ပဉှာဝါရဿ ဃဋနေ အနုလောမဂဏနာ

၄၃၉. ဣဒါနေတ္ထ ယထာလဒ္ဓါနိ ဝိဿဇ္ဇနာနိ ဂဏနာဝသေန ဒဿေတုံ ဟေတုယာ သတ္တာတိအာဒိ ဝုတ္တံ. တတ္ထ သတ္တာတိ ကုသလေန ကုသလံ၊ အဗျာကတံ၊ ကုသလာဗျာကတန္တိ တီဏိ. တထာ အကုသလေန၊ အဗျာကတေန အဗျာကတမေဝါတိ ဧဝံ သတ္တ. အာရမ္မဏေ နဝါတိ ဧကမူလကဧကာဝသာနာနိ နဝ. အဓိပတိယာ ဒသာတိ ကုသလံ ကုသလဿ သဟဇာတတော စေဝ အာရမ္မဏတော စ၊ အကုသလဿ အာရမ္မဏတောဝ အဗျာကတဿ သဟဇာတတော စေဝ အာရမ္မဏတော စ၊ ကုသလာဗျာကတဿ သဟဇာတတောဝါတိ ကုသလမူလကာနိ စတ္တာရိ. အကုသလံ အကုသလဿ သဟဇာတတော စေဝ အာရမ္မဏတော စ၊ အဗျာကတဿ သဟဇာတတောဝ တထာ အကုသလာဗျာကတဿာတိ အကုသလမူလကာနိ တီဏိ. အဗျာကတော အဗျာကတဿ သဟဇာတတော စေဝ အာရမ္မဏတော စ၊ ကုသလဿ အာရမ္မဏတောဝ တထာ အကုသလဿာတိ အဗျာကတမူလကာနိ တီဏီတိ ဧဝံ ဒသ. ဧတ္ထ ပန အာရမ္မဏာဓိပတိပိ သတ္တဓာ၊ သဟဇာတာဓိပတိပိ သတ္တဓာဝ လဗ္ဘတိ.

အနန္တရေ သတ္တာတိ ကုသလမူလကာနိ ဒွေ၊ တထာ အကုသလမူလကာနိ၊ အဗျာကတမူလကာနိ တီဏီတိ ဧဝံ သတ္တ. သမနန္တရေပိ ဧတာနေဝ. သဟဇာတေ နဝါတိ ကုသလမူလကာနိ တီဏိ၊ အကုသလမူလကာနိ တီဏိ၊ အဗျာကတမူလကံ ဧကံ၊ တထာ ကုသလာဗျာကတမူလကံ၊ အကုသလာဗျာကတမူလကဉ္စာတိ ဧဝံ နဝ. အညမညေ တီဏီတိ ကုသလေန ကုသလံ၊ အကုသလေန အကုသလံ၊ အဗျာကတေန အဗျာကတန္တိ ဧဝံ တီဏိ. နိဿယေ တေရသာတိ သဟဇာတတောဝ ကုသလမူလကာနိ တီဏိ၊ တထာ အကုသလမူလကာနိ၊ တထာ အဗျာကတမူလကာနိ. ဧတ္ထ ပန ပုရေဇာတမ္ပိ လဗ္ဘတိ. အဗျာကတဉှိ အဗျာကတဿ သဟဇာတမ္ပိ ဟောတိ ပုရေဇာတမ္ပိ၊ ကုသလဿ ပုရေဇာတမေဝ တထာ အကုသလဿ. ပုန ကုသလာဗျာကတော သဟဇာတပုရေဇာတတော ကုသလဿ၊ သဟဇာတတောဝ အဗျာကတဿ၊ တထာ အကုသလာဗျာကတောတိ ဧဝံ တေရသ. ဥပနိဿယေ နဝါတိ ဧကမူလကေကာဝသာနာ နဝ. တေသံ ဝိဘင်္ဂေ တေဝီသတိ ဘေဒါ ဒဿိတာ. တေသု အာရမ္မဏူပနိဿယေ သတ္တ၊ အနန္တရူပနိဿယေ သတ္တ၊ ပကတူပနိဿယေ နဝ ဟောန္တိ. ပုရေဇာတေ တီဏီတိ အဗျာကတော အဗျာကတဿ၊ ကုသလဿ၊ အကုသလဿာတိ ဧဝံ တီဏိ.

ပစ္ဆာဇာတေ တီဏီတိ ကုသလော အဗျာကတဿ၊ အကုသလော အဗျာကတဿ၊ အဗျာကတော အဗျာကတဿာတိ ဧဝံ တီဏိ. အာသေဝနေ တီဏိ အညမညသဒိသာနိ. ကမ္မေ သတ္တ ဟေတုသဒိသာနိ. တတ္ထ ဒွီသု ဝိဿဇ္ဇနေသု နာနာက္ခဏိကကမ္မမ္ပိ အာဂတံ၊ ပဉ္စသု သဟဇာတမေဝ. ဝိပါကေ ဧကံ အဗျာကတေန အဗျာကတံ. အာဟာရဣန္ဒြိယဈာနမဂ္ဂေသု သတ္တ ဟေတုသဒိသာနေဝ. ဣန္ဒြိယံ ပနေတ္ထ သဟဇာတပုရေဇာတဝသေန အာဂတံ. သမ္ပယုတ္တေ တီဏိ အညမညသဒိသာနိ. ဝိပ္ပယုတ္တေ ပဉ္စာတိ သဟဇာတပစ္ဆာဇာတတော ကုသလေန အဗျာကတံ၊ အကုသလေန အဗျာကတံ၊ သဟဇာတပုရေဇာတပစ္ဆာဇာတတော အဗျာကတေန အဗျာကတံ၊ ဝတ္ထုပုရေဇာတတော အဗျာကတေန ကုသလံ၊ တထာ အကုသလန္တိ ဧကံ ကုသလမူလံ၊ ဧကံ အကုသလမူလံ၊ တီဏိ အဗျာကတမူလာနီတိ ဧဝံ ပဉ္စ.

အတ္ထိယာ တေရသာတိ သဟဇာတတော ကုသလေန ကုသလံ၊ သဟဇာတပစ္ဆာဇာတတော ကုသလေန အဗျာကတံ၊ သဟဇာတတောဝ ကုသလေန ကုသလာဗျာကတန္တိ ကုသလမူလာနိ တီဏိ၊ တထာ အကုသလမူလာနိ၊ သဟဇာတပုရေဇာတပစ္ဆာဇာတာဟာရိန္ဒြိယတော ပန အဗျာကတေန အဗျာကတံ၊ ဝတ္ထာရမ္မဏပုရေဇာတတော အဗျာကတေန ကုသလံ၊ တထာ အကုသလံ၊ သဟဇာတပုရေဇာတတော ကုသလော စ အဗျာကတော စ အကုသလဿ၊ သွေဝ အဗျာကတဿ သဟဇာတပစ္ဆာဇာတအာဟာရိန္ဒြိယတော သဟဇာတပုရေဇာတတော စ ကုသလော စ အဗျာကတော စ ကုသလဿ၊ သွေဝ အဗျာကတဿ သဟဇာတပစ္ဆာဇာတအာဟာရိန္ဒြိယတောတိ ဧဝံ တေရသ. နတ္ထိဝိဂတေသု သတ္တ အနန္တရသဒိသာနိ. အဝိဂတေ တေရသ အတ္ထိသဒိသာနီတိ. ဧဝမေတ္ထ သတ္တ ဂဏနပရိစ္ဆေဒါ ဧကံ တီဏိ ပဉ္စ သတ္တ နဝ ဒသ တေရသာတိ. တေသု ဝိပါကဝသေန ဧကမေဝ ဧကကံ၊ အညမညပုရေဇာတပစ္ဆာဇာတာသေဝနသမ္ပယုတ္တဝသေန ပဉ္စ တိကာ၊ ဝိပ္ပယုတ္တဝသေန ဧကမေဝ ပဉ္စကံ၊ ဟေတုအနန္တရသမနန္တရကမ္မအာဟာရိန္ဒြိယဈာနမဂ္ဂနတ္ထိဝိဂတဝသေန ဒသ သတ္တကာ၊ အာရမ္မဏသဟဇာတဥပနိဿယဝသေန တယော နဝကာ၊ အဓိပတိဝသေန ဧကံ ဒသကံ၊ နိဿယအတ္ထိအဝိဂတဝသေန တယော တေရသကာတိ ဧဝံ တသ္မိံ တသ္မိံ ပစ္စယေ နိဒ္ဒိဋ္ဌဝါရေ ဂဏနဝသေန သာဓုကံ သလ္လက္ခေတွာ တေသံ ဝသေန ဒုကတိကာဒီသု ပစ္စယသံသန္ဒနေ ဂဏနာ ဝေဒိတဗ္ဗာ.

၄၄၀. ယေ ပန ပစ္စယာ ယေသံ ပစ္စယာနံ ဝိသဘာဂါ ဝါ ဝိရုဒ္ဓါ ဝါ ဟောန္တိ၊ တေ တေဟိ သဒ္ဓိံ န ယောဇေတဗ္ဗာ. သေယျထိဒံ – ဟေတုပစ္စယဿ တာဝ အာရမ္မဏာနန္တရသမနန္တရူပနိဿယပုရေဇာတပစ္ဆာဇာတကမ္မာသေဝနာဟာရဈာနနတ္ထိဝိဂတာ အဓိပတိပစ္စယေ စ ဌပေတွာ ဝီမံသံ သေသာဓိပတိနော ဝိသဘာဂါ၊ သဟဇာတာဒယော သဘာဂါ. ကသ္မာ? တထာ ဘာဝါဘာဝတော. ဟေတုပစ္စယော ဟိ ယေသံ ဟေတုပစ္စယော ဟောတိ၊ တေသံ သဟဇာတာဒိပစ္စယောပိ ဟောတိ၊ အာရမ္မဏာဒိပစ္စယော ပန န ဟောတီတိ အာရမ္မဏာဒယော တဿ ဝိသဘာဂါ နာမ. တသ္မာ သော တေဟိ၊ တေ ဝါ တေန သဒ္ဓိံ၊ န ယောဇေတဗ္ဗာ. ပုရေဇာတပစ္ဆာဇာတသမ္ပယုတ္တဝိပ္ပယုတ္တအတ္ထိနတ္ထိဝိဂတာဝိဂတာ စ အညမညဝိရုဒ္ဓါ၊ တေပိ အညမညံ န ယောဇေတဗ္ဗာ. တတ္ထ အယောဇနီယေ ဝဇ္ဇေတွာ ယောဇနီယေဟိ ယောဂေ ယေ ဝါရာ လဗ္ဘန္တိ၊ တေ သင်္ခေပတော ဒဿေတုံ ဟေတုပစ္စယာ အဓိပတိယာ စတ္တာရီတိအာဒိ ဝုတ္တံ.

တတ္ထ ကိဉ္စာပိ ဟေတုပစ္စယဿ အဓိပတိနာ သံသန္ဒနေ ဦနတရဂဏနဝသေန သတ္တဟိ ဝါရေဟိ ဘဝိတဗ္ဗံ၊ ယသ္မာ ပန အဓိပတီသု ဝီမံသာဝ ဟေတုပစ္စယော၊ န ဣတရေ၊ တသ္မာ ဝိသဘာဂေ ဝဇ္ဇေတွာ သဘာဂဝသေန ‘‘စတ္တာရီ’’တိ ဝုတ္တံ. တာနိ ဧဝံ ဝေဒိတဗ္ဗာနိ – ကုသလော ဓမ္မော ကုသလဿ ဓမ္မဿ ဟေတုပစ္စယေန ပစ္စယော အဓိပတိပစ္စယေန ပစ္စယော၊ ကုသလာ ဝီမံသာ သမ္ပယုတ္တကာနံ ခန္ဓာနံ၊ ကုသလော ဓမ္မော အဗျာကတဿ ဓမ္မဿ ဟေတုပစ္စယေန ပစ္စယော အဓိပတိပစ္စယေန ပစ္စယော၊ ကုသလာ ဝီမံသာ စိတ္တသမုဋ္ဌာနာနံ ရူပါနံ၊ ကုသလော ဓမ္မော ကုသလဿ စ အဗျာကတဿ စ ဓမ္မဿ ဟေတုပစ္စယေန ပစ္စယော အဓိပတိပစ္စယေန ပစ္စယော၊ ကုသလာ ဝီမံသာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ၊ အဗျာကတော ဓမ္မော အဗျာကတဿ ဓမ္မဿ ဟေတုပစ္စယေန ပစ္စယော အဓိပတိပစ္စယေန ပစ္စယော၊ ဝိပါကာဗျာကတာ ကိရိယာဗျာကတာ ဝီမံသာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနန္တိ. ဧတ္ထ စ ဝိပါကာဗျာကတာ လောကုတ္တရတောဝ ဂဟေတဗ္ဗာ. အာရမ္မဏပစ္စယအနန္တရပစ္စယာဒယော ပန ဝိသဘာဂတ္တာ န ယောဇိတာ. ဣမိနာ ဥပါယေန သဗ္ဗတ္ထ လဗ္ဘမာနဉ္စ အလဗ္ဘမာနဉ္စ ဉတွာ လဗ္ဘမာနဝသေန ဝါရာ ဥဒ္ဓရိတဗ္ဗာ.

သဟဇာတေ သတ္တာတိ ဟေတုယာ လဒ္ဓါနေဝ. အညမညေ တီဏီတိ သုဒ္ဓိကအညမညေ လဒ္ဓါနေဝ. နိဿယေ သတ္တာတိ ဟေတုယာ လဒ္ဓါနေဝ. ဝိပါကေ ဧကန္တိ သုဒ္ဓိကဝိပါကေ လဒ္ဓမေဝ. ဣန္ဒြိယမဂ္ဂေသု စတ္တာရီတိ ဟေဋ္ဌာ ဝုတ္တနယာနေဝ. သမ္ပယုတ္တေ တီဏီတိ သုဒ္ဓိကသမ္ပယုတ္တေ လဒ္ဓါနေဝ. ဝိပ္ပယုတ္တေ တီဏီတိ ကုသလာဒိစိတ္တသမုဋ္ဌာနံ ရူပံ ပစ္စယုပ္ပန္နံ ကတွာ ဝေဒိတဗ္ဗာနိ. အတ္ထိအဝိဂတေသု သတ္တာတိ ဟေတုယာ လဒ္ဓါနေဝ.

