၅၁၇. ဒကရက္ခသဇာတကံ (၇)

၂၂၄. သစေ ဝေါ ဝုယှမာနာနံ၊ သတ္တန္နံ ဥဒကဏ္ဏဝေ၊

မနုဿဗလိမေသာနော၊ နာဝံ ဂဏှေယျ ရက္ခသော၊

အနုပုဗ္ဗံ ကထံ ဒတွာ၊ မုဉ္စေသိ ဒကရက္ခသာ [ဒကရက္ခတော (ပီ.)].

၂၂၅. မာတရံ ပဌမံ ဒဇ္ဇံ၊ ဘရိယံ ဒတွာန ဘာတရံ၊

တတော သဟာယံ ဒတွာန၊ ပဉ္စမံ ဒဇ္ဇံ [ဒဇ္ဇ (သျာ.)] ဗြာဟ္မဏံ၊

ဆဋ္ဌာဟံ ဒဇ္ဇမတ္တာနံ၊ နေဝ ဒဇ္ဇံ မဟောသဓံ.

၂၂၆. ပေါသေတာ တေ ဇနေတ္တီ စ၊ ဒီဃရတ္တာနုကမ္ပိကာ၊

ဆဗ္ဘီ တယိ ပဒုဿတိ [ပဒုဋ္ဌသ္မိံ (သီ. သျာ.)]၊ ပဏ္ဍိတာ အတ္ထဒဿိနီ၊

အညံ ဥပနိသံ ကတွာ၊ ဝဓာ တံ ပရိမောစယိ.

၂၂၇. တံ တာဒိသိံ [တာဒိသံ (က.)] ပါဏဒဒိံ၊ ဩရသံ ဂဗ္ဘဓာရိနိံ [ဂဗ္ဘဓာရိဏိံ (သီ. သျာ.)]၊

မာတရံ ကေန ဒေါသေန၊ ဒဇ္ဇာသိ ဒကရက္ခိနော [ဒကရက္ခတော (ပီ.)].

၂၂၈. ဒဟရာ ဝိယလင်္ကာရံ၊ ဓာရေတိ အပိဠန္ဓနံ၊

ဒေါဝါရိကေ အနီကဋ္ဌေ၊ အတိဝေလံ ပဇဂ္ဃတိ [သဉ္ဇဂ္ဃတိ (က.)].

၂၂၉. အထောပိ ပဋိရာဇူနံ၊ သယံ ဒူတာနိ သာသတိ၊

မာတရံ တေန ဒေါသေန၊ ဒဇ္ဇာဟံ ဒကရက္ခိနော.

၂၃၀. ဣတ္ထိဂုမ္ဗဿ ပဝရာ၊ အစ္စန္တံ ပိယဘာဏိနီ [အစ္စန္တပိယဝါဒိနီ (သီ. ပီ.)]၊

အနုဂ္ဂတာ [အနုဗ္ဗတာ (သျာ.)၊ အနုပုဗ္ဗတာ (က.)] သီလဝတီ၊ ဆာယာဝ အနပါယိနီ.

၂၃၁. အက္ကောဓနာ ပုညဝတီ [ပညဝတီ (သီ. ပီ.)]၊ ပဏ္ဍိတာ အတ္ထဒဿိနီ၊

ဥဗ္ဗရိံ [ဥပ္ပရိံ (သီ.)] ကေန ဒေါသေန၊ ဒဇ္ဇာသိ ဒကရက္ခိနော.

၂၃၂. ခိဍ္ဍာရတိသမာပန္နံ၊ အနတ္ထဝသမာဂတံ၊

သာ မံ သကာန ပုတ္တာနံ၊ အယာစံ ယာစတေ ဓနံ.

၂၃၃. သောဟံ ဒဒါမိ သာရတ္တော [သာရတော (သျာ.)]၊ ဗဟုံ ဥစ္စာဝစံ ဓနံ၊

သုဒုစ္စဇံ စဇိတွာန၊ ပစ္ဆာ သောစာမိ ဒုမ္မနော၊

ဥဗ္ဗရိံ တေန ဒေါသေန၊ ဒဇ္ဇာဟံ ဒကရက္ခိနော.

