၄၇၁. မေဏ္ဍကပဉှဇာတကံ (၈)

၉၄. ယေသံ န ကဒါစိ ဘူတပုဗ္ဗံ၊ သချံ [သက္ခိံ (သီ. ပီ.)၊ သခိ (သျာ.)] သတ္တပဒမ္ပိမသ္မိ လောကေ၊

ဇာတာ အမိတ္တာ ဒုဝေ သဟာယာ၊ ပဋိသန္ဓာယ စရန္တိ ကိဿ ဟေတု.

၉၅. ယဒိ မေ အဇ္ဇ ပါတရာသကာလေ၊ ပဉှံ န သက္ကုဏေယျာထ ဝတ္တုမေတံ၊

ရဋ္ဌာ ပဗ္ဗာဇယိဿာမိ ဝေါ သဗ္ဗေ၊ န ဟိ မတ္ထော ဒုပ္ပညဇာတိကေဟိ.

၉၆. မဟာဇနသမာဂမမှိ ဃောရေ၊ ဇနကောလာဟလသင်္ဂမမှိ ဇာတေ၊

ဝိက္ခိတ္တမနာ အနေကစိတ္တာ၊ ပဉှံ န သက္ကုဏောမ ဝတ္တုမေတံ.

၉၇. ဧကဂ္ဂစိတ္တာဝ ဧကမေကာ၊ ရဟသိ ဂတာ အတ္ထံ နိစိန္တယိတွာ [အတ္ထာနိ စိန္တယိတွာ (သျာ. က.)]၊

ပဝိဝေကေ သမ္မသိတွာန ဓီရာ၊ အထ ဝက္ခန္တိ ဇနိန္ဒ ဧတမတ္ထံ.

၉၈. ဥဂ္ဂပုတ္တ-ရာဇပုတ္တိယာနံ၊ ဥရဗ္ဘဿ မံသံ ပိယံ မနာပံ၊

န သုနခဿ တေ အဒေန္တိ မံသံ၊ အထ မေဏ္ဍဿ သုဏေန သချမဿ.

၉၉. စမ္မံ ဝိဟနန္တိ ဧဠကဿ၊ အဿပိဋ္ဌတ္ထရဿုခဿ [အဿပိဋ္ဌတ္ထရဏသုခဿ (သီ.)] ဟေတု၊

န စ တေ သုနခဿ အတ္ထရန္တိ၊ အထ မေဏ္ဍဿ သုဏေန သချမဿ.

၁၀၀. အာဝေလ္လိတသိင်္ဂိကော ဟိ မေဏ္ဍော၊ န စ သုနခဿ ဝိသာဏကာနိ အတ္ထိ၊

တိဏဘက္ခော မံသဘောဇနော စ၊ အထ မေဏ္ဍဿ သုဏေန သချမဿ.

၁၀၁. တိဏမာသိ ပလာသမာသိ မေဏ္ဍော၊ န စ သုနခေါ တိဏမာသိ နော ပလာသံ၊

ဂဏှေယျ သုဏော သသံ ဗိဠာရံ၊ အထ မေဏ္ဍဿ သုဏေန သချမဿ.

၁၀၂. အဋ္ဌဍ္ဎပဒေါ စတုပ္ပဒဿ၊ မေဏ္ဍော အဋ္ဌနခေါ အဒိဿမာနော၊

ဆာဒိယမာဟရတီ အယံ ဣမဿ၊ မံသံ အာဟရတီ အယံ အမုဿ.

၁၀၃. ပါသာဒဝရဂတော ဝိဒေဟသေဋ္ဌော၊ ဝိတိဟာရံ အညမညဘောဇနာနံ၊

အဒ္ဒက္ခိ [အဒ္ဒသ (သျာ. က.)] ကိရ သက္ခိကံ ဇနိန္ဒော၊ ဗုဘုက္ကဿ ပုဏ္ဏံ မုခဿ [ဘောဘုက္ခဿ စ ပုဏ္ဏမုခဿ (သီ.)] စေတံ.

၁၀၄. လာဘာ ဝတ မေ အနပ္ပရူပါ၊ ယဿ မေဒိသာ ပဏ္ဍိတာ ကုလမှိ၊

ပဉှဿ ဂမ္ဘီရဂတံ နိပုဏမတ္ထံ၊ ပဋိဝိဇ္ဈန္တိ သုဘာသိတေန ဓီရာ.

၁၀၅. အဿတရိရထဉ္စ ဧကမေကံ၊ ဖီတံ ဂါမဝရဉ္စ ဧကမေကံ၊

သဗ္ဗေသံ ဝေါ ဒမ္မိ ပဏ္ဍိတာနံ၊ ပရမပ္ပတီတမနော သုဘာသိတေနာတိ.

မေဏ္ဍကပဉှဇာတကံ အဋ္ဌမံ.