၁၀. သိင်္ဂါလဝဂ္ဂေါ

၂၄၁. သဗ္ဗဒါဌိဇာတကံ (၂-၁၀-၁)

၁၈၂. သိင်္ဂါလော မာနထဒ္ဓေါ စ၊ ပရိဝါရေန အတ္ထိကော၊

ပါပုဏိ မဟတိံ ဘူမိံ၊ ရာဇာသိ သဗ္ဗဒါဌိနံ.

၁၈၃. ဧဝမေဝ မနုဿေသု၊ ယော ဟောတိ ပရိဝါရဝါ၊

သော ဟိ တတ္ထ မဟာ ဟောတိ၊ သိင်္ဂါလော ဝိယ ဒါဌိနန္တိ.

သဗ္ဗဒါဌိဇာတကံ ပဌမံ.

၂၄၂. သုနခဇာတကံ (၂-၁၀-၂)

၁၈၄. ဗာလော ဝတာယံ သုနခေါ၊ ယော ဝရတ္တံ [ယော စ ယောတ္တံ (က.)] န ခါဒတိ၊

ဗန္ဓနာ စ ပမုဉ္စေယျ၊ အသိတော စ ဃရံ ဝဇေ.

၁၈၅. အဋ္ဌိတံ မေ မနသ္မိံ မေ၊ အထော မေ ဟဒယေ ကတံ၊

ကာလဉ္စ ပဋိကင်္ခါမိ၊ ယာဝ ပဿုပတူ ဇနော [ပသုပတုဇ္ဇနော (သျာ. က.)].

သုနခဇာတကံ ဒုတိယံ.

၂၄၃. ဂုတ္တိလဇာတကံ (၂-၁၀-၃)

၁၈၆. သတ္တတန္တိံ သုမဓုရံ၊ ရာမဏေယျံ အဝါစယိံ၊

သော မံ ရင်္ဂမှိ အဝှေတိ၊ သရဏံ မေ ဟောဟိ ကောသိယ.

၁၈၇. အဟံ တံ သရဏံ သမ္မ [အဟံ တေ သရဏံ ဟောမိ (ဝိ. ဝ. ၃၂၈)]၊ အဟမာစရိယပူဇကော၊

န တံ ဇယိဿတိ သိဿော၊ သိဿမာစရိယ ဇေဿသီတိ.

ဂုတ္တိလဇာတကံ တတိယံ.

၂၄၄. ဝိဂတိစ္ဆဇာတကံ (၂-၁၀-၄)

၁၈၈. ယံ ပဿတိ န တံ ဣစ္ဆတိ၊ ယဉ္စ န ပဿတိ တံ ကိရိစ္ဆတိ၊

မညာမိ စိရံ စရိဿတိ၊ န ဟိ တံ လစ္ဆတိ ယံ သ ဣစ္ဆတိ.

၁၈၉. ယံ လဘတိ န တေန တုဿတိ၊ ယဉ္စ ပတ္ထေတိ လဒ္ဓံ ဟီဠေတိ၊

ဣစ္ဆာ ဟိ အနန္တဂေါစရာ၊ ဝိဂတိစ္ဆာန [ဝီတိစ္ဆာနံ (သီ. ပီ.)] နမော ကရောမသေတိ.

ဝိဂတိစ္ဆ [ဝီတိစ္ဆ (သီ. ပီ.)] ဇာတကံ စတုတ္ထံ.

၂၄၅. မူလပရိယာယဇာတကံ (၂-၁၀-၅)

၁၉၀. ကာလော ဃသတိ ဘူတာနိ၊ သဗ္ဗာနေဝ သဟတ္တနာ၊

ယော စ ကာလဃသော ဘူတော၊ သ ဘူတပစနိံ ပစိ.

၁၉၁. ဗဟူနိ နရသီသာနိ၊ လောမသာနိ ဗြဟာနိ စ၊

ဂီဝါသု ပဋိမုက္ကာနိ၊ ကောစိဒေဝေတ္ထ ကဏ္ဏဝါတိ.

မူလပရိယာယဇာတကံ ပဉ္စမံ.

၂၄၆. ဗာလောဝါဒဇာတကံ (၂-၁၀-၆)

၁၉၂. ဟန္တွာ ဆေတွာ [ဈတွာ (သီ. ပီ.)၊ ဃတွာ (သျာ.)] ဝဓိတွာ စ၊ ဒေတိ ဒါနံ အသညတော၊

ဧဒိသံ ဘတ္တံ ဘုဉ္ဇမာနော၊ သ ပါပမုပလိမ္ပတိ [သ ပါပေန ဥပလိပ္ပတိ (သီ. ပီ.)].

