၅၂၀. ဂန္ဓတိန္ဒုကဇာတကံ (၁၀)
၃၃၂. အပ္ပမာဒေါ အမတံ ပဒံ [အမတပဒံ (သီ. ပီ.)]၊ ပမာဒေါ မစ္စုနော ပဒံ၊
အပ္ပမတ္တာ န မီယန္တိ၊ ယေ ပမတ္တာ ယထာ မတာ.
၃၃၃. မဒါ ပမာဒေါ ဇာယေထ၊ ပမာဒါ ဇာယတေ ခယော၊
ခယာ ပဒေါသာ [ခယာ စ ဒေါသာ (သီ.)] ဇာယန္တိ၊ မာ ပမာဒေါ [မာ မဒေါ (သီ. သျာ. ပီ.)] ဘရတူသဘ [ဘာရဓူသဘ (က.)].
၃၃၄. ဗဟူ ဟိ ခတ္တိယာ ဇီနာ၊ အတ္ထံ ရဋ္ဌံ ပမာဒိနော၊
အထောပိ ဂါမိနော ဂါမာ၊ အနဂါရာ အဂါရိနော.
၃၃၅. ခတ္တိယဿ ပမတ္တဿ၊ ရဋ္ဌသ္မိံ ရဋ္ဌဝဍ္ဎန၊
သဗ္ဗေ ဘောဂါ ဝိနဿန္တိ၊ ရညော တံ ဝုစ္စတေ အဃံ.
၃၃၆. နေသ ဓမ္မော မဟာရာဇ၊ အတိဝေလံ ပမဇ္ဇသိ၊
ဣဒ္ဓံ ဖီတံ ဇနပဒံ၊ စောရာ ဝိဒ္ဓံသယန္တိ နံ.
၃၃၇. န တေ ပုတ္တာ ဘဝိဿန္တိ၊ န ဟိရညံ န ဓာနိယံ [န ဟိရညနိဓာနိယာ (က.)]၊
ရဋ္ဌေ ဝိလုပ္ပမာနမှိ၊ သဗ္ဗဘောဂေဟိ ဇိယျသိ.
၃၃၈. သဗ္ဗဘောဂါ ပရိဇိဏ္ဏံ၊ ရာဇာနံ ဝါပိ ခတ္တိယံ [ခတ္တိယ (က.)]၊
ဉာတိမိတ္တာ သုဟဇ္ဇာ စ၊ န တံ မညန္တိ မာနိယံ [မန္တိယံ (သျာ.)].
၃၃၉. ဟတ္ထာရောဟာ အနီကဋ္ဌာ၊ ရထိကာ ပတ္တိကာရကာ၊
တမေဝမုပဇီဝန္တာ၊ န တံ မညန္တိ မာနိယံ.
၃၄၀. အသံဝိဟိတကမ္မန္တံ၊ ဗာလံ ဒုမ္မန္တိမန္တိနံ၊
သိရီ ဇဟတိ ဒုမ္မေဓံ၊ ဇိဏ္ဏံဝ ဥရဂေါ တစံ.
၃၄၁. သုသံဝိဟိတကမ္မန္တံ၊ ကာလုဋ္ဌာယိံ အတန္ဒိတံ၊
သဗ္ဗေ ဘောဂါဘိဝဍ္ဎန္တိ၊ ဂါဝေါ သဥသဘာမိဝ.
၃၄၂. ဥပဿုတိံ မဟာရာဇ၊ ရဋ္ဌေ ဇနပဒေ စရ၊
တတ္ထ ဒိသွာ စ သုတွာ စ၊ တတော တံ [တွံ (က.)] ပဋိပဇ္ဇသိ.
၃၄၃. ဧဝံ ဝေဒေတု ပဉ္စာလော၊ သင်္ဂါမေ သရမပ္ပိတော [သမပ္ပိတော (သီ. ပီ.)]၊
ယထာဟမဇ္ဇ ဝေဒေမိ၊ ကဏ္ဋကေန သမပ္ပိတော.
၃၄၄. ဇိဏ္ဏော ဒုဗ္ဗလစက္ခူသိ၊ န ရူပံ သာဓု ပဿသိ၊
ကိံ တတ္ထ ဗြဟ္မဒတ္တဿ၊ ယံ တံ မဂ္ဂေယျ [မဂ္ဃေယျ (ပီ.)] ကဏ္ဋကော [ကဏ္ဍကော (သီ. သျာ. ပီ.)].