၄၄၁-၄၄၃. ဧဝံ ယေဟိ အဓိပတိပစ္စယာဒီဟိ ဧကာဒသဟိ ပစ္စယေဟိ သဒ္ဓိံ ဟေတုပစ္စယော ယောဇနံ လဘတိ၊ တေသံ ဝသေန ဒုမူလကနယေ ဂဏနံ ဒဿေတွာ ဣဒါနိ တိမူလကာဒီသု တဿ ဒဿနတ္ထံ လက္ခဏံ ဌပေန္တော ဟေတုသဟဇာတနိဿယအတ္ထိအဝိဂတန္တိ သတ္တာတိအာဒိမာဟ. ပေါတ္ထကေသု ပန နိဿဥပနိဿအဓိပါတိ ဧဝံ ပရိဟီနက္ခရာနိ ပစ္စယနာမာနိ လိခန္တိ၊ တံ သညာကရဏမတ္တဝသေန လိခိတံ. တသ္မာ တာဒိသေသု ဌာနေသု ပရိပုဏ္ဏာ ပါဠိ ကာတဗ္ဗာ. ယံ ပနိဒံ လက္ခဏံ ဌပိတံ၊ တေန ဣဒံ ဒီပေတိ – အယံ ဟေတုပစ္စယော သဟဇာတာဒီဟိ စတူဟိ သဒ္ဓိံ သံသန္ဒနေ အတ္တနော ဝိဘင်္ဂေ လဒ္ဓါနိ သတ္တေဝ ဝိဿဇ္ဇနာနိ လဘတိ. သစေ ပနေတ္ထ အညမညပစ္စယော ပဝိသတိ၊ အညမညေ လဒ္ဓါနိ တီဏိ လဘတိ. သစေ သမ္ပယုတ္တပစ္စယော ပဝိသတိ၊ တာနေဝ တီဏိ လဘတိ. သစေ ဝိပ္ပယုတ္တပစ္စယော ပဝိသတိ၊ ဟေတုဝိပ္ပယုတ္တဒုကေ လဒ္ဓါနိ တီဏိ လဘတိ. သစေ ဝိပါကပစ္စယော ပဝိသတိ၊ သဗ္ဗေဟိ ဝိပါကသဘာဂေဟိ သဒ္ဓိံ သံသန္ဒနေ ဧဝမေဝ ဝိဿဇ္ဇနံ လဘတိ. သစေ ပနေတ္ထ ဣန္ဒြိယမဂ္ဂပစ္စယာ ပဝိသန္တိ၊ တေဟိ သဒ္ဓိံ ဒုမူလကေ လဒ္ဓါနိ စတ္တာရိယေဝ လဘတိ. သစေ တေဟိ သဒ္ဓိံ အညမညပစ္စယော ပဝိသတိ၊ ဟေတာဓိပတိဒုကေ ဒဿိတေသု စတူသု ဝိဿဇ္ဇနေသု ‘‘ကုသလော ဓမ္မော အဗျာကတဿ၊ ကုသလော ဓမ္မော ကုသလဿ စ အဗျာကတဿ စာ’’တိ ဒွေ အပနေတွာ သေသာနိ ဒွေ လဘတိ. သစေပိ တတ္ထ သမ္ပယုတ္တပစ္စယော ပဝိသတိ၊ တာနေဝ ဒွေ လဘတိ. သစေ ပန ဝိပ္ပယုတ္တပစ္စယော ပဝိသတိ၊ ဣတရာနိ ဒွေ လဘတိ. သစေ ပန တေသု ဝိပါကပစ္စယော ပဝိသတိ၊ သဗ္ဗတ္ထ ဧကမေဝ လဘတိ. အဓိပတိနာ ပန သဒ္ဓိံ ဟေတာဓိပတိဒုကတော ဦနတရဂဏနေသု အပ္ပဝိသန္တေသု စတ္တာရိယေဝ လဘတိ. ဦနတရဂဏနေသု ပဝိသန္တေသု တေသံ ဝသေန ဒွေ ဧကန္တိ လဘတိ. ဧဝံ တေသံ တေသံ ပစ္စယာနံ သမာယောဂေ လဗ္ဘမာနံ ဂဏနံ ဝိဒိတွာ တိမူလကာဒီသု ဂဏနာ ဥဒ္ဓရိတဗ္ဗာတိ.

ဧတေသု ပန ဃဋနေသု သဗ္ဗပဌမာနိ စတ္တာရိ ဃဋနာနိ သာမညတော နဝန္နမ္ပိ ဟေတူနံ ဝသေန ဝုတ္တာနိ အဝိပါကာနိ. အဗျာကတေန အဗျာကတဝိဿဇ္ဇနေ ပနေတ္ထ ဝိပါကဟေတုပိ လဗ္ဘတိ.

တတော ပရာနိ ပဉ္စ ဃဋနာနိ ဝိပါကဟေတုဝသေန ဝုတ္တာနိ. တတ္ထ သဗ္ဗေပိ သဟဇာတဝိပါကာ စေဝ ဝိပါကသဟဇာတရူပါ စ. တေသု ပဌမေ ဃဋနေ ဝိပါကာ စေဝ တံသမုဋ္ဌာနရူပါ စ လဗ္ဘန္တိ၊ ဒုတိယေ ဝိပါကာ စေဝ ပဋိသန္ဓိယဉ္စ ဝတ္ထုရူပံ. တတိယေ အရူပဓမ္မာဝ. စတုတ္ထေ ဝိပါကစိတ္တသမုဋ္ဌာနရူပမေဝ လဗ္ဘတိ. ပဉ္စမေ ဝတ္ထုရူပမေဝ.

တတော ပရာနိ ပဉ္စဒသ ဃဋနာနိ ဣန္ဒြိယမဂ္ဂယုတ္တာနိ အမောဟဟေတုဝသေန ဝုတ္တာနိ. တတ္ထ ပဌမာနိ နဝ နိရာဓိပတီနိ၊ ပစ္ဆိမာနိ ဆ သာဓိပတီနိ. နိရာဓိပတိကေသုပိ ပဌမာနိ စတ္တာရိ သာမညတော သဗ္ဗတ္ထ အမောဟဝသေန ဝုတ္တာနိ၊ ပစ္ဆိမာနိ ပဉ္စ ဝိပါကာမောဟဝသေန. တတ္ထ နိရာဓိပတိကေသု ပဌမေ စတ္တာရီတိ ဟေဋ္ဌာ ဟေတာဓိပတိဒုကေ ဒဿိတာနေဝ. ဒုတိယေ စိတ္တသမုဋ္ဌာနရူပံ ပရိဟာယတိ. တတိယေ ဝတ္ထုရူပံ ပရိဟာယတိ. စတုတ္ထေ ကုသလော ဓမ္မော စိတ္တသမုဋ္ဌာနာနံ၊ အဗျာကတော တံသမုဋ္ဌာနာနန္တိ ရူပမေဝ လဗ္ဘတိ. တတော ပရာနိ ဝိပါကယုတ္တာနိ ပဉ္စ ဟေဋ္ဌာ ဝုတ္တနယာနေဝ. သာဓိပတိကေသု ပဌမာနိ တီဏိ ဃဋနာနိ သာမညတော ဝိပါကာဝိပါကဟေတုဝသေန ဝုတ္တာနိ. တေသု ပဌမေ စတ္တာရိ ဝုတ္တနယာနေဝ. ဒုတိယေ ရူပံ ပရိဟာယတိ၊ တတိယေ အရူပံ ပရိဟာယတိ. တတော ပရာနိ တီဏိ ဝိပါကဟေတုဝသေန ဝုတ္တာနိ. တေသု ပဌမေ ရူပါရူပံ လဗ္ဘတိ၊ ဒုတိယေ အရူပမေဝ၊ တတိယေ ရူပမေဝ. ဧဝမ္ပိ တေသံ တေသံ ပစ္စယာနံ သမာယောဂေ လဗ္ဘမာနံ ဂဏနံ ဝိဒိတွာ တိမူလကာဒီသု ဂဏနာ ဥဒ္ဓရိတဗ္ဗာတိ.

ဟေတုမူလကံ နိဋ္ဌိတံ.

၄၄၄. အာရမ္မဏမူလကေပိ အဓိပတိပစ္စယာဒယော သတ္တ အာရမ္မဏေန သဘာဂါ၊ သေသာ သောဠသ ဝိသဘာဂါတိ တေ အယောဇေတွာ သတ္တေဝ ယောဇိတာ. တေသု အဓိပတိယာ သတ္တာတိ ကုသလော ဓမ္မော ကုသလဿ ဓမ္မဿ၊ အကုသလဿ ဓမ္မဿ၊ အဗျာကတဿာတိ ဧဝံ ကုသလမူလာနိ တီဏိ၊ အကုသလမူလံ ဧကံ၊ အဗျာကတမူလာနိ တီဏီတိ သတ္တ. နိဿယေ တီဏီတိ ဝတ္ထုဝသေန အဗျာကတမူလာနေဝ. ဥပနိဿယေ သတ္တ ဟေဋ္ဌိမာနိ ဧဝ. ပုရေဇာတေ တီဏီတိ ဝတ္ထာရမ္မဏဝသေန အဗျာကတမူလာနိ. ဝိပ္ပယုတ္တေ တီဏီတိ ဝတ္ထုဝသေနေဝ. အတ္ထိအဝိဂတေသု တီဏီတိ ဝတ္ထာရမ္မဏဝသေန. ယထာ ပန ဟေတုမူလကေ လက္ခဏဒဿနတ္ထံ ဃဋနာနိ ဌပိတာနိ၊ တထာ အာရမ္မဏမူလကာဒီသုပိ.

၄၄၅. တတ္ထ ယာနိ တာဝ ဣမသ္မိံ အာရမ္မဏမူလကေ ပဉ္စ ဃဋနာနိ ဌပိတာနိ. တတ္ထ ပဌမံ အာရမ္မဏာဓိပတိဝသေန သာဓိပတိကံ. တတ္ထ သတ္တာတိ အာရမ္မဏာဓိပတိဒုကေ လဒ္ဓဝိဿဇ္ဇနာနေဝ. ဒုတိယံ နိရာဓိပတိကံ. တတ္ထ တီဏီတိ ဝတ္ထာရမ္မဏဝသေန အာရမ္မဏဝသေနေဝ ဝါ အဗျာကတမူလာနိ. တတိယံ နိဿယေန ဝုတ္တံ. တတ္ထ တီဏီတိ ဝတ္ထုဝသေန အဗျာကတမူလာနိ. စတုတ္ထပဉ္စမာနိ သာဓိပတိကာနိ. တေသု စတုတ္ထေ ဧကန္တိ ဝတ္ထာရမ္မဏဝသေန အာရမ္မဏဝသေနေဝ ဝါ အဗျာကတမူလံ အကုသလံ. ပဉ္စမေ ဧကန္တိ နိဿယတော အဗျာကတမူလကံ အကုသလံ. ဧဝမိဓာပိ လဗ္ဘမာနဝသေန တိကာဒီသု ဂဏနာ ဝေဒိတဗ္ဗာ. တထာ အဓိပတိမူလကာဒီသု. အာရမ္မဏဣန္ဒြိယဝိပါကဝသေန ဝိတ္ထာရယောဇနံ ပန အဝတွာ တတ္ထ တတ္ထ ဝတ္တဗ္ဗယုတ္တကမေဝ ဝဒါမာတိ.

၄၄၆. အဓိပတိမူလကေ သဟဇာတေ သတ္တာတိ သဟဇာတာဓိပတိဝသေန ကုသလမူလာနိ တီဏိ၊ အကုသလမူလာနိ တီဏိ၊ အဗျာကတမူလံ ဧကံ. သဟဇာတေန ပန သဒ္ဓိံ အာရမ္မဏာဓိပတိ၊ အာရမ္မဏာဓိပတိနာ စ သဒ္ဓိံ သဟဇာတံ န လဗ္ဘတိ. အညမညေ တီဏီတိ သဟဇာတာဓိပတိဝသေနေဝ. နိဿယေ အဋ္ဌာတိ ကုသလမူလာနိ တီဏိ၊ အကုသလမူလာနိ တီဏိ၊ အဗျာကတမူလာနိ ဒွေ. အဗျာကတော ဟိ အဓိပတိ အဗျာကတဿ သဟဇာတတော စေဝ အာရမ္မဏတော စ နိဿယော ဟောတိ၊ အကုသလဿ အာရမ္မဏတောဝ. ကုသလဿ ပန ဥဘယထာပိ န ဟောတီတိ အဗျာကတမူလာနိ ဒွေယေဝါတိ ဧဝံ အဋ္ဌ. ဥပနိဿယေ သတ္တ အာရမ္မဏသဒိသာနေဝ. ပုရေဇာတေ ဧကန္တိ အဗျာကတာဓိပတိ အာရမ္မဏဝသေန အကုသလဿ. ဝိပါကေ ဧကံ အဗျာကတေန အဗျာကတံ လောကုတ္တရံ. အာဟာရာဒီသု သတ္တ ဟေဋ္ဌာ ဧကမူလကေ လဒ္ဓါနေဝ. ဝိပ္ပယုတ္တေ စတ္တာရီတိ ကုသလေန အဗျာကတံ၊ တထာ အကုသလေန၊ အဗျာကတေန အဗျာကတဉ္စ ကုသလဉ္စ. အတ္ထိအဝိဂတေသု အဋ္ဌ နိဿယသဒိသာနေဝ.

၄၄၇-၄၅၂. ဃဋနာနိ ပနေတ္ထ ပဋိပါဋိယာ အာရမ္မဏာဒီဟိ အယောဇေတွာ ပဌမံ အတ္ထိအဝိဂတေဟိ ယောဇိတာနိ. ကိံ ကာရဏာတိ? ဥဘယာဓိပတိမိဿကတ္တာ. တတ္ထ ပဌမေ ဃဋနေ အာရမ္မဏာဓိပတိဝသေန ဝတ္ထာရမ္မဏံ လဗ္ဘတိ၊ ဒုတိယေ နိဿယဝသေန ဂရုံ ကတွာ အဿာဒေန္တဿ ဝတ္ထုမေဝ၊ တတိယေ သဟဇာတာဓိပတိဝသေန ကုသလာဒယော ရူပါနံ၊ အာရမ္မဏာဓိပတိဝသေန ဝတ္ထု အကုသလဿ. တတော ပရာနိ တီဏိ ဃဋနာနိ အာရမ္မဏာဓိပတိဝသေန ဝုတ္တာနိ. တတ္ထ ပဌမေ သတ္တာတိ ဟေဋ္ဌာ ဝုတ္တာနေဝ. ဒုတိယေ ဧကန္တိ ပုရေဇာတာနိ ဝတ္ထာရမ္မဏာနိ အကုသလဿ. တတိယေ ဝတ္ထုမေဝ အကုသလဿ. တတော ပရာနိ တီဏိ ဃဋနာနိ ဝိပါကာဝိပါကသာဓာရဏာနိ သဟဇာတာဓိပတိဝသေန ဝုတ္တာနိ. တတ္ထ ပဌမေ ရူပါရူပံ လဗ္ဘတိ၊ ဒုတိယေ အရူပမေဝ၊ တတိယေ ရူပမေဝ. တတော ပရာနိ တီဏိ ဝိပါကာဓိပတိဝသေန ဝုတ္တာနိ. တေသုပိ ပဌမေ ရူပါရူပံ လဗ္ဘတိ၊ ဒုတိယေ အရူပံ၊ တတိယေ ရူပမေဝ. တတော ပရာနိ ဆ ဃဋနာနိ အာဟာရိန္ဒြိယယုတ္တာနိ စိတ္တာဓိပတိဝသေန ဝုတ္တာနိ. တတ္ထ တီဏိ အဝိပါကာနိ၊ တီဏိ သဝိပါကာနိ. တေသု ဂဏနာ ပါကဋာယေဝ. တတော ပရာနိ ဆ ဃဋနာနိ တထေဝ ဝိရိယာဓိပတိဝသေန ဝုတ္တာနိ. နနု စ အဓိပတိပဋိပါဋိယာ ပဌမံ ဝိရိယာဓိပတိဝသေန ဝတ္တဗ္ဗာနိ သိယုံ၊ ကသ္မာ တထာ န ဝုတ္တာနီတိ? ပရတော ဟေတုဝသေန ဝုတ္တဃဋနေဟိ သဒိသတ္တာ. ပရတော ဟိ ဟေတုဝသေန ဃဋနာနိ အမောဟဿ ဝီမံသာဓိပတိတ္တာ ဝီမံသာယ စ သမ္မာဒိဋ္ဌိဘာဝတော မဂ္ဂသမ္ပယုတ္တာနိ. ဝိရိယမ္ပိ စ သမ္မာဝါယာမမိစ္ဆာဝါယာမဘာဝေန မဂ္ဂေါတိ တေန သဒ္ဓိံ ဃဋနာနိ ပရတော ဟေတုဝသေန ဝုတ္တဃဋနေဟိ သဒိသာနီတိ ပရိဝတ္တေတွာ ဝုတ္တာနိ. တေသုပိ ဂဏနာ ပါကဋာယေဝ.

