၁၂. ဒွါဒသကနိပါတော
၄၆၄. စူဠကုဏာလဇာတကံ (၁)
၁. လုဒ္ဓါနံ [ခုဒ္ဒါနံ (သီ. သျာ. ပီ.)] လဟုစိတ္တာနံ၊ အကတညူန ဒုဗ္ဘိနံ၊
နာဒေဝသတ္တော ပုရိသော၊ ထီနံ သဒ္ဓါတုမရဟတိ.
၂. န တာ ပဇာနန္တိ ကတံ န ကိစ္စံ၊ န မာတရံ ပိတရံ ဘာတရံ ဝါ၊
အနရိယာ သမတိက္ကန္တဓမ္မာ၊ သဿေဝ စိတ္တဿ ဝသံ ဝဇန္တိ.
၃. စိရာနုဝုဋ္ဌမ္ပိ [စိရာနုဝုတ္ထမ္ပိ (သီ. ပီ.)] ပိယံ မနာပံ၊ အနုကမ္ပကံ ပါဏသမမ္ပိ ဘတ္တုံ [သန္တံ (သီ. သျာ. ပီ.)]၊
အာဝါသု ကိစ္စေသု စ နံ ဇဟန္တိ၊ တသ္မာဟမိတ္ထီနံ န ဝိဿသာမိ.
၄. ထီနဉှိ စိတ္တံ ယထာ ဝါနရဿ၊ ကန္နပ္ပကန္နံ ယထာ ရုက္ခဆာယာ၊
စလာစလံ ဟဒယမိတ္ထိယာနံ၊ စက္ကဿ နေမိ ဝိယ ပရိဝတ္တတိ.
၅. ယဒါ တာ ပဿန္တိ သမေက္ခမာနာ၊ အာဒေယျရူပံ ပုရိသဿ ဝိတ္တံ၊
သဏှာဟိ ဝါစာဟိ နယန္တိ မေနံ၊ ကမ္ဗောဇကာ ဇလဇေနေဝ အဿံ.
၆. ယဒါ န ပဿန္တိ သမေက္ခမာနာ၊ အာဒေယျရူပံ ပုရိသဿ ဝိတ္တံ၊
သမန္တတော နံ ပရိဝဇ္ဇယန္တိ၊ တိဏ္ဏော နဒီပါရဂတောဝ ကုလ္လံ.
၇. သိလေသူပမာ သိခိရိဝ သဗ္ဗဘက္ခာ၊ တိက္ခမာယာ နဒီရိဝ သီဃသောတာ၊
သေဝန္တိ ဟေတာ ပိယမပ္ပိယဉ္စ၊ နာဝါ ယထာ ဩရကူလံ ပရဉ္စ.
၈. န တာ ဧကဿ န ဒွိန္နံ၊ အာပဏောဝ ပသာရိတော၊
ယော တာ မယှန္တိ မညေယျ၊ ဝါတံ ဇာလေန ဗာဓယေ [ဗန္ဓယေ (သျာ. က.)].
၉. ယထာ နဒီ စ ပန္ထော စ၊ ပါနာဂါရံ သဘာ ပပါ၊
ဧဝံ လောကိတ္ထိယော နာမ၊ ဝေလာ တာသံ န ဝိဇ္ဇတိ [ဣမိဿာ ဂါထာယ ပုဗ္ဗဒ္ဓါပရဒ္ဓံ ဝိပရိယာယေန ဒိဿတိ (က.)].
၁၀. ဃတာသနသမာ ဧတာ၊ ကဏှသပ္ပသိရူပမာ၊
ဂါဝေါ ဗဟိတိဏဿေဝ၊ ဩမသန္တိ ဝရံ ဝရံ.
၁၁. ဃတာသနံ ကုဉ္ဇရံ ကဏှသပ္ပံ၊ မုဒ္ဓါဘိသိတ္တံ ပမဒါ စ သဗ္ဗာ၊
ဧတေ နရော နိစ္စယတော [နိစ္စယတ္တော (သီ. ပီ.)] ဘဇေထ၊ တေသံ ဟဝေ ဒုဗ္ဗိဒု သဗ္ဗဘာဝေါ [သစ္စဘာဝေါ (သျာ.)].
