၅၃၅. သုဓာဘောဇနဇာတကံ (၃)

၁၉၂. ‘‘နေဝ ကိဏာမိ နပိ ဝိက္ကိဏာမိ၊ န စာပိ မေ သန္နိစယော စ အတ္ထိ [ဣဓတ္ထိ (သျာ.)]၊

သုကိစ္ဆရူပံ ဝတိဒံ ပရိတ္တံ၊ ပတ္ထောဒနော နာလမယံ ဒုဝိန္နံ’’.

၁၉၃. ‘‘အပ္ပမှာ အပ္ပကံ ဒဇ္ဇာ၊ အနုမဇ္ဈတော မဇ္ဈကံ၊

ဗဟုမှာ ဗဟုကံ ဒဇ္ဇာ၊ အဒါနံ နုပပဇ္ဇတိ [န ဥပပဇ္ဇတိ (သီ. ပီ.)].

၁၉၄. ‘‘တံ တံ ဝဒါမိ ကောသိယ၊ ဒေဟိ ဒါနာနိ ဘုဉ္ဇ စ၊

အရိယမဂ္ဂံ သမာရူဟ [အရိယံ မဂ္ဂံ သမာရုဟ (သီ. ပီ.)]၊ နေကာသီ လဘတေ သုခံ’’.

၁၉၅. ‘‘မောဃဉ္စဿ ဟုတံ ဟောတိ၊ မောဃဉ္စာပိ သမီဟိတံ၊

အတိထိသ္မိံ ယော နိသိန္နသ္မိံ၊ ဧကော ဘုဉ္ဇတိ ဘောဇနံ.

၁၉၆. ‘‘တံ တံ ဝဒါမိ ကောသိယ၊ ဒေဟိ ဒါနာနိ ဘုဉ္ဇ စ၊

အရိယမဂ္ဂံ သမာရူဟ၊ နေကာသီ လဘတေ သုခံ’’.

၁၉၇. ‘‘သစ္စဉ္စဿ ဟုတံ ဟောတိ၊ သစ္စဉ္စာပိ သမီဟိတံ၊

အတိထိသ္မိံ ယော နိသိန္နသ္မိံ၊ နေကော ဘုဉ္ဇတိ ဘောဇနံ.

၁၉၈. ‘‘တံ တံ ဝဒါမိ ကောသိယ၊ ဒေဟိ ဒါနာနိ ဘုဉ္ဇ စ၊

အရိယမဂ္ဂံ သမာရူဟ၊ နေကာသီ လဘတေ သုခံ’’.

၁၉၉. ‘‘သရဉ္စ ဇုဟတိ ပေါသော၊ ဗဟုကာယ ဂယာယ စ၊

ဒေါဏေ တိမ္ဗရုတိတ္ထသ္မိံ၊ သီဃသောတေ မဟာဝဟေ.

၂၀၀. ‘‘အတြ စဿ ဟုတံ ဟောတိ၊ အတြ စဿ သမီဟိတံ၊

အတိထိသ္မိံ ယော နိသိန္နသ္မိံ၊ နေကော ဘုဉ္ဇတိ ဘောဇနံ.

၂၀၁. ‘‘တံ တံ ဝဒါမိ ကောသိယ၊ ဒေဟိ ဒါနာနိ ဘုဉ္ဇ စ၊

အရိယမဂ္ဂံ သမာရူဟ၊ နေကာသီ လဘတေ သုခံ’’.

၂၀၂. ‘‘ဗဠိသဉှိ သော နိဂိလတိ [နိဂ္ဂိလတိ (သီ. ပီ.)]၊ ဒီဃသုတ္တံ သဗန္ဓနံ၊

အတိထိသ္မိံ ယော နိသိန္နသ္မိံ၊ ဧကော ဘုဉ္ဇတိ ဘောဇနံ.

၂၀၃. ‘‘တံ တံ ဝဒါမိ ကောသိယ၊ ဒေဟိ ဒါနာနိ ဘုဉ္ဇ စ၊

အရိယမဂ္ဂံ သမာရူဟ၊ နေကာသီ လဘတေ သုခံ’’.

