၁၆. တိံသနိပါတော
၅၁၁. ကိံဆန္ဒဇာတကံ (၁)
၁. ကိံဆန္ဒော ကိမဓိပ္ပါယော၊ ဧကော သမ္မသိ ဃမ္မနိ၊
ကိံ ပတ္ထယာနော ကိံ ဧသံ၊ ကေန အတ္ထေန ဗြာဟ္မဏ.
၂. ယထာ မဟာ ဝါရိဓရော၊ ကုမ္ဘော သုပရိဏာဟဝါ [သုပရိဏာမဝါ (က.)]၊
တထူပမံ အမ္ဗပက္ကံ၊ ဝဏ္ဏဂန္ဓရသုတ္တမံ.
၃. တံ ဝုယှမာနံ သောတေန၊ ဒိသွာနာမလမဇ္ဈိမေ၊
ပါဏီဟိ နံ ဂဟေတွာန၊ အဂျာယတနမာဟရိံ.
၄. တတော ကဒလိပတ္တေသု၊ နိက္ခိပိတွာ သယံ အဟံ၊
သတ္ထေန နံ ဝိကပ္ပေတွာ၊ ခုပ္ပိပါသံ အဟာသိ မေ.
၅. သောဟံ အပေတဒရထော၊ ဗျန္တီဘူတော [ဗျန္တိဘူတော (သီ. ပီ. က.)] ဒုခက္ခမော၊
အဿာဒံ နာဓိဂစ္ဆာမိ၊ ဖလေသွညေသု ကေသုစိ [ကေသုပိ (က. သီ.)].
၆. သောသေတွာ နူန မရဏံ၊ တံ မမံ အာဝဟိဿတိ၊
အမ္ဗံ ယဿ ဖလံ သာဒု၊ မဓုရဂ္ဂံ မနောရမံ၊
ယမုဒ္ဓရိံ ဝုယှမာနံ၊ ဥဒဓိသ္မာ မဟဏ္ဏဝေ.
၇. အက္ခာတံ တေ မယာ သဗ္ဗံ၊ ယသ္မာ ဥပဝသာမဟံ၊
ရမ္မံ ပတိ နိသိန္နောသ္မိ၊ ပုထုလောမာယုတာ ပုထု.
၈. တွဉ္စ ခေါ မေဝ [မေ (သီ.)၊ မမ (?)] အက္ခာဟိ၊ အတ္တာနမပလာယိနိ၊
ကာ ဝါ တွမသိ ကလျာဏိ၊ ကိဿ ဝါ တွံ သုမဇ္ဈိမေ.
၉. ရုပ္ပပဋ္ဋပလိမဋ္ဌီဝ [ရုပ္ပပဋ္ဋပ္လမဋ္ဌီဝ (သျာ.)၊ ရူပပဋ္ဋပမဋ္ဌီဝ (က.)]၊ ဗျဂ္ဃီဝ ဂိရိသာနုဇာ၊
ယာ သန္တိ နာရိယော ဒေဝေသု၊ ဒေဝါနံ ပရိစာရိကာ.
၁၀. ယာ စ မနုဿလောကသ္မိံ၊ ရူပေနာနွာဂတိတ္ထိယော၊
ရူပေန တေ သဒိသီ နတ္ထိ၊ ဒေဝေသု ဂန္ဓဗ္ဗမနုဿလောကေ [ဒေဝဂန္ဓဗ္ဗမာနုသေ (သျာ.)]၊
ပုဋ္ဌာသိ မေ စာရုပုဗ္ဗင်္ဂိ၊ ဗြူဟိ နာမဉ္စ ဗန္ဓဝေ.
၁၁. ယံ တွံ ပတိ နိသိန္နောသိ၊ ရမ္မံ ဗြာဟ္မဏ ကောသိကိံ၊
သာဟံ ဘုသာလယာ ဝုတ္ထာ၊ ဝရဝါရိဝဟောဃသာ.
