၅၁၃. ဇယဒ္ဒိသဇာတကံ (၃)

၆၄. စိရဿံ ဝတ မေ ဥဒပါဒိ အဇ္ဇ၊ ဘက္ခော မဟာ သတ္တမိဘတ္တကာလေ၊

ကုတောသိ ကော ဝါသိ တဒိင်္ဃ ဗြူဟိ၊ အာစိက္ခ ဇာတိံ ဝိဒိတော ယထာသိ.

၆၅. ပဉ္စာလရာဇာ မိဂဝံ ပဝိဋ္ဌော၊ ဇယဒ္ဒိသော နာမ ယဒိဿုတော တေ၊

စရာမိ ကစ္ဆာနိ ဝနာနိ စာဟံ၊ ပသဒံ ဣမံ ခါဒ မမဇ္ဇ မုဉ္စ.

၆၆. သေနေဝ တွံ ပဏသိ သဿမာနော [သယှမာနော (သျာ. က.)]၊ မမေသ ဘက္ခော ပသဒေါ ယံ ဝဒေသိ၊

တံ ခါဒိယာန ပသဒံ ဇိဃညံ [ဇိဃစ္ဆံ (?)]၊ ခါဒိဿံ ပစ္ဆာ န ဝိလာပကာလော.

၆၇. န စတ္ထိ မောက္ခော မမ နိက္ကယေန [ဝိက္ကယေန (သီ.)]၊ ဂန္တွာန ပစ္စာဂမနာယ ပဏှေ၊

တံ သင်္ကရံ [သင်္ဂရံ (သီ. သျာ. ပီ.)] ဗြာဟ္မဏဿပ္ပဒါယ၊ သစ္စာနုရက္ခီ ပုနရာဝဇိဿံ.

၆၈. ကိံ ကမ္မဇာတံ အနုတပ္ပတေ တွံ [အနုတပ္ပတီ တံ (သီ. ပီ.)]၊ ပတ္တံ သမီပံ မရဏဿ ရာဇ၊

အာစိက္ခ မေ တံ အပိ သက္ကုဏေမု၊ အနုဇာနိတုံ အာဂမနာယ ပဏှေ.

၆၉. ကတာ မယာ ဗြာဟ္မဏဿ ဓနာသာ၊ တံ သင်္ကရံ ပဋိမုက္ကံ န မုတ္တံ၊

တံ သင်္ကရံ ဗြာဟ္မဏဿပ္ပဒါယ၊ သစ္စာနုရက္ခီ ပုနရာဝဇိဿံ.

၇၀. ယာ တေ ကတာ ဗြာဟ္မဏဿ ဓနာသာ၊ တံ သင်္ကရံ ပဋိမုက္ကံ န မုတ္တံ၊

တံ သင်္ကရံ ဗြာဟ္မဏဿပ္ပဒါယ၊ သစ္စာနုရက္ခီ ပုနရာဝဇဿု.

၇၁. မုတ္တော စ သော ပေါရိသာဒဿ [ပုရိသာဒဿ (ပီ.)] ဟတ္ထာ၊ ဂန္တွာ သကံ မန္ဒိရံ ကာမကာမီ၊

တံ သင်္ကရံ ဗြာဟ္မဏဿပ္ပဒါယ၊ အာမန္တယီ ပုတ္တမလီနသတ္တံ [သတ္တုံ (သျာ. ပီ. က.)].

၇၂. အဇ္ဇေဝ ရဇ္ဇံ အဘိသိဉ္စယဿု၊ ဓမ္မံ စရ သေသု ပရေသု စာပိ၊

အဓမ္မကာရော စ တေ မာဟု ရဋ္ဌေ၊ ဂစ္ဆာမဟံ ပေါရိသာဒဿ ဉတ္တေ [ဉန္တေ (သျာ.)].

၇၃. ကိံ ကမ္မ ကုဗ္ဗံ တဝ ဒေဝ ပါဝ [ဒေဝပါဒေ (သီ. သျာ. ပီ.)]၊ နာရာဓယီ တံ တဒိစ္ဆာမိ သောတုံ၊

ယမဇ္ဇ ရဇ္ဇမှိ ဥဒဿယေ တုဝံ၊ ရဇ္ဇမ္ပိ နိစ္ဆေယျံ တယာ ဝိနာဟံ.

၇၄. န ကမ္မုနာ ဝါ ဝစသာ ဝ တာတ၊ အပရာဓိတောဟံ တုဝိယံ သရာမိ၊

သန္ဓိဉ္စ [သဒ္ဓိံ စ (က.)] ကတွာ ပုရိသာဒကေန၊ သစ္စာနုရက္ခီ ပုနာဟံ ဂမိဿံ.

