၉. ဥပါဟနဝဂ္ဂေါ

၂၃၁. ဥပါဟနဇာတကံ (၂-၉-၁)

၁၆၁. ယထာပိ ကီတာ ပုရိသဿုပါဟနာ၊ သုခဿ အတ္ထာယ ဒုခံ ဥဒဗ္ဗဟေ၊

ဃမ္မာဘိတတ္တာ ထလသာ ပပီဠိတာ၊ တဿေဝ ပါဒေ ပုရိသဿ ခါဒရေ.

၁၆၂. ဧဝမေဝ ယော ဒုက္ကုလီနော အနရိယော၊ တမ္မာက [တမှာက (သီ.)၊ တုမှာက (သျာ. ပီ.)] ဝိဇ္ဇဉ္စ သုတဉ္စ အာဒိယ၊

တမေဝ သော တတ္ထ သုတေန ခါဒတိ၊ အနရိယော ဝုစ္စတိ ဒုပါဟနူပမောတိ [ပါနဒူပမောတိ (သီ. ပီ.)].

ဥပါဟနဇာတကံ ပဌမံ.

၂၃၂. ဝီဏာဂုဏဇာတကံ (၂-၉-၂)

၁၆၃. ဧကစိန္တိတော ယမတ္ထော၊ ဗာလော အပရိဏာယကော၊

န ဟိ ခုဇ္ဇေန ဝါမေန၊ ဘောတိ သင်္ဂန္တုမရဟသိ.

၁၆၄. ပုရိသူသဘံ မညမာနာ၊ အဟံ ခုဇ္ဇမကာမယိံ၊

သောယံ သံကုဋိတော သေတိ၊ ဆိန္နတန္တိ ယထာ ဝိဏာတိ [ထုဏာတိ (သီ.)].

ဝီဏာဂုဏဇာတကံ ဒုတိယံ.

၂၃၃. ဝိကဏ္ဏဇာတကံ (၂-၉-၃)

၁၆၅. ကာမံ ယဟိံ ဣစ္ဆသိ တေန ဂစ္ဆ၊ ဝိဒ္ဓေါသိ မမ္မမှိ [မမသ္မိ (က.)] ဝိကဏ္ဏကေန၊

ဟတောသိ ဘတ္တေန သုဝါဒိတေန [သဝါဒိတေန (သီ. သျာ. ပီ.)]၊ လောလော စ မစ္ဆေ အနုဗန္ဓမာနော.

၁၆၆. ဧဝမ္ပိ လောကာမိသံ ဩပတန္တော၊ ဝိဟညတီ စိတ္တဝသာနုဝတ္တီ၊

သော ဟညတိ ဉာတိသခါန မဇ္ဈေ၊ မစ္ဆာနုဂေါ သောရိဝ သုံသုမာရောတိ [သုသုမာရော (က.)].

ဝိကဏ္ဏဇာတကံ တတိယံ.

၂၃၄. အသိတာဘူဇာတကံ (၂-၉-၄)

၁၆၇. တွမေဝ ဒါနိမကရ [မကရိ (သျာ.)၊ မကရာ (က. သီ.)]၊ ယံ ကာမော ဗျဂမာ တယိ၊

သောယံ အပ္ပဋိသန္ဓိကော၊ ခရဆိန္နံဝ ရေနုကံ [ရေရုကံ (သီ. ပီ.)].

၁၆၈. အတြိစ္ဆံ [အတြိစ္ဆာ (သီ. သျာ. ပီ.)] အတိလောဘေန၊ အတိလောဘမဒေန စ၊

ဧဝံ ဟာယတိ အတ္ထမှာ၊ အဟံဝ အသိတာဘုယာတိ.

အသိတာဘူဇာတကံ စတုတ္ထံ.

၂၃၅. ဝစ္ဆနခဇာတကံ (၂-၉-၅)

၁၆၉. သုခါ ဃရာ ဝစ္ဆနခ၊ သဟိရညာ သဘောဇနာ၊

ယတ္ထ ဘုတွာ ပိဝိတွာ စ၊ သယေယျာထ အနုဿုကော.

၁၇၀. ဃရာ နာနီဟမာနဿ၊ ဃရာ နာဘဏတော မုသာ၊

ဃရာ နာဒိန္နဒဏ္ဍဿ၊ ပရေသံ အနိကုဗ္ဗတော [အနိကြုဗ္ဗတော (က.)]၊

ဧဝံ ဆိဒ္ဒံ ဒုရဘိသမ္ဘဝံ [ဒုရဘိဘဝံ (သီ. ပီ.)]၊ ကော ဃရံ ပဋိပဇ္ဇတီတိ.

ဝစ္ဆနခဇာတကံ ပဉ္စမံ.

