၅၄၇. ဝေဿန္တရဇာတကံ (၁၀)

ဒသဝရကထာ

၁၆၅၅. ‘‘ဖုဿတီ [ဖုသတိ (သီ. ပီ.)] ဝရဝဏ္ဏာဘေ၊ ဝရဿု ဒသဓာ ဝရေ၊

ပထဗျာ စာရုပုဗ္ဗင်္ဂိ၊ ယံ တုယှံ မနသော ပိယံ’’.

၁၆၅၆. ‘‘ဒေဝရာဇ နမော တျတ္ထု၊ ကိံ ပါပံ ပကတံ မယာ၊

ရမ္မာ စာဝေသိ မံ ဌာနာ၊ ဝါတောဝ ဓရဏီရုဟံ’’.

၁၆၅၇. ‘‘န စေဝ တေ ကတံ ပါပံ၊ န စ မေ တွမသိ အပ္ပိယာ၊

ပုညဉ္စ တေ ပရိက္ခီဏံ၊ ယေန တေဝံ ဝဒါမဟံ.

၁၆၅၈. ‘‘သန္တိကေ မရဏံ တုယှံ၊ ဝိနာဘာဝေါ ဘဝိဿတိ၊

ပဋိဂဏှာဟိ မေ ဧတေ၊ ဝရေ ဒသ ပဝေစ္ဆတော’’.

၁၆၅၉. ‘‘ဝရံ စေ မေ အဒေါ သက္က၊ သဗ္ဗဘူတာနမိဿရ၊

သိဝိရာဇဿ ဘဒ္ဒန္တေ၊ တတ္ထ အဿံ နိဝေသနေ.

၁၆၆၀. ‘‘နီလနေတ္တာ နီလဘမု၊ နိလက္ခီ စ ယထာ မိဂီ၊

ဖုဿတီ နာမ နာမေန၊ တတ္ထပဿံ ပုရိန္ဒဒ.

၁၆၆၁. ‘‘ပုတ္တံ လဘေထ ဝရဒံ၊ ယာစယောဂံ [ယာစယောဂိံ (က.)] အမစ္ဆရိံ၊

ပူဇိတံ ပဋိရာဇူဟိ၊ ကိတ္တိမန္တံ ယသဿိနံ.

၁၆၆၂. ‘‘ဂဗ္ဘံ မေ ဓာရယန္တိယာ၊ မဇ္ဈိမင်္ဂံ အနုန္နတံ၊

ကုစ္ဆိ အနုန္နတော အဿ၊ စာပံဝ လိခိတံ သမံ.

၁၆၆၃. ‘‘ထနာ မေ နပ္ပပတေယျုံ၊ ပလိတာ န သန္တု ဝါသဝ၊

ကာယေ ရဇော န လိမ္ပေထ၊ ဝဇ္ဈဉ္စာပိ ပမောစယေ.

၁၆၆၄. ‘‘မယူရကောဉ္စာဘိရုဒေ၊ နာရိဝရဂဏာယုတေ၊

ခုဇ္ဇစေလာပကာကိဏ္ဏေ၊ သူဒမာဂဓဝဏ္ဏိတေ.

၁၆၆၅. ‘‘စိတြဂ္ဂဠေရုဃုသိတေ၊ သုရာမံသပဗောဓနေ၊

သိဝိရာဇဿ ဘဒ္ဒန္တေ၊ တတ္ထဿံ မဟေသီ ပိယာ’’.

၁၆၆၆. ‘‘ယေ တေ ဒသ ဝရာ ဒိန္နာ၊ မယာ သဗ္ဗင်္ဂသောဘနေ၊

သိဝိရာဇဿ ဝိဇိတေ၊ သဗ္ဗေ တေ လစ္ဆသီ ဝရေ.