၁၂. နာနာဒုမဂဏာကိဏ္ဏာ၊ ဗဟုကာ ဂိရိကန္ဒရာ၊
မမေဝ ပမုခါ ဟောန္တိ၊ အဘိသန္ဒန္တိ ပါဝုသေ.
၁၃. အထော ဗဟူ ဝနတောဒါ၊ နီလဝါရိဝဟိန္ဓရာ၊
ဗဟုကာ နာဂဝိတ္တောဒါ၊ အဘိသန္ဒန္တိ ဝါရိနာ.
၁၄. တာ အမ္ဗဇမ္ဗုလဗုဇာ၊ နီပါ တာလာ စုဒုမ္ဗရာ [တာလမုဒုမ္ဗရာ (သျာ. က.)]၊
ဗဟူနိ ဖလဇာတာနိ၊ အာဝဟန္တိ အဘိဏှသော.
၁၅. ယံ ကိဉ္စိ ဥဘတော တီရေ၊ ဖလံ ပတတိ အမ္ဗုနိ၊
အသံသယံ တံ သောတဿ၊ ဖလံ ဟောတိ ဝသာနုဂံ.
၁၆. ဧတဒညာယ မေဓာဝိ၊ ပုထုပည သုဏောဟိ မေ၊
မာ ရောစယ မဘိသင်္ဂံ၊ ပဋိသေဓ ဇနာဓိပ.
၁၇. န ဝါဟံ ဝဍ္ဎဝံ [ဝဒ္ဓဝံ (သီ. ပီ.)] မညေ၊ ယံ တွံ ရဋ္ဌာဘိဝဍ္ဎန၊
အာစေယျမာနော ရာဇိသိ၊ မရဏံ အဘိကင်္ခသိ.
၁၈. တဿ ဇာနန္တိ ပိတရော၊ ဂန္ဓဗ္ဗာ စ သဒေဝကာ၊
ယေ စာပိ ဣသယော လောကေ၊ သညတတ္တာ တပဿိနော၊
အသံသယံ တေပိ [တေ (သီ. ပီ.)] ဇာနန္တိ၊ ပဋ္ဌဘူတာ [ဝဒ္ဓဘူတာ (သီ. ပီ.)] ယသဿိနော.
၁၉. ဧဝံ ဝိဒိတွာ ဝိဒူ သဗ္ဗဓမ္မံ၊ ဝိဒ္ဓံသနံ စဝနံ ဇီဝိတဿ၊
န စီယတီ တဿ နရဿ ပါပံ၊ သစေ န စေတေတိ ဝဓာယ တဿ.
၂၀. ဣသိပူဂသမညာတေ၊ ဧဝံ လောကျာ ဝိဒိတာ သတိ [ပတိ (က. သျာ. က.)]၊
အနရိယပရိသမ္ဘာသေ၊ ပါပကမ္မံ ဇိဂီသသိ [ဇိဂိံသသိ (သီ. သျာ. ပီ.)].
၂၁. သစေ အဟံ မရိဿာမိ၊ တီရေ တေ ပုထုသုဿောဏိ၊
အသံသယံ တံ အသိလောကော၊ မယိ ပေတေ အာဂမိဿတိ.
၂၂. တသ္မာ ဟိ ပါပကံ ကမ္မံ၊ ရက္ခဿေဝ [ရက္ခဿု စ (သျာ.)] သုမဇ္ဈိမေ၊
မာ တံ သဗ္ဗော ဇနော ပစ္ဆာ၊ ပကုဋ္ဌာယိ [ပကတ္ထာသိ (သီ. ပီ.)၊ ပတွက္ခာသိ (သျာ.)] မယိ မတေ.
၂၃. အညာတမေတံ အဝိသယှသာဟိ၊ အတ္တာနမမ္ဗဉ္စ ဒဒါမိ တေ တံ၊
သော ဒုစ္စဇေ ကာမဂုဏေ ပဟာယ၊ သန္တိဉ္စ ဓမ္မဉ္စ အဓိဋ္ဌိတောသိ.
