၈. စူဠသေဋ္ဌိပေတဝတ္ထုဝဏ္ဏနာ

နဂ္ဂေါ ကိသော ပဗ္ဗဇိတောသိ၊ ဘန္တေတိ ဣဒံ သတ္ထရိ ဝေဠုဝနေ ဝိဟရန္တေ စူဠသေဋ္ဌိပေတံ အာရဗ္ဘ ဝုတ္တံ. ဗာရာဏသိယံ ကိရ ဧကော ဂဟပတိ အဿဒ္ဓေါ အပ္ပသန္နော မစ္ဆရီ ကဒရိယော ပုညကိရိယာယ အနာဒရော စူဠသေဋ္ဌိ နာမ အဟောသိ. သော ကာလံ ကတွာ ပေတေသု နိဗ္ဗတ္တိ၊ တဿ ကာယော အပဂတမံသလောဟိတော အဋ္ဌိနှာရုစမ္မမတ္တော မုဏ္ဍော အပေတဝတ္ထော အဟောသိ. ဓီတာ ပနဿ အနုလာ အန္ဓကဝိန္ဒေ သာမိကဿ ဂေဟေ ဝသန္တီ ပိတရံ ဥဒ္ဒိဿ ဗြာဟ္မဏေ ဘောဇေတုကာမာ တဏ္ဍုလာဒီနိ ဒါနူပကရဏာနိ သဇ္ဇေသိ. တံ ဉတွာ ပေတော အာသာယ အာကာသေန တတ္ထ ဂစ္ဆန္တော ရာဇဂဟံ သမ္ပာပုဏိ. တေန စ သမယေန ရာဇာ အဇာတသတ္တု ဒေဝဒတ္တေန ဥယျောဇိတော ပိတရံ ဇီဝိတာ ဝေါရောပေတွာ တေန ဝိပ္ပဋိသာရေန ဒုဿုပိနေန စ နိဒ္ဒံ အနုပဂစ္ဆန္တော ဥပရိပါသာဒဝရဂတော စင်္ကမန္တော တံ ပေတံ အာကာသေန ဂစ္ဆန္တံ ဒိသွာ ဣမာယ ဂါထာယ ပုစ္ဆိ –

၂၄၆. ‘‘နဂ္ဂေါ ကိသော ပဗ္ဗဇိတောသိ ဘန္တေ၊ ရတ္တိံ ကုဟိံ ဂစ္ဆသိ ကိဿဟေတု၊

အာစိက္ခ မေ တံ အပိ သက္ကုဏေမု၊ သဗ္ဗေန ဝိတ္တံ ပဋိပါဒယေ တုဝ’’န္တိ.

တတ္ထ ပဗ္ဗဇိတောတိ သမဏော. ရာဇာ ကိရ တံ နဂ္ဂတ္တာ မုဏ္ဍတ္တာ စ ‘‘နဂ္ဂေါ သမဏော အယ’’န္တိ သညာယ ‘‘နဂ္ဂေါ ကိသော ပဗ္ဗဇိတောသီ’’တိအာဒိမာဟ. ကိဿဟေတူတိ ကိန္နိမိတ္တံ. သဗ္ဗေန ဝိတ္တံ ပဋိပါဒယေ တုဝန္တိ ဝိတ္တိယာ ဥပကရဏဘူတံ ဝိတ္တံ သဗ္ဗေန ဘောဂေန တုယှံ အဇ္ဈာသယာနုရူပံ၊ သဗ္ဗေန ဝါ ဥဿာဟေန ပဋိပါဒေယျံ သမ္ပာဒေယျံ. တထာ ကာတုံ မယံ အပ္ပေဝ နာမ သက္ကုဏေယျာမ၊ တသ္မာ အာစိက္ခ မေ တံ၊ ဧတံ တဝ အာဂမနကာရဏံ မယှံ ကထေဟီတိ အတ္ထော.

