၅၃၇. မဟာသုတသောမဇာတကံ (၅)

၃၇၁. ‘‘ကသ္မာ တုဝံ ရသက ဧဒိသာနိ၊ ကရောသိ ကမ္မာနိ သုဒါရုဏာနိ၊

ဟနာသိ ဣတ္ထီ ပုရိသေ စ မူဠှော၊ မံသဿ ဟေတု အဒု [အာဒု (သီ. သျာ.)] ဓနဿ ကာရဏာ’’.

၃၇၂. ‘‘နံ အတ္တဟေတူ န ဓနဿ ကာရဏာ၊ န ပုတ္တဒါရဿ သဟာယဉာတိနံ၊

ဘတ္တာ စ မေ ဘဂဝါ ဘူမိပါလော၊ သော ခါဒတိ မံသံ ဘဒန္တေဒိသံ’’.

၃၇၃. ‘‘သစေ တုဝံ ဘတ္တုရတ္ထေ ပယုတ္တော၊ ကရောသိ ကမ္မာနိ သုဒါရုဏာနိ၊

ပါတောဝ အန္တေပုရံ ပါပုဏိတွာ၊ လပေယျာသိ မေ ရာဇိနော သမ္မုခေ တံ’’.

၃၇၄. ‘‘တထာ ကရိဿာမိ အဟံ ဘဒန္တေ၊ ယထာ တုဝံ [ယမေဝ တွံ (သီ.)] ဘာသသိ ကာဠဟတ္ထိ၊

ပါတောဝ အန္တေပုရံ ပါပုဏိတွာ၊ ဝက္ခာမိ တေ ရာဇိနော သမ္မုခေ တံ’’.

၃၇၅. တတော ရတျာ ဝိဝသာနေ [ဝိဝသနေ (သီ. သျာ. ပီ.)]၊ သူရိယုဂ္ဂမနံ ပတိ၊

ကာဠော ရသကမာဒါယ၊ ရာဇာနံ ဥပသင်္ကမိ၊

ဥပသင်္ကမ္မ [ဥပသင်္ကမိတွာ (သီ. သျာ. ပီ.)] ရာဇာနံ၊ ဣဒံ ဝစနမဗြဝိ.

၃၇၆. ‘‘သစ္စံ ကိရ မဟာရာဇ၊ ရသကော ပေသိတော တယာ၊

ဟနတိ ဣတ္ထိပုရိသေ၊ တုဝံ မံသာနိ ခါဒသိ’’.

၃၇၇. ‘‘ဧဝမေဝ တထာ ကာဠ၊ ရသကော ပေသိတော မယာ၊

မမ အတ္ထံ ကရောန္တဿ၊ ကိမေတံ ပရိဘာသသိ’’.

၃၇၈. ‘‘အာနန္ဒော သဗ္ဗမစ္ဆာနံ၊ ခါဒိတွာ ရသဂိဒ္ဓိမာ၊

ပရိက္ခီဏာယ ပရိသာယ၊ အတ္တာနံ ခါဒိယာ မတော.

၃၇၉. ‘‘ဧဝံ ပမတ္တော ရသဂါရဝေ ရတ္တော [ရတော (သီ. သျာ. ပီ.)]၊ ဗာလော ယဒီ အာယတိ နာဝဗုဇ္ဈတိ၊

ဝိဓမ္မ ပုတ္တေ စဇိ [စဇိတွာ (က.)] ဉာတကေ စ၊ ပရိဝတ္တိယ အတ္တာနညေဝ [အတ္တာနမေဝ (သီ. ပီ.)] ခါဒတိ.

၃၈၀. ‘‘ဣဒံ တေ သုတွာန ဝိဂေတု [ဝိဟေတု (သီ. ပီ.)] ဆန္ဒော၊ မာ ဘက္ခယီ [မာ ဘက္ခသီ (သီ. ပီ.)] ရာဇ မနုဿမံသံ၊

မာ တွံ ဣမံ ကေဝလံ ဝါရိဇောဝ၊ ဒွိပဒါဓိပ [ဒိပဒါဒိပ (သီ. ပီ.) ဧဝမုပရိပိ] သုညမကာသိ ရဋ္ဌံ’’.

