၅၁၆. မဟာကပိဇာတကံ (၆)
၁၇၈. ဗာရာဏသျံ [ဗာရာဏဿံ (သီ. ပီ.)] အဟူ ရာဇာ၊ ကာသီနံ ရဋ္ဌဝဍ္ဎနော၊
မိတ္တာမစ္စပရိဗျူဠှော၊ အဂမာသိ မိဂါဇိနံ [မိဂါဇိရံ (သီ.)၊ မိဂါစိရံ (ပီ.)].
၁၇၉. တတ္ထ ဗြာဟ္မဏမဒ္ဒက္ခိ၊ သေတံ စိတြံ ကိလာသိနံ၊
ဝိဒ္ဓသ္တံ ကောဝိဠာရံဝ၊ ကိသံ ဓမနိသန္ထတံ.
၁၈၀. ပရမကာရုညတံ ပတ္တံ၊ ဒိသွာ ကိစ္ဆဂတံ နရံ၊
အဝစ ဗျမှိတော ရာဇာ၊ ‘‘ယက္ခာနံ ကတမော နုသိ.
၁၈၁. ‘‘ဟတ္ထပါဒါ စ တေ သေတာ၊ တတော သေတတရံ [သေတတရော (ပီ.)] သိရော၊
ဂတ္တံ ကမ္မာသဝဏ္ဏံ တေ၊ ကိလာသဗဟုလော စသိ.
၁၈၂. ‘‘ဝဋ္ဋနာဝဠိ [ဝဋ္ဌနာဝလိ (ပီ.)] သင်္ကာသာ၊ ပိဋ္ဌိ တေ နိန္နတုန္နတာ၊
ကာဠပဗ္ဗာဝ [ကာဠပဗ္ဗာ စ (သျာ.)၊ ကာဠာ ပဗ္ဗာ စ (ပီ.)] တေ အင်္ဂါ၊ နာညံ ပဿာမိ ဧဒိသံ.
၁၈၃. ‘‘ဥဂ္ဃဋ္ဋပါဒေါ တသိတော၊ ကိသော ဓမနိသန္ထတော၊
ဆာတော အာတတ္တရူပေါသိ [အာဒိတ္တရူပေါသိ (က.)၊ အတိတ္တရူပေါသိ (သျာ. က. အဋ္ဌ.)]၊ ကုတောသိ ကတ္ထ ဂစ္ဆသိ.
၁၈၄. ‘‘ဒုဒ္ဒသီ အပ္ပကာရောသိ၊ ဒုဗ္ဗဏ္ဏော ဘီမဒဿနော၊
ဇနေတ္တိ ယာပိ တေ မာတာ၊ န တံ ဣစ္ဆေယျ ပဿိတုံ.
၁၈၅. ‘‘ကိံ ကမ္မမကရံ [ကမ္မမကရာ (သီ. သျာ. ပီ.)] ပုဗ္ဗေ၊ ကံ အဝဇ္ဈံ အဃာတယိ၊
ကိဗ္ဗိသံ ယံ ကရိတွာန၊ ဣဒံ ဒုက္ခံ ဥပါဂမိ’’.
၁၈၆. တဂ္ဃ တေ အဟမက္ခိဿံ၊ ယထာပိ ကုသလော တထာ၊
သစ္စဝါဒိဉှိ လောကသ္မိံ၊ ပသံသန္တီဓ ပဏ္ဍိတာ.
၁၈၇. ဧကော စရံ ဂေါဂဝေသော၊ မူဠှော အစ္စသရိံ ဝနေ၊
အရညေ ဣရီဏေ [ဤရိဏေ (သီ. သျာ. ပီ.)] ဝိဝနေ၊ နာနာကုဉ္ဇရသေဝိတေ.
၁၈၈. ဝါဠမိဂါနုစရိတေ၊ ဝိပ္ပနဋ္ဌောသ္မိ ကာနနေ၊
အစရိံ တတ္ထ သတ္တာဟံ၊ ခုပ္ပိပါသ [ခုပ္ပိပါသာ (သီ. ပီ.)] သမပ္ပိတော.