၄၅၃-၄၅၆. အနန္တရသမနန္တရမူလကေသု သတ္တာတိ ကုသလော ကုသလဿ အဗျာကတဿ စ၊ တထာ အကုသလော၊ အဗျာကတော တိဏ္ဏန္နမ္ပီတိ ဧဝံ သတ္တ. ကမ္မေ ဧကန္တိ ကုသလာ မဂ္ဂစေတနာ အတ္တနော ဝိပါကာဗျာကတဿ. ဃဋနာနိ ပနေတေသု တီဏိ တီဏိယေဝ. တာနိ ဗဟုတရပဋိပါဋိယာ ဝုတ္တာနိ.

၄၅၇-၄၆၀. သဟဇာတအညမညနိဿယမူလကေသု ယေ ယေ ဒုကမူလကေ ပစ္စယာ ဝုတ္တာ တေ တေယေဝ အာဒိတော ဌိတေန သဘာဂါ. တသ္မာ ဒုကမူလကေ ဂဏနံ ဉတွာ ယေ ဥပရိ ပစ္စယာ ဃဋိတာ၊ တေသု ဦနတရဂဏနဿ ဝသေန သဗ္ဗဃဋနေသု ဂဏနာ ဝေဒိတဗ္ဗာ. တတ္ထ သဟဇာတမူလကေ ဒသ ဃဋနာနိ. တေသု ပဉ္စ အဝိပါကာနိ၊ ပဉ္စ သဝိပါကာနိ. တတ္ထ အဝိပါကေသု တာဝ ပဌမေ ကုသလော ကုသလဿ အဗျာကတဿ၊ ကုသလာဗျာကတဿ၊ ကုသလာဗျာကတော အဗျာကတဿာတိ စတ္တာရိ၊ တထာ အကုသလော၊ အဗျာကတော အဗျာကတဿေဝါတိ ဧဝံ နဝ. တတ္ထ ကုသလာကုသလာဒိကေသု အဋ္ဌသု ဝိဿဇ္ဇနေသု အရူပဉ္စေဝ စိတ္တသမုဋ္ဌာနရူပဉ္စ လဗ္ဘတိ. အဗျာကတေ ဝတ္ထုရူပမ္ပိ. ဒုတိယေ ဃဋနေ အဗျာကတဝိဿဇ္ဇနေ ရူပေသု ဝတ္ထုမေဝ လဗ္ဘတိ၊ တတိယေ တီသုပိ အရူပမေဝ၊ စတုတ္ထေ စိတ္တသမုဋ္ဌာနရူပမေဝ၊ ပဉ္စမေ ပဋိသန္ဓိယံ ဝတ္ထုနာ သဒ္ဓိံ အရူပဓမ္မာ. သဝိပါကေသု ပဌမေ ဝိပါကာ စေဝ ဝိပါကစိတ္တသမုဋ္ဌာနရူပဉ္စ၊ ဒုတိယေ ဝိပါကာ စေဝ ဝတ္ထုရူပဉ္စ၊ တတိယေ ဝိပါကမေဝ၊ စတုတ္ထေ ဝိပါကစိတ္တသမုဋ္ဌာနမေဝ၊ ပဉ္စမေ ဝတ္ထုရူပမေဝ လဗ္ဘတိ.

အညမညမူလကေ ဆ ဃဋနာနိ. တေသု ပဌမာနိ တီဏိ အဝိပါကာနိ၊ ပစ္ဆိမာနိ တီဏိ သဝိပါကာနိ. တေသု ဂဏနာ ပါကဋာယေဝ.

၄၆၁. နိဿယမူလကေ နိဿယပစ္စယာ အာရမ္မဏေ တီဏီတိ ဝတ္ထုံ အာရမ္မဏံ ကတွာ ပဝတ္တကုသလာဒိဝသေန ဝေဒိတဗ္ဗာနိ. ဥပနိဿယေ ဧကန္တိ ဝတ္ထုံ အာရမ္မဏူပနိဿယံ ကတွာ ဥပ္ပန္နာကုသလံ. သေသံ ဒုမူလကေ ဟေဋ္ဌာ ဝုတ္တနယေနေဝ ဝေဒိတဗ္ဗံ.

၄၆၂-၄၆၄. ဣမသ္မိံ ပန နိဿယပစ္စယေ ဝီသတိ ဃဋနာနိ. တေသု ပုရိမာနိ ဆ ဃဋနာနိ ပုရေဇာတသဟဇာတဝသေန ဝုတ္တာနိ၊ တတော စတ္တာရိ ပုရေဇာတဝသေနေဝ၊ တတော ဒသ သဟဇာတဝသေနေဝ. တတ္ထ ပဌမေ ဃဋနေ တေရသာတိ နိဿယပစ္စယဝိဘင်္ဂေ ဝုတ္တာနေဝ. ဒုတိယေ အဋ္ဌာတိ သဟဇာတာဓိပတိဝသေန သတ္တ၊ ဝတ္ထုံ ဂရုံ ကတွာ အကုသလဉ္စာတိ အဋ္ဌ. တတိယေ သတ္တ ဣန္ဒြိယပစ္စယေ လဒ္ဓါနေဝ. စတုတ္ထေ ပဉ္စ ဝိပ္ပယုတ္တေ လဒ္ဓါနိ. ပဉ္စမေ စတ္တာရီတိ ကုသလာဒီနိ စိတ္တသမုဋ္ဌာနာနံ၊ ဝတ္ထု စ အကုသလဿ. ဆဋ္ဌေ တီဏီတိ ကုသလာဒီနိ စိတ္တသမုဋ္ဌာနဿ. ပုရေဇာတဝသေန စတူသု ပဌမေ တီဏီတိ ဝတ္ထု ကုသလာဒီနံ၊ စက္ခာဒီနိ စ အဗျာကတဿ. ဒုတိယေ ဝတ္ထုမေဝ ကုသလာဒီနံ. တတိယေ ဧကန္တိ ဝတ္ထု အကုသလဿ. စတုတ္ထေ စက္ခာဒီနိ ဝိညာဏပဉ္စကဿ. သဟဇာတဝသေန ဒသ သဝိပါကာဝိပါကဝသေန ဒွိဓာ ဘိန္ဒိတွာ သဟဇာတမူလကေ ဝုတ္တနယေနေဝ ဝေဒိတဗ္ဗာနိ.

၄၆၅. ဥပနိဿယမူလကေ အာရမ္မဏေ သတ္တာတိ အာရမ္မဏူပနိဿယေ လဒ္ဓါနေဝ. အဓိပတိယာ သတ္တာတိ တာနေဝ. အနန္တရသမနန္တရေသု အနန္တရူပနိဿယေ လဒ္ဓါနေဝ. နိဿယေ ဧကန္တိ ဝတ္ထု အကုသလဿ. ပုရေဇာတေ ဧကန္တိ တဿေဝ ဝတ္ထုံ ဝါ အာရမ္မဏံ ဝါ. အာသေဝနေ တီဏိ အနန္တရူပနိဿယဝသေန. ကမ္မေ ဒွေ ပကတူပနိဿယဝသေန. လောကုတ္တရကုသလစေတနာ ပန အနန္တရူပနိဿယောပိ ဟောတိ. ဝိပ္ပယုတ္တေ ဧကံ အာရမ္မဏူပနိဿယဝသေန၊ တထာ အတ္ထိအဝိဂတေသု. နတ္ထိဝိဂတေသု သတ္တ အနန္တရသမာနေဝ.

၄၆၆. ဥပနိဿယမူလကာနိ ပန သတ္တ ဃဋနာနိ ဟောန္တိ. တတ္ထ ပုရိမာနိ တီဏိ အာရမ္မဏူပနိဿယဝသေန ဝုတ္တာနိ. တတ္ထ ပဌမေ သတ္တာတိ ကုသလော ကုသလာဒီနံ၊ တထာ အဗျာကတော၊ အကုသလော အကုသလဿေဝါတိ ဧဝံ သတ္တ. ဒုတိယေ ဧကန္တိ စက္ခာဒိအဗျာကတံ အကုသလဿ. တတိယေ ဝတ္ထု အကုသလဿ. တတော ပရာနိ ဒွေ အနန္တရူပနိဿယဝသေန ဝုတ္တာနိ. တေသု ဂဏနာ ပါကဋာယေဝ. တတော ဒွေ အနန္တရပကတူပနိဿယဝသေန ဝုတ္တာနိ. တတ္ထ ပဌမေ လောကိယကုသလာကုသလစေတနာပစ္စယဘာဝတော ဂဟေတဗ္ဗာ၊ ဒုတိယေ လောကုတ္တရကုသလာဝ.

၄၆၇-၄၆၈. ပုရေဇာတမူလကေ အာရမ္မဏေ တီဏီတိ အဗျာကတော ကုသလာဒီနံ. အဓိပတိယာ ဧကန္တိ အဗျာကတော အကုသလဿ. သေသေသုပိ ဧသေဝ နယော. ဧတ္ထ ပန သတ္တ ဃဋနာနိ. တေသု ပဌမံ ဝတ္ထာရမ္မဏဝသေန ဝုတ္တံ၊ ဒုတိယံ ဝတ္ထုဝသေနေဝ၊ တတိယံ အာရမ္မဏဝသေန၊ စတုတ္ထံ ဝတ္ထုဿ အာရမ္မဏကာလဝသေန၊ ပဉ္စမံ အာရမ္မဏာဓိပတိဝသေန၊ ဆဋ္ဌံ ဝတ္ထုနော အာရမ္မဏာဓိပတိကာလဝသေန၊ သတ္တမံ စက္ခာဒိဝသေန.

၄၆၉-၄၇၂. ပစ္ဆာဇာတမူလကေ ဝီသတိ ပစ္စယာ န ယုဇ္ဇန္တိ၊ တယောဝ ယောဇနံ လဘန္တိ. ဧကမေဝေတ္ထ ဃဋနံ၊ တံ ကာယဿ ကုသလာဒီနံ ဝသေန ဝေဒိတဗ္ဗံ. အာသေဝနမူလကေပိ ဧကမေဝ ဃဋနံ.

၄၇၃-၄၇၇. ကမ္မမူလကေ အနန္တရေ ဧကန္တိ မဂ္ဂစေတနာဝသေန ဝုတ္တံ. အညမညေ တီဏီတိ ဧတ္ထ ပဋိသန္ဓိယံ ဝတ္ထုပိ ဂဟေတဗ္ဗံ. ဥပနိဿယေ ဒွေတိ အနန္တရပကတူပနိဿယဝသေန ဟေဋ္ဌာ ဝုတ္တာနေဝ. ဧဝံ သေသာနိပိ ဟေဋ္ဌာ ဝုတ္တနယေနေဝ ဝေဒိတဗ္ဗာနိ. ဧတ္ထ ပန ဧကာဒသ ဃဋနာနိ. တတ္ထ ပဌမာနိ ဒွေ ပကတူပနိဿယာနန္တရူပနိဿယဝိဘာဂတော နာနာက္ခဏိကကမ္မဝသေန ဝုတ္တာနိ. တတော ပရာနိ စတ္တာရိ ဝိပါကာဝိပါကတော ဧကက္ခဏိကကမ္မဝသေန ဝုတ္တာနိ. တတ္ထ ပဌမေ အရူပေန သဒ္ဓိံ စိတ္တသမုဋ္ဌာနရူပံ လဗ္ဘတိ၊ ဒုတိယေ အရူပေန သဒ္ဓိံ ဝတ္ထု၊ တတိယေ အရူပမေဝ၊ စတုတ္ထေ စိတ္တသမုဋ္ဌာနရူပမေဝ. ပဋိသန္ဓိယံ ပန ကဋတ္တာရူပမ္ပိ လဗ္ဘတိ. တတော ပရာနိ ပဉ္စ သဝိပါကာနိ၊ တာနိ ဟေဋ္ဌာ ဝုတ္တနယာနေဝ. ဝိပါကမူလကေ ပဉ္စ ဃဋာနာနိ ဥတ္တာနတ္ထာနေဝ.

၄၇၈-၄၈၃. အာဟာရမူလကေ သတ္တာတိအာဒီနိ ဝုတ္တနယာနေဝ. ဃဋနာနိ ပနေတ္ထ စတုတ္တိံသ. တေသု ပဌမာနိ ပဉ္စ ဝိပါကာဝိပါကသာမညတော ဝုတ္တာနိ. တတ္ထ ပဌမေ စတ္တာရောပိ အာဟာရာ လဗ္ဘန္တိ၊ ဒုတိယေ တယော အရူပါဟာရာဝ. တတိယေ ဝတ္ထုပိ ပစ္စယုပ္ပန္နံ ဟောတိ၊ စတုတ္ထေ တံ ပရိဟာယတိ. ပဉ္စမေ ရူပမေဝ ပစ္စယုပ္ပန္နံ. တတော ပရာနိ ပဉ္စ သဝိပါကဃဋနာနိ၊ တာနိ ဟေဋ္ဌာ ဝုတ္တနယာနေဝ. တတော ပရာနိ နဝ ဃဋနာနိ စေတနာဟာရဝသေန ဝုတ္တာနိ. တတော ပရာနိ နဝ နိရာဓိပတိဝိညာဏာဟာရဝသေန. တတော ပရာနိ သာဓိပတိဝိညာဏာဟာရဝသေန ဆ ဃဋနာနိ ဝုတ္တာနိ. တတ္ထ တီဏိ ဝိပါကာဝိပါကသာမညဝသေန ဝုတ္တာနိ. တီဏိ ဝိပါကဝသေနေဝ. တတ္ထ လောကိယာနံ ဝိပါကာနံ အဘာဝတော ဝတ္ထု ပရိဟာယတိ.

