၂၉၃. ကာယနိဗ္ဗိန္ဒဇာတကံ (၃-၅-၃)

၁၂၇. ဖုဋ္ဌဿ မေ အညတရေန ဗျာဓိနာ၊ ရောဂေန ဗာဠှံ ဒုခိတဿ ရုပ္ပတော၊

ပရိသုဿတိ ခိပ္ပမိဒံ ကဠေဝရံ၊ ပုပ္ဖံ ယထာ ပံသုနိ အာတပေ ကတံ.

၁၂၈. အဇညံ ဇညသင်္ခါတံ၊ အသုစိံ သုစိသမ္မတံ၊

နာနာကုဏပပရိပူရံ၊ ဇညရူပံ အပဿတော.

၁၂၉. ဓိရတ္ထုမံ အာတုရံ ပူတိကာယံ၊ ဇေဂုစ္ဆိယံ အဿုစိံ ဗျာဓိဓမ္မံ၊

ယတ္ထပ္ပမတ္တာ အဓိမုစ္ဆိတာ ပဇာ၊ ဟာပေန္တိ မဂ္ဂံ သုဂတူပပတ္တိယာတိ.

ကာယနိဗ္ဗိန္ဒ [ကာယဝိစ္ဆန္ဒ (သီ.)၊ ကာယဝိစ္ဆိန္ဒ (ပီ.)] ဇာတကံ တတိယံ.