၃၈၁. ‘‘သုဇာတော နာမ နာမေန၊ ဩရသော တဿ အတြဇော [တဿ ဩရသ အတြဇော (သီ.)၊ တဿ အတြဇ ဩရသော (ပီ.)]၊

ဇမ္ဗုပေသိမလဒ္ဓါန၊ မတော သော တဿ သင်္ခယေ.

၃၈၂. ‘‘ဧဝမေဝ အဟံ ကာဠ၊ ဘုတွာ ဘက္ခံ ရသုတ္တမံ၊

အလဒ္ဓါ မာနုသံ မံသံ၊ မညေ ဟိဿာမိ [ဟေဿာမိ (သီ. သျာ.)၊ ဟဿာမိ (ပီ.)] ဇီဝိတံ’’.

၃၈၃. ‘‘မာဏဝ အဘိရူပေါသိ၊ ကုလေ ဇာတောသိ သောတ္ထိယေ၊

န တွံ အရဟသိ တာတ၊ အဘက္ခံ ဘက္ခယေတဝေ’’.

၃၈၄. ‘‘ရသာနံ အညတရံ ဧတံ၊ ကသ္မာ [ယသ္မာ (သီ. ပီ.)] မံ တွံ နိဝါရယေ၊

သောဟံ တတ္ထ ဂမိဿာမိ၊ ယတ္ထ လစ္ဆာမိ ဧဒိသံ.

၃၈၅. ‘‘သောဝါဟံ နိပ္ပတိဿာမိ၊ န တေ ဝစ္ဆာမိ သန္တိကေ၊

ယဿ မေ ဒဿနေန တွံ၊ နာဘိနန္ဒသိ ဗြာဟ္မဏ’’.

၃၈၆. ‘‘အဒ္ဓါ အညေပိ ဒါယာဒေ၊ ပုတ္တေ လစ္ဆာမ မာဏဝ၊

တွဉ္စ ဇမ္မ ဝိနဿဿု၊ ယတ္ထ ပတ္တံ န တံ သုဏေ’’.

၃၈၇. ‘‘ဧဝမေဝ တုဝံ ရာဇ၊ ဒွိပဒိန္ဒ သုဏောဟိ မေ၊

ပဗ္ဗာဇေဿန္တိ တံ ရဋ္ဌာ၊ သောဏ္ဍံ မာဏဝကံ ယထာ’’.

၃၈၈. ‘‘သုဇာတော နာမ နာမေန၊ ဘာဝိတတ္တာန သာဝကော၊

အစ္ဆရံ ကာမယန္တောဝ၊ န သော ဘုဉ္ဇိ န သော ပိဝိ.

၃၈၉. ‘‘ကုသဂ္ဂေနုဒကမာဒါယ [ကုသဂ္ဂေ ဥဒကမာဒါယ (သီ. ပီ.)]၊ သမုဒ္ဒေ ဥဒကံ မိနေ၊

ဧဝံ မာနုသကာ ကာမာ၊ ဒိဗ္ဗကာမာန သန္တိကေ.

၃၉၀. ‘‘ဧဝမေဝ အဟံ ကာဠ၊ ဘုတွာ ဘက္ခံ ရသုတ္တမံ၊

အလဒ္ဓါ မာနုသံ မံသံ၊ မညေ ဟိဿာမိ ဇီဝိတံ’’.

၃၉၁. ‘‘ယထာပိ တေ ဓတရဋ္ဌာ၊ ဟံသာ ဝေဟာယသင်္ဂမာ၊

အဘုတ္တပရိဘောဂေန [အဝုတ္တိပရိဘောဂေန (သီ. ပီ.)၊ အယုတ္တပရိဘောဂေန (သျာ.)]၊ သဗ္ဗေ အဗ္ဘတ္ထတံ ဂတာ.

၃၉၂. ‘‘ဧဝမေဝ တုဝံ ရာဇ၊ ဒွိပဒိန္ဒ သုဏောဟိ မေ၊

အဘက္ခံ ရာဇ ဘက္ခေသိ၊ တသ္မာ ပဗ္ဗာဇယန္တိ တံ’’.