၂၃၄. ယေနောစိတာ ဇနပဒါ [ဇာနပဒါ (သီ. သျာ. ပီ.)]၊ အာနီတာ စ ပဋိဂ္ဂဟံ၊

အာဘတံ ပရရဇ္ဇေဘိ၊ အဘိဋ္ဌာယ ဗဟုံ ဓနံ.

၂၃၅. ဓနုဂ္ဂဟာနံ ပဝရံ၊ သူရံ တိခိဏမန္တိနံ၊

ဘာတရံ ကေန ဒေါသေန၊ ဒဇ္ဇာသိ ဒကရက္ခိနော.

၂၃၆. ယေနောစိတာ [မယောစိတာ (သီ.)၊ မယာစိတာ (ပီ.)] ဇနပဒါ၊ အာနီတာ စ ပဋိဂ္ဂဟံ၊

အာဘတံ ပရရဇ္ဇေဘိ၊ အဘိဋ္ဌာယ ဗဟုံ ဓနံ.

၂၃၇. ဓနုဂ္ဂဟာနံ ပဝရော၊ သူရော တိခိဏမန္တိ စ [တိခိဏမန္တိနော (က.)]၊

မယာယံ [မယာ သော (သီ. ပီ.)] သုခိတော ရာဇာ၊ အတိမညတိ ဒါရကော.

၂၃၈. ဥပဋ္ဌာနမ္ပိ မေ အယျေ၊ န သော ဧတိ ယထာ ပုရေ၊

ဘာတရံ တေန ဒေါသေန၊ ဒဇ္ဇာဟံ ဒကရက္ခိနော.

၂၃၉. ဧကရတ္တေန ဥဘယော၊ တွဉ္စေဝ ဓနုသေခ စ [ဓနုသေခဝါ (သီ. သျာ. ပီ.)]၊

ဥဘော ဇာတေတ္ထ ပဉ္စာလာ၊ သဟာယာ သုသမာဝယာ.

၂၄၀. စရိယာ တံ အနုဗန္ဓိတ္ထော [အနုဗန္ဓော (က.)]၊ ဧကဒုက္ခသုခေါ တဝ၊

ဥဿုက္ကော တေ ဒိဝါရတ္တိံ၊ သဗ္ဗကိစ္စေသု ဗျာဝဋော၊

သဟာယံ ကေန ဒေါသေန၊ ဒဇ္ဇာသိ ဒကရက္ခိနော.

၂၄၁. စရိယာ မံ အယံ [စရိယာယ အယံ (သီ. ပီ.)] အယျေ၊ ပဇဂ္ဃိတ္ထော [သဉ္ဇဂ္ဃိတ္ထော (သျာ.)] မယာ သဟ၊

အဇ္ဇာပိ တေန ဝဏ္ဏေန၊ အတိဝေလံ ပဇဂ္ဃတိ.

၂၄၂. ဥဗ္ဗရိယာပိဟံ အယျေ၊ မန္တယာမိ ရဟောဂတော၊

အနာမန္တော [အနာမန္တာ (သီ.)] ပဝိသတိ၊ ပုဗ္ဗေ အပ္ပဋိဝေဒိတော.

၂၄၃. လဒ္ဓဒွါရော [လဒ္ဓဝါရော (သီ. ပီ.)] ကတောကာသော၊ အဟိရိကံ အနာဒရံ၊

သဟာယံ တေန ဒေါသေန၊ ဒဇ္ဇာဟံ ဒကရက္ခိနော.

၂၄၄. ကုသလော သဗ္ဗနိမိတ္တာနံ၊ ရုတညူ [ရုဒညူ (သီ. သျာ. ပီ.)] အာဂတာဂမော၊

ဥပ္ပါတေ သုပိနေ ယုတ္တော၊ နိယျာနေ စ ပဝေသနေ.

