၅၁၄. ဆဒ္ဒန္တဇာတကံ (၄)
၉၇. ကိံ နု သောစသိနုစ္စင်္ဂိ၊ ပဏ္ဍူသိ ဝရဝဏ္ဏိနိ၊
မိလာယသိ ဝိသာလက္ခိ၊ မာလာဝ ပရိမဒ္ဒိတာ.
၉၈. ဒေါဟဠော မေ မဟာရာဇ၊ သုပိနန္တေနုပဇ္ဈဂါ [နု’ပစ္စဂါ (သီ. သျာ. ပီ.)]၊
န သော သုလဘရူပေါဝ၊ ယာဒိသော မမ ဒေါဟဠော.
၉၉. ယေ ကေစိ မာနုသာ ကာမာ၊ ဣဓ လောကသ္မိ နန္ဒနေ၊
သဗ္ဗေ တေ ပစုရာ မယှံ၊ အဟံ တေ ဒမ္မိ ဒေါဟဠံ.
၁၀၀. လုဒ္ဒါ ဒေဝ သမာယန္တု၊ ယေ ကေစိ ဝိဇိတေ တဝ၊
ဧတေသံ အဟမက္ခိဿံ၊ ယာဒိသော မမ ဒေါဟဠော.
၁၀၁. ဣမေ တေ လုဒ္ဒကာ ဒေဝိ၊ ကတဟတ္ထာ ဝိသာရဒါ၊
ဝနညူ စ မိဂညူ စ၊ မမတ္ထေ [မမ တေ (ပီ.)] စတ္တဇီဝိတာ.
၁၀၂. လုဒ္ဒပုတ္တာ နိသာမေထ၊ ယာဝန္တေတ္ထ သမာဂတာ၊
ဆဗ္ဗိသာဏံ ဂဇံ သေတံ၊ အဒ္ဒသံ သုပိနေ အဟံ၊
တဿ ဒန္တေဟိ မေ အတ္ထော၊ အလာဘေ နတ္ထိ ဇီဝိတံ.
၁၀၃. န နော ပိတူနံ န ပိတာမဟာနံ၊ ဒိဋ္ဌော သုတော ကုဉ္ဇရော ဆဗ္ဗိသာဏော၊
ယမဒ္ဒသာ သုပိနေ ရာဇပုတ္တီ၊ အက္ခာဟိ နော ယာဒိသော ဟတ္ထိနာဂေါ.
၁၀၄. ဒိသာ စတဿော ဝိဒိသာ စတဿော၊ ဥဒ္ဓံ အဓော ဒသ ဒိသာ ဣမာယော၊
ကတမံ ဒိသံ တိဋ္ဌတိ နာဂရာဇာ၊ ယမဒ္ဒသာ သုပိနေ ဆဗ္ဗိသာဏံ.
၁၀၅. ဣတော ဥဇုံ ဥတ္တရိယံ ဒိသာယံ၊ အတိက္ကမ္မ သော သတ္တဂိရီ ဗြဟန္တေ၊
သုဝဏ္ဏပဿော နာမ ဂိရီ ဥဠာရော၊ သုပုပ္ဖိတော [သမ္ပုပ္ဖိတော (သျာ.)] ကိမ္ပုရိသာနုစိဏ္ဏော.
၁၀၆. အာရုယှ သေလံ ဘဝနံ ကိန္နရာနံ၊ ဩလောကယ ပဗ္ဗတပါဒမူလံ၊
အထ ဒက္ခသီ မေဃသမာနဝဏ္ဏံ၊ နိဂြောဓရာဇံ အထ သဟဿပါဒံ [ပေါရံ (က.)].
၁၀၇. တတ္ထစ္ဆတီ ကုဉ္ဇရော ဆဗ္ဗိသာဏော၊ သဗ္ဗသေတော ဒုပ္ပသဟော ပရေဘိ၊
ရက္ခန္တိ နံ အဋ္ဌသဟဿနာဂါ၊ ဤသာဒန္တာ ဝါတဇဝပ္ပဟာရိနော.
၁၀၈. တိဋ္ဌန္တိ တေ တုမူလံ [တုမူလ (သျာ.)၊ ဘိမူလ (ပီ. က.)] ပဿသန္တာ၊ ကုပ္ပန္တိ ဝါတဿပိ ဧရိတဿ၊
မနုဿဘူတံ ပန တတ္ထ ဒိသွာ၊ ဘသ္မံ ကရေယျုံ နာဿ ရဇောပိ တဿ.