၃၉၃. ‘‘တိဋ္ဌာဟီတိ မယာ ဝုတ္တော၊ သော တွံ ဂစ္ဆသိ ပမ္မုခေါ [ပါမုခေါ (က.)]၊

အဋ္ဌိတော တွံ ဌိတောမှီတိ၊ လပသိ ဗြဟ္မစာရိနိ၊

ဣဒံ တေ သမဏာယုတ္တံ၊ အသိဉ္စ မေ မညသိ ကင်္ကပတ္တံ’’ [ကင်္ခပတ္တံ (သျာ. က.)].

၃၉၄. ‘‘ဌိတောဟမသ္မီ သဓမ္မေသု ရာဇ၊ န နာမဂေါတ္တံ ပရိဝတ္တယာမိ၊

စောရဉ္စ လောကေ အဌိတံ ဝဒန္တိ၊ အာပါယိကံ နေရယိကံ ဣတော စုတံ.

၃၉၅. ‘‘သစေ တွံ သဒ္ဒဟသိ [သစေပိ သဟသိ (သီ. ပီ.)] ရာဇ၊ သုတံ ဂဏှာဟိ ခတ္တိယ [ခတ္တိယံ (သျာ.)]၊

တေန ယညံ ယဇိတွာန၊ ဧဝံ သဂ္ဂံ ဂမိဿသိ’’.

၃၉၆. ‘‘ကိသ္မိံ နု ရဋ္ဌေ တဝ ဇာတိဘူမိ [ဇာတဘူမိ (သီ.)]၊ အထ ကေန အတ္ထေန ဣဓာနုပတ္တော၊

အက္ခာဟိ မေ ဗြာဟ္မဏ ဧတမတ္ထံ၊ ကိမိစ္ဆသီ ဒေမိ တယဇ္ဇ ပတ္ထိတံ’’.

၃၉၇. ‘‘ဂါထာ စတဿော ဓရဏီမဟိဿရ၊ သုဂမ္ဘိရတ္ထာ ဝရသာဂရူပမာ၊

တဝေဝ အတ္ထာယ ဣဓာဂတောသ္မိ၊ သုဏောဟိ ဂါထာ ပရမတ္ထသံဟိတာ’’.

၃၉၈. ‘‘န ဝေ ရုဒန္တိ မတိမန္တော သပညာ၊ ဗဟုဿုတာ ယေ ဗဟုဋ္ဌာနစိန္တိနော၊

ဒီပဉှိ ဧတံ ပရမံ နရာနံ၊ ယံ ပဏ္ဍိတာ သောကနုဒါ ဘဝန္တိ.

၃၉၉. ‘‘အတ္တာနံ ဉာတီ ဥဒါဟု [ဥဒ (သီ. ပီ.)] ပုတ္တဒါရံ၊ ဓညံ ဓနံ ရဇတံ ဇာတရူပံ၊

ကိမေဝ တွံ [ကိမော နု တွံ (သီ. ပီ.)] သုတသောမာနုတပ္ပေ၊ ကောရဗျသေဋ္ဌ ဝစနံ သုဏောမ တေတံ’.

၄၀၀. ‘‘နေဝါဟမတ္တာနမနုတ္ထုနာမိ၊ န ပုတ္တဒါရံ န ဓနံ န ရဋ္ဌံ၊

သတဉ္စ ဓမ္မော စရိတော ပုရာဏော၊ တံ သင်္ကရံ [သင်္ဂရံ (သီ. သျာ. ပီ.) ဧဝမုပရိပိ] ဗြာဟ္မဏဿာနုတပ္ပေ.

၄၀၁. ‘‘ကတော မယာ သင်္ကရော ဗြာဟ္မဏေန၊ ရဋ္ဌေ သကေ ဣဿရိယေ ဌိတေန၊

တံ သင်္ကရံ ဗြာဟ္မဏသပ္ပဒါယ၊ သစ္စာနုရက္ခီ ပုနရာဝဇိဿံ’’.

၄၀၂. ‘‘နေဝါဟမေတံ အဘိသဒ္ဒဟာမိ၊ သုခီ နရော မစ္စုမုခါ ပမုတ္တော၊

အမိတ္တဟတ္ထံ ပုနရာဝဇေယျ၊ ကောရဗျသေဋ္ဌ န ဟိ မံ ဥပေသိ.