၂၄. ယော ဟိတွာ ပုဗ္ဗသညောဂံ၊ ပစ္ဆာ သံယောဇနေ ဌိတော၊
အဓမ္မဉ္စေဝ စရတိ၊ ပါပဉ္စဿ ပဝဍ္ဎတိ.
၂၅. ဧဟိ တံ ပါပယိဿာမိ၊ ကာမံ အပ္ပေါဿုကော ဘဝ၊
ဥပါနယာမိ သီတသ္မိံ၊ ဝိဟရာဟိ အနုဿုကော.
၂၆. တံ ပုပ္ဖရသမတ္တေဘိ၊ ဝက္ကင်္ဂေဟိ အရိန္ဒမ၊
ကောဉ္စာ မယူရာ ဒိဝိယာ၊ ကောလဋ္ဌိမဓုသာဠိကာ၊
ကူဇိတာ ဟံသပူဂေဟိ၊ ကောကိလေတ္ထ ပဗောဓရေ.
၂၇. အမ္ဗေတ္ထ ဝိပ္ပသာခဂ္ဂါ [ဝိပ္ပသူနဂ္ဂါ (သီ. သျာ. ပီ.)၊ ဝိပ္ပဩနဂ္ဂါ (က.)]၊ ပလာလခလသန္နိဘာ၊
ကောသမ္ဗသဠလာ [ကောသုမ္ဘသလလာ (သီ. သျာ. ပီ.)] နီပါ၊ ပက္ကတာလဝိလမ္ဗိနော.
၂၈. မာလီ တိရိဋီ ကာယူရီ၊ အင်္ဂဒီ စန္ဒနုဿဒေါ [စန္ဒနဿဒေါ (သီ.)]၊
ရတ္တိံ တွံ ပရိစာရေသိ၊ ဒိဝါ ဝေဒေသိ ဝေဒနံ.
၂၉. သောဠသိတ္ထိသဟဿာနိ၊ ယာ တေမာ ပရိစာရိကာ၊
ဧဝံ မဟာနုဘာဝေါသိ၊ အဗ္ဘုတော လောမဟံသနော.
၃၀. ကိံ ကမ္မမကရီ ပုဗ္ဗေ၊ ပါပံ အတ္တဒုခါဝဟံ၊
ယံ ကရိတွာ မနုဿေသု၊ ပိဋ္ဌိမံသာနိ ခါဒသိ.
၃၁. အဇ္ဈေနာနိ ပဋိဂ္ဂယှ၊ ကာမေသု ဂဓိတော [ဂထိတော (သီ. ပီ.)၊ ဂိဒ္ဓိတော (သျာ. က.)၊ ဂိဒ္ဓိကော (က. အဋ္ဌ.)] အဟံ၊
အစရိံ ဒီဃမဒ္ဓါနံ၊ ပရေသံ အဟိတာယဟံ.
၃၂. ယော ပိဋ္ဌိမံသိကော ဟောတိ၊ ဧဝံ ဥက္ကစ္စ ခါဒတိ၊
ယထာဟံ အဇ္ဇ ခါဒါမိ၊ ပိဋ္ဌိမံသာနိ အတ္တနောတိ.
ကိံဆန္ဒဇာတကံ ပဌမံ.
၅၁၂. ကုမ္ဘဇာတကံ (၂)
၃၃. ကော ပါတုရာသီ တိဒိဝါ နဘမှိ၊ ဩဘာသယံ သံဝရိံ စန္ဒိမာဝ၊
ဂတ္တေဟိ တေ ရသ္မိယော နိစ္ဆရန္တိ၊ သတေရတာ [သတေရိတာ (သီ. သျာ. က.)] ဝိဇ္ဇုရိဝန္တလိက္ခေ.
၃၄. သော ဆိန္နဝါတံ ကမသီ အဃမှိ၊ ဝေဟာယသံ ဂစ္ဆသိ တိဋ္ဌသီ စ၊
ဣဒ္ဓီ နု တေ ဝတ္ထုကတာ သုဘာဝိတာ၊ အနဒ္ဓဂူနံ အပိ ဒေဝတာနံ.
