၂၉၉. ကောမာရပုတ္တဇာတကံ (၃-၅-၉)

၁၄၅. ပုရေ တုဝံ သီလဝတံ သကာသေ၊ ဩက္ကန္တိကံ [ဩက္ကန္ဒိကံ (သီ. သျာ. ပီ.)] ကီဠသိ အဿမမှိ၊

ကရောဟရေ [ကရောဟိ ရေ (က.)] မက္ကဋိယာနိ မက္ကဋ၊ န တံ မယံ သီလဝတံ ရမာမ.

၁၄၆. သုတာ ဟိ မယှံ ပရမာ ဝိသုဒ္ဓိ၊ ကောမာရပုတ္တဿ ဗဟုဿုတဿ၊

မာ ဒါနိ မံ မညိ တုဝံ ယထာ ပုရေ၊ ဈာနာနုယုတ္တော ဝိဟရာမိ [ဈာနာနုယုတ္တာ ဝိဟရာမ (သီ. ပီ.)] အာဝုသော.

၁၄၇. သစေပိ သေလသ္မိ ဝပေယျ ဗီဇံ၊ ဒေဝေါ စ ဝဿေ န ဟိ တံ ဝိရူဠှေ [နေဝ ဟိ တံ ရုဟေယျ (သီ. ပီ.)၊ န ဟိ တံ ဝိရူဟေ (?)]၊

သုတာ ဟိ တေ သာ ပရမာ ဝိသုဒ္ဓိ၊ အာရာ တုဝံ မက္ကဋ ဈာနဘူမိယာတိ.

ကောမာရပုတ္တဇာတကံ နဝမံ.