၅၁၈. ပဏ္ဍရနာဂရာဇဇာတကံ (၈)
၂၅၈. ဝိကိဏ္ဏဝါစံ အနိဂုယှ [အနိဂူဠှ (ပီ.)] မန္တံ၊ အသညတံ အပရိစက္ခိတာရံ [အပရိရက္ခိတာရံ (က.)]၊
ဘယံ တမနွေတိ သယံ အဗောဓံ၊ နာဂံ ယထာ ပဏ္ဍရကံ သုပဏ္ဏော [သုဝဏ္ဏော (က.)].
၂၅၉. ယော ဂုယှမန္တံ ပရိရက္ခနေယျံ၊ မောဟာ နရော သံသတိ ဟာသမာနော [ဘာသမာနော (ပီ.)]၊
တံ ဘိန္နမန္တံ ဘယမနွေတိ ခိပ္ပံ၊ နာဂံ ယထာ ပဏ္ဍရကံ သုပဏ္ဏော.
၂၆၀. နာနုမိတ္တော ဂရုံ အတ္ထံ၊ ဂုယှံ ဝေဒိတုမရဟတိ၊
သုမိတ္တော စ အသမ္ဗုဒ္ဓံ၊ သမ္ဗုဒ္ဓံ ဝါ အနတ္ထ ဝါ.
၂၆၁. ဝိဿာသမာပဇ္ဇိမဟံ အစေလံ [အစေလော (သီ. ပီ.)]၊ သမဏော အယံ သမ္မတော ဘာဝိတတ္တော၊
တဿာဟမက္ခိံ ဝိဝရိံ [ဝိဝရံ (သီ.)] ဂုယှမတ္ထံ၊ အတီတမတ္ထော ကပဏံ [ကပဏော (ပီ.)] ရုဒါမိ.
၂၆၂. တဿာဟံ ပရမံ [ပုရိမံ (သီ.)] ဗြဟ္မေ ဂုယှံ၊ ဝါစဉှိ မံ နာသက္ခိံ [နာသက္ခိ (ပီ.)] သံယမေတုံ၊
တပ္ပက္ခတော ဟိ ဘယမာဂတံ မမံ၊ အတီတမတ္ထော ကပဏံ ရုဒါမိ.
၂၆၃. ယော ဝေ နရော သုဟဒံ မညမာနော၊ ဂုယှမတ္ထံ သံသတိ ဒုက္ကုလီနေ၊
ဒေါသာ ဘယာ အထဝါ ရာဂရတ္တာ [ရာဂရတ္တော (သီ. သျာ. ပီ.)]၊ ပလ္လတ္ထိတော [ပလ္လိတ္ထော (ပီ.)၊ ပလ္လတ္တိတော (က.)] ဗာလော အသံသယံ သော.
၂၆၄. တိရောက္ခဝါစော အသတံ ပဝိဋ္ဌော၊ ယော သင်္ဂတီသု မုဒီရေတိ ဝါကျံ၊
အာသီဝိသော ဒုမ္မုခေါတျာဟု တံ နရံ၊ အာရာ အာရာ [အာရာ အရာ (ပီ.)] သံယမေ တာဒိသမှာ.
၂၆၅. အန္နံ ပါနံ ကာသိက [ကာသိကံ (ပီ.)] စန္ဒနဉ္စ၊ မနာပိတ္ထိယော မာလမုစ္ဆာဒနဉ္စ၊
ဩဟာယ ဂစ္ဆာမသေ သဗ္ဗကာမေ၊ သုပဏ္ဏ ပါဏူပဂတာဝ တျမှာ.
၂၆၆. ကော နီဓ တိဏ္ဏံ ဂရဟံ ဥပေတိ၊ အသ္မိံဓ လောကေ ပါဏဘူ နာဂရာဇ၊
သမဏော သုပဏ္ဏော အထ ဝါ တွမေဝ၊ ကိံ ကာရဏာ ပဏ္ဍရကဂ္ဂဟီတော.