၃၄၅. ဗဟွေတ္ထ ဗြဟ္မဒတ္တဿ၊ သောဟံ [ယောဟံ (သီ. သျာ. ပီ.)] မဂ္ဂသ္မိ [မဂ္ဂေါသ္မိ (ပီ.)] ဗြာဟ္မဏ၊
အရက္ခိတာ ဇာနပဒါ၊ အဓမ္မဗလိနာ ဟတာ.
၃၄၆. ရတ္တိဉှိ [ရတ္တိဉ္စ (သီ.)] စောရာ ခါဒန္တိ၊ ဒိဝါ ခါဒန္တိ တုဏ္ဍိယာ၊
ရဋ္ဌသ္မိံ ကူဋရာဇဿ၊ ဗဟု အဓမ္မိကော ဇနော.
၃၄၇. ဧတာဒိသေ ဘယေ ဇာတေ [တာတ (သီ. ပီ.)]၊ ဘယဋ္ဋာ တာတ [တာဝ (သီ. ပီ.)] မာဏဝါ၊
နိလ္လေနကာနိ ကုဗ္ဗန္တိ၊ ဝနေ အာဟတွ ကဏ္ဋကံ.
၃၄၈. ကဒါဿု နာမယံ ရာဇာ၊ ဗြဟ္မဒတ္တော မရိဿတိ၊
ယဿ ရဋ္ဌမှိ ဇိယျန္တိ၊ အပ္ပတိကာ ကုမာရိကာ.
၃၄၉. ဒုဗ္ဘာသိတဉှိ တေ ဇမ္မိ၊ အနတ္ထပဒကောဝိဒေ၊
ကုဟိံ ရာဇာ ကုမာရီနံ၊ ဘတ္တာရံ ပရိယေသတိ.
၃၅၀. န မေ ဒုဗ္ဘာသိတံ ဗြဟ္မေ၊ ကောဝိဒတ္ထပဒါ အဟံ၊
အရက္ခိတာ ဇာနပဒါ၊ အဓမ္မဗလိနာ ဟတာ.
၃၅၁. ရတ္တိဉှိ စောရာ ခါဒန္တိ၊ ဒိဝါ ခါဒန္တိ တုဏ္ဍိယာ၊
ရဋ္ဌသ္မိံ ကူဋရာဇဿ၊ ဗဟု အဓမ္မိကော ဇနော၊
ဒုဇ္ဇီဝေ ဒုဗ္ဘရေ ဒါရေ၊ ကုတော ဘတ္တာ ကုမာရိယော.
၃၅၂. ဧဝံ သယတု ပဉ္စာလော၊ သင်္ဂါမေ သတ္တိယာ ဟတော၊
ယထာယံ ကပဏော သေတိ၊ ဟတော ဖာလေန သာလိယော.
၃၅၃. အဓမ္မေန တုဝံ ဇမ္မ၊ ဗြဟ္မဒတ္တဿ ကုဇ္ဈသိ၊
ယော တွံ သပသိ ရာဇာနံ၊ အပရဇ္ဈိတွာန အတ္တနော [အတ္တနာ (ပီ.)].
၃၅၄. ဓမ္မေန ဗြဟ္မဒတ္တဿ၊ အဟံ ကုဇ္ဈာမိ ဗြာဟ္မဏ၊
အရက္ခိတာ ဇာနပဒါ၊ အဓမ္မဗလိနာ ဟတာ.
၃၅၅. ရတ္တိဉှိ စောရာ ခါဒန္တိ၊ ဒိဝါ ခါဒန္တိ တုဏ္ဍိယာ၊
ရဋ္ဌသ္မိံ ကူဋရာဇဿ၊ ဗဟု အဓမ္မိကော ဇနော.
၃၅၆. သာ နူန ပုန ရေ ပက္ကာ၊ ဝိကာလေ ဘတ္တမာဟရိ၊
ဘတ္တဟာရိံ အပေက္ခန္တော၊ ဟတော ဖာလေန သာလိယော.
၃၅၇. ဧဝံ ဟညတု ပဉ္စာလော၊ သင်္ဂါမေ အသိနာ ဟတော [ဒဠှံ (ပီ.)]၊
ယထာဟမဇ္ဇ ပဟတော၊ ခီရဉ္စ မေ ပဝဋ္ဋိတံ.
၃၅၈. ယံ ပသု ခီရံ ဆဍ္ဍေတိ၊ ပသုပါလံ ဝိဟိံသတိ [ပသုပါလဉ္စ ဟိံသတိ (သီ.)၊ ပသု ဖာလဉ္စ ဟိံသတိ (ပီ.)]၊
ကိံ တတ္ထ ဗြဟ္မဒတ္တဿ၊ ယံ နော ဂရဟတေ [ဂရဟတော (ပီ.)] ဘဝံ.