၂၀၄. ‘‘ဥဠာရဝဏ္ဏာ ဝတ ဗြာဟ္မဏာ ဣမေ၊ အယဉ္စ ဝေါ သုနခေါ ကိဿ ဟေတု၊

ဥစ္စာဝစံ ဝဏ္ဏနိဘံ ဝိကုဗ္ဗတိ၊ အက္ခာထ နော ဗြာဟ္မဏာ ကေ နု တုမှေ’’.

၂၀၅. ‘‘စန္ဒော စ သူရိယော စ [သူရိယော စ (က.)] ဥဘော ဣဓာဂတာ၊ အယံ ပန မာတလိ ဒေဝသာရထိ၊

သက္ကောဟမသ္မိ တိဒသာနမိန္ဒော၊ ဧသော စ ခေါ ပဉ္စသိခေါတိ ဝုစ္စတိ.

၂၀၆. ‘‘ပါဏိဿရာ မုဒိင်္ဂါ စ [မုတိင်္ဂါ စ (သီ. သျာ. ပီ.)]၊ မုရဇာလမ္ဗရာနိ စ၊

သုတ္တမေနံ ပဗောဓေန္တိ၊ ပဋိဗုဒ္ဓေါ စ နန္ဒတိ’’.

၂၀၇. ‘‘ယေ ကေစိမေ မစ္ဆရိနော ကဒရိယာ၊ ပရိဘာသကာ သမဏဗြာဟ္မဏာနံ၊

ဣဓေဝ နိက္ခိပ္ပ သရီရဒေဟံ၊ ကာယဿ ဘေဒါ နိရယံ ဝဇန္တိ’’.

၂၀၈. ‘‘ယေ ကေစိမေ သုဂ္ဂတိမာသမာနာ [သုဂ္ဂတိမာသသာနာ (သီ. ပီ.)၊ သုဂ္ဂတာသိသမာနာ (က.)]၊ ဓမ္မေ ဌိတာ သံယမေ သံဝိဘာဂေ၊

ဣဓေဝ နိက္ခိပ္ပ သရီရဒေဟံ၊ ကာယဿ ဘေဒါ သုဂတိံ ဝဇန္တိ’’.

၂၀၉. ‘‘တွံ နောသိ ဉာတိ ပုရိမာသု ဇာတိသု၊ သော မစ္ဆရီ ရောသကော [ကောသိယော (သျာ. က.)] ပါပဓမ္မော၊

တဝေဝ အတ္ထာယ ဣဓာဂတမှာ၊ မာ ပါပဓမ္မော နိရယံ ဂမိတ္ထ’’ [အပတ္ထ (က. သီ. သျာ. ပီ.)].

၂၁၀. ‘‘အဒ္ဓါ ဟိ မံ ဝေါ ဟိတကာမာ၊ ယံ မံ သမနုသာသထ၊

သောဟံ တထာ ကရိဿာမိ၊ သဗ္ဗံ ဝုတ္တံ ဟိတေသိဘိ.

၂၁၁. ‘‘ဧသာဟမဇ္ဇေဝ ဥပါရမာမိ၊ န စာပိဟံ [န စာပဟံ (သီ. ပီ.)] ကိဉ္စိ ကရေယျ ပါပံ၊

န စာပိ မေ ကိဉ္စိ အဒေယျမတ္ထိ၊ န စာပိဒတွာ ဥဒကံ ပိဝါမိ [ဥဒကမ္ပဟံ ပိဗေ (သီ.)].

၂၁၂. ‘‘ဧဝဉ္စ မေ ဒဒတော သဗ္ဗကာလံ [သဗ္ဗကာလေ (က.)]၊ ဘောဂါ ဣမေ ဝါသဝ ခီယိဿန္တိ၊

တတော အဟံ ပဗ္ဗဇိဿာမိ သက္က၊ ဟိတွာန ကာမာနိ ယထောဓိကာနိ’’.