၄၀၃. ‘‘မုတ္တော တုဝံ ပေါရိသာဒဿ ဟတ္ထာ၊ ဂန္တွာ သကံ မန္ဒိရံ ကာမကာမီ၊

မဓုရံ ပိယံ ဇီဝိတံ လဒ္ဓ ရာဇ၊ ကုတော တုဝံ ဧဟိသိ မေ သကာသံ’’.

၄၀၄. ‘‘မတံ ဝရေယျ ပရိသုဒ္ဓသီလော၊ န ဇီဝိတံ [န ဟိ ဇီဝိတံ (သီ.)] ဂရဟိတော ပါပဓမ္မော၊

န ဟိ တံ နရံ တာယတိ [တာယတေ (သီ. သျာ. ပီ. က.)] ဒုဂ္ဂတီဟိ၊ ယဿာပိ ဟေတု အလိကံ ဘဏေယျ.

၄၀၅. ‘‘သစေပိ ဝါတော ဂိရိမာဝဟေယျ၊ စန္ဒော စ သူရိယော စ ဆမာ ပတေယျုံ၊

သဗ္ဗာ စ နဇ္ဇော ပဋိသောတံ ဝဇေယျုံ၊ န တွေဝဟံ ရာဇ မုသာ ဘဏေယျံ.

၄၀၆. [အယံ ဂါထာ သီ. ပီ. ပေါတ္ထကေသု န ဒိဿတိ] ‘‘နဘံ ဖလေယျ ဥဒဓီပိ သုဿေ၊ သံဝဋ္ဋယေ ဘူတဓရာ ဝသုန္ဓရာ၊

သိလုစ္စယော မေရု သမူလမုပ္ပတေ၊ န တွေဝဟံ ရာဇ မုသာ ဘဏေယျံ’’ [အယံ ဂါထာ သီ. ပီ. ပေါတ္ထကေသု န ဒိဿတိ].

၄၀၇. ‘‘အသိဉ္စ သတ္တိဉ္စ ပရာမသာမိ၊ သပထမ္ပိ တေ သမ္မ အဟံ ကရောမိ၊

တယာ ပမုတ္တော အနဏော ဘဝိတွာ၊ သစ္စာနုရက္ခီ ပုနရာဝဇိဿံ’’.

၄၀၈. ‘‘ယော တေ ကတော သင်္ကရော ဗြာဟ္မဏေန၊ ရဋ္ဌေ သကေ ဣဿရိယေ ဌိတေန၊

တံ သင်္ကရံ ဗြာဟ္မဏသပ္ပဒါယ၊ သစ္စာနုရက္ခီ ပုနရာဝဇဿု’’.

၄၀၉. ‘‘ယော မေ ကတော သင်္ကရော ဗြာဟ္မဏေန၊ ရဋ္ဌေ သကေ ဣဿရိယေ ဌိတေန၊

တံ သင်္ကရံ ဗြာဟ္မဏသပ္ပဒါယ၊ သစ္စာနုရက္ခီ ပုနရာဝဇိဿံ’’.

၄၁၀. ‘‘မုတ္တော စ သော ပေါရိသာဒဿ ဟတ္ထာ၊ ဂန္တွာန တံ ဗြာဟ္မဏံ ဧတဒဝေါစ၊

သုဏောမ [သုဏောမိ (သီ. သျာ.)] ဂါထာယော သတာရဟာယော၊ ယာ မေ သုတာ အဿု ဟိတာယ ဗြဟ္မေ’’.

၄၁၁. ‘‘သကိဒေဝ သုတသောမ၊ သဗ္ဘိ ဟောတိ [ဟောတု (ပီ.)] သမာဂမော၊

သာ နံ သင်္ဂတိ ပါလေတိ၊ နာသဗ္ဘိ ဗဟုသင်္ဂမော.

၄၁၂. ‘‘သဗ္ဘိရေဝ သမာသေထ၊ သဗ္ဘိ ကုဗ္ဗေထ သန္ထဝံ၊

သတံ သဒ္ဓမ္မမညာယ၊ သေယျော ဟောတိ န ပါပိယော.

၄၁၃. ‘‘ဇီရန္တိ ဝေ ရာဇရထာ သုစိတ္တာ၊ အထော သရီရမ္ပိ ဇရံ ဥပေတိ၊

သတဉ္စ ဓမ္မော န ဇရံ ဥပေတိ၊ သန္တော ဟဝေ သဗ္ဘိ ပဝေဒယန္တိ.