၁၂. နစ္စန္တဝဏ္ဏာ န ဗဟူနံ ကန္တာ၊ န ဒက္ခိဏာ ပမဒါ သေဝိတဗ္ဗာ၊
န ပရဿ ဘရိယာ န ဓနဿ ဟေတု၊ ဧတိတ္ထိယော ပဉ္စ န သေဝိတဗ္ဗာတိ.
စူဠကုဏာလဇာတကံ ပဌမံ.
၄၆၅. ဘဒ္ဒသာလဇာတကံ (၂)
၁၃. ကာ တွံ သုဒ္ဓေဟိ ဝတ္ထေဟိ၊ အဃေ ဝေဟာယသံ [ဝေဟာသယံ (သီ. ပီ.)] ဌိတာ၊
ကေန တျာဿူနိ ဝတ္တန္တိ၊ ကုတော တံ ဘယမာဂတံ.
၁၄. တဝေဝ ဒေဝ ဝိဇိတေ၊ ဘဒ္ဒသာလောတိ မံ ဝိဒူ၊
သဋ္ဌိ [သဋ္ဌိံ (သီ. ပီ.)] ဝဿသဟဿာနိ၊ တိဋ္ဌတော ပူဇိတဿ မေ.
၁၅. ကာရယန္တာ နဂရာနိ၊ အဂါရေ စ ဒိသမ္ပတိ၊
ဝိဝိဓေ စာပိ ပါသာဒေ၊ န မံ တေ အစ္စမညိသုံ၊
ယထေဝ မံ တေ ပူဇေသုံ၊ တထေဝ တွမ္ပိ ပူဇယ.
၁၆. တံ ဣဝါဟံ [တဉ္စ အဟံ (သီ. သျာ. ပီ.)] န ပဿာမိ၊ ထူလံ ကာယေန တေ ဒုမံ၊
အာရောဟပရိဏာဟေန၊ အဘိရူပေါသိ ဇာတိယာ.
၁၇. ပါသာဒံ ကာရယိဿာမိ၊ ဧကတ္ထမ္ဘံ မနောရမံ၊
တတ္ထ တံ ဥပနေဿာမိ၊ စိရံ တေ ယက္ခ ဇီဝိတံ.
၁၈. ဧဝံ စိတ္တံ ဥဒပါဒိ၊ သရီရေန ဝိနာဘာဝေါ၊
ပုထုသော မံ ဝိကန္တိတွာ၊ ခဏ္ဍသော အဝကန္တထ.
၁၉. အဂ္ဂေ စ ဆေတွာ မဇ္ဈေ စ၊ ပစ္ဆာ မူလမှိ ဆိန္ဒထ [မူလဉ္စ ဆိန္ဒထ (သီ.)၊ မူလံ ဝိဆိန္ဒထ (ပီ.)]၊
ဧဝံ မေ ဆိဇ္ဇမာနဿ၊ န ဒုက္ခံ မရဏံ သိယာ.
၂၀. ဟတ္ထပါဒံ [ဟတ္ထပါဒေ (က.)] ယထာ ဆိန္ဒေ [ဆိန္နေ (က.)]၊ ကဏ္ဏနာသဉ္စ ဇီဝတော၊
တတော ပစ္ဆာ သိရော ဆိန္ဒေ၊ တံ ဒုက္ခံ မရဏံ သိယာ.
၂၁. သုခံ နု ခဏ္ဍသော ဆိန္နံ၊ ဘဒ္ဒသာလဝနပ္ပတိ၊
ကိံ ဟေတု ကိံ ဥပါဒါယ၊ ခဏ္ဍသော ဆိန္နမိစ္ဆသိ.
၂၂. ယဉ္စ ဟေတုမုပါဒါယ၊ ဟေတုံ ဓမ္မူပသံဟိတံ၊
ခဏ္ဍသော ဆိန္နမိစ္ဆာမိ၊ မဟာရာဇ သုဏောဟိ မေ.
၂၃. ဉာတီ မေ သုခသံဝဒ္ဓါ၊ မမ ပဿေ နိဝါတဇာ၊
တေပိဟံ ဥပဟိံသေယျံ၊ ပရေသံ အသုခေါစိတံ.