၂၁၃. ‘‘နဂုတ္တမေ ဂိရိဝရေ ဂန္ဓမာဒနေ၊ မောဒန္တိ တာ ဒေဝဝရာဘိပါလိတာ၊

အထာဂမာ ဣသိဝရော သဗ္ဗလောကဂူ၊ သုပုပ္ဖိတံ ဒုမဝရသာခမာဒိယ.

၂၁၄. ‘‘သုစိံ သုဂန္ဓံ တိဒသေဟိ သက္ကတံ၊ ပုပ္ဖုတ္တမံ အမရဝရေဟိ သေဝိတံ၊

အလဒ္ဓ မစ္စေဟိ ဝ ဒါနဝေဟိ ဝါ၊ အညတြ ဒေဝေဟိ တဒါရဟံ ဟိဒံ [ဟိတံ (သျာ.)].

၂၁၅. ‘‘တတော စတဿော ကနကတ္တစူပမာ၊ ဥဋ္ဌာယ နာရိယော ပမဒါဓိပါ မုနိံ၊

အာသာ စ သဒ္ဓါ စ သိရီ တတော ဟိရီ၊ ဣစ္စဗြဝုံ နာရဒဒေဝ ဗြာဟ္မဏံ.

၂၁၆. ‘‘သစေ အနုဒ္ဒိဋ္ဌံ တယာ မဟာမုနိ၊ ပုပ္ဖံ ဣမံ ပါရိဆတ္တဿ ဗြဟ္မေ၊

ဒဒါဟိ နော သဗ္ဗာ ဂတိ တေ ဣဇ္ဈတု၊ တုဝမ္ပိ နော ဟောဟိ ယထေဝ ဝါသဝေါ.

၂၁၇. ‘‘တံ ယာစမာနာဘိသမေက္ခ နာရဒေါ၊ ဣစ္စဗြဝီ သံကလဟံ ဥဒီရယိ၊

န မယှမတ္ထတ္ထိ ဣမေဟိ ကောစိ နံ၊ ယာယေဝ ဝေါ သေယျသိ သာ ပိဠန္ဓထ’’ [ပိဠယှထ (သီ. ပီ.)].

၂၁၈. ‘‘တွံ နောတ္တမေဝါဘိသမေက္ခ နာရဒ၊ ယဿိစ္ဆသိ တဿာ အနုပ္ပဝေစ္ဆသု၊

ယဿာ ဟိ နော နာရဒ တွံ ပဒဿသိ၊ သာယေဝ နော ဟေဟိတိ သေဋ္ဌသမ္မတာ’’.

၂၁၉. ‘‘အကလ္လမေတံ ဝစနံ သုဂတ္တေ၊ ကော ဗြာဟ္မဏော သံကလဟံ ဥဒီရယေ၊

ဂန္တွာန ဘူတာဓိပမေဝ ပုစ္ဆထ၊ သစေ န ဇာနာထ ဣဓုတ္တမာဓမံ’’.

၂၂၀. ‘‘တာ နာရဒေန ပရမပ္ပကောပိတာ၊ ဥဒီရိတာ ဝဏ္ဏမဒေန မတ္တာ၊

သကာသေ [သကာသံ (က.)] ဂန္တွာန သဟဿစက္ခုနော၊ ပုစ္ဆိံသု ဘူတာဓိပံ ကာ နု သေယျသိ’’.

၂၂၁. ‘‘တာ ဒိသွာ အာယတ္တမနာ ပုရိန္ဒဒေါ၊ ဣစ္စဗြဝီ ဒေဝဝရော ကတဉ္ဇလီ၊

သဗ္ဗာဝ ဝေါ ဟောထ သုဂတ္တေ သာဒိသီ၊ ကော နေဝ ဘဒ္ဒေ ကလဟံ ဥဒီရယိ’’.

