၅၁၉. သမ္ဗုလာဇာတကံ (၉)
၂၉၇. ကာ ဝေဓမာနာ ဂိရိကန္ဒရာယံ၊ ဧကာ တုဝံ တိဋ္ဌသိ သံဟိတူရု [သညတူရ (သီ. ပီ.)၊ သဉ္စိတူရု (သျာ.)]၊
ပုဋ္ဌာသိ မေ ပါဏိပမေယျမဇ္ဈေ၊ အက္ခာဟိ မေ နာမဉ္စ ဗန္ဓဝေ စ.
၂၉၈. ဩဘာသယံ ဝနံ ရမ္မံ၊ သီဟဗျဂ္ဃနိသေဝိတံ၊
ကာ ဝါ တွမသိ ကလျာဏိ၊ ကဿ ဝါ တွံ သုမဇ္ဈိမေ၊
အဘိဝါဒေမိ တံ ဘဒ္ဒေ၊ ဒါနဝါဟံ နမတ္ထု တေ.
၂၉၉. ယော ပုတ္တော ကာသိရာဇဿ၊ သောတ္ထိသေနောတိ တံ ဝိဒူ၊
တဿာဟံ သမ္ဗုလာ ဘရိယာ၊ ဧဝံ ဇာနာဟိ ဒါနဝ၊
အဘိဝါဒေမိ တံ ဘန္တေ [ဘဒ္ဒန္တေ (သီ. သျာ.)]၊ သမ္ဗုလာဟံ နမတ္ထု တေ.
၃၀၀. ဝေဒေဟပုတ္တော ဘဒ္ဒန္တေ၊ ဝနေ ဝသတိ အာတုရော၊
တမဟံ ရောဂသမ္မတ္တံ၊ ဧကာ ဧကံ ဥပဋ္ဌဟံ [ဥပဋ္ဌဟိံ (သီ.)].
၃၀၁. အဟဉ္စ ဝနမုဉ္ဆာယ၊ မဓုမံသံ မိဂါဗိလံ [မိဂါဝိလံ (သီ.)]၊
ယဒါ ဟရာမိ တံ ဘက္ခော၊ တဿ နူနဇ္ဇ နာဓတိ [နာထတိ (က.)].
၃၀၂. ကိံ ဝနေ ရာဇပုတ္တေန၊ အာတုရေန ကရိဿသိ၊
သမ္ဗုလေ ပရိစိဏ္ဏေန၊ အဟံ ဘတ္တာ ဘဝါမိ တေ.
၃၀၃. သောကဋ္ဋာယ ဒုရတ္တာယ၊ ကိံ ရူပံ ဝိဇ္ဇတေ မမ၊
အညံ ပရိယေသ ဘဒ္ဒန္တေ၊ အဘိရူပတရံ မယာ.
၃၀၄. ဧဟိမံ ဂိရိမာရုယှ၊ ဘရိယာ မေ [မယှံ (သီ. သျာ. ပီ.)] စတုဿတာ၊
တာသံ တွံ ပဝရာ ဟောဟိ၊ သဗ္ဗကာမသမိဒ္ဓိနီ.
၃၀၅. နူန [နနု (သီ. သျာ. ပီ. က.)] တာရကဝဏ္ဏာဘေ [ဟာဋကဝဏ္ဏာဘေ (ပီ.)]၊ ယံ ကိဉ္စိ မနသိစ္ဆသိ၊
သဗ္ဗံ တံ ပစုရံ မယှံ၊ ရမဿွဇ္ဇ [ရမသုဇ္ဇ (သီ. သျာ.)] မယာ သဟ.
၃၀၆. နော စေ တုဝံ မဟေသေယျံ၊ သမ္ဗုလေ ကာရယိဿသိ၊
အလံ တွံ ပါတရာသာယ၊ ပဏှေ [မညေ (သီ. ပီ.)] ဘက္ခာ ဘဝိဿသိ.
၃၀၇. တဉ္စ သတ္တဇဋော လုဒ္ဒေါ၊ ကဠာရော ပုရိသာဒကော၊
ဝနေ နာထံ အပဿန္တိံ၊ သမ္ဗုလံ အဂ္ဂဟီ ဘုဇေ.
၃၀၈. အဓိပန္နာ ပိသာစေန၊ လုဒ္ဒေနာမိသစက္ခုနာ၊
သာ စ သတ္တုဝသမ္ပတ္တာ၊ ပတိမေဝါနုသောစတိ.