၁၆၆၇. ‘‘ဣဒံ ဝတွာန မဃဝါ၊ ဒေဝရာဇာ သုဇမ္ပတိ၊

ဖုဿတိယာ ဝရံ ဒတွာ၊ အနုမောဒိတ္ထ ဝါသဝေါ.

ဒသဝရကထာ နာမ.

ဟေမဝန္တံ

၁၆၆၈. ‘‘ပရူဠှကစ္ဆနခလောမာ၊ ပင်္ကဒန္တာ ရဇဿိရာ၊

ပဂ္ဂယှ ဒက္ခိဏံ ဗာဟုံ၊ ကိံ မံ ယာစန္တိ ဗြာဟ္မဏာ’’.

၁၆၆၉. ‘‘ရတနံ ဒေဝ ယာစာမ၊ သိဝီနံ ရဋ္ဌဝဍ္ဎနံ၊

ဒဒါဟိ ပဝရံ နာဂံ၊ ဤသာဒန္တံ ဥရူဠှဝံ’’.

၁၆၇၀. ‘‘ဒဒါမိ န ဝိကမ္ပာမိ၊ ယံ မံ ယာစန္တိ ဗြာဟ္မဏာ၊

ပဘိန္နံ ကုဉ္ဇရံ ဒန္တိံ၊ ဩပဝယှံ ဂဇုတ္တမံ’’.

၁၆၇၁. ‘‘ဟတ္ထိက္ခန္ဓတော ဩရုယှ၊ ရာဇာ စာဂါဓိမာနသော၊

ဗြာဟ္မဏာနံ အဒါ ဒါနံ၊ သိဝီနံ ရဋ္ဌဝဍ္ဎနော’’.

၁၆၇၂. ‘‘တဒါသိ ယံ ဘိံသနကံ၊ တဒါသိ လောမဟံသနံ၊

ဟတ္ထိနာဂေ ပဒိန္နမှိ၊ မေဒနီ သမ္ပကမ္ပထ.

၁၆၇၃. ‘‘တဒါသိ ယံ ဘိံသနကံ၊ တဒါသိ လောမဟံသနံ၊

ဟတ္ထိနာဂေ ပဒိန္နမှိ၊ ခုဗ္ဘိတ္ထ နဂရံ တဒါ.

၁၆၇၄. ‘‘သမာကုလံ ပုရံ အာသိ၊ ဃောသော စ ဝိပုလော မဟာ၊

ဟတ္ထိနာဂေ ပဒိန္နမှိ၊ သိဝီနံ ရဋ္ဌဝဍ္ဎနေ’’.

၁၆၇၅. ‘‘ဥဂ္ဂါ စ ရာဇပုတ္တာ စ၊ ဝေသိယာနာ စ ဗြာဟ္မဏာ၊

ဟတ္ထာရောဟာ အနီကဋ္ဌာ၊ ရထိကာ ပတ္တိကာရကာ.

၁၆၇၆. ‘‘ကေဝလော စာပိ နိဂမော၊ သိဝယော စ သမာဂတာ၊

ဒိသွာ နာဂံ နီယမာနံ၊ တေ ရညော ပဋိဝေဒယုံ.

၁၆၇၇. ‘‘ဝိဓမံ ဒေဝ တေ ရဋ္ဌံ၊ ပုတ္တော ဝေဿန္တရော တဝ၊

ကထံ နော ဟတ္ထိနံ ဒဇ္ဇာ၊ နာဂံ ရဋ္ဌဿ ပူဇိတံ.

၁၆၇၈. ‘‘ကထံ နော ကုဉ္ဇရံ ဒဇ္ဇာ၊ ဤသာဒန္တံ ဥရူဠှဝံ၊

ခေတ္တညုံ သဗ္ဗယုဒ္ဓါနံ၊ သဗ္ဗသေတံ ဂဇုတ္တမံ.

