၄၇၂. မဟာပဒုမဇာတကံ (၉)

၁၀၆. နာဒဋ္ဌာ [နာဒိဋ္ဌာ (က. သီ. သျာ. က.)] ပရတော ဒေါသံ၊ အဏုံ ထူလာနိ သဗ္ဗသော၊

ဣဿရော ပဏယေ ဒဏ္ဍံ၊ သာမံ အပ္ပဋိဝေက္ခိယ.

၁၀၇. ယော စ အပ္ပဋိဝေက္ခိတွာ၊ ဒဏ္ဍံ ကုဗ္ဗတိ ခတ္တိယော၊

သကဏ္ဋကံ သော ဂိလတိ၊ ဇစ္စန္ဓောဝ သမက္ခိကံ.

၁၀၈. အဒဏ္ဍိယံ ဒဏ္ဍယတိ [ဒဏ္ဍိယတိ (သျာ. ပီ.)]၊ ဒဏ္ဍိယဉ္စ အဒဏ္ဍိယံ [အဒဏ္ဍိယ (နိယျ)၊ န ဒဏ္ဍယေ (?)]၊

အန္ဓောဝ ဝိသမံ မဂ္ဂံ၊ န ဇာနာတိ သမာသမံ.

၁၀၉. ယော စ ဧတာနိ ဌာနာနိ၊ အဏုံ ထူလာနိ သဗ္ဗသော၊

သုဒိဋ္ဌမနုသာသေယျ၊ သ ဝေ ဝေါဟရိတု [ဝေါဟာတု (ပီ.)] မရဟတိ.

၁၁၀. နေကန္တမုဒုနာ သက္ကာ၊ ဧကန္တတိခိဏေန ဝါ၊

အတ္တံ မဟန္တေ [မဟတ္တေ (သျာ. က.)] ဌပေတုံ [ဌာပေတုံ (သီ. သျာ. ပီ.)]၊ တသ္မာ ဥဘယမာစရေ.

၁၁၁. ပရိဘူတော မုဒု ဟောတိ၊ အတိတိက္ခော စ ဝေရဝါ၊

ဧတဉ္စ ဥဘယံ ဉတွာ၊ အနုမဇ္ဈံ သမာစရေ.

၁၁၂. ဗဟုမ္ပိ ရတ္တော ဘာသေယျ၊ ဒုဋ္ဌောပိ ဗဟု ဘာသတိ၊

န ဣတ္ထိကာရဏာ ရာဇ၊ ပုတ္တံ ဃာတေတုမရဟသိ.

၁၁၃. သဗ္ဗောဝ [သဗ္ဗော စ (က. သီ. ပီ.)] လောကော ဧကတော [ဧကန္တော (သီ. ပီ.)]၊ ဣတ္ထီ စ အယမေကိကာ၊

တေနာဟံ ပဋိပဇ္ဇိဿံ၊ ဂစ္ဆထ ပက္ခိပထေဝ [ပက္ခိပေထ (သျာ. အဋ္ဌ.)] တံ.

၁၁၄. အနေကတာလေ နရကေ၊ ဂမ္ဘီရေ စ သုဒုတ္တရေ [ဂမ္ဘီရေ သုဒုရုတ္တရေ (ပီ. က.)]၊

ပါတိတော ဂိရိဒုဂ္ဂသ္မိံ၊ ကေန တွံ တတ္ထ နာမရိ.

၁၁၅. နာဂေါ ဇာတဖဏော တတ္ထ၊ ထာမဝါ ဂိရိသာနုဇော၊

ပစ္စဂ္ဂဟိ မံ ဘောဂေဟိ၊ တေနာဟံ တတ္ထ နာမရိံ.

၁၁၆. ဧဟိ တံ ပဋိနေဿာမိ၊ ရာဇပုတ္တ သကံ ဃရံ၊

ရဇ္ဇံ ကာရေဟိ [ကာရေသိ (သီ.)] ဘဒ္ဒန္တေ၊ ကိံ အရညေ ကရိဿသိ.

၁၁၇. ယထာ ဂိလိတွာ ဗဠိသံ၊ ဥဒ္ဓရေယျ သလောဟိတံ၊

ဥဒ္ဓရိတွာ သုခီ အဿ၊ ဧဝံ [သုခံ (ပီ. က.)] ပဿာမိ အတ္တနံ [အတ္တနိ (ပီ. က.)၊ အတ္တနာ (သျာ.)၊ ဧဝံ အဟမ္ပိ ပုန သောတ္ထိဘာဝပ္ပတ္တံ ဂိလိတဗဠိသံ ပုရိသမိဝ အတ္တာနံ ပဿာမီတိ (အဋ္ဌ. သံဝဏ္ဏနာ)].

၁၁၈. ကိံ နု တွံ ဗဠိသံ ဗြူသိ၊ ကိံ တွံ ဗြူသိ သလောဟိတံ၊

ကိံ နု တွံ ဥဗ္ဘတံ ဗြူသိ၊ တံ မေ အက္ခာဟိ ပုစ္ဆိတော.

၁၁၉. ကာမာဟံ ဗဠိသံ ဗြူမိ၊ ဟတ္ထိအဿံ သလောဟိတံ၊

စတ္တာဟံ ဥဗ္ဘတံ ဗြူမိ၊ ဧဝံ ဇာနာဟိ ခတ္တိယ.

၁၂၀. စိဉ္စာမာဏဝိကာ မာတာ၊ ဒေဝဒတ္တော စ မေ ပိတာ၊

အာနန္ဒော ပဏ္ဍိတော နာဂေါ၊ သာရိပုတ္တော စ ဒေဝတာ၊

ရာဇပုတ္တော အဟံ အာသိံ [အဟံ တဒါ ရာဇပုတ္တော (သီ. သျာ. ပီ.)]၊ ဧဝံ ဓာရေထ ဇာတကန္တိ.

မဟာပဒုမဇာတကံ နဝမံ.