၂၄. စေတေယျရူပံ [စေတဗ္ဗရူပံ (သီ. ပီ.)] စေတေသိ၊ ဘဒ္ဒသာလဝနပ္ပတိ၊
ဟိတကာမောသိ ဉာတီနံ၊ အဘယံ သမ္မ ဒမ္မိ တေတိ.
ဘဒ္ဒသာလဇာတကံ ဒုတိယံ.
၄၆၆. သမုဒ္ဒဝါဏိဇဇာတကံ (၃)
၂၅. ကသန္တိ ဝပန္တိ တေ ဇနာ၊ မနုဇာ ကမ္မဖလူပဇီဝိနော၊
နယိမဿ ဒီပကဿ ဘာဂိနော၊ ဇမ္ဗုဒီပါ ဣဒမေဝ နော ဝရံ.
၂၆. တိပဉ္စရတ္တူပဂတမှိ စန္ဒေ၊ ဝေဂေါ မဟာ ဟေဟိတိ သာဂရဿ၊
ဥပ္လဝိဿံ ဒီပမိမံ ဥဠာရံ၊ မာ ဝေါ ဝဓီ ဂစ္ဆထ လေဏမညံ.
၂၇. န ဇာတုယံ သာဂရဝါရိဝေဂေါ၊ ဥပ္လဝိဿံ ဒီပမိမံ ဥဠာရံ၊
တံ မေ နိမိတ္တေဟိ ဗဟူဟိ ဒိဋ္ဌံ၊ မာ ဘေထ ကိံ သောစထ မောဒထဝှေါ [မောဒထ ဝေါ (က.) ၆.၃၈ မောဂ္ဂလ္လာနသုတ္တံ ပဿိတဗ္ဗံ].
၂၈. ပဟူတဘက္ခံ ဗဟုအန္နပါနံ၊ ပတ္တတ္ထ အာဝါသမိမံ ဥဠာရံ၊
န ဝေါ ဘယံ ပဋိပဿာမိ ကိဉ္စိ၊ အာပုတ္တပုတ္တေဟိ ပမောဒထဝှေါ.
၂၉. ယော ဒေဝေါယံ ဒက္ခိဏာယံ [ဒက္ခိဏဿံ (သီ.)] ဒိသာယံ၊ ခေမန္တိ ပက္ကောသတိ တဿ သစ္စံ၊
န ဥတ္တရော ဝေဒိ ဘယာဘယဿ၊ မာ ဘေထ ကိံ သောစထ မောဒထဝှေါ.
၃၀. ယထာ ဣမေ ဝိပ္ပဝဒန္တိ ယက္ခာ၊ ဧကော ဘယံ သံသတိ ခေမမေကော၊
တဒိင်္ဃ မယှံ ဝစနံ သုဏာထ၊ ခိပ္ပံ လဟုံ မာ ဝိနဿိမှ သဗ္ဗေ.
၃၁. သဗ္ဗေ သမာဂမ္မ ကရောမ နာဝံ၊ ဒေါဏိံ ဒဠှံ သဗ္ဗယန္တူပပန္နံ၊
သစေ အယံ ဒက္ခိဏော သစ္စမာဟ၊ မောဃံ ပဋိက္ကောသတိ ဥတ္တရောယံ၊
သာ စေဝ နော ဟေဟိတိ အာပဒတ္ထာ၊ ဣမဉ္စ ဒီပံ န ပရိစ္စဇေမ.
၃၂. သစေ စ ခေါ ဥတ္တရော သစ္စမာဟ၊ မောဃံ ပဋိက္ကောသတိ ဒက္ခိဏောယံ၊
တမေဝ နာဝံ အဘိရုယှ သဗ္ဗေ၊ ဧဝံ မယံ သောတ္ထိ တရေမု ပါရံ.
၃၃. န ဝေ သုဂဏှံ ပဌမေန သေဋ္ဌံ၊ ကနိဋ္ဌမာပါထဂတံ ဂဟေတွာ၊
ယော စီဓ တစ္ဆံ [မဇ္ဈံ (သီ. သျာ. ပီ.)] ပဝိစေယျ ဂဏှတိ [ဂဏှိ (က.)]၊ သ ဝေ နရော သေဋ္ဌမုပေတိ ဌာနံ.