၁၆၇၉. ‘‘ပဏ္ဍုကမ္ဗလသဉ္ဆန္နံ၊ ပဘိန္နံ သတ္တုမဒ္ဒနံ၊

ဒန္တိံ သဝါဠဗီဇနိံ၊ သေတံ ကေလာသသာဒိသံ.

၁၆၈၀. ‘‘သသေတစ္ဆတ္တံ သဥပါဓေယျံ၊ သာထဗ္ဗနံ သဟတ္ထိပံ၊

အဂ္ဂယာနံ ရာဇဝါဟိံ၊ ဗြာဟ္မဏာနံ အဒါ ဂဇံ [ဓနံ (သီ. ပီ.)၊ ဒါနံ (သျာ.)].

၁၆၈၁. ‘‘အန္နံ ပါနဉ္စ ယော [သော (သီ. သျာ. က.)] ဒဇ္ဇာ၊ ဝတ္ထသေနာသနာနိ စ၊

ဧတံ ခေါ ဒါနံ ပတိရူပံ၊ ဧတံ ခေါ ဗြာဟ္မဏာရဟံ.

၁၆၈၂. ‘‘အယံ တေ ဝံသရာဇာ နော၊ သိဝီနံ ရဋ္ဌဝဍ္ဎနော [ရဋ္ဌဝဍ္ဎနံ (သီ.)၊ ရဋ္ဌဝဍ္ဎန (ပီ.)]၊

ကထံ ဝေဿန္တရော ပုတ္တော၊ ဂဇံ ဘာဇေတိ သဉ္ဇယ.

၁၆၈၃. ‘‘သစေ တွံ န ကရိဿသိ၊ သိဝီနံ ဝစနံ ဣဒံ၊

မညေ တံ သဟ ပုတ္တေန၊ သိဝီ ဟတ္ထေ ကရိဿရေ’’.

၁၆၈၄. ‘‘ကာမံ ဇနပဒေါ မာသိ၊ ရဋ္ဌဉ္စာပိ ဝိနဿတု၊

နာဟံ သိဝီနံ ဝစနာ၊ ရာဇပုတ္တံ အဒူသကံ၊

ပဗ္ဗာဇေယျံ သကာ ရဋ္ဌာ၊ ပုတ္တော ဟိ မမ ဩရသော.

၁၆၈၅. ‘‘ကာမံ ဇနပဒေါ မာသိ၊ ရဋ္ဌဉ္စာပိ ဝိနဿတု၊

နာဟံ သိဝီနံ ဝစနာ၊ ရာဇပုတ္တံ အဒူသကံ၊

ပဗ္ဗာဇေယျံ သကာ ရဋ္ဌာ၊ ပုတ္တော ဟိ မမ အတြဇော.

၁၆၈၆. ‘‘န စာဟံ တသ္မိံ ဒုဗ္ဘေယျံ၊ အရိယသီလဝတော ဟိ သော၊

အသိလောကောပိ မေ အဿ၊ ပါပဉ္စ ပသဝေ ဗဟုံ၊

ကထံ ဝေဿန္တရံ ပုတ္တံ၊ သတ္ထေန ဃာတယာမသေ’’.

၁၆၈၇. ‘‘မာ နံ ဒဏ္ဍေန သတ္ထေန၊ န ဟိ သော ဗန္ဓနာရဟော၊

ပဗ္ဗာဇေဟိ စ နံ ရဋ္ဌာ၊ ဝင်္ကေ ဝသတု ပဗ္ဗတေ’’.

၁၆၈၈. ‘‘ဧသော စေ သိဝီနံ ဆန္ဒော၊ ဆန္ဒံ န ပနုဒါမသေ၊

ဣမံ သော ဝသတု ရတ္တိံ၊ ကာမေ စ ပရိဘုဉ္ဇတု.

၁၆၈၉. ‘‘တတော ရတျာ ဝိဝသာနေ၊ သူရိယဿုဂ္ဂမနံ ပတိ [သူရိယုဂ္ဂမနေ သတိ (က.)]၊

သမဂ္ဂါ သိဝယော ဟုတွာ၊ ရဋ္ဌာ ပဗ္ဗာဇယန္တု နံ’’.