၂၂၂. ‘‘ယော သဗ္ဗလောကစ္စရိတော [သဗ္ဗလောကံ စရကော (သီ. သျာ. ပီ.)] မဟာမုနိ၊ ဓမ္မေ ဌိတော နာရဒေါ [နာရဒ (သျာ.)] သစ္စနိက္ကမော၊

သော နောဗြဝိ [ဗြဝီ (သီ. သျာ. ပီ.)] ဂိရိဝရေ ဂန္ဓမာဒနေ၊ ဂန္တွာန ဘူတာဓိပမေဝ ပုစ္ဆထ၊

သစေ န ဇာနာထ ဣဓုတ္တမာဓမံ’’.

၂၂၃. ‘‘အသု [အသူ (သျာ.)] ဗြဟာရညစရော မဟာမုနိ၊ နာဒတွာ ဘတ္တံ ဝရဂတ္တေ ဘုဉ္ဇတိ၊

ဝိစေယျ ဒါနာနိ ဒဒါတိ ကောသိယော၊ ယဿာ ဟိ သော ဒဿတိ သာဝ သေယျသိ’’.

၂၂၄. ‘‘အသူ ဟိ ယော သမ္မတိ ဒက္ခိဏံ ဒိသံ၊ ဂင်္ဂါယ တီရေ ဟိမဝန္တပဿနိ [ဟိမဝန္တပသ္မနိ (သီ. ပီ. က.)]၊

သ ကောသိယော ဒုလ္လဘပါနဘောဇနော၊ တဿ သုဓံ ပါပယ ဒေဝသာရထိ’’.

၂၂၅. ‘‘သ [သော (သျာ.)] မာတလီ ဒေဝဝရေန ပေသိတော၊ သဟဿယုတ္တံ အဘိရုယှ သန္ဒနံ၊

သုခိပ္ပမေဝ [သ ခိပ္ပမေဝ (သီ. ပီ.)] ဥပဂမ္မ အဿမံ၊ အဒိဿမာနော မုနိနော သုဓံ အဒါ’’.

၂၂၆. ‘‘ဥဒဂ္ဂိဟုတ္တံ ဥပတိဋ္ဌတော ဟိ မေ၊ ပဘင်္ကရံ လောကတမောနုဒုတ္တမံ၊

သဗ္ဗာနိ ဘူတာနိ အဓိစ္စ [အတိစ္စ (သီ. ပီ.)] ဝါသဝေါ၊ ကော နေဝ မေ ပါဏိသု ကိံ သုဓောဒဟိ.

၂၂၇. ‘‘သင်္ခူပမံ သေတမတုလျဒဿနံ၊ သုစိံ သုဂန္ဓံ ပိယရူပမဗ္ဘုတံ၊

အဒိဋ္ဌပုဗ္ဗံ မမ ဇာတု စက္ခုဘိ [ဇာတစက္ခုဟိ (သီ. ပီ.)]၊ ကာ ဒေဝတာ ပါဏိသု ကိံ သုဓောဒဟိ’’.

၂၂၈. ‘‘အဟံ မဟိန္ဒေန မဟေသိ ပေသိတော၊ သုဓာဘိဟာသိံ တုရိတော မဟာမုနိ၊

ဇာနာသိ မံ မာတလိ ဒေဝသာရထိ၊ ဘုဉ္ဇဿု ဘတ္တုတ္တမ မာဘိဝါရယိ [မာ ဝိစာရယိ (သီ. ပီ.)].

၂၂၉. ‘‘ဘုတ္တာ စ သာ ဒွါဒသ ဟန္တိ ပါပကေ၊ ခုဒံ ပိပါသံ အရတိံ ဒရက္လမံ [ဒရထံ ကိလံ (သျာ.)၊ ဒရထက္ခမံ (က.)]၊

ကောဓူပနာဟဉ္စ ဝိဝါဒပေသုဏံ၊ သီတုဏှတန္ဒိဉ္စ ရသုတ္တမံ ဣဒံ’’.