၂၆၇. သမဏောတိ မေ သမ္မတတ္တော အဟောသိ၊ ပိယော စ မေ မနသာ ဘာဝိတတ္တော၊
တဿာဟမက္ခိံ ဝိဝရိံ ဂုယှမတ္ထံ၊ အတီတမတ္ထော ကပဏံ ရုဒါမိ.
၂၆၈. န စတ္ထိ သတ္တော အမရော ပထဗျာ၊ ပညာဝိဓာ နတ္ထိ န နိန္ဒိတဗ္ဗာ၊
သစ္စေန ဓမ္မေန ဓိတိယာ [ဓိယာ (သီ. ပီ.)] ဒမေန၊ အလဗ္ဘမဗျာဟရတီ နရော ဣဓ.
၂၆၉. မာတာပိတာ ပရမာ ဗန္ဓဝါနံ၊ နာဿ တတိယော အနုကမ္ပကတ္ထိ၊
တေသမ္ပိ ဂုယှံ ပရမံ န သံသေ၊ မန္တဿ ဘေဒံ ပရိသင်္ကမာနော.
၂၇၀. မာတာပိတာ ဘဂိနီ ဘာတရော စ၊ သဟာယာ ဝါ ယဿ ဟောန္တိ သပက္ခာ၊
တေသမ္ပိ ဂုယှံ ပရမံ န သံသေ၊ မန္တဿ ဘေဒံ ပရိသင်္ကမာနော.
၂၇၁. ဘရိယာ စေ ပုရိသံ ဝဇ္ဇာ၊ ကောမာရီ ပိယဘာဏိနီ၊
ပုတ္တရူပယသူပေတာ၊ ဉာတိသံဃပုရက္ခတာ၊ တဿာပိ ဂုယှံ ပရမံ န သံသေ၊
မန္တဿ ဘေဒံ ပရိသင်္ကမာနော.
၂၇၂. န ဂုယှမတ္ထံ [ဂုယှတ္ထံ (က.)] ဝိဝရေယျ၊ ရက္ခေယျ နံ ယထာ နိဓိံ၊
န ဟိ ပါတုကတော သာဓု၊ ဂုယှော အတ္ထော ပဇာနတာ.
၂၇၃. ထိယာ ဂုယှံ န သံသေယျ၊ အမိတ္တဿ စ ပဏ္ဍိတော၊
ယော စာမိသေန သံဟီရော၊ ဟဒယတ္ထေနော စ ယော နရော.
၂၇၄. ဂုယှမတ္ထံ အသမ္ဗုဒ္ဓံ၊ သမ္ဗောဓယတိ ယော နရော၊
မန္တဘေဒဘယာ တဿ၊ ဒါသဘူတော တိတိက္ခတိ.
၂၇၅. ယာဝန္တော ပုရိသဿတ္ထံ၊ ဂုယှံ ဇာနန္တိ မန္တိနံ၊
တာဝန္တော တဿ ဥဗ္ဗေဂါ၊ တသ္မာ ဂုယှံ န ဝိဿဇေ.
၂၇၆. ဝိဝိစ္စ ဘာသေယျ ဒိဝါ ရဟဿံ၊ ရတ္တိံ ဂိရံ နာတိဝေလံ ပမုဉ္စေ၊
ဥပဿုတိကာ ဟိ သုဏန္တိ မန္တံ၊ တသ္မာ မန္တော ခိပ္ပမုပေတိ ဘေဒံ.
၂၇၇. ယထာပိ အဿ [အယော (သျာ.)၊ အယ (က.)] နဂရံ မဟန္တံ၊ အဒွါရကံ [အာဠာရကံ (ပီ.)] အာယသံ ဘဒ္ဒသာလံ၊
သမန္တခါတာပရိခါဥပေတံ၊ ဧဝမ္ပိ မေ တေ ဣဓ ဂုယှမန္တာ.