၁၆၉၀. ‘‘ဥဋ္ဌေဟိ ကတ္တေ တရမာနော၊ ဂန္တွာ ဝေဿန္တရံ ဝဒ၊

သိဝယော ဒေဝ တေ ကုဒ္ဓါ၊ နေဂမာ စ သမာဂတာ.

၁၆၉၁. ‘‘ဥဂ္ဂါ စ ရာဇပုတ္တာ စ၊ ဝေသိယာနာ စ ဗြာဟ္မဏာ၊

ဟတ္ထာရောဟာ အနီကဋ္ဌာ၊ ရထိကာ ပတ္တိကာရကာ၊

ကေဝလော စာပိ နိဂမော၊ သိဝယော စ သမာဂတာ.

၁၆၉၂. ‘‘အသ္မာ ရတျာ ဝိဝသာနေ၊ သူရိယဿုဂ္ဂမနံ ပတိ၊

သမဂ္ဂါ သိဝယော ဟုတွာ၊ ရဋ္ဌာ ပဗ္ဗာဇယန္တိ တံ.

၁၆၉၃. ‘‘သ ကတ္တာ တရမာနောဝ၊ သိဝိရာဇေန ပေသိတော၊

အာမုတ္တဟတ္ထာဘရဏာ၊ သုဝတ္ထော စန္ဒနဘူသိတော.

၁၆၉၄. ‘‘သီသံ နှာတော ဥဒကေ သော၊ အာမုတ္တမဏိကုဏ္ဍလော၊

ဥပါဂမိ ပုရံ ရမ္မံ၊ ဝေဿန္တရနိဝေသနံ.

၁၆၉၅. ‘‘တတ္ထဒ္ဒသ ကုမာရံ သော၊ ရမမာနံ သကေ ပုရေ၊

ပရိကိဏ္ဏံ အမစ္စေဟိ၊ တိဒသာနံဝ ဝါသဝံ.

၁၆၉၆. ‘‘သော တတ္ထ ဂန္တွာ တရမာနော၊ ကတ္တာ ဝေဿန္တရံဗြဝိ၊

ဒုက္ခံ တေ ဝေဒယိဿာမိ၊ မာ မေ ကုဇ္ဈိ ရထေသဘ.

၁၆၉၇. ‘‘ဝန္ဒိတွာ ရောဒမာနော သော၊ ကတ္တာ ရာဇာနမဗြဝိ၊

ဘတ္တာ မေသိ မဟာရာဇ၊ သဗ္ဗကာမရသာဟရော.

၁၆၉၈. ‘‘ဒုက္ခံ တေ ဝေဒယိဿာမိ၊ တတ္ထ အဿာသယန္တု မံ၊

သိဝယော ဒေဝ တေ ကုဒ္ဓါ၊ နေဂမာ စ သမာဂတာ.

၁၆၉၉. ‘‘ဥဂ္ဂါ စ ရာဇပုတ္တာ စ၊ ဝေသိယာနာ စ ဗြာဟ္မဏာ၊

ဟတ္ထာရောဟာ အနီကဋ္ဌာ၊ ရထိကာ ပတ္တိကာရကာ၊

ကေဝလော စာပိ နိဂမော၊ သိဝယော စ သမာဂတာ.

၁၇၀၀. ‘‘အသ္မာ ရတျာ ဝိဝသာနေ၊ သူရိယဿုဂ္ဂမနံ ပတိ၊

သမဂ္ဂါ သိဝယော ဟုတွာ၊ ရဋ္ဌာ ပဗ္ဗာဇယန္တိ တံ’’.