၂၃၀. ‘‘န ကပ္ပတီ မာတလိ မယှ ဘုဉ္ဇိတုံ၊ ပုဗ္ဗေ အဒတွာ ဣတိ မေ ဝတုတ္တမံ၊

န စာပိ ဧကာသ္နမရီယပူဇိတံ [ဧကာသနံ အရိယပူဇိတံ (သီ. ပီ.)]၊ အသံဝိဘာဂီ စ သုခံ န ဝိန္ဒတိ’’.

၂၃၁. ‘‘ထီဃာတကာ ယေ စိမေ ပါရဒါရိကာ၊ မိတ္တဒ္ဒုနော ယေ စ သပန္တိ သုဗ္ဗတေ၊

သဗ္ဗေ စ တေ မစ္ဆရိပဉ္စမာဓမာ၊ တသ္မာ အဒတွာ ဥဒကမ္ပိ နာသ္နိယေ [နာသ္မိယေ (သီ. ပီ.)].

၂၃၂. ‘‘သော ဟိတ္ထိယာ ဝါ ပုရိသဿ ဝါ ပန၊ ဒဿာမိ ဒါနံ ဝိဒုသမ္ပဝဏ္ဏိတံ၊

သဒ္ဓါ ဝဒညူ ဣဓ ဝီတမစ္ဆရာ၊ ဘဝန္တိ ဟေတေ သုစိသစ္စသမ္မတာ’’ [သမ္မသမ္မတာ (သီ.)].

၂၃၃. ‘‘အတော မတာ [မုတာ (သီ. ပီ.)] ဒေဝဝရေန ပေသိတာ၊ ကညာ စတဿော ကနကတ္တစူပမာ၊

အာသာ စ သဒ္ဓါ စ သိရီ တတော ဟိရီ [သိရီ ဟိရီ တတော (ပီ.)]၊ တံ အဿမံ အာဂမု [အာဂမုံ (သီ. ပီ. က.)] ယတ္ထ ကောသိယော.

၂၃၄. ‘‘တာ ဒိသွာ သဗ္ဗော ပရမပ္ပမောဒိတော [သဗ္ဗာ ပရမပ္ပမောဒိတာ (သျာ.)]၊ သုဘေန ဝဏ္ဏေန သိခါရိဝဂ္ဂိနော၊

ကညာ စတဿော စတုရော စတုဒ္ဒိသာ၊ ဣစ္စဗြဝီ မာတလိနော စ သမ္မုခါ.

၂၃၅. ‘‘ပုရိမံ ဒိသံ ကာ တွံ ပဘာသိ ဒေဝတေ၊ အလင်္ကတာ တာရဝရာဝ ဩသဓီ၊

ပုစ္ဆာမိ တံ ကဉ္စနဝေလ္လိဝိဂ္ဂဟေ၊ အာစိက္ခ မေ တွံ ကတမာသိ ဒေဝတာ.

၂၃၆. ‘‘သိရာဟ ဒေဝီမနုဇေဘိ [မနုဇေသု (သီ. သျာ. ပီ.)] ပူဇိတာ၊ အပါပသတ္တူပနိသေဝိနီ သဒါ၊

သုဓာဝိဝါဒေန တဝန္တိမာဂတာ၊ တံ မံ သုဓာယ ဝရပည ဘာဇယ.

၂၃၇. ‘‘ယဿာဟမိစ္ဆာမိ သုဓံ [သုခံ (ပီ.)] မဟာမုနိ၊ သော [သ (သီ. ပီ.)] သဗ္ဗကာမေဟိ နရော ပမောဒတိ၊

သိရီတိ မံ ဇာနဟိ ဇူဟတုတ္တမ၊ တံ မံ သုဓာယ ဝရပည ဘာဇယ’’.

၂၃၈. ‘‘သိပ္ပေန ဝိဇ္ဇာစရဏေန ဗုဒ္ဓိယာ၊ နရာ ဥပေတာ ပဂုဏာ သကမ္မုနာ [သကမ္မနာ (သီ. ပီ.)]၊

တယာ ဝိဟီနာ န လဘန္တိ ကိဉ္စနံ [ကိဉ္စိနံ (က.)]၊ တယိဒံ န သာဓု ယဒိဒံ တယာ ကတံ.