၄၁၄. ‘‘နဘဉ္စံ ဒူရေ ပထဝီ စ ဒူရေ၊ ပါရံ သမုဒ္ဒဿ တဒါဟု ဒူရေ၊

တတော ဟဝေ ဒူရတရံ ဝဒန္တိ၊ သတဉ္စ ဓမ္မော [ဓမ္မံ (သီ. ပီ.)] အသတဉ္စ ရာဇ’’.

၄၁၅. ‘‘သဟဿိယာ [သဟဿိယော (သီ. ပီ.)] ဣမာ ဂါထာ၊ နဟိမာ [န ဣမာ၊ (သီ. ပီ.) နယိမာ (သျာ.)] ဂါထာ သတာရဟာ၊

စတ္တာရိ တွံ သဟဿာနိ၊ ခိပ္ပံ ဂဏှာဟိ ဗြာဟ္မဏ’’.

၄၁၆. ‘‘အာသီတိယာ နာဝုတိယာ [အသီတိယာ နဝုတိယာ (ပီ.)] စ ဂါထာ၊ သတာရဟာ စာပိ ဘဝေယျ [ဘဝေယျု (သီ. သျာ. ပီ.)] ဂါထာ၊

ပစ္စတ္တမေဝ သုတသောမ ဇာနဟိ၊ သဟဿိယာ နာမ ကာ အတ္ထိ [သဟဿိယော နာမ ဣဓတ္ထိ (သီ.)] ဂါထာ’’.

၄၁၇. ‘‘ဣစ္ဆာမိ ဝေါဟံ သုတဝုဒ္ဓိမတ္တနော၊ သန္တောတိ မံ [သန္တော မမံ (သျာ.)၊ သန္တော စ မံ (သီ. ပီ. က.)] သပ္ပုရိသာ ဘဇေယျုံ၊

အဟံ သဝန္တီဟိ မဟောဒဓီဝ၊ န ဟိ တာတ တပ္ပါမိ သုဘာသိတေန.

၄၁၈. ‘‘အဂ္ဂိ ယထာ တိဏကဋ္ဌံ ဒဟန္တော၊ န တပ္ပတီ သာဂရောဝ [သာဂရော ဝါ (သီ. ပီ.)] နဒီဟိ၊

ဧဝမ္ပိ တေ ပဏ္ဍိတာ ရာဇသေဋ္ဌ၊ သုတွာ န တပ္ပန္တိ သုဘာသိတေန.

၄၁၉. ‘‘သကဿ ဒါသဿ ယဒါ သုဏောမိ၊ ဂါထံ အဟံ အတ္ထဝတိံ [ဂါထာ အဟံ အတ္ထဝတီ (သီ. ပီ.)] ဇနိန္ဒ၊

တမေဝ သက္ကစ္စ နိသာမယာမိ၊ န ဟိ တာတ ဓမ္မေသု မမတ္ထိ တိတ္တိ’’.

၄၂၀. ‘‘ဣဒံ တေ ရဋ္ဌံ သဓနံ သယောဂ္ဂံ၊ သကာယုရံ သဗ္ဗကာမူပပန္နံ၊

ကိံ ကာမဟေတု ပရိဘာသသိမံ [ဘာသသေ မံ (သီ. သျာ. ပီ.)]၊ ဂစ္ဆာမဟံ ပေါရိသာဒဿ ဉတ္တေ’’ [ပေါရိသာဒဿ ကန္တေ (သီ. ပီ.)၊ ပေါရိသာဒဿုပန္တေ (က.)].

၄၂၁. ‘‘အတ္တာနုရက္ခာယ ဘဝန္တိ ဟေတေ၊ ဟတ္ထာရောဟာ ရထိကာ ပတ္တိကာ စ၊

အဿာရုဟာ [အဿာရောဟာ (သျာ. ပီ.)] ယေ စ ဓနုဂ္ဂဟာသေ၊ သေနံ ပယုဉ္ဇာမ ဟနာမ သတ္တုံ’’.