၁၇၀၁. ‘‘ကိသ္မိံ မေ သိဝယော ကုဒ္ဓါ၊ နာဟံ ပဿာမိ ဒုက္ကဋံ၊

တံ မေ ကတ္တေ ဝိယာစိက္ခ၊ ကသ္မာ ပဗ္ဗာဇယန္တိ မံ’’.

၁၇၀၂. ‘‘ဥဂ္ဂါ စ ရာဇပုတ္တာ စ၊ ဝေသိယာနာ စ ဗြာဟ္မဏာ၊

ဟတ္ထာရောဟာ အနီကဋ္ဌာ၊ ရထိကာ ပတ္တိကာရကာ၊

နာဂဒါနေန ခိယျန္တိ၊ တသ္မာ ပဗ္ဗာဇယန္တိ တံ’’.

၁၇၀၃. ‘‘ဟဒယံ စက္ခုမ္ပဟံ ဒဇ္ဇံ၊ ကိံ မေ ဗာဟိရကံ ဓနံ၊

ဟိရညံ ဝါ သုဝဏ္ဏံ ဝါ၊ မုတ္တာ ဝေဠုရိယာ မဏိ.

၁၇၀၄. ‘‘ဒက္ခိဏံ ဝါပဟံ ဗာဟုံ၊ ဒိသွာ ယာစကမာဂတေ၊

ဒဒေယျံ န ဝိကမ္ပေယျံ၊ ဒါနေ မေ ရမတေ မနော.

၁၇၀၅. ‘‘ကာမံ မံ သိဝယော သဗ္ဗေ၊ ပဗ္ဗာဇေန္တု ဟနန္တု ဝါ၊

နေဝ ဒါနာ ဝိရမိဿံ၊ ကာမံ ဆိန္ဒန္တု သတ္တဓာ’’.

၁၇၀၆. ‘‘ဧဝံ တံ သိဝယော အာဟု၊ နေဂမာ စ သမာဂတာ၊

ကောန္တိမာရာယ တီရေန၊ ဂိရိမာရဉ္ဇရံ ပတိ၊

ယေန ပဗ္ဗာဇိတာ ယန္တိ၊ တေန ဂစ္ဆတု သုဗ္ဗတော’’.

၁၇၀၇. ‘‘သောဟံ တေန ဂမိဿာမိ၊ ယေန ဂစ္ဆန္တိ ဒူသကာ၊

ရတ္တိန္ဒိဝံ မေ ခမထ၊ ယာဝ ဒါနံ ဒဒါမဟံ’’.

၁၇၀၈. ‘‘အာမန္တယိတ္ထ ရာဇာနံ၊ မဒ္ဒိံ သဗ္ဗင်္ဂသောဘနံ၊

ယံ တေ ကိဉ္စိ မယာ ဒိန္နံ၊ ဓနံ ဓညဉ္စ ဝိဇ္ဇတိ.

၁၇၀၉. ‘‘ဟိရညံ ဝါ သုဝဏ္ဏံ ဝါ၊ မုတ္တာ ဝေဠုရိယာ ဗဟူ၊

သဗ္ဗံ တံ နိဒဟေယျာသိ၊ ယဉ္စ တေ ပေတ္တိကံ ဓနံ.

၁၇၁၀. ‘‘တမဗြဝိ ရာဇပုတ္တီ၊ မဒ္ဒီ သဗ္ဗင်္ဂသောဘနာ၊

ကုဟိံ ဒေဝ နိဒဟာမိ၊ တံ မေ အက္ခာဟိ ပုစ္ဆိတော’’.

၁၇၁၁. ‘‘သီလဝန္တေသု ဒဇ္ဇာသိ၊ ဒါနံ မဒ္ဒိ ယထာရဟံ၊

န ဟိ ဒါနာ ပရံ အတ္ထိ၊ ပတိဋ္ဌာ သဗ္ဗပါဏိနံ.