၃၄. ယထာပိ တေ သာဂရဝါရိမဇ္ဈေ၊ သကမ္မုနာ သောတ္ထိ ဝဟိံသု ဝါဏိဇာ၊
အနာဂတတ္ထံ ပဋိဝိဇ္ဈိယာန၊ အပ္ပမ္ပိ နာစ္စေတိ သ ဘူရိပညော.
၃၅. ဗာလာ စ မောဟေန ရသာနုဂိဒ္ဓါ၊ အနာဂတံ အပ္ပဋိဝိဇ္ဈိယတ္ထံ၊
ပစ္စုပ္ပန္နေ သီဒန္တိ အတ္ထဇာတေ၊ သမုဒ္ဒမဇ္ဈေ ယထာ တေ မနုဿာ.
၃၆. အနာဂတံ ပဋိကယိရာထ ကိစ္စံ၊ ‘‘မာ မံ ကိစ္စံ ကိစ္စကာလေ ဗျဓေသိ’’၊
တံ တာဒိသံ ပဋိကတ [ပဋိကတံ (က.)၊ ပဋိဂတ (သီ. အဋ္ဌ.)၊ ပဋိကစ္စ (?)] ကိစ္စကာရိံ၊ န တံ ကိစ္စံ ကိစ္စကာလေ ဗျဓေတီတိ.
သမုဒ္ဒဝါဏိဇဇာတကံ တတိယံ.
၄၆၇. ကာမဇာတကံ (၄)
၃၇. ကာမံ ကာမယမာနဿ၊ တဿ စေ တံ သမိဇ္ဈတိ၊
အဒ္ဓါ ပီတိမနော ဟောတိ၊ လဒ္ဓါ မစ္စော ယဒိစ္ဆတိ.
၃၈. ကာမံ ကာမယမာနဿ၊ တဿ စေ တံ သမိဇ္ဈတိ၊
တတော နံ အပရံ ကာမေ၊ ဓမ္မေ တဏှံဝ ဝိန္ဒတိ.
၃၉. ဂဝံဝ သိင်္ဂိနော သိင်္ဂံ၊ ဝဍ္ဎမာနဿ ဝဍ္ဎတိ၊
ဧဝံ မန္ဒဿ ပေါသဿ၊ ဗာလဿ အဝိဇာနတော၊
ဘိယျော တဏှာ ပိပါသာ စ၊ ဝဍ္ဎမာနဿ ဝဍ္ဎတိ.
၄၀. ပထဗျာ သာလိယဝကံ၊ ဂဝဿံ [ဂဝါသံ (သီ. သျာ. ပီ.)] ဒါသပေါရိသံ၊
ဒတွာ စ [ဒတွာပိ (သီ. သျာ.)၊ ဒတွာ ဝါ (ပီ.)] နာလမေကဿ၊ ဣတိ ဝိဒွါ [ဝိဒ္ဓါ (သျာ.)] သမံ စရေ.
၄၁. ရာဇာ ပသယှ ပထဝိံ ဝိဇိတွာ၊ သသာဂရန္တံ မဟိမာဝသန္တော၊
ဩရံ သမုဒ္ဒဿ အတိတ္တရူပေါ [အတိတ္တိရူပေါ (က.)]၊ ပါရံ သမုဒ္ဒဿပိ ပတ္ထယေထ.
၄၂. ယာဝ အနုဿရံ ကာမေ၊ မနသာ တိတ္တိ နာဇ္ဈဂါ၊
တတော နိဝတ္တာ ပဋိကမ္မ ဒိသွာ၊ တေ ဝေ သုတိတ္တာ ယေ [တိတ္တာ (သီ. သျာ. ပီ.)] ပညာယ တိတ္တာ.
၄၃. ပညာယ တိတ္တိနံ [တိတ္တီနံ (သီ. သျာ.)] သေဋ္ဌံ၊ န သော ကာမေဟိ တပ္ပတိ၊
ပညာယ တိတ္တံ ပုရိသံ၊ တဏှာ န ကုရုတေ ဝသံ.
