၃. ဥဒပါနဝဂ္ဂေါ
၂၇၁. ဥဒပါနဒူသကဇာတကံ (၃-၃-၁)
၆၁. အာရညိကဿ ဣသိနော၊ စိရရတ္တံ တပဿိနော၊
ကိစ္ဆာကတံ ဥဒပါနံ၊ ကထံ သမ္မ အဝါဟသိ [အဝါဟယိ (သီ. ပီ.)၊ အပါဟသိ (သျာ.)].
၆၂. ဧသ ဓမ္မော သိင်္ဂါလာနံ၊ ယံ ပိတွာ ဩဟဒါမသေ၊
ပိတုပိတာမဟံ ဓမ္မော၊ န တံ [န နံ (သီ. ပီ.)] ဥဇ္ဈာတုမရဟသိ.
၆၃. ယေသံ ဝေါ ဧဒိသော ဓမ္မော၊ အဓမ္မော ပန ကီဒိသော၊
မာ ဝေါ ဓမ္မံ အဓမ္မံ ဝါ၊ အဒ္ဒသာမ ကုဒါစနန္တိ.
ဥဒပါနဒူသကဇာတကံ ပဌမံ.
၂၇၂. ဗျဂ္ဃဇာတကံ (၃-၃-၂)
၆၄. ယေန မိတ္တေန သံသဂ္ဂါ၊ ယောဂက္ခေမော ဝိဟိယျတိ၊
ပုဗ္ဗေဝဇ္ဈာဘဝံ တဿ၊ ရုက္ခေ အက္ခီဝ ပဏ္ဍိတော.
၆၅. ယေန မိတ္တေန သံသဂ္ဂါ၊ ယောဂက္ခေမော ပဝဍ္ဎတိ၊
ကရေယျတ္တသမံ ဝုတ္တိံ၊ သဗ္ဗကိစ္စေသု ပဏ္ဍိတော.
၆၆. ဧထ ဗျဂ္ဃါ နိဝတ္တဝှေါ၊ ပစ္စုပေထ [ပစ္စမေထ (သီ. ပီ.)] မဟာဝနံ၊
မာ ဝနံ ဆိန္ဒိ နိဗျဂ္ဃံ၊ ဗျဂ္ဃါ မာဟေသု နိဗ္ဗနာတိ.
ဗျဂ္ဃဇာတကံ ဒုတိယံ.
၂၇၃. ကစ္ဆပဇာတကံ (၃-၃-၃)
၆၇. ကော နု ဥဒ္ဓိတဘတ္တောဝ [ဥဒ္ဒိတဘတ္တောဝ (သီ.)၊ ဝဍ္ဎိတဘတ္တောဝ (သျာ.)]၊ ပူရဟတ္ထောဝ ဗြာဟ္မဏော၊
ကဟံ နု ဘိက္ခံ အစရိ၊ ကံ သဒ္ဓံ ဥပသင်္ကမိ.
၆၈. အဟံ ကပိသ္မိ ဒုမ္မေဓော၊ အနာမာသာနိ အာမသိံ၊
တွံ မံ မောစယ ဘဒ္ဒန္တေ၊ မုတ္တော ဂစ္ဆေယျ ပဗ္ဗတံ.
၆၉. ကစ္ဆပါ ကဿပါ ဟောန္တိ၊ ကောဏ္ဍညာ ဟောန္တိ မက္ကဋာ၊
မုဉ္စ ကဿပ ကောဏ္ဍညံ၊ ကတံ မေထုနကံ တယာတိ.
ကစ္ဆပဇာတကံ တတိယံ.
၂၇၄. လောလဇာတကံ (၃-၃-၄)
၇၀. ကာယံ ဗလာကာ သိခိနီ၊ စောရီ လင်္ဃိပိတာမဟာ၊
ဩရံ ဗလာကေ အာဂစ္ဆ၊ စဏ္ဍော မေ ဝါယသော သခါ.
၇၁. နာဟံ ဗလာကာ သိခိနီ၊ အဟံ လောလောသ္မိ ဝါယသော၊
အကတွာ ဝစနံ တုယှံ၊ ပဿ လူနောသ္မိ အာဂတော.