၃၅၉. ဂါရယှော ဗြဟ္မေ ပဉ္စာလော၊ ဗြဟ္မဒတ္တဿ ရာဇိနော၊
အရက္ခိတာ ဇာနပဒါ၊ အဓမ္မဗလိနာ ဟတာ.
၃၆၀. ရတ္တိဉှိ စောရာ ခါဒန္တိ၊ ဒိဝါ ခါဒန္တိ တုဏ္ဍိယာ၊
ရဋ္ဌသ္မိံ ကူဋရာဇဿ၊ ဗဟု အဓမ္မိကော ဇနော.
၃၆၁. စဏ္ဍာ အဋနကာ [အဋနက (ပီ.)၊ အကဋနာ (က.)] ဂါဝီ၊ ယံ ပုရေ န ဒုဟာမသေ၊
တံ ဒါနိ အဇ္ဇ ဒေါဟာမ၊ ခီရကာမေဟုပဒ္ဒုတာ.
၃၆၂. ဧဝံ ကန္ဒတု ပဉ္စာလော၊ ဝိပုတ္တော ဝိပ္ပသုက္ခတု၊
ယထာယံ ကပဏာ ဂါဝီ၊ ဝိပုတ္တာ ပရိဓာဝတိ.
၃၆၃. ယံ ပသု ပသုပါလဿ၊ သမ္ဘမေယျ [ပဗ္ဘမေယျ (သီ. ပီ.)] ရဝေယျ ဝါ၊
ကော နီဓ အပရာဓတ္ထိ၊ ဗြဟ္မဒတ္တဿ ရာဇိနော.
၃၆၄. အပရာဓော မဟာဗြဟ္မေ၊ ဗြဟ္မဒတ္တဿ ရာဇိနော၊
အရက္ခိတာ ဇာနပဒါ၊ အဓမ္မဗလိနာ ဟတာ.
၃၆၅. ရတ္တိဉှိ စောရာ ခါဒန္တိ၊ ဒိဝါ ခါဒန္တိ တုဏ္ဍိယာ၊
ရဋ္ဌသ္မိံ ကူဋရာဇဿ၊ ဗဟု အဓမ္မိကော ဇနော၊
ကထံ နော အသိကောသတ္ထာ၊ ခီရပါ ဟညတေ ပဇာ.
၃၆၆. ဧဝံ ခဇ္ဇတု ပဉ္စာလော၊ ဟတော ယုဒ္ဓေ သပုတ္တကော၊
ယထာဟမဇ္ဇ ခဇ္ဇာမိ၊ ဂါမိကေဟိ [ဂါမကေဟိ (သီ. ပီ.)] အရညဇော.
၃၆၇. န သဗ္ဗဘူတေသု ဝိဓေန္တိ [ဝိဓန္တိ (က.)] ရက္ခံ၊ ရာဇာနော မဏ္ဍူက မနုဿလောကေ၊
နေတ္တာဝတာ ရာဇာ အဓမ္မစာရီ၊ ယံ တာဒိသံ ဇီဝမဒေယျု ဓင်္ကာ.
၃၆၈. အဓမ္မရူပေါ ဝတ ဗြဟ္မစာရီ၊ အနုပ္ပိယံ ဘာသသိ ခတ္တိယဿ၊
ဝိလုပ္ပမာနာယ ပုထုပ္ပဇာယ၊ ပူဇေသိ ရာဇံ ပရမပ္ပမာဒံ [ရာဇံ ပရမပ္ပဝါဒံ (သီ.)၊ ရာဇာ ပရမပ္ပဝါဒိံ (သျာ.)].
၃၆၉. သစေ ဣမံ ဗြဟ္မေ သုရဇ္ဇကံ သိယာ၊ ဖီတံ ရဋ္ဌံ မုဒိတံ [ပူရိတံ (က.)] ဝိပ္ပသန္နံ၊
ဘုတွာ ဗလိံ အဂ္ဂပိဏ္ဍဉ္စ ကာကာ၊ န မာဒိသံ ဇီဝမဒေယျု ဓင်္ကာတိ.
ဂန္ဓတိန္ဒုကဇာတကံ ဒသမံ.
တဿုဒ္ဒါနံ –
ကိံဆန္ဒ ကုမ္ဘ ဇယဒ္ဒိသ ဆဒ္ဒန္တ၊ အထ ပဏ္ဍိတသမ္ဘဝ သိရကပိ၊
ဒကရက္ခသ ပဏ္ဍရနာဂဝရော၊ အထ သမ္ဗုလ တိန္ဒုကဒေဝသုတောတိ.
တိံသနိပါတံ နိဋ္ဌိတံ.