၄၄. အပစိနေထေဝ ကာမာနံ [ကာမာနိ (သီ. သျာ. ပီ.)]၊ အပ္ပိစ္ဆဿ အလောလုပေါ၊
သမုဒ္ဒမတ္တော ပုရိသော၊ န သော ကာမေဟိ တပ္ပတိ.
၄၅. ရထကာရောဝ စမ္မဿ၊ ပရိကန္တံ ဥပါဟနံ၊
ယံ ယံ စဇတိ [ဇဟတိ (သျာ. က.)] ကာမာနံ၊ တံ တံ သမ္ပဇ္ဇတေ သုခံ၊
သဗ္ဗံ စေ သုခမိစ္ဆေယျ၊ သဗ္ဗေ ကာမေ ပရိစ္စဇေ.
၄၆. အဋ္ဌ တေ ဘာသိတာ ဂါထာ၊ သဗ္ဗာ ဟောန္တိ သဟဿိယော [သဟဿိယာ (?) ဥပရိ သုတသောမဇာတကေ တထာ ဒိဿတိ]၊
ပဋိဂဏှ မဟာဗြဟ္မေ၊ သာဓေတံ တဝ ဘာသိတံ.
၄၇. န မေ အတ္ထော သဟဿေဟိ၊ သတေဟိ နဟုတေဟိ ဝါ၊
ပစ္ဆိမံ ဘာသတော ဂါထံ၊ ကာမေ မေ န ရတော မနော.
၄၈. ဘဒြကော [သဒ္ဒေါ (သီ.)] ဝတာယံ မာဏဝကော၊ သဗ္ဗလောကဝိဒူ မုနိ၊
ယော ဣမံ တဏှံ [ယော တဏှံ (သီ. သျာ.)] ဒုက္ခဇနနိံ၊ ပရိဇာနာတိ ပဏ္ဍိတောတိ.
ကာမဇာတကံ စတုတ္ထံ.
၄၆၈. ဇနသန္ဓဇာတကံ (၅)
၄၉. ဒသ ခလု ဣမာနိ [ခလုမာနိ (သျာ.)] ဌာနာနိ၊ ယာနိ ပုဗ္ဗေ အကရိတွာ၊
သ ပစ္ဆာ မနုတပ္ပတိ၊ ဣစ္စေဝါဟ [ဣစ္စာဟ ရာဇာ (သီ. သျာ. ပီ.)] ဇနသန္ဓော.
၅၀. အလဒ္ဓါ ဝိတ္တံ တပ္ပတိ၊ ပုဗ္ဗေ အသမုဒါနိတံ၊
န ပုဗ္ဗေ ဓနမေသိဿံ၊ ဣတိ ပစ္ဆာနုတပ္ပတိ.
၅၁. သကျရူပံ ပုရေ သန္တံ၊ မယာ သိပ္ပံ န သိက္ခိတံ၊
ကိစ္ဆာ ဝုတ္တိ အသိပ္ပဿ၊ ဣတိ ပစ္ဆာနုတပ္ပတိ.
၅၂. ကူဋဝေဒီ ပုရေ အာသိံ၊ ပိသုဏော ပိဋ္ဌိမံသိကော၊
စဏ္ဍော စ ဖရုသော စာပိ [စာသိံ (သီ. သျာ. ပီ.)]၊ ဣတိ ပစ္ဆာနုတပ္ပတိ.
၅၃. ပါဏာတိပါတီ ပုရေ အာသိံ၊ လုဒ္ဒေါ စာပိ [စာသိံ (သီ. ပီ.)] အနာရိယော၊
ဘူတာနံ နာပစာယိဿံ၊ ဣတိ ပစ္ဆာနုတပ္ပတိ.
၅၄. ဗဟူသု ဝတ သန္တီသု၊ အနာပါဒါသု ဣတ္ထိသု၊
ပရဒါရံ အသေဝိဿံ၊ ဣတိ ပစ္ဆာနုတပ္ပတိ.
၅၅. ဗဟုမှိ ဝတ သန္တမှိ၊ အန္နပါနေ ဥပဋ္ဌိတေ၊
န ပုဗ္ဗေ အဒဒံ [အဒဒိံ (သီ.)] ဒါနံ၊ ဣတိ ပစ္ဆာနုတပ္ပတိ.