ဧဝံ ရညာ ပုဋ္ဌော ပေတော အတ္တနော ပဝတ္တိံ ကထေန္တော တိဿော ဂါထာ အဘာသိ –

၂၄၇. ‘‘ဗာရာဏသီ နဂရံ ဒူရဃုဋ္ဌံ၊ တတ္ထာဟံ ဂဟပတိ အဍ္ဎကော အဟု ဒီနော၊

အဒါတာ ဂေဓိတမနော အာမိသသ္မိံ၊ ဒုဿီလျေန ယမဝိသယမှိ ပတ္တော.

၂၄၈. ‘‘သော သူစိကာယ ကိလမိတော တေဟိ၊

တေနေဝ ဉာတီသု ယာမိ အာမိသကိဉ္စိက္ခဟေတု၊

အဒါနသီလာ န စ သဒ္ဒဟန္တိ၊

‘ဒါနဖလံ ဟောတိ ပရမှိ လောကေ’.

၂၄၉. ‘‘ဓီတာ စ မယှံ လပတေ အဘိက္ခဏံ၊ ဒဿာမိ ဒါနံ ပိတူနံ ပိတာမဟာနံ၊

တမုပက္ခဋံ ပရိဝိသယန္တိ ဗြာဟ္မဏာ၊ ယာမိ အဟံ အန္ဓကဝိန္ဒံ ဘုတ္တု’’န္တိ.

၂၄၇. တတ္ထ ဒူရဃုဋ္ဌန္တိ ဒူရတော ဧဝ ဂုဏကိတ္တနဝသေန ဃောသိတံ၊ သဗ္ဗတ္ထ ဝိဿုတံ ပါကဋန္တိ အတ္ထော. အဍ္ဎကောတိ အဍ္ဎော မဟာဝိဘဝေါ. ဒီနောတိ နိဟီနစိတ္တော အဒါနဇ္ဈာသယော. တေနာဟ ‘‘အဒါတာ’’တိ. ဂေဓိတမနော အာမိသသ္မိန္တိ ကာမာမိသေ လဂ္ဂစိတ္တော ဂေဓံ အာပန္နော. ဒုဿီလျေန ယမဝိသယမှိ ပတ္တောတိ အတ္တနာ ကတေန ဒုဿီလကမ္မုနာ ယမဝိသယံ ပေတလောကံ ပတ္တော အမှိ.

၂၄၈. သော သူစိကာယ ကိလမိတောတိ သော အဟံ ဝိဇ္ဈနဋ္ဌေန သူစိသဒိသတာယ ‘‘သူစိကာ’’တိ လဒ္ဓနာမာယ ဇိဃစ္ဆာယ ကိလမိတော နိရန္တရံ ဝိဇ္ဈမာနော. ‘‘ကိလမထော’’တိ ဣစ္စေဝ ဝါ ပါဌော. တေဟီတိ ‘‘ဒီနော’’တိအာဒိနာ ဝုတ္တေဟိ ပါပကမ္မေဟိ ကာရဏဘူတေဟိ. တဿ ဟိ ပေတဿ တာနိ ပါပကမ္မာနိ အနုဿရန္တဿ အတိဝိယ ဒေါမနဿံ ဥပ္ပဇ္ဇိ၊ တသ္မာ ဧဝမာဟ. တေနေဝါတိ တေနေဝ ဇိဃစ္ဆာဒုက္ခေန. ဉာတီသု ယာမီတိ ဉာတီနံ သမီပံ ယာမိ ဂစ္ဆာမိ. အာမိသကိဉ္စိက္ခဟေတူတိ အာမိသဿ ကိဉ္စိက္ခနိမိတ္တံ၊ ကိဉ္စိ အာမိသံ ပတ္ထေန္တောတိ အတ္ထော. အဒါနသီလာ န စ သဒ္ဒဟန္တိ၊ ‘ဒါနဖလံ ဟောတိ ပရမှိ လောကေ’တိ ယထာ အဟံ၊ တထာ ဧဝံ အညေပိ မနုဿာ အဒါနသီလာ ‘‘ဒါနဿ ဖလံ ဧကံသေန ပရလောကေ ဟောတီ’’တိ န စ သဒ္ဒဟန္တိ. ယတော အဟံ ဝိယ တေပိ ပေတာ ဟုတွာ မဟာဒုက္ခံ ပစ္စနုဘဝန္တီတိ အဓိပ္ပါယော.

