၅. ပဗ္ဗဇ္ဇပဉှော

၅. အထ ခေါ အာယသ္မာ နာဂသေနော ယေန မိလိန္ဒဿ ရညော နိဝေသနံ တေနုပသင်္ကမိ၊ ဥပသင်္ကမိတွာ ပညတ္တေ အာသနေ နိသီဒိ. အထ ခေါ မိလိန္ဒော ရာဇာ အာယသ္မန္တံ နာဂသေနံ သပရိသံ ပဏီတေန ခါဒနီယေန ဘောဇနီယေန သဟတ္ထာ သန္တပ္ပေတွာ သမ္ပဝါရေတွာ ဧကမေကံ ဘိက္ခုံ ဧကမေကေန ဒုဿယုဂေန အစ္ဆာဒေတွာ အာယသ္မန္တံ နာဂသေနံ တိစီဝရေန အစ္ဆာဒေတွာ အာယသ္မန္တံ နာဂသေနံ ဧတဒဝေါစ ‘‘ဘန္တေ နာဂသေန ဒသဟိ၊ ဘိက္ခူဟိ သဒ္ဓိံ ဣဓ နိသီဒထ၊ အဝသေသာ ဂစ္ဆန္တူ’’တိ.

အထ ခေါ မိလိန္ဒော ရာဇာ အာယသ္မန္တံ နာဂသေနံ ဘုတ္တာဝိံ ဩနီတပတ္တပါဏိံ ဝိဒိတွာ အညတရံ နီစံ အာသနံ ဂဟေတွာ ဧကမန္တံ နိသီဒိ၊ ဧကမန္တံ နိသိန္နော ခေါ မိလိန္ဒော ရာဇာ အာယသ္မန္တံ နာဂသေနံ ဧတဒဝေါစ ‘‘ဘန္တေ နာဂသေန၊ ကိမှိ ဟောတိ ကထာသလ္လာပေါ’’တိ? ‘‘အတ္ထေန မယံ၊ မဟာရာဇ၊ အတ္ထိကာ၊ အတ္ထေ ဟောတု ကထာသလ္လာပေါ’’တိ.

ရာဇာ အာဟ ‘‘ကိမတ္ထိယာ၊ ဘန္တေ နာဂသေန၊ တုမှာကံ ပဗ္ဗဇ္ဇာ၊ ကော စ တုမှာကံ ပရမတ္ထော’’တိ. ထေရော အာဟ ‘‘ကိန္တိ၊ မဟာရာဇ၊ ဣဒံ ဒုက္ခံ နိရုဇ္ဈေယျ၊ အညဉ္စ ဒုက္ခံ န ဥပ္ပဇ္ဇေယျာတိ. ဧတဒတ္ထာ၊ မဟာရာဇ၊ အမှာကံ ပဗ္ဗဇ္ဇာ၊ အနုပါဒါ ပရိနိဗ္ဗာနံ ခေါ ပန အမှာကံ ပရမတ္ထော’’တိ.

‘‘ကိံ ပန၊ ဘန္တေ နာဂသေန၊ သဗ္ဗေ ဧတဒတ္ထာယ ပဗ္ဗဇန္တီ’’တိ? ‘‘န ဟိ၊ မဟာရာဇ၊ ကေစိ ဧတဒတ္ထာယ ပဗ္ဗဇန္တိ၊ ကေစိ ရာဇာဘိနီတာ [ရာဇဘီတိတာ (သီ.)] ပဗ္ဗဇန္တိ၊ ကေစိ စောရာဘိနီတာ [စောရဘီတိတာ (သီ.)] ပဗ္ဗဇန္တိ၊ ကေစိ ဣဏဋ္ဋာ ပဗ္ဗဇန္တိ၊ ကေစိ အာဇီဝိကတ္ထာယ ပဗ္ဗဇန္တိ၊ ယေ ပန သမ္မာ ပဗ္ဗဇန္တိ၊ တေ ဧတဒတ္ထာယ ပဗ္ဗဇန္တီ’’တိ.

‘‘တွံ ပန၊ ဘန္တေ၊ ဧတဒတ္ထာယ ပဗ္ဗဇိတောသီ’’တိ? ‘‘အဟံ ခေါ၊ မဟာရာဇ၊ ဒဟရကော သန္တော ပဗ္ဗဇိတော၊ န ဇာနာမိ ဣမဿ နာမတ္ထာယ ပဗ္ဗဇာမီတိ၊ အပိ စ ခေါ မေ ဧဝံ အဟောသိ ‘ပဏ္ဍိတာ ဣမေ သမဏာ သကျပုတ္တိယာ၊ တေ မံ သိက္ခာပေဿန္တီ’တိ၊ သွာဟံ တေဟိ သိက္ခာပိတော ဇာနာမိ စ ပဿာမိ စ ‘ဣမဿ နာမတ္ထာယ ပဗ္ဗဇ္ဇာ’’’တိ.

‘‘ကလ္လောသိ၊ ဘန္တေ နာဂသေနာ’’တိ.

ပဗ္ဗဇ္ဇပဉှော ပဉ္စမော.