၅၆. မာတရံ ပိတရဉ္စာပိ၊ ဇိဏ္ဏကံ ဂတယောဗ္ဗနံ [ဇိဏ္ဏကေ ဂတယောဗ္ဗနေ (သီ. သျာ. ပီ.)]၊
ပဟု သန္တော န ပေါသိဿံ၊ ဣတိ ပစ္ဆာနုတပ္ပတိ.
၅၇. အာစရိယမနုသတ္ထာရံ၊ သဗ္ဗကာမရသာဟရံ၊
ပိတရံ အတိမညိဿံ၊ ဣတိ ပစ္ဆာနုတပ္ပတိ.
၅၈. သမဏေ ဗြာဟ္မဏေ စာပိ၊ သီလဝန္တေ ဗဟုဿုတေ၊
န ပုဗ္ဗေ ပယိရုပါသိဿံ၊ ဣတိ ပစ္ဆာနုတပ္ပတိ.
၅၉. သာဓု ဟောတိ တပေါ စိဏ္ဏော၊ သန္တော စ ပယိရုပါသိတော၊
န စ ပုဗ္ဗေ တပေါ စိဏ္ဏော၊ ဣတိ ပစ္ဆာနုတပ္ပတိ.
၆၀. ယော စ ဧတာနိ ဌာနာနိ၊ ယောနိသော ပဋိပဇ္ဇတိ၊
ကရံ ပုရိသကိစ္စာနိ၊ သ ပစ္ဆာ နာနုတပ္ပတီတိ.
ဇနသန္ဓဇာတကံ ပဉ္စမံ.
၄၆၉. မဟာကဏှဇာတကံ (၆)
၆၁. ကဏှော ကဏှော စ ဃောရော စ၊ သုက္ကဒါဌော ပဘာသဝါ [ပတာပဝါ (သီ. သျာ. ပီ.)]၊
ဗဒ္ဓေါ ပဉ္စဟိ ရဇ္ဇူဟိ၊ ကိံ ရဝိ [ဓီရ (သီ. ပီ.)၊ ဝီရ (သျာ.)] သုနခေါ တဝ.
၆၂. နာယံ မိဂါနမတ္ထာယ၊ ဥသီနက [ဥသီနရ (သီ. ပီ.)၊ ဥသီန္နရ (သျာ.)] ဘဝိဿတိ၊
မနုဿာနံ အနယော ဟုတွာ၊ တဒါ ကဏှော ပမောက္ခတိ.
၆၃. ပတ္တဟတ္ထာ သမဏကာ၊ မုဏ္ဍာ သင်္ဃာဋိပါရုတာ၊
နင်္ဂလေဟိ ကသိဿန္တိ၊ တဒါ ကဏှော ပမောက္ခတိ.
၆၄. တပဿိနိယော [တပနီယာ (က.) ဒုတိယန္တပဒါနိ ဟေတာနိ] ပဗ္ဗဇိတာ၊ မုဏ္ဍာ သင်္ဃာဋိပါရုတာ၊
ယဒါ လောကေ ဂမိဿန္တိ၊ တဒါ ကဏှော ပမောက္ခတိ.
၆၅. ဒီဃောတ္တရောဋ္ဌာ ဇဋိလာ၊ ပင်္ကဒန္တာ ရဇဿိရာ၊
ဣဏံ စောဒါယ [ဝေါဒါယ (သီ. ပီ.)၊ စောဒယ (သျာ.)] ဂစ္ဆန္တိ၊ တဒါ ကဏှော ပမောက္ခတိ.
၆၆. အဓိစ္စ ဝေဒေ [ဝေဒံ (က.)] သာဝိတ္တိံ၊ ယညတန္တဉ္စ [တန္တြဉ္စ (သီ. သျာ. ပီ.)] ဗြာဟ္မဏာ၊
ဘတိကာယ ယဇိဿန္တိ၊ တဒါ ကဏှော ပမောက္ခတိ.
၆၇. မာတရံ ပိတရဉ္စာပိ၊ ဇိဏ္ဏကံ ဂတယောဗ္ဗနံ၊
ပဟူ သန္တော [သန္တာ (သီ.)] န ဘရန္တိ၊ တဒါ ကဏှော ပမောက္ခတိ.