၇၅. အဟံ ဂမိဿာမိ ဣဓေဝ ဟောဟိ၊ နတ္ထိ တတော ဇီဝတော ဝိပ္ပမောက္ခော၊

သစေ တုဝံ ဂစ္ဆသိယေဝ ရာဇ၊ အဟမ္ပိ ဂစ္ဆာမိ ဥဘော န ဟောမ.

၇၆. အဒ္ဓါ ဟိ တာတ သတာနေသ ဓမ္မော၊ မရဏာ စ မေ ဒုက္ခတရံ တဒဿ၊

ကမ္မာသပါဒေါ တံ ယဒါ ပစိတွာ၊ ပသယှ ခါဒေ ဘိဒါ ရုက္ခသူလေ.

၇၇. ပါဏေန တေ ပါဏမဟံ နိမိဿံ၊ မာ တွံ အဂါ ပေါရိသာဒဿ ဉတ္တေ၊

ဧတဉ္စ တေ ပါဏမဟံ နိမိဿံ၊ တသ္မာ မတံ ဇီဝိတဿ ဝဏ္ဏေမိ [ဝရေမိ (သီ.)].

၇၈. တတော ဟဝေ ဓိတိမာ ရာဇပုတ္တော၊ ဝန္ဒိတွာ မာတု စ ပိတု စ [ဝန္ဒိတ္ထ မာတုစ္စ ပိတုစ္စ (သီ. ပီ.)] ပါဒေ၊

ဒုခိနိဿ မာတာ နိပတာ [နိပတီ (သီ. ပီ.)] ပထဗျာ၊ ပိတာဿ ပဂ္ဂယှ ဘုဇာနိ ကန္ဒတိ.

၇၉. တံ ဂစ္ဆန္တံ တာဝ ပိတာ ဝိဒိတွာ၊ ပရမ္မုခေါ ဝန္ဒတိ ပဉ္ဇလီကော၊

သောမော စ ရာဇာ ဝရုဏော စ ရာဇာ၊ ပဇာပတီ စန္ဒိမာ သူရိယော စ၊

ဧတေဟိ ဂုတ္တော ပုရိသာဒကမှာ၊ အနုညာတော သောတ္ထိ ပစ္စေဟိ တာတ.

၈၀. ယံ ဒဏ္ဍကိရညော ဂတဿ [ယံ ဒဏ္ဍကာရညဂတဿ (ပီ.)] မာတာ၊ ရာမဿကာသိ သောတ္ထာနံ သုဂုတ္တာ၊

တံ တေ အဟံ သောတ္ထာနံ ကရောမိ၊ ဧတေန သစ္စေန သရန္တု ဒေဝါ၊

အနုညာတော သောတ္ထိ ပစ္စေဟိ ပုတ္တ.

၈၁. အာဝီ ရဟော ဝါပီ မနောပဒေါသံ၊ နာဟံ သရေ ဇာတု မလီနသတ္တေ၊

ဧတေန သစ္စေန သရန္တု ဒေဝါ၊ အနုညာတော သောတ္ထိ ပစ္စေဟိ ဘာတိက [ဘာတ (သီ.)၊ ဘာတာ (သျာ. ပီ.)].

၈၂. ယသ္မာ စ မေ အနဓိမနောသိ သာမိ၊ န စာပိ မေ မနသာ အပ္ပိယောသိ၊

ဧတေန သစ္စေန သရန္တု ဒေဝါ၊ အနုညာတော သောတ္ထိ ပစ္စေဟိ သာမိ.

၈၃. ဗြဟာ ဥဇူ စာရုမုခေါ ကုတောသိ၊ န မံ ပဇာနာသိ ဝနေ ဝသန္တံ၊

လုဒ္ဒံ မံ ဉတွာ ‘‘ပုရိသာဒကော’’တိ၊ ကော သောတ္ထိ မာဇာနမိဓာ’ဝဇေယျ.

၈၄. ဇာနာမိ လုဒ္ဒ ပုရိသာဒကော တွံ၊ န တံ န ဇာနာမိ ဝနေ ဝသန္တံ၊

အဟဉ္စ ပုတ္တောသ္မိ ဇယဒ္ဒိသဿ၊ မမဇ္ဇ ခါဒ ပိတုနော ပမောက္ခာ.

၈၅. ဇာနာမိ ပုတ္တောတိ [ပုတ္တောသိ (သျာ. က.)] ဇယဒ္ဒိသဿ၊ တထာ ဟိ ဝေါ မုခဝဏ္ဏော ဥဘိန္နံ၊

သုဒုက္ကရညေဝ [သုဒုက္ကရဉ္စေဝ (သျာ. ပီ. က.)] ကတံ တဝေဒံ၊ ယော မတ္တုမိစ္ဆေ ပိတုနော ပမောက္ခာ.

၈၆. န ဒုက္ကရံ ကိဉ္စိ မဟေတ္ထ မညေ၊ ယော မတ္တုမိစ္ဆေ ပိတုနော ပမောက္ခာ၊

မာတု စ [မာတုစ္စ (သီ.)] ဟေတု ပရလောက ဂန္တွာ [ဂမျာ (သီ. သျာ.)၊ ဂမျ (ပီ.)]၊ သုခေန သဂ္ဂေန စ သမ္ပယုတ္တော.