၄၈၄-၄၉၅. ဣန္ဒြိယမူလကေ ပုရေဇာတေ ဧကန္တိ စက္ခုန္ဒြိယာဒီနံ ဝသေန အဗျာကတေန အဗျာကတံ. သေသံ ဒုမူလကံ ဟေဋ္ဌာ ဝုတ္တနယေနေဝ ဝေဒိတဗ္ဗံ. ဃဋနာနိ ပနေတ္ထ ဆ သတ္တတိ. တတ္ထ ပဌမေ သဗ္ဗာနိပိ ဣန္ဒြိယာနိ ပစ္စယဋ္ဌေန လဗ္ဘန္တိ. ဒုတိယေ ရူပဇီဝိတိန္ဒြိယံ ဟာယတိ. န ဟိ တံ နိဿယော ဟောတိ. တတိယေ အရူပိန္ဒြိယာနိ ရူပါနံ. စတုတ္ထေ စက္ခာဒီနိ စက္ခုဝိညာဏာဒီနံ. တတော ပရာနိ နဝ ဃဋနာနိ သဟဇာတအရူပိန္ဒြိယဝသေန ဝုတ္တာနိ၊ တတော နဝ မဂ္ဂဘူတာနံ ဣန္ဒြိယာနံ ဝသေန၊ တတော နဝ ဈာနင်္ဂဘူတာနံ၊ တတော နဝ ဈာနမဂ္ဂဘူတာနံ၊ တတော နဝ မနိန္ဒြိယဝသေနေဝ၊ တတော သာဓိပတီနိ ဆ၊ တတော ဝီရိယဝသေန မဂ္ဂသမ္ပယုတ္တာနိ ဆ၊ တတော အမောဟဟေတုဝသေန နိရာဓိပတီနိ နဝ၊ သာဓိပတီနိ ဆ. တေသု သဗ္ဗေသု ဝိပါကပစ္စယေန အယုတ္တာနိ စ ယုတ္တာနိ စ ဟေဋ္ဌာ ဝုတ္တနယေနေဝ ဝေဒိတဗ္ဗာနိ.

၄၉၆-၅၀၀. ဈာနမူလကေပိ ဒုမူလကံ ဟေဋ္ဌာ ဝုတ္တနယေနေဝ ဝေဒိတဗ္ဗံ. ဃဋနာနိ ပနေတ္ထ ဆတ္တိံသ. တေသု ပဌမာနိ နဝ ဣန္ဒြိယမဂ္ဂဘာဝံ အနာမသိတွာ သာဓာရဏဈာနင်္ဂဝသေနေဝ ဝုတ္တာနိ. တတော ပရာနိ နဝ ဣန္ဒြိယဘူတဈာနင်္ဂဝသေန၊ တတော နဝ မဂ္ဂဘူတဈာနင်္ဂဝသေန၊ တတော နဝ ဣန္ဒြိယမဂ္ဂဘူတဈာနင်္ဂဝသေန. စတူသုပိ စေတေသု နဝကေသု အာဒိတော စတ္တာရိ စတ္တာရိ ဝိပါကာဝိပါကသာဓာရဏာနိ. အဝသာနေ ပဉ္စ ပဉ္စ ဝိပါကာနေဝ၊ တာနိ ဟေဋ္ဌာ ဝုတ္တနယာနေဝ.

၅၀၁-၅၀၈. မဂ္ဂမူလကေပိ ဒုမူလကံ ဝုတ္တနယေနေဝ ဝေဒိတဗ္ဗံ. ဃဋနာနိ ပနေတ္ထ သတ္တပညာသ. တေသု ပဌမာနိ နဝ ဣန္ဒြိယဈာနဘာဝံ အနာမသိတွာ သုဒ္ဓိကမဂ္ဂဝသေနေဝ ဝုတ္တာနိ. တတော နဝ ဣန္ဒြိယဘူတမဂ္ဂဝသေန၊ တတော နဝ ဈာနဘူတမဂ္ဂဝသေန၊ တတော နဝ ဣန္ဒြိယဈာနဘူတမဂ္ဂဝသေန၊ တတော ဆ အဓိပတိဘူတမဂ္ဂဝသေန၊ တတော နဝ နိရာဓိပတိမဂ္ဂဟေတုဝသေန၊ တတော ဆ သာဓိပတိမဂ္ဂဟေတုဝသေန၊ တတ္ထ နဝကေသု ပဉ္စ ပဉ္စ ဆက္ကေသု တီဏိ တီဏိ ဝိပါကာနိ. သေသာနိ သာဓာရဏာနိ၊ တာနိ ဟေဋ္ဌာ ဝုတ္တနယာနေဝ.

၅၀၉-၅၁၀. သမ္ပယုတ္တမူလကေ ဒုမူလကံ ဥတ္တာနတ္ထမေဝ. ဧတ္ထ ပန ဒွေယေဝ ဃဋနာနိ. တတ္ထ ဧကံ သာဓာရဏဝသေန၊ ဧကံ ဝိပါကဝသေန ဝုတ္တံ.

၅၁၁-၅၁၄. ဝိပ္ပယုတ္တမူလကေပိ ဒုမူလကံ ဥတ္တာနတ္ထမေဝ. ဃဋနာနိ ပနေတ္ထ တေရသ. တတ္ထ ပဌမေ ပဉ္စာတိ ကုသလော အဗျာကတဿ၊ တထာ အကုသလော၊ အဗျာကတော တိဏ္ဏန္နမ္ပိ. ဧတ္ထ စ ဣမေ ဝိပ္ပယုတ္တာဒယော သဟဇာတာပိ ဟောန္တိ၊ ပစ္ဆာဇာတပုရေဇာတာပိ. ဒုတိယေ ပုရေဇာတသဟဇာတာဝ တတိယေ တေယေဝ အဓိပတိဝသေန. တတ္ထ ကုသလော အဗျာကတဿ တထာ အကုသလော၊ အဗျာကတော ပန အဗျာကတဿ စ အာရမ္မဏာဓိပတိဝသေန အကုသလဿ စာတိ ဧဝံ စတ္တာရိ. စတုတ္ထေ တီဏီတိ ကုသလာဒီနိ အဗျာကတဿ. ဣန္ဒြိယာနိ ပနေတ္ထ ရူပါနိပိ အရူပါနိပိ. ပဉ္စမေ ပစ္စယာ အရူပါဝ ဆဋ္ဌေ ဝတ္ထုဝသေန ရူပါဝ သတ္တမေ ကုသလာဗျာကတာနံ ဝိပဿနာဝသေန၊ အကုသလဿ အဿာဒနဝသေန ဝတ္ထုမေဝ. အဋ္ဌမေ တဒေဝါကုသလဿ၊ နဝမေ စက္ခာဒီနိ အဗျာကတဿ၊ ဒသမေ ကုသလာဒယော စိတ္တသမုဋ္ဌာနာနံ၊ ဧကာဒသမေ ပဋိသန္ဓိယံ ဝတ္ထု ခန္ဓာနံ၊ ဒွါဒသမေ ပဋိသန္ဓိယံ ခန္ဓာ ကဋတ္တာရူပါနံ၊ တေရသမေ ပဋိသန္ဓိယံ ခန္ဓာ ဝတ္ထုဿ.

၅၁၅-၅၁၈. အတ္ထိပစ္စယမူလကေ ဥပနိဿယေ ဧကန္တိ အာရမ္မဏူပနိဿယဝသေန အဗျာကတံ အကုသလဿ. သေသံ ဒုမူလကေ ဥတ္တာနမေဝ. ဃဋနာနိ ပနေတ္ထ ဧကူနတိံသ. တေသု ပဌမေ အရူပဝတ္ထာရမ္မဏမဟာဘူတဣန္ဒြိယာဟာရာနံ ဝသေန သဟဇာတပုရေဇာတပစ္ဆာဇာတပစ္စယာ လဗ္ဘန္တိ. ဒုတိယေ ပစ္ဆာဇာတကဗဠီကာရာဟာရာ န လဗ္ဘန္တိ. ပဌမဒုတိယဃဋနာနေဝ အဓိပတိနာ သဒ္ဓိံ ဥပရိ တတိယစတုတ္ထာနိ ကတာနိ. ပုန ပဌမမေဝ စတူဟိ အာဟာရေဟိ သဒ္ဓိံ ပဉ္စမံ၊ ရူပိန္ဒြိယေဟိ သဒ္ဓိံ ဆဋ္ဌံ၊ ရူပါရူပိန္ဒြိယေဟိ သဒ္ဓိံ သတ္တမံ ကတံ. ဒုတိယမေဝ ဝါ ပန ဣန္ဒြိယေဟိ သဒ္ဓိံ သတ္တမံ ကတံ. ပဌမဒုတိယာနေဝ ဝိပ္ပယုတ္တပစ္စယေန သဒ္ဓိံ အဋ္ဌမနဝမာနိ. တေသု နဝမံ အဓိပတိနာ သဒ္ဓိံ ဒသမံ ကတံ. တတော ဧကာဒသမေ ပစ္စယဝသေန ဝတ္ထု ဟာယတိ. ဒွါဒသမေ အရူပဓမ္မာယေဝ ပစ္စယာ၊ တေရသမေ ဝတ္ထာရမ္မဏာ၊ စုဒ္ဒသမေ ဝတ္ထုမေဝ၊ ပန္နရသမေ အာရမ္မဏမေဝ၊ သောဠသမေ ဝတ္ထုမေဝ အာရမ္မဏံ၊ သတ္တရသမေ ပန တဒေဝ အာရမ္မဏာဓိပတိဘာဝေန၊ အဋ္ဌာရသမေပိ တဒေဝ အာရမ္မဏူပနိဿယဝသေန၊ ဧကူနဝီသတိမေ စက္ခာဒယောဝ ပစ္စယာ. ဣမာနိ ဧကူနဝီသတိ ပကိဏ္ဏကဃဋနာနိ နာမ သဟဇာတံ အဂ္ဂဟေတွာ ဝုတ္တာနိ. တတော ပရာနိ ဒသ သဟဇာတဝသေန ဝုတ္တာနိ.

၅၁၉. နတ္ထိဝိဂတမူလကေသု အနန္တရသမနန္တရမူလကေသု ဝိယ ဥပနိဿယာသေဝနကမ္မဝသေန တီဏိယေဝ ဃဋနာနိ၊ အဝိဂတမူလကံ အတ္ထိမူလကသဒိသမေဝါတိ.

ယာနိ ပနေတာနိ ဣမသ္မိံ ပဉှာဝါရေ ဃဋနာနိ ဝုတ္တာနိ၊ တာနိ သဗ္ဗာနိပိ ဒုဝိဓာနိယေဝ – ပကိဏ္ဏကတော သဟဇာတတော စ. တတ္ထ သဗ္ဗေသမ္ပိ အာရမ္မဏမူလကာဒီနံ အာဒိတော သဟဇာတံ အဂ္ဂဟေတွာ ဝုတ္တာနိ ပကိဏ္ဏကာနိ နာမ. တာနိ အာရမ္မဏမူလကေ ပဉ္စပိ၊ အဓိပတိမူလကေ ဆ၊ အနန္တရမူလကေ တီဏိပိ၊ တထာ သမနန္တရမူလကေ၊ နိဿယမူလကေ ဒသ၊ ဥပနိဿယမူလကေ သတ္တ၊ ပုရေဇာတမူလကေ သတ္တ၊ ပစ္ဆာဇာတမူလကေ ဧကမေဝ၊ တထာ အာသေဝနမူလကေ၊ ကမ္မမူလကေ ဒွေ၊ အာဟာရမူလကေ ဧကံ၊ ဣန္ဒြိယမူလကေ စတ္တာရိ၊ ဝိပ္ပယုတ္တမူလကေ နဝ၊ အတ္ထိမူလကေ ဧကူနဝီသတိ၊ နတ္ထိမူလကေ တီဏိပိ၊ တထာဝိဂတမူလကေ. အဝိဂတမူလကေ ဧကူနဝီသတီတိ သဗ္ဗာနိပိ သတဉ္စေဝ တီဏိ စ ဟောန္တိ. သဟဇာတနိဿယဘာဝေန ပနေတာနိ ပကိဏ္ဏကာနီတိ ဝုတ္တာနိ.

ယာနိ ပန သဟဇာတံ လဗ္ဘန္တိ၊ တာနိ သဟဇာတဃဋနာနိ နာမာတိ ဝုစ္စန္တိ. တာနိ အာရမ္မဏမူလကေ အနန္တရသမနန္တရပုရေဇာတပစ္ဆာဇာတအာသေဝနနတ္ထိဝိဂတမူလကေသု န လဗ္ဘန္တိ. န ဟိ တေ ပစ္စယာ သဟဇာတာနံ ပစ္စယာ ဟောန္တိ. ယထာ စ သဟဇာတာနံ န ဟောန္တိ၊ တထာ ဟေတုသဟဇာတအညမညဝိပါကဈာနမဂ္ဂသမ္ပယုတ္တပစ္စယာ. အသဟဇာတာနန္တိ ဟေတုမူလကေ သဗ္ဗာနိ စတုဝီသတိပိ ဃဋနာနိ သဟဇာတဃဋနာနေဝ. တထာ အဓိပတိမူလကေ စတုဝီသတိ၊ သဟဇာတမူလကေ ဒသပိ၊ အညမညမူလကေ ဆပိ၊ နိဿယမူလကေ ဒသ၊ ကမ္မမူလကေ နဝ၊ ဝိပါကမူလကေ ပဉ္စပိ၊ အာဟာရမူလကေ တေတ္တိံသ၊ ဣန္ဒြိယမူလကေ ဒွါသတ္တတိ ဈာနမူလကေ ဆတ္တိံသာပိ၊ မဂ္ဂမူလကေ သတ္တပညာသမ္ပိ၊ သမ္ပယုတ္တမူလကေ ဒွေပိ၊ ဝိပ္ပယုတ္တမူလကေ စတ္တာရိ၊ အတ္ထိမူလကေ ဒသ၊ အဝိဂတမူလကေ ဒသာတိ သဗ္ဗာနိပိ တီဏိ သတာနိ ဒွါဒသ စ ဟောန္တိ. ဣတိ ပုရိမာနိ သတံ တီဏိ စ ဣမာနိ စ ဒွါဒသုတ္တရာနိ တီဏိ သတာနီတိ သဗ္ဗာနိပိ ပဉ္စဒသာဓိကာနိ စတ္တာရိ ဃဋနသတာနိ ပဉှာဝါရေ အာဂတာနိ. တေသု ယေ ယေ ပစ္စယဓမ္မာ နာမဝသေန န ပါကဋာ ဟုတွာ ပညာယန္တိ၊ တေပိ ဟေတုမူလကာဒီနံ နယာနံ အာဒိတော ဝိပါကာဝိပါကသာမညတော ဝုတ္တေသု ဃဋနေသု ဒဿေတဗ္ဗာ. ဒွါဒသေဝ ဟိ ဟေတူ ဆ အာရမ္မဏာ စတ္တာရော အဓိပတယော စတ္တာရော အာဟာရာ ဝီသတိ ဣန္ဒြိယာနိ သတ္တ ဈာနင်္ဂါနိ ဒွါဒသ မဂ္ဂင်္ဂါနီတိ ဧတေ ပစ္စယဓမ္မာ နာမ. တေသု ယေ ယေ ဓမ္မာ ဧကန္တေန ကုသလာ၊ ဧကန္တေနေဝ အကုသလာ၊ ဧကန္တေန ကုသလဝိပါကာ၊ ဧကန္တေနေဝါကုသလဝိပါကာ၊ ဧကန္တေနေဝ ဝိပါကာ၊ ဧကန္တေနေဝ အဝိပါကာ တေ တေ သာဓုကံ သလ္လက္ခေတွာ ယေ တတ္ထ ဝိပါကာ၊ တေ ဝိပါကဃဋနေသု၊ ယေ အဝိပါကာ၊ တေ အဝိပါကဃဋနေသု ယထာယောဂံ ယောဇေတဗ္ဗာတိ.