၃၅. ဝေဟာယသံ ဂမ္မမာဂမ္မ [ကမမာဂမ္မ (သီ. သျာ.)] တိဋ္ဌသိ၊ ကုမ္ဘံ ကိဏာထာတိ ယမေတမတ္ထံ၊
ကော ဝါ တုဝံ ကိဿ ဝါ တာယ ကုမ္ဘော၊ အက္ခာဟိ မေ ဗြာဟ္မဏ ဧတမတ္ထံ.
၃၆. န သပ္ပိကုမ္ဘော နပိ တေလကုမ္ဘော၊ န ဖာဏိတဿ န မဓုဿ ကုမ္ဘော၊
ကုမ္ဘဿ ဝဇ္ဇာနိ အနပ္ပကာနိ၊ ဒေါသေ ဗဟူ ကုမ္ဘဂတေ သုဏာထ.
၃၇. ဂဠေယျ ယံ ပိတွာ [ပီတွာ (သီ. ပီ.)] ပတေ ပပါတံ၊ သောဗ္ဘံ ဂုဟံ စန္ဒနိယောဠိဂလ္လံ၊
ဗဟုမ္ပိ ဘုဉ္ဇေယျ အဘောဇနေယျံ၊ တဿာ ပုဏ္ဏံ ကုမ္ဘမိမံ ကိဏာထ.
၃၈. ယံ ပိတွာ [ယံ ဝေ ပီတွာ (သီ.)] စိတ္တသ္မိမနေသမာနော၊ အာဟိဏ္ဍတီ ဂေါရိဝ ဘက္ခသာရီ [ဘက္ခသာဒီ (သီ. သျာ. အဋ္ဌ.)]၊
အနာထမာနော ဥပဂါယတိ နစ္စတိ စ၊ တဿာ ပုဏ္ဏံ ကုမ္ဘမိမံ ကိဏာထ.
၃၉. ယံ ဝေ ပိဝိတွာ အစေလောဝ နဂ္ဂေါ၊ စရေယျ ဂါမေ ဝိသိခန္တရာနိ၊
သမ္မူဠှစိတ္တော အတိဝေလသာယီ၊ တဿာ ပုဏ္ဏံ ကုမ္ဘမိမံ ကိဏာထ.
၄၀. ယံ ပိတွာ ဥဋ္ဌာယ ပဝေဓမာနော၊ သီသဉ္စ ဗာဟုဉ္စ [ဗာဟဉ္စ (ပီ.)] ပစာလယန္တော၊
သော နစ္စတီ ဒါရုကဋလ္လကောဝ၊ တဿာ ပုဏ္ဏံ ကုမ္ဘမိမံ ကိဏာထ.
၄၁. ယံ ဝေ ပိဝိတွာ အဂ္ဂိဒဍ္ဎာ သယန္တိ၊ အထော သိဂါလေဟိပိ ခါဒိတာသေ၊
ဗန္ဓံ ဝဓံ ဘောဂဇာနိဉ္စုပေန္တိ၊ တဿာ ပုဏ္ဏံ ကုမ္ဘမိမံ ကိဏာထ.
၄၂. ယံ ပိတွာ ဘာသေယျ အာဘာသနေယျံ၊ သဘာယမာသီနော အပေတဝတ္ထော၊
သမ္မက္ခိတော [သမက္ခိတော (သီ.)] ဝန္တဂတော ဗျသန္နော၊ တဿာ ပုဏ္ဏံ ကုမ္ဘမိမံ ကိဏာထ.
၄၃. ယံ ဝေ ပိဝိတွာ ဥက္ကဋ္ဌော အာဝိလက္ခော၊ မမေဝ သဗ္ဗာ ပထဝီတိ မညေ [မညတိ (သီ.)]၊
န မေ သမော စာတုရန္တောပိ ရာဇာ၊ တဿာ ပုဏ္ဏံ ကုမ္ဘမိမံ ကိဏာထ.