၂၃၉. ‘‘ပဿာမိ ပေါသံ အလသံ မဟဂ္ဃသံ၊ သုဒုက္ကုလီနမ္ပိ အရူပိမံ နရံ၊

တယာနုဂုတ္တော သိရိ ဇာတိမာမပိ [ဇာတိမံ အပိ (သီ.)]၊ ပေသေတိ ဒါသံ ဝိယ ဘောဂဝါ သုခီ.

၂၄၀. ‘‘တံ တံ အသစ္စံ အဝိဘဇ္ဇသေဝိနိံ၊ ဇာနာမိ မူဠှံ ဝိဒုရာနုပါတိနိံ၊

န တာဒိသီ အရဟတိ အာသနူဒကံ၊ ကုတော သုဓာ ဂစ္ဆ န မယှ ရုစ္စသိ’’.

၂၄၁. ‘‘ကာ သုက္ကဒါဌာ ပဋိမုက္ကကုဏ္ဍလာ၊ စိတ္တင်္ဂဒါ ကမ္ဗုဝိမဋ္ဌဓာရိနီ၊

ဩသိတ္တဝဏ္ဏံ ပရိဒယှ သောဘသိ၊ ကုသဂ္ဂိရတ္တံ အပိဠယှ မဉ္ဇရိံ.

၂၄၂. ‘‘မိဂီဝ ဘန္တာ သရစာပဓာရိနာ၊ ဝိရာဓိတာ မန္ဒမိဝ ဥဒိက္ခသိ၊

ကော တေ ဒုတီယော ဣဓ မန္ဒလောစနေ၊ န ဘာယသိ ဧကိကာ ကာနနေ ဝနေ’’.

၂၄၃. ‘‘န မေ ဒုတီယော ဣဓ မတ္ထိ ကောသိယ၊ မသက္ကသာရပ္ပဘဝမှိ ဒေဝတာ၊

အာသာ သုဓာသာယ တဝန္တိမာဂတာ၊ တံ မံ သုဓာယ ဝရပည ဘာဇယ’’.

၂၄၄. ‘‘အာသာယ ယန္တိ ဝါဏိဇာ ဓနေသိနော၊ နာဝံ သမာရုယှ ပရေန္တိ အဏ္ဏဝေ၊

တေ တတ္ထ သီဒန္တိ အထောပိ ဧကဒါ၊ ဇီနာဓနာ ဧန္တိ ဝိနဋ္ဌပါဘတာ.

၂၄၅. ‘‘အာသာယ ခေတ္တာနိ ကသန္တိ ကဿကာ၊ ဝပန္တိ ဗီဇာနိ ကရောန္တုပါယသော၊

ဤတီနိပါတေန အဝုဋ္ဌိတာယ [အဝုဋ္ဌိကာယ (သီ. ပီ.)] ဝါ၊ န ကိဉ္စိ ဝိန္ဒန္တိ တတော ဖလာဂမံ.

၂၄၆. ‘‘အထတ္တကာရာနိ ကရောန္တိ ဘတ္တုသု၊ အာသံ ပုရက္ခတွာ နရာ သုခေသိနော၊

တေ ဘတ္တုရတ္ထာ အတိဂါဠှိတာ ပုန၊ ဒိသာ ပနဿန္တိ အလဒ္ဓ ကိဉ္စနံ.

၂၄၇. ‘‘ဟိတွာန [ဇဟိတွ (သီ. သျာ. ပီ.)] ဓညဉ္စ ဓနဉ္စ ဉာတကေ၊ အာသာယ သဂ္ဂါဓိမနာ သုခေသိနော၊

တပန္တိ လူခမ္ပိ တပံ စိရန္တရံ၊ ကုမဂ္ဂမာရုယှ [ကုမ္မဂ္ဂမာရုယှ (သီ. သျာ. ပီ.)] ပရေန္တိ ဒုဂ္ဂတိံ.