၂၇၈. ယေ ဂုယှမန္တာ အဝိကိဏ္ဏဝါစာ၊ ဒဠှာ သဒတ္ထေသု နရာ ဒုဇိဝှ [ဒုဇိဝှါ (သျာ. ပီ.)]၊
အာရာ အမိတ္တာ ဗျဝဇန္တိ တေဟိ၊ အာသီဝိသာ ဝါ ရိဝ သတ္တုသံဃာ [သတ္တသံဃာ (သီ. သျာ.)].
၂၇၉. ဟိတွာ ဃရံ ပဗ္ဗဇိတော အစေလော၊ နဂ္ဂေါ မုဏ္ဍော စရတိ ဃာသဟေတု၊
တမှိ [တမှီ (ပီ.)] နု ခေါ ဝိဝရိံ ဂုယှမတ္ထံ၊ အတ္ထာ စ ဓမ္မာ စ အပဂ္ဂတမှာ [အပါဂတမှာ (သီ.)၊ အပဂတမှာ (သျာ.)၊ အဝါဂတမှာ (ပီ.)].
၂၈၀. ကထံကရော ဟောတိ သုပဏ္ဏရာဇ၊ ကိံသီလော ကေန ဝတေန ဝတ္တံ၊
သမဏော စရံ ဟိတွာ မမာယိတာနိ၊ ကထံကရော သဂ္ဂမုပေတိ ဌာနံ.
၂၈၁. ဟိရိယာ တိတိက္ခာယ ဒမေနုပေတော [ဒမေန ခန္တိယာ (သီ. သျာ. ပီ.)]၊ အက္ကောဓနော ပေသုဏိယံ ပဟာယ၊
သမဏော စရံ ဟိတွာ မမာယိတာနိ၊ ဧဝံကရော သဂ္ဂမုပေတိ ဌာနံ.
၂၈၂. မာတာဝ ပုတ္တံ တရုဏံ တနုဇ္ဇံ [တနူဇံ (သီ.)]၊ သမ္ဖဿတာ [သမ္ပဿ တံ (သီ. ပီ.)] သဗ္ဗဂတ္တံ ဖရေတိ၊
ဧဝမ္ပိ မေ တွံ ပါတုရဟု ဒိဇိန္ဒ၊ မာတာဝ ပုတ္တံ အနုကမ္ပမာနော.
၂၈၃. ဟန္ဒဇ္ဇ တွံ မုဉ္စ [မုစ္စ (သီ.)] ဝဓာ ဒုဇိဝှ၊ တယော ဟိ ပုတ္တာ န ဟိ အညော အတ္ထိ၊
အန္တေဝါသီ ဒိန္နကော အတြဇော စ၊ ရဇ္ဇဿု [ရဇဿု (သီ. သျာ. ပီ.)] ပုတ္တညတရော မေ အဟောသိ.
၂၈၄. ဣစ္စေဝ ဝါကျံ ဝိသဇ္ဇီ သုပဏ္ဏော၊ ဘုမျံ ပတိဋ္ဌာယ ဒိဇော ဒုဇိဝှံ၊
မုတ္တဇ္ဇ တွံ သဗ္ဗဘယာတိဝတ္တော၊ ထလူဒကေ ဟောဟိ မယာဘိဂုတ္တော.
၂၈၅. အာတင်္ကိနံ ယထာ ကုသလော ဘိသက္ကော၊ ပိပါသိတာနံ ရဟဒေါဝ သီတော၊
ဝေသ္မံ ယထာ ဟိမသီတဋ္ဋိတာနံ [ဟိမသိသိရဋ္ဋိတာနံ (ပီ.)]၊ ဧဝမ္ပိ တေ သရဏမဟံ ဘဝါမိ.
၂၈၆. သန္ဓိံ ကတွာ အမိတ္တေန၊ အဏ္ဍဇေန ဇလာဗုဇ၊
ဝိဝရိယ ဒါဌံ သေသိ၊ ကုတော တံ ဘယမာဂတံ.
၂၈၇. သင်္ကေထေဝ အမိတ္တသ္မိံ၊ မိတ္တသ္မိမ္ပိ န ဝိဿသေ၊
အဘယာ ဘယမုပ္ပန္နံ၊ အပိ မူလာနိ ကန္တတိ.