၇၂. ပုနပါပဇ္ဇသီ သမ္မ၊ သီလဉှိ တဝ တာဒိသံ၊
န ဟိ မာနုသကာ ဘောဂါ၊ သုဘုဉ္ဇာ ဟောန္တိ ပက္ခိနာတိ.
လောလဇာတကံ စတုတ္ထံ.
၂၇၅. ရုစိရဇာတကံ (၃-၃-၅)
၇၃. ကာယံ ဗလာကာ ရုစိရာ၊ ကာကနီဠသ္မိမစ္ဆတိ၊
စဏ္ဍော ကာကော သခါ မယှံ၊ ယဿ [တဿ (သီ. ပီ.)] စေတံ ကုလာဝကံ.
၇၄. နနု မံ သမ္မ ဇာနာသိ၊ ဒိဇ သာမာကဘောဇန၊
အကတွာ ဝစနံ တုယှံ၊ ပဿ လူနောသ္မိ အာဂတော.
၇၅. ပုနပါပဇ္ဇသီ သမ္မ၊ သီလဉှိ တဝ တာဒိသံ၊
န ဟိ မာနုသကာ ဘောဂါ၊ သုဘုဉ္ဇာ ဟောန္တိ ပက္ခိနာတိ.
ရုစိရဇာတကံ ပဉ္စမံ.
၂၇၆. ကုရုဓမ္မဇာတကံ (၃-၃-၆)
၇၆. တဝ သဒ္ဓဉ္စ သီလဉ္စ၊ ဝိဒိတွာန ဇနာဓိပ၊
ဝဏ္ဏံ အဉ္ဇနဝဏ္ဏေန၊ ကာလိင်္ဂသ္မိံ နိမိမှသေ [ဝိနိမှသေ (သျာ.)၊ ဝနိမှသေ (က.)].
၇၇. အန္နဘစ္စာ စဘစ္စာ စ၊ ယောဓ ဥဒ္ဒိဿ ဂစ္ဆတိ၊
သဗ္ဗေ တေ အပ္ပဋိက္ခိပ္ပါ၊ ပုဗ္ဗာစရိယဝစော ဣဒံ.
၇၈. ဒဒါမိ ဝေါ ဗြာဟ္မဏာ နာဂမေတံ၊ ရာဇာရဟံ ရာဇဘောဂ္ဂံ ယသဿိနံ၊
အလင်္ကတံ ဟေမဇာလာဘိဆန္နံ၊ သသာရထိံ ဂစ္ဆထ ယေန ကာမန္တိ.
ကုရုဓမ္မဇာတကံ [ကုရုဓမ္မဇာတကံ (သီ. သျာ. ပီ.)] ဆဋ္ဌံ.
၂၇၇. ရောမကဇာတကံ (၃-၃-၇)
၇၉. ဝဿာနိ ပညာသ သမာဓိကာနိ၊ ဝသိမှ သေလဿ ဂုဟာယ ရောမက၊
အသင်္ကမာနာ အဘိနိဗ္ဗုတတ္တာ [အဘိနိဗ္ဗုတစိတ္တာ (သျာ. က.)]၊ ဟတ္ထတ္တ [ဟတ္ထတ္ထ (သျာ.)] မာယန္တိ မမဏ္ဍဇာ ပုရေ.
၈၀. တေ ဒါနိ ဝက္ကင်္ဂ ကိမတ္ထမုဿုကာ၊ ဘဇန္တိ အညံ ဂိရိကန္ဒရံ ဒိဇာ၊
န နူန မညန္တိ မမံ ယထာ ပုရေ၊ စိရပ္ပဝုတ္ထာ အထ ဝါ န တေ ဣမေ.
၈၁. ဇာနာမ တံ န မယံ သမ္ပမူဠှာ [န မယ’မသ္မ မူဠှာ (သီ. ပီ.)]၊ သောယေဝ တွံ တေ မယမသ္မ နာညေ၊
စိတ္တဉ္စ တေ အသ္မိံ ဇနေ ပဒုဋ္ဌံ၊ အာဇီဝိကာ [အာဇီဝက (သီ. သျာ.)၊ အာဇီဝိက (ပီ.)] တေန တမုတ္တသာမာတိ.