၂၄၉. လပတေတိ ကထေတိ. အဘိက္ခဏန္တိ အဘိဏှံ ဗဟုသော. ကိန္တိ လပတီတိ အာဟ ‘‘ဒဿာမိ ဒါနံ ပိတူနံ ပိတာမဟာန’’န္တိ. တတ္ထ ပိတူနန္တိ မာတာပိတူနံ၊ စူဠပိတုမဟာပိတူနံ ဝါ. ပိတာမဟာနန္တိ အယျကပယျကာနံ. ဥပက္ခဋန္တိ သဇ္ဇိတံ. ပရိဝိသယန္တီတိ ဘောဇယန္တိ. အန္ဓကဝိန္ဒန္တိ ဧဝံနာမကံ နဂရံ. ဘုတ္တုန္တိ ဘုဉ္ဇိတုံ. တတော ပရာ သင်္ဂီတိကာရကေဟိ ဝုတ္တာ –

၂၅၀. ‘‘တမဝေါစ ရာဇာ ‘အနုဘဝိယာန တမ္ပိ၊

ဧယျာသိ ခိပ္ပံ အဟမပိ ကဿံ ပူဇံ၊

အာစိက္ခ မေ တံ ယဒိ အတ္ထိ ဟေတု၊

သဒ္ဓါယိတံ ဟေတုဝစော သုဏောမ’.

၂၅၁. ‘‘တထာတိ ဝတွာ အဂမာသိ တတ္ထ၊ ဘုဉ္ဇိံသု ဘတ္တံ န စ ဒက္ခိဏာရဟာ၊

ပစ္စာဂမိ ရာဇဂဟံ ပုနာပရံ၊ ပါတုရဟောသိ ပုရတော ဇနာဓိပဿ.

၂၅၂. ‘‘ဒိသွာန ပေတံ ပုနဒေဝ အာဂတံ၊ ရာဇာ အဝေါစ ‘အဟမပိ ကိံ ဒဒါမိ၊

အာစိက္ခ မေ တံ ယဒိ အတ္ထိ ဟေတု၊ ယေန တုဝံ စိရတရံ ပီဏိတော သိယာ’.

၂၅၃. ‘‘ဗုဒ္ဓဉ္စ သံဃံ ပရိဝိသိယာန ရာဇ၊ အန္နေန ပါနေန စ စီဝရေန၊

တံ ဒက္ခိဏံ အာဒိသ မေ ဟိတာယ၊ ဧဝံ အဟံ စိရတရံ ပီဏိတော သိယာ.

၂၅၄. ‘‘တတော စ ရာဇာ နိပတိတွာ တာဝဒေ၊ ဒါနံ သဟတ္ထာ အတုလံ ဒဒိတွာ သံဃေ၊

အာရောစေသိ ပကတံ တထာဂတဿ၊ တဿ စ ပေတဿ ဒက္ခိဏံ အာဒိသိတ္ထ.

၂၅၅. ‘‘သော ပူဇိတော အတိဝိယ သောဘမာနော၊ ပါတုရဟောသိ ပုရတော ဇနာဓိပဿ၊

ယက္ခောဟမသ္မိ ပရမိဒ္ဓိပတ္တော၊ န မယှမတ္ထိ သမာ သဒိသာ မာနုသာ.