၁၈၉. တတ္ထ တိန္ဒုကမဒ္ဒက္ခိံ၊ ဝိသမဋ္ဌံ ဗုဘုက္ခိတော၊
ပပါတမဘိလမ္ဗန္တံ၊ သမ္ပန္နဖလဓာရိနံ.
၁၉၀. ဝါတဿိတာနိ ဘက္ခေသိံ၊ တာနိ ရုစ္စိံသု မေ ဘုသံ၊
အတိတ္တော ရုက္ခမာရူဟိံ [မာရုယှ (သီ. သျာ.)]၊ တတ္ထ ဟေဿာမိ အာသိတော.
၁၉၁. ဧကံ မေ ဘက္ခိတံ အာသိ၊ ဒုတိယံ အဘိပတ္ထိတံ၊
တတော သာ ဘဉ္ဇထ သာခါ၊ ဆိန္နာ ဖရသုနာ ဝိယ.
၁၉၂. သောဟံ သဟာဝ သာခါဟိ၊ ဥဒ္ဓံပါဒေါ အဝံသိရော၊
အပ္ပတိဋ္ဌေ အနာလမ္ဗေ၊ ဂိရိဒုဂ္ဂသ္မိ ပါပတံ.
၁၉၃. ယသ္မာ စ ဝါရိ ဂမ္ဘီရံ၊ တသ္မာ န သမပဇ္ဇိသံ [သမပဇ္ဇသိံ (သီ.)၊ သမဘဇ္ဇိသံ (ပီ.)]၊
တတ္ထ သေသိံ နိရာနန္ဒော၊ အနူနာ [အနာထော (သီ.)] ဒသ ရတ္တိယော.
၁၉၄. အထေတ္ထ ကပိ မာဂဉ္ဆိ [မာဂစ္ဆိ (သျာ. က.)]၊ ဂေါနင်္ဂုလော ဒရီစရော၊
သာခါဟိ သာခံ ဝိစရန္တော၊ ခါဒမာနော ဒုမပ္ဖလံ.
၁၉၅. သော မံ ဒိသွာ ကိသံ ပဏ္ဍုံ၊ ကာရုညမကရံ မယိ၊
အမ္ဘော ကော နာမ သော ဧတ္ထ၊ ဧဝံ ဒုက္ခေန အဋ္ဋိတော.
၁၉၆. မနုဿော အမနုဿော ဝါ၊ အတ္တာနံ မေ ပဝေဒယ၊
တဿဉ္ဇလိံ ပဏာမေတွာ၊ ဣဒံ ဝစနမဗြဝိံ.
၁၉၇. မနုဿောဟံ ဗျသမ္ပတ္တော [ဝသမ္ပတ္တော (သျာ. က.)]၊ သာ မေ နတ္ထိ ဣတော ဂတိ၊
တံ ဝေါ ဝဒါမိ ဘဒ္ဒံ ဝေါ၊ တွဉ္စ မေ သရဏံ ဘဝ.
၁၉၈. ဂရုံ [ဂရု (သီ. ပီ.)] သိလံ ဂဟေတွာန၊ ဝိစရီ [ဝိစရိ (ပီ.)] ပဗ္ဗတေ ကပိ၊
သိလာယ ယောဂ္ဂံ ကတွာန၊ နိသဘော ဧတဒဗြဝိ.
၁၉၉. ဧဟိ မေ ပိဋ္ဌိမာရုယှ၊ ဂီဝံ ဂဏှာဟိ ဗာဟုဘိ၊
အဟံ တံ ဥဒ္ဓရိဿာမိ၊ ဂိရိဒုဂ္ဂတ ဝေဂသာ.
၂၀၀. တဿ တံ ဝစနံ သုတွာ၊ ဝါနရိန္ဒဿ သိရီမတော၊
ပိဋ္ဌိမာရုယှ ဓီရဿ၊ ဂီဝံ ဗာဟာဟိ အဂ္ဂဟိံ.