၁၀၉. ဗဟူ ဟိမေ ရာဇကုလမှိ သန္တိ၊ ပိဠန္ဓနာ ဇာတရူပဿ ဒေဝီ၊
မုတ္တာမဏီဝေဠုရိယာမယာ စ၊ ကိံ ကာဟသိ ဒန္တပိဠန္ဓနေန၊
မာရေတုကာမာ ကုဉ္ဇရံ ဆဗ္ဗိသာဏံ၊ ဥဒါဟု ဃာတေဿသိ လုဒ္ဒပုတ္တေ.
၁၁၀. သာ ဣဿိတာ ဒုက္ခိတာ စသ္မိ လုဒ္ဒ၊ ဥဒ္ဓဉ္စ သုဿာမိ အနုဿရန္တီ၊
ကရောဟိ မေ လုဒ္ဒက ဧတမတ္ထံ၊ ဒဿာမိ တေ ဂါမဝရာနိ ပဉ္စ.
၁၁၁. ကတ္ထစ္ဆတီ ကတ္ထမုပေတိ ဌာနံ၊ ဝီထိဿ ကာ နှာန [နဟာန (သီ. ပီ.)] ဂတဿ ဟောတိ၊
ကထဉှိ သော နှာယတိ [နဟာယတိ (သီ. ပီ.)] နာဂရာဇာ၊ ကထံ ဝိဇာနေမု ဂတိံ ဂဇဿ.
၁၁၂. တတ္ထေဝ သာ ပေါက္ခရဏီ အဒူရေ [အဝိဒူရေ (သျာ. က.)]၊ ရမ္မာ သုတိတ္ထာ စ မဟောဒိကာ [မဟောဒကာ (သျာ. က.)] စ၊
သမ္ပုပ္ဖိတာ ဘမရဂဏာနုစိဏ္ဏာ [ကိဏ္ဏာ (ကတ္ထစိ)]၊ ဧတ္ထ ဟိ သော နှာယတိ နာဂရာဇာ.
၁၁၃. သီသံ နဟာတုပ္ပလ [နဟာတော ဥပ္ပလ (သီ. သျာ. ပီ.)] မာလဘာရီ၊ သဗ္ဗသေတော ပုဏ္ဍရီကတ္တစင်္ဂီ၊
အာမောဒမာနော ဂစ္ဆတိ သန္နိကေတံ၊ ပုရက္ခတွာ မဟေသိံ သဗ္ဗဘဒ္ဒံ.
၁၁၄. တတ္ထေဝ သော ဥဂ္ဂဟေတွာန ဝါကျံ၊ အာဒါယ တူဏိဉ္စ ဓနုဉ္စ လုဒ္ဒေါ၊
ဝိတုရိယတိ [ဝိတုရိယ သော (သီ. အဋ္ဌ.)] သတ္တဂိရီ ဗြဟန္တေ၊ သုဝဏ္ဏပဿံ နာမ ဂိရိံ ဥဠာရံ.
၁၁၅. အာရုယှ သေလံ ဘဝနံ ကိန္နရာနံ၊ ဩလောကယီ ပဗ္ဗတပါဒမူလံ၊
တတ္ထဒ္ဒသာ မေဃသမာနဝဏ္ဏံ၊ နိဂြောဓရာဇံ အဋ္ဌသဟဿပါဒံ.
၁၁၆. တတ္ထဒ္ဒသာ ကုဉ္ဇရံ ဆဗ္ဗိသာဏံ၊ သဗ္ဗသေတံ ဒုပ္ပသဟံ ပရေဘိ၊
ရက္ခန္တိ နံ အဋ္ဌသဟဿနာဂါ၊ ဤသာဒန္တာ ဝါတဇဝပ္ပဟာရိနော.
၁၁၇. တတ္ထဒ္ဒသာ ပေါက္ခရဏိံ အဒူရေ၊ ရမ္မံ သုတိတ္ထဉ္စ မဟောဒိကဉ္စ၊
သမ္ပုပ္ဖိတံ ဘမရဂဏာနုစိဏ္ဏံ၊ ယတ္ထ ဟိ သော နှာယတိ နာဂရာဇာ.