၂၅၆. ‘‘ပဿာနုဘာဝံ အပရိမိတံ မမယိဒံ၊ တယာနုဒိဋ္ဌံ အတုလံ ဒတွာ သံဃေ၊

သန္တပ္ပိတော သတတံ သဒါ ဗဟူဟိ၊ ယာမိ အဟံ သုခိတော မနုဿဒေဝါ’’တိ.

၂၅၀. တတ္ထ တမဝေါစ ရာဇာတိ တံ ပေတံ တထာ ဝတွာ ဌိတံ ရာဇာ အဇာတသတ္တု အဝေါစ. အနုဘဝိယာန တမ္ပီတိ တံ တဝ ဓီတုယာ ဥပက္ခဋံ ဒါနမ္ပိ အနုဘဝိတွာ. ဧယျာသီတိ အာဂစ္ဆေယျာသိ. ကဿန္တိ ကရိဿာမိ. အာစိက္ခ မေ တံ ယဒိ အတ္ထိ ဟေတူတိ သစေ ကိဉ္စိ ကာရဏံ အတ္ထိ၊ တံ ကာရဏံ မယှံ အာစိက္ခ ကထေဟိ. သဒ္ဓါယိတန္တိ သဒ္ဓါယိတဗ္ဗံ. ဟေတုဝစောတိ ဟေတုယုတ္တဝစနံ၊ ‘‘အမုကသ္မိံ ဌာနေ အသုကေန ပကာရေန ဒါနေ ကတေ မယှံ ဥပကပ္ပတီ’’တိ သကာရဏံ ဝစနံ ဝဒါတိ အတ္ထော.

၂၅၁. တထာတိ ဝတွာတိ သာဓူတိ ဝတွာ. တတ္ထာတိ တသ္မိံ အန္ဓကဝိန္ဒေ ပရိဝေသနဋ္ဌာနေ. ဘုဉ္ဇိံသု ဘတ္တံ န စ ဒက္ခိဏာရဟာတိ ဘတ္တံ ဘုဉ္ဇိံသု ဒုဿီလဗြာဟ္မဏာ၊ န စ ပန ဒက္ခိဏာရဟာ သီလဝန္တော ဘုဉ္ဇိံသူတိ အတ္ထော. ပုနာပရန္တိ ပုန အပရံ ဝါရံ ရာဇဂဟံ ပစ္စာဂမိ.

၂၅၂. ကိံ ဒဒါမီတိ ‘‘ကီဒိသံ တေ ဒါနံ ဒဿာမီ’’တိ ရာဇာ ပေတံ ပုစ္ဆိ. ယေန တုဝန္တိ ယေန ကာရဏေန တွံ. စိရတရန္တိ စိရကာလံ. ပီဏိတောတိ တိတ္တော သိယာ၊ တံ ကထေဟီတိ အတ္ထော.

၂၅၃. ပရိဝိသိယာနာတိ ဘောဇေတွာ. ရာဇာတိ အဇာတသတ္တုံ အာလပတိ. မေ ဟိတာယာတိ မယှံ ဟိတတ္ထာယ ပေတတ္တဘာဝတော ပရိမုတ္တိယာ.

၂၅၄. တတောတိ တသ္မာ တေန ဝစနေန၊ တတော ဝါ ပါသာဒတော. နိပတိတွာတိ နိက္ခမိတွာ. တာဝဒေတိ တဒါ ဧဝ အရုဏုဂ္ဂမနဝေလာယ. ယမှိ ပေတော ပစ္စာဂန္တွာ ရညော အတ္တာနံ ဒဿေသိ၊ တသ္မိံ ပုရေဘတ္တေ ဧဝ ဒါနံ အဒါသိ. သဟတ္ထာတိ သဟတ္ထေန. အတုလန္တိ အပ္ပမာဏံ ဥဠာရံ ပဏီတံ. ဒတွာ သံဃေတိ သံဃဿ ဒတွာ. အာရောစေသိ ပကတံ တထာဂတဿာတိ ‘‘ဣဒံ၊ ဘန္တေ၊ ဒါနံ အညတရံ ပေတံ သန္ဓာယ ပကတ’’န္တိ တံ ပဝတ္တိံ ဘဂဝတော အာရောစေသိ. အာရောစေတွာ စ ယထာ တံ ဒါနံ တဿ ဥပကပ္ပတိ၊ ဧဝံ တဿ စ ပေတဿ ဒက္ခိဏံ အာဒိသိတ္ထ အာဒိသိ.