၁၇၁၂. ‘‘ပုတ္တေသု မဒ္ဒိ ဒယေသိ၊ သဿုယာ သသုရမှိ စ၊

ယော စ တံ ဘတ္တာ မညေယျ၊ သက္ကစ္စံ တံ ဥပဋ္ဌဟေ.

၁၇၁၃. ‘‘နော စေ တံ ဘတ္တာ မညေယျ၊ မယာ ဝိပ္ပဝသေန တေ၊

အညံ ဘတ္တာရံ ပရိယေသ၊ မာ ကိသိတ္ထော [မာ ကိလိတ္ထ (သီ. ပီ.)] မယာ ဝိနာ’’.

၁၇၁၄. ‘‘အဟဉှိ ဝနံ ဂစ္ဆာမိ၊ ဃောရံ ဝါဠမိဂါယုတံ၊

သံသယော ဇီဝိတံ မယှံ၊ ဧကကဿ ဗြဟာဝနေ’’.

၁၇၁၅. ‘‘တမဗြဝိ ရာဇပုတ္တီ၊ မဒ္ဒီ သဗ္ဗင်္ဂသောဘနာ၊

‘‘အဘုမ္မေ ကထံ နု ဘဏသိ၊ ပါပကံ ဝတ ဘာသသိ.

၁၇၁၆. ‘‘နေသ ဓမ္မော မဟာရာဇ၊ ယံ တွံ ဂစ္ဆေယျ ဧကကော၊

အဟမ္ပိ တေန ဂစ္ဆာမိ၊ ယေန ဂစ္ဆသိ ခတ္တိယ.

၁၇၁၇. ‘‘မရဏံ ဝါ တယာ သဒ္ဓိံ၊ ဇီဝိတံ ဝါ တယာ ဝိနာ၊

တဒေဝ မရဏံ သေယျော၊ ယံ စေ ဇီဝေ တယာ ဝိနာ.

၁၇၁၈. ‘‘အဂ္ဂိံ ဥဇ္ဇာလယိတွာန [နိဇ္ဇာလယိတွာန (သီ. ပီ.)]၊ ဧကဇာလသမာဟိတံ၊

တတ္ထ မေ [တတ္ထေဝ (သျာ. က.)] မရဏံ သေယျော၊ ယံ စေ ဇီဝေ တယာ ဝိနာ.

၁၇၁၉. ‘‘ယထာ အာရညကံ နာဂံ၊ ဒန္တိံ အနွေတိ ဟတ္ထိနီ၊

ဇေဿန္တံ ဂိရိဒုဂ္ဂေသု၊ သမေသု ဝိသမေသု စ.

၁၇၂၀. ‘‘ဧဝံ တံ အနုဂစ္ဆာမိ၊ ပုတ္တေ အာဒါယ ပစ္ဆတော၊

သုဘရာ တေ ဘဝိဿာမိ၊ န တေ ဟေဿာမိ ဒုဗ္ဘရာ.

၁၇၂၁. ‘‘ဣမေ ကုမာရေ ပဿန္တော၊ မဉ္ဇုကေ ပိယဘာဏိနေ၊

အာသီနေ [အာသနေ (က.)] ဝနဂုမ္ဗသ္မိံ၊ န ရဇ္ဇဿ သရိဿသိ.

၁၇၂၂. ‘‘ဣမေ ကုမာရေ ပဿန္တော၊ မဉ္ဇုကေ ပိယဘာဏိနေ၊

ကီဠန္တေ ဝနဂုမ္ဗသ္မိံ၊ န ရဇ္ဇဿ သရိဿသိ.

၁၇၂၃. ‘‘ဣမေ ကုမာရေ ပဿန္တော၊ မဉ္ဇုကေ ပိယဘာဏိနေ၊

အဿမေ ရမဏီယမှိ၊ န ရဇ္ဇဿ သရိဿသိ.

၁၇၂၄. ‘‘ဣမေ ကုမာရေ ပဿန္တော၊ မဉ္ဇုကေ ပိယဘာဏိနေ၊