၁၁၈. ဒိသွာန နာဂဿ ဂတိံ ဌိတိဉ္စ၊ ဝီထိဿ ယာ နှာနဂတဿ ဟောတိ၊
ဩပါတမာဂစ္ဆိ အနရိယရူပေါ၊ ပယောဇိတော စိတ္တဝသာနုဂါယ.
၁၁၉. ခဏိတွာန ကာသုံ ဖလကေဟိ ဆာဒယိ၊ အတ္တာနမောဓာယ ဓနုဉ္စ လုဒ္ဒေါ၊
ပဿာဂတံ ပုထုသလ္လေန နာဂံ၊ သမပ္ပယီ ဒုက္ကဋကမ္မကာရီ.
၁၂၀. ဝိဒ္ဓေါ စ နာဂေါ ကောဉ္စမနာဒိ ဃောရံ၊ သဗ္ဗေ စ [သဗ္ဗေဝ (သီ. သျာ. ပီ.)] နာဂါ နိန္နဒုံ [နိန္နာဒု (သျာ.)၊ နိန္နာဒံ (က.)] ဃောရရူပံ၊
တိဏဉ္စ ကဋ္ဌဉ္စ ရဏံ [စုဏ္ဏံ (က. သီ. ပီ.)] ကရောန္တာ၊ ဓာဝိံသု တေ အဋ္ဌဒိသာ သမန္တတော.
၁၂၁. ဝဓိဿမေတန္တိ [ဝဓိဿမေနန္တိ (သျာ.)] ပရာမသန္တော၊ ကာသာဝမဒ္ဒက္ခိ ဓဇံ ဣသီနံ၊
ဒုက္ခေန ဖုဋ္ဌဿုဒပါဒိ သညာ၊ အရဟဒ္ဓဇော သဗ္ဘိ အဝဇ္ဈရူပေါ.
၁၂၂. အနိက္ကသာဝေါ ကာသာဝံ၊ ယော ဝတ္ထံ ပရိဒဟိဿတိ [ပရိဒဟေဿတိ (သီ. ပီ.)၊ ပရိဓဿတိ (ကတ္ထစိ)]၊
အပေတော ဒမသစ္စေန၊ န သော ကာသာဝမရဟတိ.
၁၂၃. ယော စ ဝန္တကသာဝဿ၊ သီလေသု သုသမာဟိတော၊
ဥပေတော ဒမသစ္စေန၊ သ ဝေ ကာသာဝမရဟတိ.
၁၂၄. သမပ္ပိတော ပုထုသလ္လေန နာဂေါ၊ အဒုဋ္ဌစိတ္တော လုဒ္ဒကမဇ္ဈဘာသိ၊
ကိမတ္ထယံ ကိဿ ဝါ သမ္မ ဟေတု၊ မမံ ဝဓီ ကဿ ဝါယံ ပယောဂေါ.
၁၂၅. ကာသိဿ ရညော မဟေသီ ဘဒန္တေ၊ သာ ပူဇိတာ ရာဇကုလေ သုဘဒ္ဒါ၊
တံ အဒ္ဒသာ သာ စ မမံ အသံသိ၊ ဒန္တေဟိ အတ္ထောတိ စ မံ [အတ္ထောတိ မမံ (သျာ. က.)] အဝေါစ.
၁၂၆. ဗဟူ ဟိ မေ ဒန္တယုဂါ ဥဠာရာ၊ ယေ မေ ပိတူနဉ္စ [ပိတုန္နမ္ပိ (ပီ.)] ပိတာမဟာနံ၊
ဇာနာတိ သာ ကောဓနာ ရာဇပုတ္တီ၊ ဝဓတ္ထိကာ ဝေရမကာသိ ဗာလာ.
၁၂၇. ဥဋ္ဌေဟိ တွံ လုဒ္ဒ ခရံ ဂဟေတွာ၊ ဒန္တေ ဣမေ ဆိန္ဒ ပုရာ မရာမိ၊
ဝဇ္ဇာသိ တံ ကောဓနံ ရာဇပုတ္တိံ၊ ‘‘နာဂေါ ဟတော ဟန္ဒ ဣမဿ ဒန္တာ’’.