၂၄၅. ပဋ္ဌော [ပဒ္ဓေါ (သီ. ပီ.)] ဘူမန္တလိက္ခသ္မိံ၊ နက္ခတ္တပဒကောဝိဒေါ၊

ဗြာဟ္မဏံ ကေန ဒေါသေန၊ ဒဇ္ဇာသိ ဒကရက္ခိနော.

၂၄၆. ပရိသာယမ္ပိ မေ အယျေ၊ ဥမ္မီလိတွာ ဥဒိက္ခတိ၊

တသ္မာ အစ္စဘမုံ လုဒ္ဒံ၊ ဒဇ္ဇာဟံ ဒကရက္ခိနော.

၂၄၇. သသမုဒ္ဒပရိယာယံ၊ မဟိံ သာဂရကုဏ္ဍလံ၊

ဝသုန္ဓရံ အာဝသသိ၊ အမစ္စပရိဝါရိတော.

၂၄၈. စာတုရန္တော မဟာရဋ္ဌော၊ ဝိဇိတာဝီ မဟဗ္ဗလော၊

ပထဗျာ ဧကရာဇာသိ၊ ယသော တေ ဝိပုလံ ဂတော.

၂၄၉. သောဠသိတ္ထိသဟဿာနိ၊ အာမုတ္တမဏိကုဏ္ဍလာ၊

နာနာဇနပဒါ နာရီ၊ ဒေဝကညူပမာ သုဘာ.

၂၅၀. ဧဝံ သဗ္ဗင်္ဂသမ္ပန္နံ၊ သဗ္ဗကာမသမိဒ္ဓိနံ၊

သုခိတာနံ ပိယံ ဒီဃံ၊ ဇီဝိတံ အာဟု ခတ္တိယ.

၂၅၁. အထ တွံ ကေန ဝဏ္ဏေန၊ ကေန ဝါ ပန ဟေတုနာ၊

ပဏ္ဍိတံ အနုရက္ခန္တော၊ ပါဏံ စဇသိ ဒုစ္စဇံ.

၂၅၂. ယတောပိ အာဂတော အယျေ၊ မမ ဟတ္ထံ မဟောသဓော၊

နာဘိဇာနာမိ ဓီရဿ၊ အနုမတ္တမ္ပိ ဒုက္ကဋံ.

၂၅၃. သစေ စ ကိသ္မိစိ ကာလေ၊ မရဏံ မေ ပုရေ သိယာ၊

သော မေ ပုတ္တေ [ပုတ္တေ စ မေ (သီ. သျာ. ပီ.] ပပုတ္တေ စ၊ သုခါပေယျ မဟောသဓော.

၂၅၄. အနာဂတံ ပစ္စုပ္ပန္နံ၊ သဗ္ဗမတ္ထမ္ပိ ပဿတိ [သဗ္ဗမတ္ထံ ဝိပဿတိ (သီ. သျာ. ပီ.)]၊

အနာပရာဓကမ္မန္တံ၊ န ဒဇ္ဇံ ဒကရက္ခိနော.

၂၅၅. ဣဒံ သုဏာထ ပဉ္စာလာ၊ စူဠနေယျဿ [စူဠနီယဿ (သီ.)] ဘာသိတံ၊

ပဏ္ဍိတံ အနုရက္ခန္တော၊ ပါဏံ စဇတိ ဒုစ္စဇံ.

၂၅၆. မာတု ဘရိယာယ ဘာတုစ္စ၊ သခိနော ဗြာဟ္မဏဿ စ၊

အတ္တနော စာပိ ပဉ္စာလော၊ ဆန္နံ စဇတိ ဇီဝိတံ.

၂၅၇. ဧဝံ မဟတ္ထိကာ [ခဟိဒ္ဓိယာ (သျာ.)၊ မဟိဒ္ဓိကာ (က.)] ပညာ၊ နိပုဏာ သာဓုစိန္တိနီ၊

ဒိဋ္ဌဓမ္မဟိတတ္ထာယ၊ သမ္ပရာယသုခါယ စာတိ.

ဒကရက္ခသဇာတကံ သတ္တမံ.