၂၀၁. သော မံ တတော သမုဋ္ဌာသိ၊ တေဇဿီ [တေဇသီ (သျာ. ပီ. က.)] ဗလဝါ ကပိ၊
ဝိဟညမာနော ကိစ္ဆေန၊ ဂိရိဒုဂ္ဂတ ဝေဂသာ.
၂၀၂. ဥဒ္ဓရိတွာန မံ သန္တော၊ နိသဘော ဧတဒဗြဝိ၊
ဣင်္ဃ မံ သမ္မ ရက္ခဿု၊ ပဿုပိဿံ မုဟုတ္တကံ.
၂၀၃. သီဟာ ဗျဂ္ဃါ စ ဒီပီ စ၊ အစ္ဆကောကတရစ္ဆယော၊
တေ မံ ပမတ္တံ ဟိံသေယျုံ၊ တေ တွံ ဒိသွာ နိဝါရယ [ဒိသွာန ဝါရယ (ပီ.)].
၂၀၄. ဧဝံ မေ ပရိတ္တာတူန [ပရိတ္တာတုန (က.)]၊ ပဿုပိ သော မုဟုတ္တကံ၊
တဒါဟံ ပါပိကံ ဒိဋ္ဌိံ၊ ပဋိလစ္ဆိံ အယောနိသော.
၂၀၅. ဘက္ခော အယံ မနုဿာနံ၊ ယထာ စညေ ဝနေ မိဂါ၊
ယံ နူနိမံ ဝဓိတွာန၊ ဆာတော ခါဒေယျ ဝါနရံ.
၂၀၆. အသိတော [အာသိကော (ပီ.)] စ ဂမိဿာမိ၊ မံသမာဒါယ သမ္ဗလံ၊
ကန္တာရံ နိတ္ထရိဿာမိ၊ ပါထေယျံ မေ ဘဝိဿတိ.
၂၀၇. တတော သိလံ ဂဟေတွာန၊ မတ္ထကံ သန္နိတာဠယိံ၊
မမ ဂတ္တ [ဘတ္တ (သီ. သျာ.)၊ ဟတ္ထ (ပီ.)] ကိလန္တဿ၊ ပဟာရော ဒုဗ္ဗလော အဟု.
၂၀၈. သော စ ဝေဂေနုဒပ္ပတ္တော၊ ကပိ ရုဟိရ [ရုဓိရ (သီ.)] မက္ခိတော၊
အဿုပုဏ္ဏေဟိ နေတ္တေဟိ၊ ရောဒန္တော မံ ဥဒိက္ခတိ.
၂၀၉. မာယျောမံ ကရိ ဘဒ္ဒန္တေ၊ တွဉ္စ နာမေဒိသံ ကရိ၊
တွဉ္စ ခေါ နာမ ဒီဃာဝု [ဒီဃာယု (ပီ.)]၊ အညေ [အညံ (ပီ.)] ဝါရေတုမရဟသိ.
၂၁၀. အဟော ဝတ ရေ ပုရိသ၊ တာဝ ဒုက္ကရကာရက၊
ဧဒိသာ ဝိသမာ ဒုဂ္ဂါ၊ ပပါတာ ဥဒ္ဓတော [ဥဒ္ဓဋော (ပီ.)] မယာ.
၂၁၁. အာနီတော ပရလောကာဝ၊ ဒုဗ္ဘေယျံ မံ အမညထ၊
တံ တေန ပါပဓမ္မေန၊ ပါပံ ပါပေန စိန္တိတံ.
၂၁၂. မာ ဟေဝ တွံ အဓမ္မဋ္ဌ၊ ဝေဒနံ ကဋုကံ ဖုသိ၊
မာ ဟေဝ ပါပကမ္မံ တံ၊ ဖလံ ဝေဠုံဝ တံ ဝဓိ.
၂၁၃. တယိမေ နတ္ထိ ဝိဿာသော၊ ပါပဓမ္မ အသညတ [ပါပဓမ္မံ အမညထ (ပီ.)]၊
ဧဟိ မေ ပိဋ္ဌိတော ဂစ္ဆ၊ ဒိဿမာနောဝ သန္တိကေ.