၁၂၈. ဥဋ္ဌာယ သော လုဒ္ဒေါ ခရံ ဂဟေတွာ၊ ဆေတွာန ဒန္တာနိ ဂဇုတ္တမဿ၊
ဝဂ္ဂူ သုဘေ အပ္ပဋိမေ ပထဗျာ၊ အာဒါယ ပက္ကာမိ တတော ဟိ ခိပ္ပံ.
၁၂၉. ဘယဋ္ဋိတာ [ဘယဒ္ဒိတာ (သီ. ပီ.)] နာဂဝဓေန အဋ္ဋာ၊ ယေ တေ နာဂါ အဋ္ဌ ဒိသာ ဝိဓာဝုံ၊
အဒိသွာန [အဒိသွ (သီ. ပီ.)] ပေါသံ ဂဇပစ္စမိတ္တံ၊ ပစ္စာဂမုံ ယေန သော နာဂရာဇာ.
၁၃၀. တေ တတ္ထ ကန္ဒိတွာ ရောဒိတွာန [ရောဒိတွ (သီ. ပီ.)] နာဂါ၊ သီသေ သကေ ပံသုကံ ဩကိရိတွာ၊
အဂမံသု တေ သဗ္ဗေ သကံ နိကေတံ၊ ပုရက္ခတွာ မဟေသိံ သဗ္ဗဘဒ္ဒံ.
၁၃၁. အာဒါယ ဒန္တာနိ ဂဇုတ္တမဿ၊ ဝဂ္ဂူ သုဘေ အပ္ပဋိမေ ပထဗျာ၊
သုဝဏ္ဏရာဇီဟိ သမန္တမောဒရေ၊ သော လုဒ္ဒကော ကာသိပုရံ ဥပါဂမိ၊
ဥပနေသိ သော ရာဇကညာယ ဒန္တေ၊ နာဂေါ ဟတော ဟန္ဒ ဣမဿ ဒန္တာ.
၁၃၂. ဒိသွာန ဒန္တာနိ ဂဇုတ္တမဿ၊ ဘတ္တုပ္ပိယဿ ပုရိမာယ ဇာတိယာ၊
တတ္ထေဝ တဿာ ဟဒယံ အဖာလိ၊ တေနေဝ သာ ကာလမကာသိ ဗာလာ.
၁၃၃. သမ္ဗောဓိပတ္တော သ [စ (သီ. သျာ.)၊ ဝ (ပီ.)] မဟာနုဘာဝေါ၊ သိတံ အကာသိ ပရိသာယ မဇ္ဈေ၊
ပုစ္ဆိံသု ဘိက္ခူ သုဝိမုတ္တစိတ္တာ၊ နာကာရဏေ ပါတုကရောန္တိ ဗုဒ္ဓါ.
၁၃၄. ယမဒ္ဒသာထ ဒဟရိံ ကုမာရိံ၊ ကာသာယဝတ္ထံ အနဂါရိယံ စရန္တိံ၊
သာ ခေါ တဒါ ရာဇကညာ အဟောသိ၊ အဟံ တဒါ နာဂရာဇာ အဟောသိံ.
၁၃၅. အာဒါယ ဒန္တာနိ ဂဇုတ္တမဿ၊ ဝဂ္ဂူ သုဘေ အပ္ပဋိမေ ပထဗျာ၊
ယော လုဒ္ဒကော ကာသိပုရံ ဥပါဂမိ၊ သော ခေါ တဒါ ဒေဝဒတ္တော အဟောသိ.
၁၃၆. အနာဝသူရံ စိရရတ္တသံသိတံ၊ ဥစ္စာဝစံ [ဥစံ နီစံ (သီ. သျာ. ပီ.)] စရိတမိဒံ ပုရာဏံ၊
ဝီတဒ္ဒရော ဝီတသောကော ဝိသလ္လော၊ သယံ အဘိညာယ အဘာသိ ဗုဒ္ဓေါ.
၁၃၇. အဟံ ဝေါ တေန ကာလေန၊ အဟောသိံ တတ္ထ ဘိက္ခဝေါ၊
နာဂရာဇာ တဒါ ဟောမိ [ဟောသိံ (သီ. သျာ. ပီ.)]၊ ဧဝံ ဓာရေထ ဇာတကန္တိ.
ဆဒ္ဒန္တဇာတကံ စတုတ္ထံ.