၃၀၉. န မေ ဣဒံ တထာ ဒုက္ခံ၊ ယံ မံ ခါဒေယျ ရက္ခသော၊
ယဉ္စ မေ အယျပုတ္တဿ၊ မနော ဟေဿတိ အညထာ.
၃၁၀. န သန္တိ ဒေဝါ ပဝသန္တိ နူန၊ န ဟိ နူန သန္တိ ဣဓ လောကပါလာ၊
သဟသာ ကရောန္တာနမသညတာနံ၊ န ဟိ နူန သန္တိ ပဋိသေဓိတာရော.
၃၁၁. ဣတ္ထီနမေသာ ပဝရာ ယသဿိနီ၊ သန္တာ သမာ အဂ္ဂိရိဝုဂ္ဂတေဇာ၊
တဉ္စေ တုဝံ ရက္ခသာဒေသိ ကညံ၊ မုဒ္ဓါ စ ဟိ သတ္တဓာ တေ ဖလေယျ၊
မာ တွံ ဒဟီ [ဇဟီ (ပီ.)] မုဉ္စ ပတိဗ္ဗတာယ [ပတိဗ္ဗတာ သာ (သီ.)၊ ပတိဗ္ဗတာ ယာ (ပီ.)].
၃၁၂. သာ စ အဿမမာဂစ္ဆိ၊ ပမုတ္တာ ပုရိသာဒကာ၊
နီဠံ [နိဍ္ဍံ (သျာ. က.)] ပဠိနံ သကုဏီဝ [ဖလိနသကုဏီဝ (သီ. သျာ. ပီ.)]၊ ဂတသိင်္ဂံဝ အာလယံ.
၃၁၃. သာ တတ္ထ ပရိဒေဝေသိ၊ ရာဇပုတ္တီ ယသဿိနီ၊
သမ္ဗုလာ ဥတုမတ္တက္ခာ၊ ဝနေ နာထံ အပဿန္တီ [အပဿတီ (သီ.)].
၃၁၄. သမဏေ ဗြာဟ္မဏေ ဝန္ဒေ၊ သမ္ပန္နစရဏေ ဣသေ၊
ရာဇပုတ္တံ အပဿန္တီ၊ တုမှံမှိ [တုမှံ ဟိ (ပီ.)] သရဏံ ဂတာ.
၃၁၅. ဝန္ဒေ သီဟေ စ ဗျဂ္ဃေ စ၊ ယေ စ အညေ ဝနေ မိဂါ၊
ရာဇပုတ္တံ အပဿန္တီ၊ တုမှံမှိ သရဏံ ဂတာ.
၃၁၆. တိဏာ [တိဏ (ပီ.)] လတာနိ ဩသဓျော၊ ပဗ္ဗတာနိ ဝနာနိ စ၊
ရာဇပုတ္တံ အပဿန္တီ၊ တုမှံမှိ သရဏံ ဂတာ.
၃၁၇. ဝန္ဒေ ဣန္ဒီဝရီသာမံ၊ ရတ္တိံ နက္ခတ္တမာလိနိံ၊
ရာဇပုတ္တံ အပဿန္တီ၊ တုမှံမှိ သရဏံ ဂတာ.
၃၁၈. ဝန္ဒေ ဘာဂီရထိံ ဂင်္ဂံ၊ သဝန္တီနံ ပဋိဂ္ဂဟံ၊
ရာဇပုတ္တံ အပဿန္တီ၊ တုမှံမှိ သရဏံ ဂတာ.
၃၁၉. ဝန္ဒေ အဟံ ပဗ္ဗတရာဇသေဋ္ဌံ၊ ဟိမဝန္တံ သိလုစ္စယံ၊
ရာဇပုတ္တံ အပဿန္တီ၊ တုမှံမှိ သရဏံ ဂတာ.
၃၂၀. အတိသာယံ ဝတာဂစ္ဆိ၊ ရာဇပုတ္တိ ယသဿိနိ၊
ကေန နုဇ္ဇ သမာဂစ္ဆိ [သမာဂစ္ဆိ (သီ. ပီ.)]၊ ကော တေ ပိယတရော မယာ.
၃၂၁. ဣဒံ ခေါဟံ တဒါဝေါစံ [တဒဝေါစံ (သီ. သျာ.)]၊ ဂဟိတာ တေန သတ္တုနာ၊
န မေ ဣဒံ တထာ ဒုက္ခံ၊ ယံ မံ ခါဒေယျ ရက္ခသော၊
ယဉ္စ မေ အယျပုတ္တဿ၊ မနော ဟေဿတိ အညထာ.
