၂. ဒုတိယအဿုတဝါသုတ္တဝဏ္ဏနာ

၆၂. ဒုတိယေ သုခဝေဒနိယန္တိ သုခဝေဒနာယ ပစ္စယံ. ဖဿန္တိ စက္ခုသမ္ဖဿာဒိံ. နနု စ စက္ခုသမ္ဖဿော သုခဝေဒနာယ ပစ္စယော န ဟောတီတိ? သဟဇာတပစ္စယေန န ဟောတိ၊ ဥပနိဿယပစ္စယေန ပန ဇဝနဝေဒနာယ ဟောတိ၊ တံ သန္ဓာယေတံ ဝုတ္တံ. သောတသမ္ဖဿာဒီသုပိ ဧသေဝ နယော. တဇ္ဇန္တိ တဇ္ဇာတိကံ တဿာရုပ္ပံ၊ တဿ ဖဿဿ အနုရူပန္တိ အတ္ထော. ဒုက္ခဝေဒနိယန္တိအာဒိ ဝုတ္တနယေနေဝ ဝေဒိတဗ္ဗံ. သင်္ဃဋ္ဋနသမောဓာနာတိ သင်္ဃဋ္ဋနေန စေဝ သမောဓာနေန စ၊ သင်္ဃဋ္ဋနသမ္ပိဏ္ဍနေနာတိ အတ္ထော. ဥသ္မာတိ ဥဏှာကာရော. တေဇော အဘိနိဗ္ဗတ္တတီတိ အဂ္ဂိစုဏ္ဏော နိက္ခမတီတိ န ဂဟေတဗ္ဗံ၊ ဥသ္မာကာရဿေဝ ပန ဧတံ ဝေဝစနံ. တတ္ထ ဒွိန္နံ ကဋ္ဌာနန္တိ ဒွိန္နံ အရဏီနံ. တတ္ထ အဓောအရဏီ ဝိယ ဝတ္ထု၊ ဥတ္တရာရဏီ ဝိယ အာရမ္မဏံ၊ သင်္ဃဋ္ဋနံ ဝိယ ဖဿော၊ ဥသ္မာဓာတု ဝိယ ဝေဒနာ. ဒုတိယံ.