၈၇. အဟဉ္စ ခေါ အတ္တနော ပါပကိရိယံ၊ အာဝီ ရဟော ဝါပိ သရေ န ဇာတု၊

သင်္ခါတဇာတီမရဏောဟမသ္မိ၊ ယထေဝ မေ ဣဓ တထာ ပရတ္ထ.

၈၈. ခါဒဇ္ဇ မံ ဒါနိ မဟာနုဘာဝ၊ ကရဿု ကိစ္စာနိ ဣမံ သရီရံ၊

ရုက္ခဿ ဝါ တေ ပပတာမိ အဂ္ဂါ၊ ဆာဒယမာနော မယှံ တွမဒေသိ မံသံ.

၈၉. ဣဒဉ္စ တေ ရုစ္စတိ ရာဇပုတ္တ၊ စဇေသိ [စဇာသိ (သီ. ပီ.)] ပါဏံ ပိတုနော ပမောက္ခာ၊

တသ္မာ ဟိ သော [တသ္မာတိဟ (သီ. သျာ.)] တွံ တရမာနရူပေါ၊ သမ္ဘဉ္ဇ ကဋ္ဌာနိ ဇလေဟိ အဂ္ဂိံ.

၉၀. တတော ဟဝေ ဓိတိမာ ရာဇပုတ္တော၊ ဒါရုံ သမာဟတွာ မဟန္တမဂ္ဂိံ၊

သန္ဒီပယိတွာ ပဋိဝေဒယိတ္ထ၊ အာဒီပိတော ဒါနိ မဟာယမဂ္ဂိ [မယာ ယက္ခမဂ္ဂိ (က.)].

၉၁. ခါဒဇ္ဇ မံ ဒါနိ ပသယှကာရီ၊ ကိံ မံ မုဟုံ ပေက္ခသိ ဟဋ္ဌလောမော၊

တထာ တထာ တုယှမဟံ ကရောမိ၊ ယထာ ယထာ မံ ဆာဒယမာနော အဒေသိ.

၉၂. ကော တာဒိသံ အရဟတိ ခါဒိတာယေ၊ ဓမ္မေ ဌိတံ သစ္စဝါဒိံ ဝဒညုံ၊

မုဒ္ဓါပိ တဿ ဝိဖလေယျ သတ္တဓာ၊ ယော တာဒိသံ သစ္စဝါဒိံ အဒေယျ.

၉၃. ဣဒဉှိ သော ဗြာဟ္မဏံ မညမာနော၊ သသော အဝါသေသိ သကေ သရီရေ၊

တေနေဝ သော စန္ဒိမာ ဒေဝပုတ္တော၊ သသတ္ထုတော [သသဋ္ဌကော (သျာ.)] ကာမဒုဟဇ္ဇ [ကာမရုဟဇ္ဇ (က.)] ယက္ခ.

၉၄. စန္ဒော ယထာ ရာဟုမုခါ ပမုတ္တော၊ ဝိရောစတေ ပန္နရသေဝ ဘာဏုမာ [ဘာနုမာ (သီ. ပီ.)]၊

ဧဝံ တုဝံ ပေါရိသာဒါ ပမုတ္တော၊ ဝိရောစ ကပိလေ [ကမ္ပိလ္လ (သီ. ပီ.)၊ ကပိလ္လေ (သျာ.)] မဟာနုဘာဝ၊

အာမောဒယံ ပိတရံ မာတရဉ္စ၊ သဗ္ဗော စ တေ နန္ဒတု ဉာတိပက္ခော.

၉၅. တတော ဟဝေ ဓိတိမာ ရာဇပုတ္တော၊ ကတဉ္ဇလီ ပရိယာယ [ပရိယဂါ (သီ.)၊ ပဂ္ဂယှ (သျာ. ပီ.)] ပေါရိသာဒံ၊

အနုညာတော သောတ္ထိ သုခီ အရောဂေါ၊ ပစ္စာဂမာ [ပစ္စာဂ (ပီ.)] ကပိလမလီနသတ္တာ [ကမ္ပိလ္လ’မလီနသတ္တော (သီ. ပီ.)၊ ကပိလ’မလီနသတ္တာ (က.)].

၉၆. တံ နေဂမာ ဇာနပဒါ စ သဗ္ဗေ၊ ဟတ္ထာရောဟာ ရထိကာ ပတ္တိကာ စ၊

နမဿမာနာ ပဉ္ဇလိကာ ဥပါဂမုံ၊ နမတ္ထု တေ ဒုက္ကရကာရကောသီတိ.

ဇယဒ္ဒိသဇာတကံ [ဇယဒိသဇာတကံ (က.)] တတိယံ.