၄၄. မာနာတိမာနာ ကလဟာနိ ပေသုဏီ၊ ဒုဗ္ဗဏ္ဏိနီ နဂ္ဂယိနီ ပလာယိနီ၊
စောရာန ဓုတ္တာန ဂတီ နိကေတော၊ တဿာ ပုဏ္ဏံ ကုမ္ဘမိမံ ကိဏာထ.
၄၅. ဣဒ္ဓါနိ ဖီတာနိ ကုလာနိ အဿု၊ အနေကသာဟဿဓနာနိ လောကေ၊
ဥစ္ဆိန္နဒါယဇ္ဇကတာနိမာယ၊ တဿာ ပုဏ္ဏံ ကုမ္ဘမိမံ ကိဏာထ.
၄၆. ဓညံ ဓနံ ရဇတံ ဇာတရူပံ၊ ခေတ္တံ ဂဝံ ယတ္ထ ဝိနာသယန္တိ၊
ဥစ္ဆေဒနီ ဝိတ္တဝတံ [ဥစ္ဆေဒနီ ဝိတ္တဂတံ (သျာ.)၊ ဥစ္ဆေဒနိဝိတ္တဂတံ (က.)] ကုလာနံ၊ တဿာ ပုဏ္ဏံ ကုမ္ဘမိမံ ကိဏာထ.
၄၇. ယံ ဝေ ပိတွာ ဒိတ္တရူပေါဝ [ဒုဋ္ဌရူပေါဝ (သီ.)] ပေါသော၊ အက္ကောသတိ မာတရံ ပိတရဉ္စ၊
သဿုမ္ပိ ဂဏှေယျ အထောပိ သုဏှံ၊ တဿာ ပုဏ္ဏံ ကုမ္ဘမိမံ ကိဏာထ.
၄၈. ယံ ဝေ ပိတွာ ဒိတ္တရူပါဝ နာရီ၊ အက္ကောသတိ သသုရံ သာမိကဉ္စ၊
ဒါသမ္ပိ ဂဏှေ ပရိစာရကမ္ပိ၊ တဿာ ပုဏ္ဏံ ကုမ္ဘမိမံ ကိဏာထ.
၄၉. ယံ ဝေ ပိဝိတွာန [ယဉ္စေ ပီတွာန (ပီ.)] ဟနေယျ ပေါသော၊ ဓမ္မေ ဌိတံ သမဏံ ဗြာဟ္မဏံ ဝါ၊
ဂစ္ဆေ အပါယမ္ပိ တတောနိဒါနံ၊ တဿာ ပုဏ္ဏံ ကုမ္ဘမိမံ ကိဏာထ.
၅၀. ယံ ဝေ ပိဝိတွာ ဒုစ္စရိတံ စရန္တိ၊ ကာယေန ဝါစာယ စ စေတသာ စ၊
နိရယံ ဝဇန္တိ ဒုစ္စရိတံ စရိတွာ၊ တဿာ ပုဏ္ဏံ ကုမ္ဘမိမံ ကိဏာထ.
၅၁. ယံ ယာစမာနာ န လဘန္တိ ပုဗ္ဗေ၊ ဗဟုံ ဟိရညမ္ပိ ပရိစ္စဇန္တာ၊
သော တံ ပိဝိတွာ အလိကံ ဘဏာတိ၊ တဿာ ပုဏ္ဏံ ကုမ္ဘမိမံ ကိဏာထ.
၅၂. ယံ ဝေ ပိတွာ ပေသနေ ပေသိယန္တော၊ အစ္စာယိကေ ကရဏီယမှိ ဇာတေ၊
အတ္ထမ္ပိ သော နပ္ပဇာနာတိ ဝုတ္တော၊ တဿာ ပုဏ္ဏံ ကုမ္ဘမိမံ ကိဏာထ.