၂၁၄. မုတ္တောသိ ဟတ္ထာ ဝါဠာနံ၊ ပတ္တောသိ မာနုသိံ ပဒံ၊
ဧသ မဂ္ဂေါ အဓမ္မဋ္ဌ၊ တေန ဂစ္ဆ ယထာသုခံ.
၂၁၅. ဣဒံ ဝတွာ ဂိရိစရော၊ ရဟဒေ [ရုဟိရံ (သျာ. က.)] ပက္ခလျ မတ္ထကံ၊
အဿူနိ သမ္ပမဇ္ဇိတွာ၊ တတော ပဗ္ဗတမာရုဟိ.
၂၁၆. သောဟံ တေနာဘိသတ္တောသ္မိ၊ ပရိဠာဟေန အဋ္ဋိတော၊
ဍယှမာနေန ဂတ္တေန၊ ဝါရိံ ပါတုံ ဥပါဂမိံ.
၂၁၇. အဂ္ဂိနာ ဝိယ သန္တတ္တော၊ ရဟဒေါ ရုဟိရမက္ခိတော၊
ပုဗ္ဗလောဟိတသင်္ကာသော၊ သဗ္ဗော မေ သမပဇ္ဇထ.
၂၁၈. ယာဝန္တော ဥဒဗိန္ဒူနိ၊ ကာယသ္မိံ နိပတိံသု မေ၊
တာဝန္တော ဂဏ္ဍ [ဂဏ္ဍူ (သီ. ပီ.)၊ ဂဏ္ဍု (သျာ.)] ဇာယေထ၊ အဒ္ဓဗေလုဝသာဒိသာ.
၂၁၉. ပဘိန္နာ ပဂ္ဃရိံသု မေ၊ ကုဏပါ ပုဗ္ဗလောဟိတာ၊
ယေန ယေနေဝ ဂစ္ဆာမိ၊ ဂါမေသု နိဂမေသု စ.
၂၂၀. ဒဏ္ဍဟတ္ထာ နိဝါရေန္တိ၊ ဣတ္ထိယော ပုရိသာ စ မံ၊
ဩက္ကိတာ [ဩကိဏ္ဏာ (သီ.)] ပူတိဂန္ဓေန၊ မာဿု ဩရေန အာဂမာ [မာဂမာ (သီ. ပီ.)].
၂၂၁. ဧတာဒိသံ ဣဒံ ဒုက္ခံ၊ သတ္တ ဝဿာနိ ဒါနိ မေ၊
အနုဘောမိ သကံ ကမ္မံ၊ ပုဗ္ဗေ ဒုက္ကဋမတ္တနော.
၂၂၂. တံ ဝေါ ဝဒါမိ ဘဒ္ဒန္တေ [ဘဒ္ဒံ ဝေါ (သီ. ပီ.)]၊ ယာဝန္တေတ္ထ သမာဂတာ၊
မာဿု မိတ္တာန [မိတ္တာနံ (သီ. ပီ.)] ဒုဗ္ဘိတ္ထော၊ မိတ္တဒုဗ္ဘော ဟိ ပါပကော.
၂၂၃. ကုဋ္ဌီ ကိလာသီ ဘဝတိ၊ ယော မိတ္တာနိဓ ဒုဗ္ဘတိ [ယော မိတ္တာနံ ဣဓဒ္ဒုဘိ (သီ. အဋ္ဌ.)၊ ယော မိတ္တာနံ ဣဓ ဒုဗ္ဘတိ (ပီ.)]၊
ကာယဿ ဘေဒါ မိတ္တဒ္ဒု [မိတ္တဒုဗ္ဘီ (သျာ. က.)]၊ နိရယံ သောပပဇ္ဇတီတိ [သော ဥပပဇ္ဇတီတိ (သီ. သျာ. ပီ.)].
မဟာကပိဇာတကံ ဆဋ္ဌံ.