ပဉှာဝါရဿ ဃဋနေ အနုလောမဂဏနာ.

ပစ္စနီယုဒ္ဓါရဝဏ္ဏနာ

၅၂၇. ဣဒါနိ ပစ္စနီယံ ဟောတိ. တတ္ထ ယထာ ပဋိစ္စ ဝါရာဒီသု ‘‘အကုသလံ ဓမ္မံ ပဋိစ္စ အကုသလော ဓမ္မော ဥပ္ပဇ္ဇတိ နဟေတုပစ္စယာ’’တိအာဒိနာ နယေန လဗ္ဘမာနာ ပဉှာ လဗ္ဘမာနာနံ ပစ္စယာနံ ဝသေန သရူပတောဝ ဝိတ္ထာရိတာ. ဧဝံ အဝိတ္ထာရေတွာ ဧကေန လက္ခဏေန သင်္ခေပတော ပစ္စနီယံ ဒဿေတုံ ဓမ္မသင်္ဂါဟကေဟိ ကုသလော ဓမ္မော ကုသလဿ ဓမ္မဿ အာရမ္မဏပစ္စယေန ပစ္စယောတိအာဒိနာ နယေန အနုလောမတော ကုသလာဒီနံ ပစ္စယာ ဥဒ္ဓဋာ. တေ စ ခေါ ပစ္စယာ သမူဟဝသေန၊ နော ဧကေကပစ္စယဝသေနေဝ၊ တသ္မာ ယေ ယတ္ထ သမူဟတော ဒဿိတာ၊ တေ ဝိဘဇိတွာ ဝေဒိတဗ္ဗာ. သဗ္ဗေပိ ဟိ ဣမေ စတုဝီသတိ ပစ္စယာ အဋ္ဌသု ပစ္စယေသု သင်္ဂဟံ ဂစ္ဆန္တိ. ကတရေသု အဋ္ဌသု? အာရမ္မဏေ၊ သဟဇာတေ၊ ဥပနိဿယေ၊ ပုရေဇာတေ၊ ပစ္ဆာဇာတေ၊ ကမ္မေ၊ အာဟာရေ၊ ဣန္ဒြိယေတိ. ကထံ? ဌပေတွာ ဟိ ဣမေ အဋ္ဌ ပစ္စယေ သေသေသု သောဠသသု ဟေတုပစ္စယော အညမညဝိပါကဈာနမဂ္ဂသမ္ပယုတ္တပစ္စယောတိ ဣမေ ဆ ပစ္စယာ ဧကန္တေန သဟဇာတာ ဟုတွာ သဟဇာတာနညေဝ ပစ္စယဘာဝတော သဟဇာတပစ္စယေ သင်္ဂဟံ ဂစ္ဆန္တိ. အနန္တရပစ္စယော သမနန္တရအာသေဝနနတ္ထိဝိဂတပစ္စယောတိ ဣမေ ပန ပဉ္စ ဥပ္ပဇ္ဇိတွာ နိရုဒ္ဓါ အတ္တနော အနန္တရံ ဥပ္ပဇ္ဇမာနာနညေဝ ပစ္စယဘာဝတော အနန္တရူပနိဿယလက္ခဏေန ဥပနိဿယေ သင်္ဂဟံ ဂစ္ဆန္တိ. နိဿယပစ္စယော သဟဇာတပုရေဇာတဘေဒတော ဒုဝိဓော. တတ္ထ သဟဇာတနိဿယော သဟဇာတာနညေဝ နိဿယပစ္စယဘာဝတော သဟဇာတပစ္စယေ သင်္ဂဟံ ဂစ္ဆတိ၊ ပုရေဇာတနိဿယော ပုရေဇာတပစ္စယေ သင်္ဂဟံ ဂစ္ဆတိ.

အဓိပတိပစ္စယောပိ သဟဇာတာဓိပတိအာရမ္မဏာဓိပတိဝသေန ဒုဝိဓော. တတ္ထ သဟဇာတာဓိပတိ သဟဇာတာနံယေဝ အဓိပတိပစ္စယဘာဝတော သဟဇာတပစ္စယေ သင်္ဂဟံ ဂစ္ဆတိ. အာရမ္မဏာဓိပတိ အာရမ္မဏူပနိဿယော ဟောတိယေဝါတိ အာရမ္မဏူပနိဿယလက္ခဏေန ဥပနိဿယပစ္စယေ သင်္ဂဟံ ဂစ္ဆတိ. ဝိပ္ပယုတ္တပစ္စယော သဟဇာတပုရေဇာတပစ္ဆာဇာတဘေဒတော တိဝိဓော. တတ္ထ သဟဇာတဝိပ္ပယုတ္တော သဟဇာတာနညေဝ ဝိပ္ပယုတ္တပစ္စယဘာဝတော သဟဇာတပစ္စယေ သင်္ဂဟံ ဂစ္ဆတိ. ပုရေဇာတဝိပ္ပယုတ္တော ပုရေ ဥပ္ပဇ္ဇိတွာ ပစ္ဆာ ဥပ္ပဇ္ဇမာနာနံ ပစ္စယဘာဝတော ပုရေဇာတေ သင်္ဂဟိတော. ပစ္ဆာဇာတဝိပ္ပယုတ္တော ပစ္ဆာ ဥပ္ပဇ္ဇိတွာ ပုရေ ဥပ္ပန္နာနံ ဥပတ္ထမ္ဘနဝသေန ပစ္စယဘာဝတော ပစ္ဆာဇာတပစ္စယေ သင်္ဂဟံ ဂစ္ဆတိ. အတ္ထိပစ္စယအဝိဂတပစ္စယာ သဟဇာတပုရေဇာတပစ္ဆာဇာတအာဟာရိန္ဒြိယာနဉ္စေဝ အတ္ထိအဝိဂတေသု စ ဧကေကဿ ဝသေန ဆဟိ ဘေဒေဟိ ဌိတာ. တတ္ထ သဟဇာတအတ္ထိအဝိဂတာ သဟဇာတာနညေဝ အတ္ထိအဝိဂတပစ္စယဘာဝတော. သဟဇာတပစ္စယေ သင်္ဂဟံ ဂစ္ဆန္တိ. ပုရေဇာတာ ပုရေ ဥပ္ပဇ္ဇိတွာ ပစ္ဆာ ဥပ္ပဇ္ဇမာနာနံ ပစ္စယဘာဝတော ပုရေဇာတပစ္စယေ သင်္ဂဟံ ဂစ္ဆန္တိ. ပစ္ဆာဇာတာ ပစ္ဆာ ဥပ္ပဇ္ဇိတွာ ပုရေ ဥပ္ပန္နာနံ ဥပတ္ထမ္ဘနဝသေန ပစ္စယဘာဝတော ပစ္ဆာဇာတပစ္စယေ သင်္ဂဟံ ဂစ္ဆန္တိ. အာဟာရဘူတာ ကဗဠီကာရာဟာရပစ္စယေ သင်္ဂဟံ ဂစ္ဆန္တိ. ဣန္ဒြိယဘူတာ ရူပဇီဝိတိန္ဒြိယပစ္စယေ သင်္ဂဟံ ဂစ္ဆန္တီတိ ဧဝံ ဣမေ သောဠသ ပစ္စယာ ဣမေသု အဋ္ဌသု ပစ္စယေသု သင်္ဂဟံ ဂစ္ဆန္တီတိ ဝေဒိတဗ္ဗာ.

ဣမေသမ္ပိ ပန အဋ္ဌန္နံ ပစ္စယာနံ အညမညံ သင်္ဂဟော အတ္ထိယေဝ. အာဒိတော နိဒ္ဒိဋ္ဌော ဟိ အာရမ္မဏပစ္စယော အဓိပတိအနဓိပတိဘေဒေန ဒုဝိဓော. တတ္ထ အဓိပတိဘူတော အာရမ္မဏူပနိဿယလက္ခဏေန ဥပနိဿယေ သင်္ဂဟံ ဂစ္ဆတိ. အနဓိပတိဘူတော သုဒ္ဓေါ အာရမ္မဏပစ္စယောဝ. ကမ္မပစ္စယောပိ သဟဇာတနာနာက္ခဏိကဝသေန ဒုဝိဓော. တတ္ထ သဟဇာတကမ္မံ အတ္တနာ သဟဇာတာနညေဝ ကမ္မပစ္စယဘာဝတော သဟဇာတေယေဝ သင်္ဂဟံ ဂစ္ဆတိ. နာနာက္ခဏိကကမ္မံ ဗလဝဒုဗ္ဗလဝသေန ဒုဝိဓံ. တတ္ထ ဗလဝကမ္မံ ဝိပါကဓမ္မာနံ ဥပနိဿယောဝ ဟုတွာ ပစ္စယော ဟောတီတိ ဥပနိဿယေ သင်္ဂဟံ ဂစ္ဆတိ. ဗလဝမ္ပိ ပန ရူပါနံ ဒုဗ္ဗလဉ္စ အရူပါနံ နာနာက္ခဏိကကမ္မပစ္စယေနေဝ ပစ္စယော. အာဟာရပစ္စယောပိ ရူပါရူပတော ဒုဝိဓော. တတ္ထ အရူပါဟာရော အတ္တနာ သဟဇာတာနညေဝ ပစ္စယော ဟောတီတိ သဟဇာတပစ္စယေ သင်္ဂဟံ ဂစ္ဆတိ. ရူပါဟာရော သဟဇာတပုရေဇာတပစ္ဆာဇာတာနံ ပစ္စယော န ဟောတိ. အတ္တနော ပန ဥပ္ပါဒက္ခဏံ အတိက္ကမိတွာ ဌိတိပ္ပတ္တော အာဟာရပစ္စယတံ သာဓေတီတိ အာဟာရပစ္စယောဝ ဟောတိ. ဣန္ဒြိယပစ္စယောပိ ရူပါရူပတော ဒုဝိဓော. တတ္ထ အရူပိန္ဒြိယပစ္စယော အတ္တနာ သဟဇာတာနညေဝ ဣန္ဒြိယပစ္စယတံ သာဓေတီတိ သဟဇာတေယေဝ သင်္ဂဟံ ဂစ္ဆတိ. ရူပိန္ဒြိယပစ္စယော ပန အဇ္ဈတ္တဗဟိဒ္ဓါဘေဒတော ဒုဝိဓော. တတ္ထ အဇ္ဈတ္တံ ဣန္ဒြိယပစ္စယော ပုရေ ဥပ္ပဇ္ဇိတွာ ပစ္ဆာ ဥပ္ပဇ္ဇမာနာနံ သသမ္ပယုတ္တဓမ္မာနံ စက္ခုဝိညာဏာဒီနံ ဣန္ဒြိယပစ္စယော ဟောတီတိ ပုရေဇာတေယေဝ သင်္ဂဟံ ဂစ္ဆတိ. ဗာဟိရော ဣန္ဒြိယပစ္စယော နာမ ရူပဇီဝိတိန္ဒြိယံ၊ တံ သဟဇာတာနံ ပစ္စယော ဟောန္တမ္ပိ အနုပါလနမတ္တဝသေနေဝ ဟောတိ၊ န ဇနကဝသေနာတိ ဣန္ဒြိယပစ္စယောဝ ဟောတိ. ဧဝံ ဣမေ အဋ္ဌ ပစ္စယာ အညမညမ္ပိ သင်္ဂဟံ ဂစ္ဆန္တီတိ ဝေဒိတဗ္ဗာ. အယံ တာဝ အဋ္ဌသု ပစ္စယေသု အဝသေသာနံ သောဠသန္နဉ္စေဝ တေသံယေဝ စ အဋ္ဌန္နံ အညမညဝသေန သင်္ဂဟနယော.

ဣဒါနိ ဣမေသံ အဋ္ဌန္နံ ပစ္စယာနံ ဧကေကသ္မိံ စတုဝီသတိယာပိ ပစ္စယေသု ယေ ယေ သင်္ဂဟံ ဂစ္ဆန္တိ၊ တေ တေ ဝေဒိတဗ္ဗာ. တတ္ထ အဋ္ဌန္နံ တာဝ သဗ္ဗပဌမေ အာရမ္မဏပစ္စယေ အာရမ္မဏပစ္စယောဝ သင်္ဂဟံ ဂစ္ဆတိ၊ န သေသာ တေဝီသတိ. ဒုတိယေ သဟဇာတပစ္စယေ ဟေတုပစ္စယော သဟဇာတာဓိပတိပစ္စယော သဟဇာတပစ္စယော အညမညပစ္စယော သဟဇာတနိဿယပစ္စယော သဟဇာတကမ္မပစ္စယော ဝိပါကပစ္စယော သဟဇာတအာဟာရပစ္စယော သဟဇာတဣန္ဒြိယပစ္စယော ဈာနပစ္စယော မဂ္ဂပစ္စယော သမ္ပယုတ္တပစ္စယော သဟဇာတဝိပ္ပယုတ္တပစ္စယော သဟဇာတတ္ထိပစ္စယော သဟဇာတာဝိဂတပစ္စယောတိ ဣမေ ပန္နရသ ပစ္စယာ သင်္ဂဟံ ဂစ္ဆန္တိ. တတိယေ ဥပနိဿယပစ္စယေ အဓိပတိဘူတော အာရမ္မဏပစ္စယော အာရမ္မဏဘူတော အဓိပတိပစ္စယော အနန္တရသမနန္တရဥပနိဿယအာသေဝနပစ္စယာ နာနာက္ခဏိကော ဗလဝကမ္မပစ္စယော နတ္ထိပစ္စယော ဝိဂတပစ္စယောတိ ဣမေ နဝ ပစ္စယာ သင်္ဂဟံ ဂစ္ဆန္တိ. စတုတ္ထေ ပုရေဇာတပစ္စယေ ပုရေဇာတနိဿယပစ္စယော ပုရေဇာတပစ္စယော ပုရေဇာတိန္ဒြိယပစ္စယော ပုရေဇာတဝိပ္ပယုတ္တပစ္စယော ပုရေဇာတတ္ထိပစ္စယော ပုရေဇာတာဝိဂတပစ္စယောတိ ဣမေ ဆ ပစ္စယာ သင်္ဂဟံ ဂစ္ဆန္တိ. ပဉ္စမေ ပစ္ဆာဇာတပစ္စယေ ပစ္ဆာဇာတပစ္စယော ပစ္ဆာဇာတဝိပ္ပယုတ္တပစ္စယော ပစ္ဆာဇာတတ္ထိပစ္စယော ပစ္ဆာဇာတာဝိဂတပစ္စယောတိ ဣမေ စတ္တာရော ပစ္စယာ သင်္ဂဟံ ဂစ္ဆန္တိ. ဆဋ္ဌေ ကမ္မပစ္စယေ နာနာက္ခဏိကကမ္မပစ္စယောဝ သင်္ဂဟိတော. သတ္တမေ အာဟာရပစ္စယေ ကဗဠီကာရာဟာရဝသေနေဝ အာဟာရပစ္စယော အာဟာရတ္ထိပစ္စယော အာဟာရာဝိဂတပစ္စယောတိ ဣမေ တယော ပစ္စယာ သင်္ဂဟိတာ. အဋ္ဌမေ ဣန္ဒြိယပစ္စယေ ရူပဇီဝိတိန္ဒြိယပစ္စယော ဣန္ဒြိယတ္ထိပစ္စယော ဣန္ဒြိယာဝိဂတပစ္စယောတိ ဣမေ တယော ပစ္စယာ သင်္ဂဟံ ဂစ္ဆန္တိ. ဧဝံ ဣမေသံ အဋ္ဌန္နံ ပစ္စယာနံ ဧကေကသ္မိံ ဣမေ စိမေ စ ပစ္စယာ သင်္ဂဟံ ဂတာတိ ဉတွာ ယေ ယတ္ထ သင်္ဂဟံ ဂတာ၊ တေ တဿ ဂဏနေန ဂဟိတာဝ ဟောန္တီတိ ဝေဒိတဗ္ဗာ.