၅၃. ဟိရီမနာပိ အဟိရီကဘာဝံ၊ ပါတုံ ကရောန္တိ မဒနာယ [မဒိရာယ (ပီ.)] မတ္တာ၊
ဓီရာပိ သန္တာ ဗဟုကံ ဘဏန္တိ၊ တဿာ ပုဏ္ဏံ ကုမ္ဘမိမံ ကိဏာထ.
၅၄. ယံ ဝေ ပိတွာ ဧကထူပါ သယန္တိ၊ အနာသကာ ထဏ္ဍိလဒုက္ခသေယျံ၊
ဒုဗ္ဗဏ္ဏိယံ အာယသကျဉ္စုပေန္တိ၊ တဿာ ပုဏ္ဏံ ကုမ္ဘမိမံ ကိဏာထ.
၅၅. ယံ ဝေ ပိတွာ ပတ္တခန္ဓာ သယန္တိ၊ ဂါဝေါ ကုဋဟတာဝ န ဟိ ဝါရုဏိယာ၊
[ယံ ဝေ ပိတွာ ပတ္တက္ခန္ဓာ၊ သယန္တိ ဂါဝေါ ကူဋဟတာရိဝ၊ န ဟိ ဝါရုဏိယာ ဝေဂေါ၊ နရေန သုဿဟောရိဝ၊ (သီ.)] ဝေဂေါ နရေန သုသဟောရိဝ [ယံ ဝေ ပိတွာ ပတ္တက္ခန္ဓာ၊ သယန္တိ ဂါဝေါ ကူဋဟတာရိဝ၊ န ဟိ ဝါရုဏိယာ ဝေဂေါ၊ နရေန သုဿဟောရိဝ၊ (သီ.)]၊ တဿာ ပုဏ္ဏံ ကုမ္ဘမိမံ ကိဏာထ.
၅၆. ယံ မနုဿာ ဝိဝဇ္ဇေန္တိ၊ သပ္ပံ ဃောရဝိသံ မိဝ [ဝိသမိဝ (သျာ.)၊ ဝိသံ ဣဝ (က.)၊ ဝိသာမိဝ (?)]၊
တံ လောကေ ဝိသသမာနံ၊ ကော နရော ပါတုမရဟတိ.
၅၇. ယံ ဝေ ပိတွာ အန္ဓကဝေဏ္ဍပုတ္တာ၊ သမုဒ္ဒတီရေ ပရိစာရယန္တာ [အန္ဓကဝေဏှုပုတ္တာ (သီ. ပီ.)၊ အဏ္ဍကဝေဏ္ဍပုတ္တာ (က.)]၊
ဥပက္ကမုံ မုသလေဟညမညံ၊ တဿာ ပုဏ္ဏံ ကုမ္ဘမိမံ ကိဏာထ.
၅၈. ယံ ဝေ ပိတွာ ပုဗ္ဗဒေဝါ ပမတ္တာ၊ တိဒိဝါ စုတာ သဿတိယာ သမာယ၊
တံ တာဒိသံ မဇ္ဇမိမံ နိရတ္ထကံ၊ ဇာနံ မဟာရာဇ ကထံ ပိဝေယျ.
၅၉. နယိမသ္မိံ ကုမ္ဘသ္မိံ ဒဓိ ဝါ မဓု ဝါ၊ ဧဝံ အဘိညာယ ကိဏာဟိ ရာဇ၊
ဧဝဉှိမံ ကုမ္ဘဂတာ မယာ တေ၊ အက္ခာတရူပံ တဝ သဗ္ဗမိတ္တ.
၆၀. န မေ ပိတာ ဝါ အထဝါပိ မာတာ၊ ဧတာဒိသာ ယာဒိသကော တုဝံသိ၊
ဟိတာနုကမ္ပီ ပရမတ္ထကာမော၊ သောဟံ ကရိဿံ ဝစနံ တဝဇ္ဇ.