ရောမကဇာတကံ သတ္တမံ.
၂၇၈. မဟိံသရာဇဇာတကံ (၃-၃-၈)
၈၂. ကိမတ္ထ [ကမတ္ထ (သီ. ပီ.)] မဘိသန္ဓာယ၊ လဟုစိတ္တဿ ဒုဗ္ဘိနော [ဒူဘိနော (သီ. ပီ.)]၊
သဗ္ဗကာမဒဒဿေဝ [ဒုဟဿေဝ (သီ. သျာ. ပီ.)၊ ရဟဿေဝ (က.)]၊ ဣမံ ဒုက္ခံ တိတိက္ခသိ.
၈၃. သိင်္ဂေန နိဟနာဟေတံ၊ ပဒသာ စ အဓိဋ္ဌဟ၊
ဘိယျော [ဘီယော (သီ.)] ဗာလာ ပကုဇ္ဈေယျုံ၊ နော စဿ ပဋိသေဓကော.
၈၄. မမေဝါယံ မညမာနော၊ အညေပေဝံ [အညမ္ပေဝံ (သီ. သျာ. ပီ.)] ကရိဿတိ၊
တေ နံ တတ္ထ ဝဓိဿန္တိ၊ သာ မေ မုတ္တိ ဘဝိဿတီတိ.
မဟိံသရာဇဇာတကံ [မဟိသဇာတကံ (သီ. သျာ. ပီ.)] အဋ္ဌမံ.
၂၇၉. သတပတ္တဇာတကံ (၃-၃-၉)
၈၅. ယထာ မာဏဝကော ပန္ထေ၊ သိင်္ဂါလိံ ဝနဂေါစရိံ၊
အတ္ထကာမံ ပဝေဒေန္တိံ [ပဝဒန္တိံ (ပီ.)]၊ အနတ္ထကာမာတိ မညတိ၊
အနတ္ထကာမံ သတပတ္တံ၊ အတ္ထကာမောတိ မညတိ.
၈၆. ဧဝမေဝ ဣဓေကစ္စော၊ ပုဂ္ဂလော ဟောတိ တာဒိသော၊
ဟိတေဟိ ဝစနံ ဝုတ္တော၊ ပဋိဂဏှာတိ ဝါမတော.
၈၇. ယေ စ ခေါ နံ ပသံသန္တိ၊ ဘယာ ဥက္ကံသယန္တိ ဝါ [စ (သီ. ပီ.)]၊
တဉှိ သော မညတေ မိတ္တံ၊ သတပတ္တံဝ မာဏဝေါတိ.
သတပတ္တဇာတကံ နဝမံ.
၂၈၀. ပုဋဒူသကဇာတကံ (၃-၃-၁၀)
၈၈. အဒ္ဓါ ဟိ နူန မိဂရာဇာ၊ ပုဋကမ္မဿ ကောဝိဒေါ၊
တထာ ဟိ ပုဋံ ဒူသေတိ၊ အညံ နူန ကရိဿတိ.
၈၉. န မေ မာတာ ဝါ ပိတာ ဝါ၊ ပုဋကမ္မဿ ကောဝိဒေါ၊
ကတံ ကတံ ခေါ ဒူသေမ၊ ဧဝံ ဓမ္မမိဒံ ကုလံ.
၉၀. ယေသံ ဝေါ ဧဒိသော ဓမ္မော၊ အဓမ္မော ပန ကီဒိသော၊
မာ ဝေါ ဓမ္မံ အဓမ္မံ ဝါ၊ အဒ္ဒသာမ ကုဒါစနန္တိ.
ပုဋဒူသကဇာတကံ ဒသမံ.
ဥဒပါနဝဂ္ဂေါ [အရညဝဂ္ဂေါ (သီ. ပီ. က.)] တတိယော.
တဿုဒ္ဒါနံ –
ဥဒပါနဝရံ ဝနဗျဂ္ဃ ကပိ၊ သိခိနီ စ ဗလာက ရုစိရဝရော၊
သုဇနာဓိပရောမကဒူသ ပုန၊ သတပတ္တဝရော ပုဋကမ္မ ဒသာတိ.