ဧဝံ သဗ္ဗပစ္စယသင်္ဂါဟကာနံ ဣမေသံ အဋ္ဌန္နံ ပစ္စယာနံ ဝသေန ဧကူနပညာသာယ ပဉှေသု ဣမသ္မိံ ပစ္စနီယေ ‘‘ကုသလော ဓမ္မော ကုသလဿ ဓမ္မဿ အာရမ္မဏပစ္စယေန ပစ္စယော’’တိအာဒယော ဣမေ ပန္နရသ ပဉှာ ဥဒ္ဓရိတွာ ဝိဿဇ္ဇိတာ. တတ္ထ ကုသလော ကုသလဿ၊ ကုသလော အကုသလဿ၊ ကုသလော အဗျာကတဿ၊ ကုသလော ကုသလာဗျာကတဿာတိ ကုသလာဒိကာ စတ္တာရော ပဉှာ၊ တထာ အကုသလာဒိကာ၊ အဗျာကတော ပန အဗျာကတဿ၊ အဗျာကတော ကုသလဿ၊ အဗျာကတော အကုသလဿာတိ အဗျာကတာဒိကာ တယော၊ ကုသလော စ အဗျာကတော စ ကုသလဿ၊ တထာ အဗျာကတဿ၊ အကုသလော စ အဗျာကတော စ အကုသလဿ၊ တထာ အဗျာကတဿာတိ ဒုမူလကေကာဝသာနာ စတ္တာရော ဟောန္တိ. တေသု ပဌမေ ပဉှေ ယေဟိ ဘဝိတဗ္ဗံ၊ တေ သဗ္ဗေ သင်္ဂဟေတွာ တယော ပစ္စယာ ဝုတ္တာ. ဒုတိယေ ဒွေ၊ တတိယေ ပဉ္စ၊ စတုတ္ထေ ဧကောဝ ပဉ္စမေ တယော၊ ဆဋ္ဌေ ဒွေ၊ သတ္တမေ ပဉ္စ၊ အဋ္ဌမေ ဧကောဝ နဝမေ သတ္တ၊ ဒသမေ တယော၊ ဧကာဒသမေ တယော၊ ဒွါဒသမေ ဒွေ၊ တေရသမေ စတ္တာရော၊ စုဒ္ဒသမေ ဒွေ၊ ပန္နရသမေပိ စတ္တာရောဝ. တေ ‘‘သဟဇာတပစ္စယေနာ’’တိ အဝတွာ ‘‘သဟဇာတံ ပစ္ဆာဇာတ’’န္တိ ဝုတ္တာ. တတ္ထ ကာရဏံ ပရတော ဝက္ခာမ.

သမာသတော ပနေတ္ထ ဧကော ဒွေ တယော စတ္တာရော ပဉ္စ သတ္တာတိ ဆဠေဝ ပစ္စယပရိစ္ဆေဒါ ဟောန္တိ. အယံ ပဉှာဝါရဿ ပစ္စနီယေ ဥက္ကဋ္ဌဝသေန ပဉှာပရိစ္ဆေဒေါ စေဝ တေ တေ ပစ္စယေ သင်္ဂဟေတွာ ဒဿိတပစ္စယပရိစ္ဆေဒေါ စ. ‘‘န ဟေတုပစ္စယော’’တိအာဒီသု ဟိ စတုဝီသတိယာပိ ပစ္စယပစ္စနီယေသု ဧကပစ္စနီယေပိ ဣတော ဥဒ္ဓံ ပဉှာ ဝါ ပစ္စယာ ဝါ န လဗ္ဘန္တိ၊ ဟေဋ္ဌာ လဗ္ဘန္တိ. တသ္မာ ယေသု ပဉှေသု ‘‘ကုသလော ဓမ္မော ကုသလဿ စ အဗျာကတဿ စ ဓမ္မဿ သဟဇာတပစ္စယေန ပစ္စယော’’တိ ဧဝံ ဧကောဝ ပစ္စယော အာဂတော၊ တသ္မိံ ပစ္စယေ ပဋိက္ခိတ္တေ တေ ပဉှာ ပရိဟာယန္တိ. ယသ္မိံ ပန ပဉှေ ‘‘ကုသလော ဓမ္မော အကုသလဿ ဓမ္မဿ အာရမ္မဏပစ္စယေန ပစ္စယော ဥပနိဿယပစ္စယေန ပစ္စယော’’တိ ဧဝံ ဒွေ ပစ္စယာ အာဂတာ. တတ္ထ နာရမ္မဏပစ္စယာတိ ဧဝံ ဧကသ္မိံ ပစ္စယေ ပဋိက္ခိတ္တေပိ ဣတရဿ ပစ္စယဿ ဝသေန သော ပဉှော လဗ္ဘတေဝ. တေသု ပန ဒွီသုပိ ပစ္စယေသု ပဋိက္ခိတ္တေသု သော ဝါရော ပစ္ဆိဇ္ဇတိ. ဧဝမေဝ ယေသု ပဉှေသု တယော စတ္တာရော ပဉ္စ သတ္တ ဝါ လဗ္ဘန္တိ၊ တေသု ဌပေတွာ ပဋိက္ခိတ္တေ ပစ္စယေ အဝသေသာနံ ဝသေန တေ ပဉှာ လဗ္ဘန္တိယေဝ. သဗ္ဗေသု ပန ပစ္စယေသု ပဋိက္ခိတ္တေသု သဗ္ဗေပိ တေ ဝါရာ ပစ္ဆိဇ္ဇန္တီတိ ဣဒမေဝ စေတ္ထ လက္ခဏံ. ဣမိနာ လက္ခဏေန အာဒိတော ပဋ္ဌာယ တေသု တေသု ပဉှေသု သင်္ခိပိတွာ ဝုတ္တပစ္စယာနံ ပဘေဒေါ စ တသ္မိံ တသ္မိံ ပစ္စနီယေ တေသံ တေသံ ပဉှာနံ ပရိဟာနိ စ ဝေဒိတဗ္ဗာ.

တတြာယံ ဝိတ္ထာရကထာ – ပဌမပဉှေ တာဝ တီဟိ ပစ္စယေဟိ ဧကူနဝီသတိ ပစ္စယာ ဒဿိတာ. ကထံ? ကုသလော ဟိ ကုသလဿ ပုရေဇာတပစ္ဆာဇာတဝိပါကဝိပ္ပယုတ္တေဟေဝ ပစ္စယော န ဟောတိ၊ သေသေဟိ ဝီသတိယာ ဟောတိ၊ တေသု အာရမ္မဏပစ္စယော ဧကောဝ သဟဇာတေ ပန သဗ္ဗသင်္ဂါဟိကဝသေန ပန္နရသ ပစ္စယာ သင်္ဂဟံ ဂစ္ဆန္တီတိ ဝုတ္တာ. တေသု ဟေတုပစ္စယေ ပဋိက္ခိတ္တေ စုဒ္ဒသ ဟောန္တိ. ကုသလော ပန ကုသလဿ နေဝ ဝိပါကပစ္စယော န၊ ဝိပ္ပယုတ္တပစ္စယောတိ တေ ဒွေ အပနေတွာ သေသေ ဒွါဒသ သန္ဓာယ သဟဇာတပစ္စယေန ပစ္စယောတိ ဝုတ္တံ. ဥပနိဿယပစ္စယေပိ သဗ္ဗသင်္ဂါဟိကဝသေန နဝ ပစ္စယာ သင်္ဂဟံ ဂစ္ဆန္တီတိ ဝုတ္တာ. တေသု အဓိပတိဘူတော အာရမ္မဏပစ္စယော အာရမ္မဏဘူတော စ အဓိပတိပစ္စယော အာရမ္မဏူပနိဿယဝသေန ဥပနိဿယမေဝ အနုပဝိဋ္ဌော. ကုသလော ပန ကုသလဿ နာနာက္ခဏိကကမ္မပစ္စယော န ဟောတီတိ တံ အပနေတွာ သေသေ ဆ သန္ဓာယ ဥပနိဿယပစ္စယေန ပစ္စယောတိ ဝုတ္တံ. ဧဝံ ပဌမပဉှေ တီဟိ ပစ္စယေဟိ ဧကူနဝီသတိပစ္စယာ ဒဿိတာတိ ဝေဒိတဗ္ဗာ. တေသု ဣမသ္မိံ ဟေတုပစ္စနီယေ ‘‘ကုသလော ဓမ္မော ကုသလဿ ဓမ္မဿ နဟေတုပစ္စယေန ပစ္စယောတိ ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ပစ္စဝေက္ခတိ၊ ပုဗ္ဗေ သုစိဏ္ဏာနိ ပစ္စဝေက္ခတီ’’တိ ဧဝမာဒိနာ အာရမ္မဏပစ္စယာဒီသု ဝုတ္တနယေနေဝ ဥဒ္ဓရိတွာ ပါဠိ ဒဿေတဗ္ဗာ.

အာရမ္မဏပစ္စယေ ပန ပဋိက္ခိတ္တေ တဿ ဝိတ္ထာရံ အပနေတွာ ဟေတုပစ္စယဝိတ္ထာရံ ပက္ခိပိတွာ သာယေဝ ပါဠိ ဒဿေတဗ္ဗာ၊ သေသပစ္စယပဋိက္ခေပေသုပိ ဧသေဝ နယော. တသ္မိံ ပန ပစ္စယေ ပဋိက္ခိတ္တေ ယေ ဝါရာ ပရိဟာယန္တိ၊ တေ ပရတော ဝက္ခာမ.

ဒုတိယပဉှေ ပန ဒွီဟိ ပစ္စယေဟိ တယော ပစ္စယာ ဒဿိတာ. ကထံ? ကုသလော ဟိ အကုသလဿ အနန္တရာဒိဝသေန ပစ္စယော န ဟောတိ. တသ္မာ တေ အပနေတွာ အာရမ္မဏူပနိဿယဝသေန သင်္ဂဟိတံ အာရမ္မဏာဓိပတိဉ္စေဝ ပကတူပနိဿယဉ္စ သန္ဓာယ ဥပနိဿယပစ္စယေန ပစ္စယောတိ ဝုတ္တံ. တသ္မာ သုဒ္ဓေါ အာရမ္မဏပစ္စယော အာရမ္မဏာဓိပတိဝသေန အဓိပတိပစ္စယော ဥပနိဿယပစ္စယောတိ ဒုတိယပဉှေ ဒွီဟိ ပစ္စယေဟိ ဣမေ တယော ပစ္စယာ ဒဿိတာတိ ဝေဒိတဗ္ဗာ.

တတိယပဉှေ ပန ပဉ္စဟိ ပစ္စယေဟိ အဋ္ဌာရသ ပစ္စယာ ဒဿိတာ. ကထံ? ကုသလော ဟိ အဗျာကတဿ အညမညပုရေဇာတာသေဝနဝိပါကသမ္ပယုတ္တေဟိယေဝ ပစ္စယော န ဟောတိ၊ သေသေဟိ ဧကူနဝီသတိယာ ဟောတိ. တေသု အာရမ္မဏပစ္စယော ဧကော. ယသ္မာ ပန ကုသလော အဗျာကတဿ အညမညဝိပါကသမ္ပယုတ္တဝသေန ပစ္စယော န ဟောတိ၊ ဟေတုပစ္စယော ပဋိက္ခိတ္တော၊ ကမ္မပစ္စယော ဝိသုံ ဂဟိတော၊ တသ္မာ ဣမေ ပဉ္စ အပနေတွာ သဟဇာတေန ဒသ ပစ္စယာ ဒဿိတာ. ဥပနိဿယေန ဟေဋ္ဌာ ဝုတ္တေသု ဆသု ဌပေတွာ အာသေဝနံ သေသာ ပဉ္စ. ပစ္ဆာဇာတော ဧကောဝ တထာ သဟဇာတနာနာက္ခဏိကဝသေန ဒုဝိဓောပိ ကမ္မပစ္စယောတိ ဧဝံ တတိယပဉှေ ပဉ္စဟိ ပစ္စယေဟိ ဣမေ အဋ္ဌာရသ ပစ္စယာ ဒဿိတာတိ ဝေဒိတဗ္ဗာ.

စတုတ္ထပဉှေ ပန ဧကေန ပစ္စယေန ဒသ. ကထံ? ကုသလော ဟိ ကုသလာဗျာကတဿ သဟဇာတေ ဝုတ္တေသု ပန္နရသသု အညမညဝိပါကသမ္ပယုတ္တဝိပ္ပယုတ္တေဟိ ပစ္စယော န ဟောတိ၊ ဟေတုပစ္စယော ပဋိက္ခိတ္တော. ဣတိ ဣမေ ပဉ္စ အပနေတွာ သေသာ ဒသ ပစ္စယာ ဧတ္ထ ဧကေန ပစ္စယေန ဒဿိတာတိ ဝေဒိတဗ္ဗာ.

၅၂၈. ယထာ စ ဣမေသု ကုသလာဒိကေသု စတူသု၊ တထာ အကုသလာဒိကေသုပိ စတူသု ပဉှေသု တေဟိ တေဟိ ပစ္စယေဟိ တေ တေယေဝ ပစ္စယာ ဒဿိတာတိ ဝေဒိတဗ္ဗာ.