၃၂၂. စောရီနံ ဗဟုဗုဒ္ဓီနံ၊ ယာသု သစ္စံ သုဒုလ္လဘံ၊
ထီနံ ဘာဝေါ ဒုရာဇာနော၊ မစ္ဆဿေဝေါဒကေ ဂတံ.
၃၂၃. တထာ မံ သစ္စံ ပါလေတု၊ ပါလယိဿတိ စေ မမံ၊
ယထာဟံ နာဘိဇာနာမိ၊ အညံ ပိယတရံ တယာ၊
ဧတေန သစ္စဝဇ္ဇေန၊ ဗျာဓိ တေ ဝူပသမ္မတု.
၃၂၄. ယေ ကုဉ္ဇရာ သတ္တသတာ ဥဠာရာ၊ ရက္ခန္တိ ရတ္တိန္ဒိဝမုယျုတာဝုဓာ၊
ဓနုဂ္ဂဟာနဉ္စ သတာနိ သောဠသ၊ ကထံဝိဓေ ပဿသိ ဘဒ္ဒေ သတ္တဝေါ.
၃၂၅. အလင်္ကတာယော ပဒုမုတ္တရတ္တစာ၊ ဝိရာဂိတာ ပဿတိ ဟံသဂဂ္ဂရာ၊
တာသံ သုဏိတွာ မိတဂီတဝါဒိတံ [မိတဂီတဝါဒိနံ (ပီ.)]၊ န ဒါနိ မေ တာတ တထာ ယထာ ပုရေ.
၃၂၆. သုဝဏ္ဏသံကစ္စဓရာ သုဝိဂ္ဂဟာ၊ အလင်္ကတာ မာနုသိယစ္ဆရူပမာ၊
သေနောပိယာ [သေနူပိယာ (ပီ.)] တာတ အနိန္ဒိတင်္ဂိယော၊ ခတ္တိယကညာ ပဋိလောဘယန္တိ [ပဋိလာဘယန္တိ (ပီ.)] နံ.
၃၂၇. သစေ အဟံ တာတ တထာ ယထာ ပုရေ၊ ပတိံ တမုဉ္ဆာယ ပုနာ ဝနေ ဘရေ၊
သမ္မာနယေ မံ န စ မံ ဝိမာနယေ၊ ဣတောပိ မေ တာတ တတော ဝရံ သိယာ.
၃၂၈. ယမန္နပါနေ ဝိပုလသ္မိ ဩဟိတေ၊ နာရီ ဝိမဋ္ဌာဘရဏာ အလင်္ကတာ၊
သဗ္ဗင်္ဂုပေတာ [ပဉ္စင်္ဂုပေတာ (သီ. သျာ. ပီ.)] ပတိနော စ အပ္ပိယာ၊ အဗဇ္ဈ [အဝဇ္ဈ (သျာ.)၊ အာဗဇ္ဈ (ပီ.)] တဿာ မရဏံ တတော ဝရံ.
၃၂၉. အပိ စေ ဒလိဒ္ဒါ ကပဏာ အနာဠှိယာ၊ ကဋာဒုတီယာ ပတိနော စ သာ ပိယာ၊
သဗ္ဗင်္ဂုပေတာယပိ အပ္ပိယာယ၊ အယမေဝ သေယျာ [သေယျော (သျာ. က.)] ကပဏာပိ ယာ ပိယာ [ကပဏာပိ ယာ (က.)].
၃၃၀. သုဒုလ္လဘိတ္ထီ ပုရိသဿ ယာ ဟိတာ၊ ဘတ္တိတ္ထိယာ ဒုလ္လဘော ယော ဟိတော စ၊
ဟိတာ စ တေ သီလဝတီ စ ဘရိယာ၊ ဇနိန္ဒ ဓမ္မံ စရ သမ္ဗုလာယ.
၃၃၁. သစေ တုဝံ ဝိပုလေ လဒ္ဓဘောဂေ၊ ဣဿာဝတိဏ္ဏာ မရဏံ ဥပေသိ၊
အဟဉ္စ တေ ဘဒ္ဒေ ဣမာ ရာဇကညာ [ဣမာ စ ကညာ (ပီ.)]၊ သဗ္ဗေ [သဗ္ဗေဝ (သီ. သျာ. ပီ.)] တေ ဝစနကရာ ဘဝါမာတိ.
သမ္ဗုလာဇာတကံ နဝမံ.