၂၈၈. ကထံ နု ဝိဿသေ တျမှိ၊ ယေနာသိ ကလဟော ကတော၊
နိစ္စယတ္တေန ဌာတဗ္ဗံ၊ သော ဒိသဗ္ဘိ [သော ဒိသမှိ (ပီ.)] န ရဇ္ဇတိ.
၂၈၉. ဝိဿာသယေ န စ တံ [နံ (သီ. သျာ. ပီ.)] ဝိဿယေယျ၊ အသင်္ကိတော သင်္ကိတော စ [အသင်္ကိတော စ သင်္ကိတော (သီ. ပီ.)] ဘဝေယျ၊
တထာ တထာ ဝိညူ ပရက္ကမေယျ၊ ယထာ ယထာ ဘာဝံ ပရော န ဇညာ.
၂၉၀. တေ ဒေဝဝဏ္ဏာ [ဒေဝဝဏ္ဏီ (ပီ.)] သုခုမာလရူပါ၊ ဥဘော သမာ သုဇယာ [သုဇယော (သီ. သျာ. ပီ.)] ပုညခန္ဓာ [ပုညဂန္ဓာ (ပီ.)]၊
ဥပါဂမုံ ကရမ္ပိယံ [ကာဒမ္ဗိယံ (သီ.)၊ ကာရမ္ဗိယံ (ပီ.)] အစေလံ၊ မိဿီဘူတာ အဿဝါဟာဝ နာဂါ.
၂၉၁. တတော ဟဝေ ပဏ္ဍရကော အစေလံ၊ သယမေဝုပါဂမ္မ ဣဒံ အဝေါစ၊
မုတ္တဇ္ဇဟံ သဗ္ဗဘယာတိဝတ္တော၊ န ဟိ [ဟ (ပီ.)] နူန တုယှံ မနသော ပိယမှာ.
၂၉၂. ပိယော ဟိ မေ အာသိ သုပဏ္ဏရာဇာ၊ အသံသယံ ပဏ္ဍရကေန သစ္စံ၊
သော ရာဂရတ္တောဝ အကာသိမေတံ၊ ပါပကမ္မံ [ပါပံ ကမ္မံ (သီ. ပီ.)] သမ္ပဇာနော န မောဟာ.
၂၉၃. န မေ ပိယံ အပ္ပိယံ ဝါပိ ဟောတိ၊ သမ္ပဿတော လောကမိမံ ပရဉ္စ၊
သုသညတာနဉှိ ဝိယဉ္ဇနေန၊ အသညတော လောကမိမံ စရာသိ.
၂၉၄. အရိယာဝကာသောသိ အနရိယောဝါသိ [အနရိယော စာသိ (သီ. ပီ.)]၊ အသညတော သညတသန္နိကာသော၊
ကဏှာဘိဇာတိကောသိ အနရိယရူပေါ၊ ပါပံ ဗဟုံ ဒုစ္စရိတံ အစာရိ.
၂၉၅. အဒုဋ္ဌဿ တုဝံ ဒုဗ္ဘိ၊ ဒုဗ္ဘီ [ဒူဘိ၊ ဒူဘီ (ပီ.)] စ ပိသုဏော စသိ၊
ဧတေန သစ္စဝဇ္ဇေန၊ မုဒ္ဓါ တေ ဖလတု သတ္တဓာ.
၂၉၆. တသ္မာ ဟိ မိတ္တာနံ န ဒုဗ္ဘိတဗ္ဗံ၊ မိတ္တဒုဗ္ဘာ [မိတ္တဒုဗ္ဘာ ဟိ (သျာ.)] ပါပိယော နတ္ထိ အညော၊
အာသိတ္တသတ္တော နိဟတော ပထဗျာ၊ ဣန္ဒဿ ဝါကျေန ဟိ သံဝရော ဟတောတိ.
ပဏ္ဍရနာဂရာဇဇာတကံ [ပဏ္ဍရကဇာတကံ (သီ. သျာ. ပီ.)] အဋ္ဌမံ.