၅၂၉. တတော ပရာနံ အဗျာကတာဒီနံ တိဏ္ဏံ ပဉှာနံ ပဌမပဉှေ သတ္တဟိ ပစ္စယေဟိ တေဝီသတိ ပစ္စယာ ဒဿိတာ. ကထံ? အဗျာကတော ဟိ အဗျာကတဿ စတုဝီသတိယာပိ ပစ္စယေဟိ ပစ္စယော ဟောတိ. ဟေတုပစ္စယေ ပန ပဋိက္ခိတ္တေ တေဝီသတိ ဟောန္တိ. တေသု အာရမ္မဏပစ္စယော ဧကောဝ. ယသ္မာ ပနေတ္ထ အသဟဇာတာနမ္ပိ သင်္ဂဟဏတ္ထံ အာဟာရိန္ဒြိယပစ္စယာ ဝိသုံ ဂဟိတာ. တသ္မာ ဣမေ တယော အပနေတွာ သဟဇာတေန ဒွါဒသ ပစ္စယာ ဒဿိတာ. ဥပနိဿယေန ဟေဋ္ဌာ ဝုတ္တာ ဆ၊ ပုရေဇာတော ဧကောဝ တထာ ပစ္ဆာဇာတအာဟာရိန္ဒြိယပစ္စယာတိ ဧဝမေတ္ထ သတ္တဟိ ပစ္စယေဟိ ဣမေ တေဝီသတိ ပစ္စယာ ဒဿိတာတိ ဝေဒိတဗ္ဗာ. ဒုတိယေ တီဟိ ပစ္စယေဟိ ဒွါဒသ ဒဿိတာ. ကထံ? အာရမ္မဏပစ္စယော ဧကော၊ ဥပနိဿယေန ပန အာရမ္မဏူပနိဿယဝသေန အာရမ္မဏာဓိပတိအနန္တရသမနန္တရနတ္ထိဝိဂတဥပနိဿယပစ္စယောတိ ဆ ဒဿိတာ. ပုရေဇာတေန ပုရေဇာတနိဿယဝိပ္ပယုတ္တအတ္ထိအဝိဂတာ ပဉ္စာတိ ဧဝမေတ္ထ တီဟိ ပစ္စယေဟိ ဣမေ ဒွါဒသ ပစ္စယာ ဒဿိတာတိ ဝေဒိတဗ္ဗာ. တတိယေပိ ဧသေဝ နယော.

၅၃၀. တတော ပရာနံ ဒုကမူလကာနံ စတုန္နံ ပဉှာနံ ပဌမပဉှေ ‘‘သဟဇာတပစ္စယေန ပုရေဇာတပစ္စယေနာ’’တိ အဝတွာ ‘‘သဟဇာတံ ပုရေဇာတ’’န္တိ ဝုတ္တေဟိ ဒွီဟိ နိဿယအတ္ထိအဝိဂတဝသေန တယော ပစ္စယာ ဒဿိတာ. ကုသလာ ဟိ ခန္ဓာ ဝတ္ထုနာ သဒ္ဓိံ ဧကတော ကုသလဿ ပစ္စယဘာဝံ သာဓယမာနာ ကိဉ္စာပိ သဟဇာတာ၊ သဟဇာတပစ္စယာ ပန န ဟောန္တိ ဝတ္ထုမိဿကတ္တာ. တသ္မာ တေသံ သဟဇာတာနံ နိဿယအတ္ထိအဝိဂတာနံ ဝသေန သဟဇာတန္တိ ဝုတ္တံ. ဝတ္ထုမှိပိ ဧသေဝ နယော. တမ္ပိ ဟိ ကိဉ္စာပိ ပုရေဇာတံ၊ ခန္ဓမိဿကတ္တာ ပန ပုရေဇာတပစ္စယော န ဟောတိ. ကေဝလံ ပုရေဇာတာနံ နိဿယာဒီနံ ဝသေန ပုရေဇာတန္တိ ဝုတ္တံ.

ဒုတိယပဉှေ ‘‘သဟဇာတံ ပစ္ဆာဇာတံ အာဟာရံ ဣန္ဒြိယ’’န္တိ ဝုတ္တေဟိ စတူဟိပိ သဟဇာတနိဿယအတ္ထိအဝိဂတဝသေန စတ္တာရော ပစ္စယာ ဒဿိတာ. ဣမသ္မိဉှိ ဝါရေ သဟဇာတပစ္စယော လဗ္ဘတိ၊ ပစ္ဆာဇာတပစ္စယာဒယော န လဗ္ဘန္တိ. ပစ္ဆာဇာတာနံ ပန အာဟာရိန္ဒြိယသင်္ခါတာနဉ္စ အတ္ထိအဝိဂတာနံ ဝသေနေတံ ဝုတ္တံ. ကုသလာ ဟိ ခန္ဓာ အဗျာကတာ စ မဟာဘူတာ ဥပါဒါရူပါနံ သဟဇာတပစ္စယေန နိဿယပစ္စယေန အတ္ထိအဝိဂတပစ္စယေဟီတိ စတုဓာ ပစ္စယာ ဟောန္တိ. ပစ္ဆာဇာတာ ပန ကုသလာ တေဟိယေဝ ဘူတေဟိ သဒ္ဓိံ တေသညေဝ ဥပါဒါရူပါနံ အတ္ထိအဝိဂတဝသေန ပစ္စယော. ကဗဠီကာရာဟာရောပိ ပစ္ဆာဇာတေဟိ ကုသလေဟိ သဒ္ဓိံ ပုရေဇာတဿ ကာယဿ အတ္ထိအဝိဂတဝသေနေဝ ပစ္စယော. ရူပဇီဝိတိန္ဒြိယမ္ပိ ပစ္ဆာဇာတေဟိ ကုသလေဟိ သဒ္ဓိံ ကဋတ္တာရူပါနံ အတ္ထိအဝိဂတပစ္စယေနေဝ ပစ္စယော. ဣတိ ဣမံ စတုဓာ ပစ္စယဘာဝံ သန္ဓာယ ‘‘သဟဇာတံ ပစ္ဆာဇာတံ၊ အာဟာရံ ဣန္ဒြိယ’’န္တိ ဣဒံ ဝုတ္တံ. ပစ္ဆာဇာတာဟာရိန္ဒြိယပစ္စယာ ပနေတ္ထ န လဗ္ဘန္တိယေဝ. ပရတော အကုသလမိဿကပဉှာဒွယေပိ ဧသေဝ နယောတိ. ဧဝမေတ္ထ တေသု တေသု ပဉှေသု သင်္ခိပိတွာ ဝုတ္တပစ္စယာနံ ပဘေဒေါ ဝေဒိတဗ္ဗော. တသ္မိံ တသ္မိံ ပန ပစ္စယေ တေသံ တေသံ ပဉှာနံ ပရိဟာနာပရိဟာနိံ ပရတော အာဝိကရိဿာမာတိ.

ပစ္စနီယုဒ္ဓါရဿ အတ္ထဝဏ္ဏနာ.

ပစ္စနီယဂဏနဝဏ္ဏနာ

၅၃၂. ဣဒါနိ ဧတေ ‘‘ကုသလော ဓမ္မော ကုသလဿ ဓမ္မဿာ’’တိအာဒယော အနုလောမဝသေန ပန္နရသ ဝါရာ ဒဿိတာ. ယသ္မာ ပစ္စနီယေပိ ဧတေယေဝ၊ န ဣတော ဥဒ္ဓံ၊ ဟေဋ္ဌာ ပန ဟောန္တိ၊ တသ္မာ ယဿ ယဿ ပစ္စယဿ ပစ္စနီယေ ယေ ယေ ဝါရာ လဗ္ဘန္တိ၊ တေ တေ အာဒိတော ပဋ္ဌာယ ဂဏနဝသေန ဒဿေတုံ နဟေတုယာ ပန္နရသာတိအာဒိ အာရဒ္ဓံ.

တတ္ထ နဟေတုယာ သဗ္ဗေသမ္ပိ ယထာဒဿိတာနံ ပစ္စယာနံ ဝသေန ပန္နရသ လဗ္ဘန္တိ. နာရမ္မဏေ သဟဇာတေ ဟေတုပစ္စယော ပဝိသတိ. တသ္မိံ တသ္မိံ ဝါရေ သုဒ္ဓေါ အာရမ္မဏပစ္စယော ပရိဟာယတိ၊ သေသပစ္စယဝသေန တေ ဝါရာ ဝိဿဇ္ဇနံ လဘန္တိ. ယထာ စ နာရမ္မဏေ၊ ဧဝံ သေသေသုပိ. သဟဇာတေ ဟေတုပစ္စယော ပဝိသတိ. တသ္မိံ တသ္မိဉ္စ ဝါရေ နဥပနိဿယေ နအနန္တရေတိ ဧဝံ ပစ္စနီယတော ဌိတာ ပစ္စယာ ပရိဟာယန္တိ၊ အဝသေသပစ္စယဝသေန တေ တေ ဝါရာ ဝိဿဇ္ဇနံ လဘန္တိ. နသဟဇာတေ ပန ‘‘ကုသလော ဓမ္မော ကုသလဿ စ အဗျာကတဿ စ၊ အကုသလော ဓမ္မော အကုသလဿ စ အဗျာကတဿ စ၊ ကုသလော စ အဗျာကတော စ ဓမ္မာ ကုသလဿ၊ အကုသလော စ အဗျာကတော စ ဓမ္မာ အကုသလဿာတိ ဣမေ စတ္တာရော ဝါရာ ပရိဟာယန္တိ. ဧတေသဉှိ စတုန္နံ ပုရိမေသု ဒွီသု သဟဇာတပစ္စယေန ပစ္စယောတိ ဧကာဒသန္နံ ပစ္စယာနံ ဝသေန ဧကောဝ ပစ္စယသင်္ဂဟော ဝုတ္တော. တေ တသ္မိံ ပဋိက္ခိတ္တေ အညေနာကာရေန ဝိဿဇ္ဇနံ န လဘန္တိ. ပစ္ဆိမေသု ဒွီသု နိဿယအတ္ထိအဝိဂတပစ္စယေ သန္ဓာယ ‘‘သဟဇာတံ ပုရေဇာတ’’န္တိ ဝုတ္တံ. တေ သဟဇာတေ ပဋိက္ခိတ္တေ အဝသေသာနံ ဟေတုအာဒီနဉ္စ ပုရေဇာတာနဉ္စေဝ နိဿယအတ္ထိအဝိဂတာနံ ဝသေန ဝိဿဇ္ဇနံ န လဘန္တိ၊ တသ္မာ ဣမေ စတ္တာရောပိ ဝါရာ ပရိဟာယန္တိ. အဝသေသာနံ ဝသေန ‘‘ဧကာဒသာ’’တိ ဝုတ္တံ.

တတ္ထ သိယာ – ယထာ ဟေတုမှိ ပဋိက္ခိတ္တေ သေသာနံ အဓိပတိအာဒီနံ ဝသေန တေ ဝါရာ လဒ္ဓါ၊ ဧဝံ သဟဇာတေ ပဋိက္ခိတ္တေ အဝသေသာနံ ဟေတုအာဒီနံ ဝသေန ကသ္မာ န လဗ္ဘန္တီတိ? နိပ္ပဒေသတ္တာ. ဟေတုအာဒယော ဟိ သဟဇာတာနံ ဧကဒေသမတ္တတော သပ္ပဒေသာ၊ တသ္မာ တေသု ပဋိက္ခိတ္တေသု အညေသံ ဝသေန တေ ဝါရာ လဗ္ဘန္တိ. သဟဇာတော ပန နိပ္ပဒေသော သဗ္ဗေပိ ဟေတုအာဒယော ဂဏှာတိ၊ တသ္မာ တသ္မိံ ပဋိက္ခိတ္တေ သဗ္ဗေပိ တေ ပဋိက္ခိတ္တာ ဟောန္တိ. န ဟိ အသဟဇာတာ ဟေတုပစ္စယာဒယော နာမ အတ္ထိ. ဣတိ သဟဇာတဿ နိပ္ပဒေသတ္တာ တသ္မိံ ပဋိက္ခိတ္တေ သဗ္ဗေပိ တေ ဥဘောပိ ဝါရာ န လဗ္ဘန္တိ. ‘‘သဟဇာတံ ပုရေဇာတ’’န္တိ ဝိဿဇ္ဇိတဝါရေသု ပန ကိဉ္စာပိ သဟဇာတပစ္စယောယေဝ နတ္ထိ၊ ယသ္မာ ပနေတ္ထ သဟဇာတာဝ အရူပက္ခန္ဓာ နိဿယအတ္ထိအဝိဂတဝသေန ပစ္စယာ၊ သဟဇာတေ စ ပဋိက္ခိတ္တေ ဧကန္တေန သဟဇာတနိဿယအတ္ထိအဝိဂတာ ပဋိက္ခိတ္တာ ဟောန္တိ၊ တသ္မာ တဿ ပဋိက္ခိတ္တတ္တာ တေပိ ဝါရာ န လဗ္ဘန္တီတိ ဧဝံ သဗ္ဗထာပေတ္ထ ဣမေ စတ္တာရော ဝါရာ ပရိဟာယန္တိ. အဝသေသာနညေဝ ဝသေန ဧကာဒသာတိ ဝုတ္တံ.

နအညမညနနိဿယနသမ္ပယုတ္တေပိ တေယေဝ ဝါရာ ပရိဟာယန္တိ. ကသ္မာ? သဟဇာတဂတိကတ္တာ. ယထေဝ ဟိ အရူပဓမ္မဘူတော သဟဇာတပစ္စယော နိပ္ပဒေသေန စတ္တာရော အရူပက္ခန္ဓေ ဂဏှာတိ၊ တထာ အညမညနိဿယသမ္ပယုတ္တာပီတိ သဟဇာတဂတိကတ္တာ ဧတေသုပိ ပဋိက္ခိတ္တေသု တေ ဝါရာ န လဗ္ဘန္တီတိ ဝေဒိတဗ္ဗာ. တေန ဝုတ္တံ နအညမညေ ဧကာဒသ၊ နနိဿယေ ဧကာဒသ၊ နသမ္ပယုတ္တေ ဧကာဒသာတိ.