၆၁. ဒဒါမိ တေ ဂါမဝရာနိ ပဉ္စ၊ ဒါသီသတံ သတ္တ ဂဝံ သတာနိ၊
အာဇညယုတ္တေ စ ရထေ ဒသ ဣမေ၊ အာစရိယော ဟောသိ မမတ္ထကာမော.
၆၂. တဝေဝ ဒါသီသတမတ္ထု ရာဇ၊ ဂါမာ စ ဂါဝေါ စ တဝေဝ ဟောန္တု၊
အာဇညယုတ္တာ စ ရထာ တဝေဝ၊ သက္ကောဟမသ္မီ တိဒသာနမိန္ဒော.
၆၃. မံသောဒနံ သပ္ပိပါယာသံ [သပ္ပိပါယဉ္စ (သီ.)] ဘုဉ္ဇ၊ ခါဒဿု စ တွံ မဓုမာသပူဝေ၊
ဧဝံ တုဝံ ဓမ္မရတော ဇနိန္ဒ၊ အနိန္ဒိတော သဂ္ဂမုပေဟိ ဌာနန္တိ.
ကုမ္ဘဇာတကံ ဒုတိယံ.
၅၁၃. ဇယဒ္ဒိသဇာတကံ (၃)
၆၄. စိရဿံ ဝတ မေ ဥဒပါဒိ အဇ္ဇ၊ ဘက္ခော မဟာ သတ္တမိဘတ္တကာလေ၊
ကုတောသိ ကော ဝါသိ တဒိင်္ဃ ဗြူဟိ၊ အာစိက္ခ ဇာတိံ ဝိဒိတော ယထာသိ.
၆၅. ပဉ္စာလရာဇာ မိဂဝံ ပဝိဋ္ဌော၊ ဇယဒ္ဒိသော နာမ ယဒိဿုတော တေ၊
စရာမိ ကစ္ဆာနိ ဝနာနိ စာဟံ၊ ပသဒံ ဣမံ ခါဒ မမဇ္ဇ မုဉ္စ.
၆၆. သေနေဝ တွံ ပဏသိ သဿမာနော [သယှမာနော (သျာ. က.)]၊ မမေသ ဘက္ခော ပသဒေါ ယံ ဝဒေသိ၊
တံ ခါဒိယာန ပသဒံ ဇိဃညံ [ဇိဃစ္ဆံ (?)]၊ ခါဒိဿံ ပစ္ဆာ န ဝိလာပကာလော.
၆၇. န စတ္ထိ မောက္ခော မမ နိက္ကယေန [ဝိက္ကယေန (သီ.)]၊ ဂန္တွာန ပစ္စာဂမနာယ ပဏှေ၊
တံ သင်္ကရံ [သင်္ဂရံ (သီ. သျာ. ပီ.)] ဗြာဟ္မဏဿပ္ပဒါယ၊ သစ္စာနုရက္ခီ ပုနရာဝဇိဿံ.
၆၈. ကိံ ကမ္မဇာတံ အနုတပ္ပတေ တွံ [အနုတပ္ပတီ တံ (သီ. ပီ.)]၊ ပတ္တံ သမီပံ မရဏဿ ရာဇ၊
အာစိက္ခ မေ တံ အပိ သက္ကုဏေမု၊ အနုဇာနိတုံ အာဂမနာယ ပဏှေ.
၆၉. ကတာ မယာ ဗြာဟ္မဏဿ ဓနာသာ၊ တံ သင်္ကရံ ပဋိမုက္ကံ န မုတ္တံ၊
တံ သင်္ကရံ ဗြာဟ္မဏဿပ္ပဒါယ၊ သစ္စာနုရက္ခီ ပုနရာဝဇိဿံ.
၇၀. ယာ တေ ကတာ ဗြာဟ္မဏဿ ဓနာသာ၊ တံ သင်္ကရံ ပဋိမုက္ကံ န မုတ္တံ၊
တံ သင်္ကရံ ဗြာဟ္မဏဿပ္ပဒါယ၊ သစ္စာနုရက္ခီ ပုနရာဝဇဿု.