၂၄၈. ‘‘အာသာ ဝိသံဝါဒိကသမ္မတာ ဣမေ၊ အာသေ သုဓာသံ [သုဓာယ (သျာ ပီ. က.)] ဝိနယဿု အတ္တနိ၊

န တာဒိသီ အရဟတိ အာသနူဒကံ၊ ကုတော သုဓာ ဂစ္ဆ န မယှ ရုစ္စသိ’’.

၂၄၉. ‘‘ဒဒ္ဒလ္လမာနာ ယသသာ ယသဿိနီ၊ ဇိဃညနာမဝှယနံ ဒိသံ ပတိ၊

ပုစ္ဆာမိ တံ ကဉ္စနဝေလ္လိဝိဂ္ဂဟေ၊ အာစိက္ခ မေ တွံ ကတမာသိ ဒေဝတာ’’.

၂၅၀. ‘‘သဒ္ဓါဟ ဒေဝီမနုဇေဟိ [ဒေဝီမနုဇေသု (သီ. သျာ. ပီ.)] ပူဇိတာ၊ အပါပသတ္တူပနိသေဝိနီ သဒါ၊

သုဓာဝိဝါဒေန တဝန္တိမာဂတာ၊ တံ မံ သုဓာယ ဝရပည ဘာဇယ’’.

၂၅၁. ‘‘ဒါနံ ဒမံ စာဂမထောပိ သံယမံ၊ အာဒါယ သဒ္ဓါယ ကရောန္တိ ဟေကဒါ၊

ထေယျံ မုသာ ကူဋမထောပိ ပေသုဏံ၊ ကရောန္တိ ဟေကေ ပုန ဝိစ္စုတာ တယာ.

၂၅၂. ‘‘ဘရိယာသု ပေါသော သဒိသီသု ပေက္ခဝါ [ပေခဝါ (ပီ.)]၊ သီလူပပန္နာသု ပတိဗ္ဗတာသုပိ၊

ဝိနေတွာန [ဝိနေတွာ (သီ. သျာ. ပီ.)] ဆန္ဒံ ကုလိတ္ထိယာသုပိ [ကုလဓီတိယာသုပိ (သီ. ပီ.)]၊ ကရောတိ သဒ္ဓံ ပုန [ပန (သီ. ပီ.)] ကုမ္ဘဒါသိယာ.

၂၅၃. ‘‘တွမေဝ သဒ္ဓေ ပရဒါရသေဝိနီ၊ ပါပံ ကရောသိ ကုသလမ္ပိ ရိဉ္စသိ၊

န တာဒိသီ အရဟတိ အာသနူဒကံ၊ ကုတော သုဓာ ဂစ္ဆ န မယှ ရုစ္စသိ’’.

၂၅၄. ‘‘ဇိဃညရတ္တိံ အရုဏသ္မိမူဟတေ၊ ယာ ဒိဿတိ ဥတ္တမရူပဝဏ္ဏိနီ၊

တထူပမာ မံ ပဋိဘာသိ ဒေဝတေ၊ အာစိက္ခ မေ တွံ ကတမာသိ အစ္ဆရာ.

၂၅၅. ‘‘ကာလာ နိဒါဃေရိဝ အဂ္ဂိဇာရိဝ [အဂ္ဂဇာတိဝ (သီ.)၊ အဂ္ဂိဇာတိဝ (ပီ.)]၊ အနိလေရိတာ လောဟိတပတ္တမာလိနီ၊

ကာ တိဋ္ဌသိ မန္ဒမိဂါဝလောကယံ [မန္ဒမိဝါဝလောကယံ (သီ. ပီ.)]၊ ဘာသေသမာနာဝ ဂိရံ န မုဉ္စသိ’’.