၁၉၃. ပုတ္တဒါရမ္ပိ စေ ဟန္တွာ၊ ဒေတိ ဒါနံ အသညတော၊

ဘုဉ္ဇမာနောပိ သပ္ပညော၊ န ပါပမုပလိမ္ပတီတိ.

ဗာလောဝါဒဇာတကံ ဆဋ္ဌံ.

၂၄၇. ပါဒဉ္ဇလီဇာတကံ (၂-၁၀-၇)

၁၉၄. အဒ္ဓါ ပါဒဉ္ဇလီ သဗ္ဗေ၊ ပညာယ အတိရောစတိ၊

တထာ ဟိ ဩဋ္ဌံ ဘဉ္ဇတိ၊ ဥတ္တရိံ နူန ပဿတိ.

၁၉၅. နာယံ ဓမ္မံ အဓမ္မံ ဝါ၊ အတ္ထာနတ္ထဉ္စ ဗုဇ္ဈတိ၊

အညတြ ဩဋ္ဌနိဗ္ဘောဂါ၊ နာယံ ဇာနာတိ ကိဉ္စနန္တိ.

ပါဒဉ္ဇလီဇာတကံ သတ္တမံ.

၂၄၈. ကိံသုကောပမဇာတကံ (၂-၁၀-၈)

၁၉၆. သဗ္ဗေဟိ ကိံသုကော ဒိဋ္ဌော၊ ကိံနွေတ္ထ ဝိစိကိစ္ဆထ၊

န ဟိ သဗ္ဗေသု ဌာနေသု၊ သာရထီ ပရိပုစ္ဆိတော.

၁၉၇. ဧဝံ သဗ္ဗေဟိ ဉာဏေဟိ၊ ယေသံ ဓမ္မာ အဇာနိတာ၊

တေ ဝေ ဓမ္မေသု ကင်္ခန္တိ၊ ကိံသုကသ္မိံဝ ဘာတရောတိ.

ကိံသုကောပမဇာတကံ အဋ္ဌမံ.

၂၄၉. သာလကဇာတကံ (၂-၁၀-၉)

၁၉၈. ဧကပုတ္တကော ဘဝိဿသိ၊ တွဉ္စ နော ဟေဿသိ ဣဿရော ကုလေ၊

ဩရောဟ ဒုမသ္မာ သာလက၊ ဧဟိ ဒါနိ ဃရကံ ဝဇေမသေ.

၁၉၉. နနု မံ သုဟဒယောတိ [နနု မံ ဟဒယေတိ (သီ. ပီ.)] မညသိ၊ ယဉ္စ မံ ဟနသိ ဝေဠုယဋ္ဌိယာ၊

ပက္ကမ္ဗဝနေ ရမာမသေ၊ ဂစ္ဆ တွံ ဃရကံ ယထာသုခန္တိ.

သာလကဇာတကံ နဝမံ.

၂၅၀. ကပိဇာတကံ (၂-၁၀-၁၀)

၂၀၀. အယံ ဣသီ ဥပသမသံယမေ ရတော၊ သ တိဋ္ဌတိ [သန္တိဋ္ဌတိ (သီ. ပီ.)] သိသိရဘယေန အဋ္ဋိတော၊

ဟန္ဒ အယံ ပဝိသတုမံ အဂါရကံ၊ ဝိနေတု သီတံ ဒရထဉ္စ ကေဝလံ.

၂၀၁. နာယံ ဣသီ ဥပသမသံယမေ ရတော၊ ကပီ အယံ ဒုမဝရသာခဂေါစရော၊

သော ဒူသကော ရောသကော စာပိ ဇမ္မော၊ သစေဝဇေမမ္ပိ [သစေ + အာဝဇေ + ဣမမ္ပိ] ဒူသေယျဂါရန္တိ [ဒူသယေ ဃရန္တိ (သီ. သျာ. ပီ.)].

ကပိဇာတကံ ဒသမံ.

သိင်္ဂါလဝဂ္ဂေါ ဒသမော.

တဿုဒ္ဒါနံ –

အထ ရာဇာ သိင်္ဂါလဝရော သုနခေါ၊ တထာ ကောသိယ ဣစ္ဆတိ ကာလဃသော၊

အထ ဒါနဝရောဋ္ဌပိ သာရထိနာ၊ ပုနမ္ဗဝနဉ္စ သိသိရကပိ ဒသာတိ.

အထ ဝဂ္ဂုဒ္ဒါနံ –

ဒဠှဉ္စ ဝဂ္ဂံ အပရေန သန္ထဝံ၊ ကလျာဏဝဂ္ဂါသဒိသော စ ရူဟကံ၊

နတံဒဠှ ဗီရဏထမ္ဘကံ ပုန၊ ကာသာဝုပါဟန သိင်္ဂါလကေန ဒသာတိ.

ဒုကနိပါတံ နိဋ္ဌိတံ.