၄၂၂. ‘‘သုဒုက္ကရံ ပေါရိသာဒေါ အကာသိ၊ ဇီဝံ ဂဟေတွာန အဝဿဇီ မံ၊

တံ တာဒိသံ ပုဗ္ဗကိစ္စံ သရန္တော၊ ဒုဗ္ဘေ အဟံ တဿ ကထံ ဇနိန္ဒ’’.

၄၂၃. ‘‘ဝန္ဒိတွာ သော ပိတရံ မာတရဉ္စ၊ အနုသာသေတွာ နေဂမဉ္စ ဗလဉ္စ၊

သစ္စဝါဒီ သစ္စာနုရက္ခမာနော၊ အဂမာသိ သော ယတ္ထ ပေါရိသာဒေါ’’.

၄၂၄. ‘‘ကတော မယာ သင်္ကရော ဗြာဟ္မဏေန၊ ရဋ္ဌေ သကေ ဣဿရိယေ ဌိတေန၊

တံ သင်္ကရံ ဗြာဟ္မဏသပ္ပဒါယ၊ သစ္စာနုရက္ခီ ပုနရာဂတောသ္မိ၊

ယဇဿု ယညံ ခါဒ မံ ပေါရိသာဒ’’.

၄၂၅. ‘‘န ဟာယတေ ခါဒိတံ [ခါဒိတုံ (သီ. သျာ. ပီ.)] မယှံ ပစ္ဆာ၊ စိတကာ အယံ တာဝ သဓူမိကာဝ [သဓူမကာ စ (သျာ.)]၊

နိဒ္ဓူမကေ ပစိတံ သာဓုပက္ကံ၊ သုဏောမ [သုဏောမိ (သီ.)၊ သုဏာမ (ပီ.)] ဂါထာယော သတာရဟာယော’’.

၄၂၆. ‘‘အဓမ္မိကော တွံ ပေါရိသာဒကာသိ [ပေါရိသာဒမကာသိ (က.)]၊ ရဋ္ဌာ စ ဘဋ္ဌော ဥဒရဿ ဟေတု၊

ဓမ္မဉ္စိမာ အဘိဝဒန္တိ ဂါထာ၊ ဓမ္မော စ အဓမ္မော စ ကုဟိံ သမေတိ.

၄၂၇. ‘‘အဓမ္မိကဿ လုဒ္ဒဿ၊ နိစ္စံ လောဟိတပါဏိနော၊

နတ္ထိ သစ္စံ ကုတော ဓမ္မော၊ ကိံ သုတေန ကရိဿသိ’’.

၄၂၈. ‘‘ယော မံသဟေတု မိဂဝံ စရေယျ၊ ယော ဝါ ဟနေ ပုရိသမတ္တဟေတု၊

ဥဘောပိ တေ ပေစ္စ သမာ ဘဝန္တိ၊ ကသ္မာ နော [ကသ္မာ နု (က.)] အဓမ္မိကံ ဗြူသိ မံ တွံ’’.

၄၂၉. ‘‘ပဉ္စ ပဉ္စနခါ ဘက္ခာ၊ ခတ္တိယေန ပဇာနတာ၊

အဘက္ခံ ရာဇ ဘက္ခေသိ၊ တသ္မာ အဓမ္မိကော တုဝံ’’.

၄၃၀. ‘‘မုတ္တော တုဝံ ပေါရိသာဒဿ ဟတ္ထာ၊ ဂန္တွာ သကံ မန္ဒိရံ ကာမကာမီ၊

အမိတ္တဟတ္ထံ ပုနရာဂတောသိ၊ န ခတ္တဓမ္မေ ကုသလောသိ ရာဇ’’.

၄၃၁. ‘‘ယေ ခတ္တဓမ္မေ ကုသလာ ဘဝန္တိ၊ ပါယေန တေ နေရယိကာ ဘဝန္တိ၊

တသ္မာ အဟံ ခတ္တဓမ္မံ ပဟာယ၊ သစ္စာနုရက္ခီ ပုနရာဂတောသ္မိ၊

ယဇဿု ယညံ ခါဒ မံ ပေါရိသာဒ’’.

၄၃၂. ‘‘ပါသာဒဝါသာ ပထဝီဂဝဿာ၊ ကာမိတ္ထိယော ကာသိကစန္ဒနဉ္စ၊

သဗ္ဗံ တဟိံ လဘသိ [လဗ္ဘတိ (ပီ.)] သာမိတာယ၊ သစ္စေန ကိံ ပဿသိ အာနိသံသံ’’.

