၂၄၀. မဟာပိင်္ဂလဇာတကံ (၂-၉-၁၀)

၁၇၉. သဗ္ဗော ဇနော ဟိံသိတော ပိင်္ဂလေန၊ တသ္မိံ မတေ ပစ္စယာ [ပစ္စယံ (သီ. သျာ. ပီ.)] ဝေဒယန္တိ၊

ပိယော နု တေ အာသိ အကဏှနေတ္တော၊ ကသ္မာ နု တွံ ရောဒသိ ဒွါရပါလ.

၁၈၀. န မေ ပိယော အာသိ အကဏှနေတ္တော၊ ဘာယာမိ ပစ္စာဂမနာယ တဿ၊

ဣတော ဂတော ဟိံသေယျ မစ္စုရာဇံ၊ သော ဟိံသိတော အာနေယျ ပုန ဣဓ.

၁၈၁. ဒဍ္ဎော ဝါဟသဟဿေဟိ၊ သိတ္တော ဃဋသတေဟိ သော၊

ပရိက္ခတာ စ သာ ဘူမိ၊ မာ ဘာယိ နာဂမိဿတီတိ.

မဟာပိင်္ဂလဇာတကံ ဒသမံ.

ဥပါဟနဝဂ္ဂေါ နဝမော.

တဿုဒ္ဒါနံ –

ဝရုပါဟန ခုဇ္ဇ ဝိကဏ္ဏကကော၊ အသိတာဘုယ ပဉ္စမဝစ္ဆနခေါ၊

ဒိဇ ပေမဝရုတ္တမဧကပဒံ၊ ကုမိနာမုခ ပိင်္ဂလကေန ဒသာတိ.