၂၅၉. တိရီဋဝစ္ဆဇာတကံ (၃-၁-၉)

၂၅. နယိမဿ ဝိဇ္ဇာမယမတ္ထိ ကိဉ္စိ၊ န ဗန္ဓဝေါ နော ပန တေ သဟာယော၊

အထ ကေန ဝဏ္ဏေန တိရီဋဝစ္ဆော [တိရီဋိဝစ္ဆော (သျာ. က.)]၊ တေဒဏ္ဍိကော ဘုဉ္ဇတိ အဂ္ဂပိဏ္ဍံ.

၂၆. အာပါသု [အာဝါသု (က.)] မေ ယုဒ္ဓပရာဇိတဿ၊ ဧကဿ ကတွာ ဝိဝနသ္မိ ဃောရေ၊

ပသာရယီ ကိစ္ဆဂတဿ ပါဏိံ၊ တေနူဒတာရိံ ဒုခသံပရေတော.

၂၇. ဧတဿ ကိစ္စေန ဣဓာနုပတ္တော၊ ဝေသာယိနော ဝိသယာ ဇီဝလောကေ၊

လာဘာရဟော တာတ တိရီဋဝစ္ဆော၊ ဒေထဿ ဘောဂံ ယဇထဉ္စ [ယဇတဉ္စ (သီ. ပီ.)၊ ယဇိတဉ္စ (သျာ.)] ယညန္တိ.

တိရီဋဝစ္ဆဇာတကံ နဝမံ.