၄၃၃. ‘‘ယေ ကေစိမေ အတ္ထိ ရသာ ပထဗျာ၊ သစ္စံ တေသံ သာဓုတရံ ရသာနံ၊

သစ္စေ ဌိတာ သမဏဗြာဟ္မဏာ စ၊ တရန္တိ ဇာတိမရဏဿ ပါရံ’’.

၄၃၄. ‘‘မုတ္တော တုဝံ ပေါရိသာဒဿ ဟတ္ထာ၊ ဂန္တွာ သကံ မန္ဒိရံ ကာမကာမီ၊

အမိတ္တဟတ္ထံ ပုနရာဂတောသိ၊ န ဟိ နူန တေ မရဏဘယံ ဇနိန္ဒ၊

အလီနစိတ္တော အသိ [စ’သိ (သီ. သျာ. ပီ.)] သစ္စဝါဒီ’’.

၄၃၅. ‘‘ကတာ မေ ကလျာဏာ အနေကရူပါ၊ ယညာ ယိဋ္ဌာ ယေ ဝိပုလာ ပသတ္ထာ၊

ဝိသောဓိတော ပရလောကဿ မဂ္ဂေါ၊ ဓမ္မေ ဌိတော ကော မရဏဿ ဘာယေ.

၄၃၆. ‘‘ကတာ မေ ကလျာဏာ အနေကရူပါ၊ ယညာ ယိဋ္ဌာ ယေ ဝိပုလာ ပသတ္ထာ၊

အနာနုတပ္ပံ ပရလောကံ ဂမိဿံ၊ ယဇဿု ယညံ အဒ [ခါဒ (သီ. သျာ. ပီ.)] မံ ပေါရိသာဒ.

၄၃၇. ‘‘ပိတာ စ မာတာ စ ဥပဋ္ဌိတာ မေ၊ ဓမ္မေန မေ ဣဿရိယံ ပသတ္ထံ၊

ဝိသောဓိတော ပရလောကဿ မဂ္ဂေါ၊ ဓမ္မေ ဌိတော ကော မရဏဿ ဘာယေ.

၄၃၈. ‘‘ပိတာ စ မာတာ စ ဥပဋ္ဌိတာ မေ၊ ဓမ္မေန မေ ဣဿရိယံ ပသတ္ထံ၊

အနာနုတပ္ပံ ပရလောကံ ဂမိဿံ၊ ယဇဿု ယညံ အဒ မံ ပေါရိသာဒ.

၄၃၉. ‘‘ဉာတီသု မိတ္တေသု ကတာ မေ ကာရာ [ကတူပကာရော (သျာ. က.)]၊ ဓမ္မေန မေ ဣဿရိယံ ပသတ္ထံ၊

ဝိသောဓိတော ပရလောကဿ မဂ္ဂေါ၊ ဓမ္မေ ဌိတော ကော မရဏဿ ဘာယေ.

၄၄၀. ‘‘ဉာတီသုံ မိတ္တေသု ကတာ မေ ကာရာ၊ ဓမ္မေန မေ ဣဿရိယံ ပသတ္ထံ၊

အနာနုတပ္ပံ ပရလောကံ ဂမိဿံ၊ ယဇဿု ယညံ အဒ မံ ပေါရိသာဒ.

၄၄၁. ‘‘ဒိန္နံ မေ ဒါနံ ဗဟုဓာ ဗဟူနံ၊ သန္တပ္ပိတာ သမဏဗြာဟ္မဏာ စ၊

ဝိသောဓိတော ပရလောကဿ မဂ္ဂေါ၊ ဓမ္မေ ဌိတော ကော မရဏဿ ဘာယေ.

၄၄၂. ‘‘ဒိန္နံ မေ ဒါနံ ဗဟုဓာ ဗဟူနံ၊ သန္တပ္ပိတာ သမဏဗြာဟ္မဏာ စ၊

အနာနုတပ္ပံ ပရလောကံ ဂမိဿံ၊ ယဇဿု ယညံ အဒ မံ ပေါရိသာဒ’’.