၂၅၅. သောတိ သော ပေတော. ပူဇိတောတိ ဒက္ခိဏာယ ဒိယျမာနာယ ပူဇိတော. အတိဝိယ သောဘမာနောတိ ဒိဗ္ဗာနုဘာဝေန အတိဝိယ ဝိရောစမာနော. ပါတုရဟောသီတိ ပါတုဘဝိ၊ ရညော ပုရတော အတ္တာနံ ဒဿေသိ. ယက္ခောဟမသ္မီတိ ပေတတ္တဘာဝတော မုတ္တော ယက္ခော အဟံ ဇာတော ဒေဝဘာဝံ ပတ္တောသ္မိ. န မယှမတ္ထိ သမာ သဒိသာ မာနုသာတိ မယှံ အာနုဘာဝသမ္ပတ္တိယာ သမာ ဝါ ဘောဂသမ္ပတ္တိယာ သဒိသာ ဝါ မနုဿာ န သန္တိ.

၂၅၆. ပဿာနုဘာဝံ အပရိမိတံ မမယိဒန္တိ ‘‘မမ ဣဒံ အပရိမာဏံ ဒိဗ္ဗာနုဘာဝံ ပဿာ’’တိ အတ္တနော သမ္ပတ္တိံ ပစ္စက္ခတော ရညော ဒဿေန္တော ဝဒတိ. တယာနုဒိဋ္ဌံ အတုလံ ဒတွာ သံဃေတိ အရိယသံဃဿ အတုလံ ဥဠာရံ ဒါနံ ဒတွာ မယှံ အနုကမ္ပာယ တယာ အနုဒိဋ္ဌံ. သန္တပ္ပိတော သတတံ သဒါ ဗဟူဟီတိ အန္နပါနဝတ္ထာဒီဟိ ဗဟူဟိ ဒေယျဓမ္မေဟိ အရိယသံဃံ သန္တပ္ပေန္တေန တယာ သဒါ သဗ္ဗကာလံ ယာဝဇီဝံ တတ္ထာပိ သတတံ နိရန္တရံ အဟံ သန္တပ္ပိတော ပီဏိတော. ယာမိ အဟံ သုခိတော မနုဿဒေဝါတိ ‘‘တသ္မာ အဟံ ဣဒါနိ သုခိတော မနုဿဒေဝ မဟာရာဇ ယထိစ္ဆိတဋ္ဌာနံ ယာမီ’’တိ ရာဇာနံ အာပုစ္ဆိ.

ဧဝံ ပေတေ အာပုစ္ဆိတွာ ဂတေ ရာဇာ အဇာတသတ္တု တမတ္ထံ ဘိက္ခူနံ အာရောစေသိ၊ ဘိက္ခူ ဘဂဝတော သန္တိကံ ဥပသင်္ကမိတွာ အာရောစေသုံ. ဘဂဝါ တမတ္ထံ အဋ္ဌုပ္ပတ္တိံ ကတွာ သမ္ပတ္တပရိသာယ ဓမ္မံ ဒေသေသိ. တံ သုတွာ မဟာဇနော မစ္ဆေရမလံ ပဟာယ ဒါနာဒိပုညာဘိရတော အဟောသီတိ.

စူဠာသေဋ္ဌိပေတဝတ္ထုဝဏ္ဏနာ နိဋ္ဌိတာ.