၂၃၆. ဗကဇာတကံ (၂-၉-၆)

၁၇၁. ဘဒ္ဒကော ဝတယံ ပက္ခီ၊ ဒိဇော ကုမုဒသန္နိဘော၊

ဝူပသန္တေဟိ ပက္ခေဟိ၊ မန္ဒမန္ဒောဝ ဈာယတိ.

၁၇၂. နာဿ သီလံ ဝိဇာနာထ၊ အနညာယ ပသံသထ၊

အမှေ ဒိဇော န ပါလေတိ၊ တေန ပက္ခီ န ဖန္ဒတီတိ.

ဗကဇာတကံ ဆဋ္ဌံ.

၂၃၇. သာကေတဇာတကံ (၂-၉-၇)

၁၇၃. ကော နု ခေါ ဘဂဝါ ဟေတု၊ ဧကစ္စေ ဣဓ ပုဂ္ဂလေ၊

အတီဝ ဟဒယံ နိဗ္ဗာတိ၊ စိတ္တဉ္စာပိ ပသီဒတိ.

၁၇၄. ပုဗ္ဗေဝ သန္နိဝါသေန၊ ပစ္စုပ္ပန္နဟိတေန ဝါ၊

ဧဝံ တံ ဇာယတေ ပေမံ၊ ဥပ္ပလံဝ ယထောဒကေတိ.

သာကေတဇာတကံ သတ္တမံ.

၂၃၈. ဧကပဒဇာတကံ (၂-၉-၈)

၁၇၅. ဣင်္ဃ ဧကပဒံ တာတ၊ အနေကတ္ထပဒဿိတံ [ပဒနိဿိတံ (သီ. ပီ.)]၊

ကိဉ္စိ သင်္ဂါဟိကံ ဗြူသိ၊ ယေနတ္ထေ သာဓယေမသေ.

၁၇၆. ဒက္ခေယျေကပဒံ တာတ၊ အနေကတ္ထပဒဿိတံ၊

တဉ္စ သီလေန သညုတ္တံ၊ ခန္တိယာ ဥပပါဒိတံ၊

အလံ မိတ္တေ သုခါပေတုံ၊ အမိတ္တာနံ ဒုခါယ စာတိ.

ဧကပဒဇာတကံ အဋ္ဌမံ.

၂၃၉. ဟရိတမဏ္ဍူကဇာတကံ (၂-၉-၉)

၁၇၇. အာသီဝိသမ္ပိ မံ [အာသီဝိသံ မမံ (သီ. ပီ.)] သန္တံ၊ ပဝိဋ္ဌံ ကုမိနာမုခံ၊

ရုစ္စတေ ဟရိတာမာတာ၊ ယံ မံ ခါဒန္တိ မစ္ဆကာ.

၁၇၈. ဝိလုမ္ပတေဝ ပုရိသော၊ ယာဝဿ ဥပကပ္ပတိ၊

ယဒါ စညေ ဝိလုမ္ပန္တိ၊ သော ဝိလုတ္တော ဝိလုမ္ပတီတိ [ဝိလုပ္ပတီတိ (?)].

ဟရိတမဏ္ဍူကဇာတကံ နဝမံ.

၂၄၀. မဟာပိင်္ဂလဇာတကံ (၂-၉-၁၀)

၁၇၉. သဗ္ဗော ဇနော ဟိံသိတော ပိင်္ဂလေန၊ တသ္မိံ မတေ ပစ္စယာ [ပစ္စယံ (သီ. သျာ. ပီ.)] ဝေဒယန္တိ၊

ပိယော နု တေ အာသိ အကဏှနေတ္တော၊ ကသ္မာ နု တွံ ရောဒသိ ဒွါရပါလ.

၁၈၀. န မေ ပိယော အာသိ အကဏှနေတ္တော၊ ဘာယာမိ ပစ္စာဂမနာယ တဿ၊

ဣတော ဂတော ဟိံသေယျ မစ္စုရာဇံ၊ သော ဟိံသိတော အာနေယျ ပုန ဣဓ.

၁၈၁. ဒဍ္ဎော ဝါဟသဟဿေဟိ၊ သိတ္တော ဃဋသတေဟိ သော၊

ပရိက္ခတာ စ သာ ဘူမိ၊ မာ ဘာယိ နာဂမိဿတီတိ.

မဟာပိင်္ဂလဇာတကံ ဒသမံ.

ဥပါဟနဝဂ္ဂေါ နဝမော.

တဿုဒ္ဒါနံ –

ဝရုပါဟန ခုဇ္ဇ ဝိကဏ္ဏကကော၊ အသိတာဘုယ ပဉ္စမဝစ္ဆနခေါ၊

ဒိဇ ပေမဝရုတ္တမဧကပဒံ၊ ကုမိနာမုခ ပိင်္ဂလကေန ဒသာတိ.