၃၆၁. ဝဏ္ဏာရောဟဇာတကံ (၅-၂-၁)
၆၀. ဝဏ္ဏာရောဟေန ဇာတိယာ၊ ဗလနိက္ကမနေန စ၊
သုဗာဟု န မယာ သေယျော၊ သုဒါဌ ဣတိ ဘာသသိ.
၆၁. ဝဏ္ဏာရောဟေန ဇာတိယာ၊ ဗလနိက္ကမနေန စ၊
သုဒါဌော န မယာ သေယျော၊ သုဗာဟု ဣတိ ဘာသသိ.
၆၂. ဧဝံ စေ မံ ဝိဟရန္တံ၊ သုဗာဟု သမ္မ ဒုဗ္ဘသိ၊
န ဒါနာဟံ တယာ သဒ္ဓိံ၊ သံဝါသမဘိရောစယေ.
၆၃. ယော ပရေသံ ဝစနာနိ၊ သဒ္ဒဟေယျ [သဒ္ဒဟေထ (သီ. သျာ. ပီ.)] ယထာတထံ၊
ခိပ္ပံ ဘိဇ္ဇေထ မိတ္တသ္မိံ၊ ဝေရဉ္စ ပသဝေ ဗဟုံ.
၆၄. န သော မိတ္တော ယော သဒါ အပ္ပမတ္တော၊ ဘေဒါသင်္ကီ ရန္ဓမေဝါနုပဿီ၊
ယသ္မိဉ္စ သေတီ ဥရသီဝ ပုတ္တော၊ သ ဝေ မိတ္တော ယော အဘေဇ္ဇော ပရေဟီတိ.
ဝဏ္ဏာရောဟဇာတကံ ပဌမံ.