၂၅၆. ‘‘ဟိရာဟ ဒေဝီမနုဇေဟိ ပူဇိတာ၊ အပါပသတ္တူပနိသေဝိနီ သဒါ၊

သုဓာဝိဝါဒေန တဝန္တိမာဂတာ၊ သာဟံ န သက္ကောမိ သုဓမ္ပိ ယာစိတုံ၊

ကောပီနရူပါ ဝိယ ယာစနိတ္ထိယာ’’.

၂၅၇. ‘‘ဓမ္မေန ဉာယေန သုဂတ္တေ လစ္ဆသိ၊ ဧသော ဟိ ဓမ္မော န ဟိ ယာစနာ သုဓာ၊

တံ တံ အယာစန္တိမဟံ နိမန္တယေ၊ သုဓာယ ယဉ္စိစ္ဆသိ တမ္ပိ ဒမ္မိ တေ.

၂၅၈. ‘‘သာ တွံ မယာ အဇ္ဇ သကမှိ အဿမေ၊ နိမန္တိတာ ကဉ္စနဝေလ္လိဝိဂ္ဂဟေ၊

တုဝဉှိ မေ သဗ္ဗရသေဟိ ပူဇိယာ၊ တံ ပူဇယိတွာန သုဓမ္ပိ အသ္နိယေ’’.

၂၅၉. ‘‘သာ ကောသိယေနာနုမတာ ဇုတီမတာ၊ အဒ္ဓါ ဟိရိ ရမ္မံ ပါဝိသိ ယဿမံ၊

ဥဒကဝန္တံ [ဥဒညဝန္တံ (သီ. ပီ.)] ဖလမရိယပူဇိတံ၊ အပါပသတ္တူပနိသေဝိတံ သဒါ.

၂၆၀. ‘‘ရုက္ခဂ္ဂဟာနာ ဗဟုကေတ္ထ ပုပ္ဖိတာ၊ အမ္ဗာ ပိယာလာ ပနသာ စ ကိံသုကာ၊

သောဘဉ္ဇနာ လောဒ္ဒမထောပိ ပဒ္မကာ၊ ကေကာ စ ဘင်္ဂါ တိလကာ သုပုပ္ဖိတာ.

၂၆၁. ‘‘သာလာ ကရေရီ ဗဟုကေတ္ထ ဇမ္ဗုယော၊ အဿတ္ထနိဂြောဓမဓုကဝေတသာ [ဝေဒိသာ (က.)]၊

ဥဒ္ဒါလကာ ပါဋလိ သိန္ဒုဝါရကာ [သိန္ဒုဝါရိတာ (ဗဟူသု)]၊ မနုညဂန္ဓာ မုစလိန္ဒကေတကာ.

၂၆၂. ‘‘ဟရေဏုကာ ဝေဠုကာ ကေဏု [ဝေဏု (သီ. ပီ.)] တိန္ဒုကာ၊ သာမာကနီဝါရမထောပိ စီနကာ၊

မောစာ ကဒလီ ဗဟုကေတ္ထ သာလိယော၊ ပဝီဟယော အာဘူဇိနော စ [အာဘုဇိနောပိ (သီ. သျာ.)] တဏ္ဍုလာ.

၂၆၃. ‘‘တဿေဝုတ္တရပဿေန [တဿ စ ဥတ္တရေ ပဿေ (သီ. ပီ.)၊ တဿ စ ဥတ္တရပဿေန (သျာ.)]၊ ဇာတာ ပေါက္ခရဏီ သိဝါ၊

အကက္ကသာ အပဗ္ဘာရာ၊ သာဓု အပ္ပဋိဂန္ဓိကာ.

၂၆၄. ‘‘တတ္ထ မစ္ဆာ သန္နိရတာ၊ ခေမိနော ဗဟုဘောဇနာ၊

သိင်္ဂူ သဝင်္ကာ သံကုလာ [သကုလာ (သီ. သျာ. ပီ.)]၊ သတဝင်္ကာ စ ရောဟိတာ၊

အာဠိဂဂ္ဂရကာကိဏ္ဏာ၊ ပါဌီနာ ကာကမစ္ဆကာ.