တတ္ထ သိယာ – ကိဉ္စာပိ ဣမေ အဝိသေသေန ကုသလာဒိဘေဒါနံ စတုန္နံ ခန္ဓာနံ သင်္ဂါဟကတ္တာ သဟဇာတဂတိကာ၊ ကုသလော ပန ကုသလာဗျာကတဿ ဌပေတွာ သဟဇာတပစ္စယံ အညထာ ပစ္စယောဝ န ဟောတိ၊ တသ္မာ တသ္မိံ ပဋိက္ခိတ္တေ သော ဝါရော ပရိဟာယတု. ကုသလော ပန ကုသလာဗျာကတာနံ နေဝ အညမညပစ္စယော ဟောတိ၊ တသ္မိံ ပဋိက္ခိတ္တေ သော ဝါရော ကသ္မာ ပရိဟာယတီတိ? အညမညပစ္စယဓမ္မဝသေန ပဝတ္တိသဗ္ဘာဝတော. ယထေဝ ဟိ ကုသလာဗျာကတာ ကုသလဿ သဟဇာတပစ္စယောဝ န ဟောန္တိ. သဟဇာတဓမ္မဝသေန ပန နိဿယပစ္စယာဒီဟိ ပဝတ္တိသဗ္ဘာဝတော တသ္မိံ ပဋိက္ခိတ္တေ သော ဝါရော ပရိဟာယတိ၊ ဧဝမိဓာပိ အညမညပစ္စယဓမ္မဝသေန သဟဇာတာဒီဟိ ပဝတ္တိသဗ္ဘာဝတော တသ္မိံ ပဋိက္ခိတ္တေ သော ဝါရော ပရိဟာယတိ. နအညမညပစ္စယေန ပစ္စယောတိ ပဒဿ ဟိ အယမတ္ထော – ယေ ဓမ္မာ အညမညပစ္စယသင်္ဂဟံ ဂတာ၊ န တေဟိ ပစ္စယော. ကုသလော စ ကုသလာဗျာကတာနံ သဟဇာတာဒိဝသေန ပစ္စယော ဟောန္တော အညမညပစ္စယဓမ္မေဟေဝ ပစ္စယော ဟောတိ၊ တသ္မာ တသ္မိံ ပဋိက္ခိတ္တေ သော ဝါရော ပရိဟာယတိ. ယထာ စ သော ဝါရော၊ တထာ သေသာပိ တယောတိ စတ္တာရောပိ တေ ဝါရာ ပရိဟာယန္တိ.

နနိဿယေ ဧကာဒသာတိ ဧတ္ထာပိ ယသ္မာ တေသံ ဝါရာနံ ဧကေန္တေန သဟဇာတပစ္စယဓမ္မာဝ နိဿယဘူတာ၊ တသ္မာ နိဿယေ ပဋိက္ခိတ္တေ ပရိဟာယန္တိ. နပုရေဇာတေ တေရသာတိ သဟဇာတံ ပုရေဇာတန္တိ ဝုတ္တဝိဿဇ္ဇနေ ဒွိမူလကေ ဒွေ အပနေတွာ တေရသ. ယထာ ဟိ တေ သဟဇာတေ ပဋိက္ခိတ္တေ ပုရေဇာတာနညေဝ နိဿယအတ္ထိအဝိဂတာနံ ဝသေန ဝိဿဇ္ဇနံ န လဘန္တိ၊ တထာ ပုရေဇာတေပိ ပဋိက္ခိတ္တေ သဟဇာတာနညေဝ နိဿယအတ္ထိအဝိဂတာနံ ဝသေန ဝိဿဇ္ဇနံ န လဘန္တိ၊ တသ္မာ တေ အပနေတွာ တေရသာတိ ဝေဒိတဗ္ဗာ.

နပစ္ဆာဇာတေ ပန္နရသာတိ ဧတ္ထ ‘‘ပစ္ဆာဇာတပစ္စယေန ပစ္စယော’’တိ ဝါ ‘‘သဟဇာတံ ပစ္ဆာဇာတံ အာဟာရံ ဣန္ဒြိယ’’န္တိ ဝါ အာဂတဋ္ဌာနေသု ဌပေတွာ ပစ္ဆာဇာတံ အဝသေသဝသေနပိ တေ ပဉှာ လဗ္ဘန္တိ၊ တသ္မာ ပန္နရသေဝ ဝုတ္တာ. နကမ္မေတိအာဒီသု ယသ္မာ ကမ္မဝိပါကာဟာရိန္ဒြိယဈာနမဂ္ဂါပိ ကုသလာဒိဘေဒါနံ စတုန္နံ ခန္ဓာနံ ဧကဒေသောဝ တသ္မာ ဌပေတွာ တေ ဓမ္မေ အဝသေသဓမ္မဝသေန သဟဇာတဓမ္မာ ပစ္စယာ ဟောန္တီတိ ဧကမ္ပိ ပဉှာဝိဿဇ္ဇနံ န ပရိဟီနံ. နသမ္ပယုတ္တေ ဧကာဒသာတိ ယသ္မာ တေသု စတူသု ဝါရေသု သမ္ပယုတ္တဓမ္မာ သဟဇာတာဒိပစ္စယေန ပစ္စယာ ဟောန္တိ၊ တသ္မာ သမ္ပယုတ္တပစ္စယပဋိက္ခေပေန တေယေဝ ဝါရာ ပရိဟာယန္တီတိ ဝေဒိတဗ္ဗာ. နဝိပ္ပယုတ္တေ နဝါတိ ဒုမူလကဧကာဝသာနာ စတ္တာရော ဧကမူလကဒုကာဝသာနာ ဒွေ စာတိ ဣမေ ဆ ဝါရာ ဧကန္တေန ဝိပ္ပယုတ္တပစ္စယဓမ္မေဟိ ယုတ္တာ. တေဟိ သဟဇာတာဒိဝသေန ပစ္စယာ ဟောန္တိ၊ တသ္မာ ဝိပ္ပယုတ္တေ ပဋိက္ခိတ္တေ သဗ္ဗေပိ တေ ပရိဟာယန္တီတိ နဝေဝ လဗ္ဘန္တိ. တေန ဝုတ္တံ ‘‘နဝိပ္ပယုတ္တေ နဝါ’’တိ. နောအတ္ထိနောအဝိဂတေသုပိ တေယေဝ ဝေဒိတဗ္ဗာ. ဧကန္တေန ဟိ တေ ဝါရာ အတ္ထိအဝိဂတပစ္စယဓမ္မယုတ္တာ၊ တသ္မာ တေ တေသံ ပဋိက္ခေပေ ပရိဟာယန္တိ. ယေပိ လဗ္ဘန္တိ၊ တေသု အာရမ္မဏဝသေန အနန္တရာဒိဝသေန ဝါ ဝိဿဇ္ဇနာနိ ကာတဗ္ဗာနိ. သဟဇာတပုရေဇာတပစ္ဆာဇာတအာဟာရိန္ဒြိယဘေဒတော ပဉ္စန္နံ အတ္ထိအဝိဂတာနံ ဝိပ္ပယုတ္တဓမ္မာနံ ဝါ ဝသေန န ကာတဗ္ဗာနီတိ.

၅၃၃. ဧဝံ ပစ္စနီယေ လဒ္ဓဝါရေ ဂဏနတော ဒဿေတွာ ဣဒါနိ ဒုမူလကာဒိဝသေန ပစ္စယဂဏနံ ဒဿေတုံ နဟေတုပစ္စယာ နာရမ္မဏေ ပန္နရသာတိအာဒိ အာရဒ္ဓံ. တတ္ထ နဟေတုမူလကဒုကေသု အတိရေကဂဏနော ဦနတရဂဏနေန သဒ္ဓိံ ယောဇိတော ဦနတရဂဏနောဝ ဟောတိ.

တိမူလကေ နဥပနိဿယေ တေရသာတိ ကုသလော အကုသလဿ၊ အကုသလော ကုသလဿာတိ ဒွေ ဝါရာ ပရိဟာယန္တိ. ကသ္မာ? နာရမ္မဏေန သဒ္ဓိံ နဥပနိဿယဿ ဃဋိတတ္တာ. အာရမ္မဏဝသေန ဟိ ဥပနိဿယဝသေန စ ဣမေသံ ပဝတ္တိ. တဉ္စ ဥဘယံ ပဋိက္ခိတ္တံ. အာရမ္မဏာဓိပတိ စ အာရမ္မဏူပနိဿယဂ္ဂဟဏေန ဂဟိတော ဟောတိယေဝ.

ဆမူလကေပိ နဥပနိဿယေ တေရသာတိ တေယေဝ တေရသ. သတ္တမူလကေ ပန နဥပနိဿယေ သတ္တာတိ နသဟဇာတေန သဒ္ဓိံ ဃဋိတတ္တာ တတ္ထ ပရိဟီနေဟိ စတူဟိ သဒ္ဓိံ ‘‘ကုသလော ကုသလဿ၊ ကုသလော အကုသလဿ၊ အကုသလော အကုသလဿ၊ အကုသလော ကုသလဿာ’’တိ ဣမေ အနန္တရူပနိဿယပကတူပနိဿယဝသေန ပဝတ္တမာနာ စတ္တာရောတိ အဋ္ဌ ပရိဟာယန္တိ၊ တသ္မာ အဝသေသာနံ ဝသေန သတ္တာတိ ဝုတ္တံ. နပုရေဇာတေ ဧကာဒသာတိ နသဟဇာတေန သဒ္ဓိံ ဃဋိတတ္တာ ဧကာဒသ. နပစ္ဆာဇာတေ နဝါတိ တေသု ဧကာဒသသု သဟဇာတံ ပစ္ဆာဇာတံ အာဟာရံ ဣန္ဒြိယန္တိ လဒ္ဓဝိဿဇ္ဇနေသု ဒုမူလကေ အဗျာကတန္တေ ဒွေ ဝါရေ အပနေတွာ. တေ ဟိ သဟဇာတေ ပဋိက္ခိတ္တေပိ ပစ္ဆာဇာတဝသေန အပရိဟီနာ. သဟဇာတေန ပန သဒ္ဓိံ ပစ္ဆာဇာတေ ပဋိက္ခိတ္တေ ပရိဟာယန္တီတိ သေသာနံ ဝသေန နဝါတိ ဝုတ္တံ. အဋ္ဌမူလကေ နနိဿယေ ဧကာဒသာတိ သဗ္ဗံ ဟေဋ္ဌာ ဝုတ္တသဒိသမေဝ. နဝမူလကေ နဥပနိဿယေ ပဉ္စာတိ ကုသလာဒယော အဗျာကတန္တာ တယော ဒုမူလကာ အဗျာကတန္တာ ဒွေ စာတိ ပဉ္စ. တေသု နာနာက္ခဏိကကမ္မကဗဠီကာရာဟာရရူပဇီဝိတိန္ဒြိယပစ္ဆာဇာတဓမ္မဝသေန ဝိဿဇ္ဇနံ ဝေဒိတဗ္ဗံ.

ဒသမူလကေ နပုရေဇာတေ ပဉ္စာတိအာဒီသုပိ တေယေဝ. နပစ္ဆာဇာတေ တီဏီတိ ပစ္ဆာဇာတဝသေန လဗ္ဘမာနေ ဒုမူလကေ အဗျာကတန္တေ ဒွေ အပနေတွာ အဝသေသာ. နဝိပ္ပယုတ္တေပိ တေယေဝ တယော. နောအတ္ထိယာ ဒွေတိ နာနာက္ခဏိကကမ္မဝသေန ကုသလဉ္စ အကုသလဉ္စ ကဋတ္တာရူပဿ. ဝိပါကံ ပနေတ္ထ နဥပနိဿယေန သဒ္ဓိံ ဃဋိတတ္တာ န လဗ္ဘတိ. ဧကာဒသမူလကေ ဟေဋ္ဌာ ဝုတ္တသဒိသာဝ ဂဏနာ. ဒွါဒသမူလကေ နကမ္မေ ဧကန္တိ အဗျာကတေန အဗျာကတံ. တတ္ထ စ အာဟာရိန္ဒြိယဝသေန ဝိဿဇ္ဇနံ ဝေဒိတဗ္ဗံ. တေရသမူလကာဒီသုပိ သဗ္ဗတ္ထ ဧကန္တိ အာဂတဋ္ဌာနေ ဣဒမေဝ ဂဟေတဗ္ဗံ. နာဟာရေ ပန ဣန္ဒြိယဝသေန ဝိဿဇ္ဇနံ ဝေဒိတဗ္ဗံ. နဣန္ဒြိယေ အာဟာရဝသေန. စုဒ္ဒသမူလကာဒီသု နကမ္မေန သဒ္ဓိံ ဃဋိတတ္တာ နောအတ္ထိနောအဝိဂတာ န လဗ္ဘန္တီတိ န ဝုတ္တာ. နာဟာရပစ္စယာ နဈာနပစ္စယာတိ နဣန္ဒြိယံ အပနေတွာ ဝုတ္တံ. တသ္မာ တတ္ထ ဣန္ဒြိယဝသေန ဧကံ ဝေဒိတဗ္ဗံ. နဝိပါကပစ္စယာ နဣန္ဒြိယပစ္စယာတိ နာဟာရံ အပနေတွာ ဝုတ္တံ၊ တသ္မာ တတ္ထ အာဟာရဝသေန ဧကံ ဝေဒိတဗ္ဗံ. ဣမေသု ပန ဒွီသု ပစ္စနီယတော ဌိတေသု ဂဏနာ နာမ နတ္ထိ၊ တသ္မာ ဧကတော န ဒဿိတာတိ.

နဟေတုမူလကံ.

၅၃၄. နာရမ္မဏမူလကာဒီသုပိ ပန္နရသတေရသဧကာဒသနဝါတိ သဗ္ဗဒုကေသု စတ္တာရောဝ မူလဂဏနပရိစ္ဆေဒါ. တိကာဒီသု ပန ဗဟုပစ္စယသမာယောဂေ ဣတရာနိပိ သတ္တ ပဉ္စ တီဏိ ဒွေ ဧကန္တိ ပရိစ္ဆိန္နဂဏနာနိ ဝိဿဇ္ဇနာနိ လဗ္ဘန္တိယေဝ. တေသု ယေသံ ပစ္စယာနံ သမာယောဂေ ယံ ယံ လဗ္ဘတိ၊ တံ တံ ဟေဋ္ဌာ ဝုတ္တနယေန သာဓုကံ သလ္လက္ခေတွာ ဥဒ္ဓရိတဗ္ဗံ. သဗ္ဗေသု စေတေသု နာရမ္မဏမူလကာဒီသု နာရမ္မဏာဒီနိ ပဒါနိ အတိက္ကန္တေန ဟေတုပဒေန သဒ္ဓိံ ပဌမံ ဗန္ဓိတွာဝ စက္ကာနိ ကတာနိ. ယသ္မာ ပန တာနိ နဟေတုမူလကေ ဝုတ္တသဒိသာနေဝ ဟောန္တိ၊ တသ္မာ ဝိတ္ထာရေန အဒဿေတွာ သင်္ခေပံ ကတွာ ဒဿိတာနိ. တတ္ထ ယထာ နဟေတုမူလကေ နာရမ္မဏနဥပနိဿယာ ဝိသုံ ဝိသုံ ပန္နရသ ဝါရေ လဘန္တာပိ သမာယောဂေ တေရသ လဘိံသု၊ ဧဝံ သဗ္ဗတ္ထ တေရသေဝ လဘန္တိ. ယထာ စ နာရမ္မဏနသဟဇာတေဟိ သဒ္ဓိံ နဥပနိဿယေ သတ္တ ဝါရာ ဟောန္တိ၊ ဧဝံ နဥပနိဿယနာရမ္မဏေဟိ သဒ္ဓိံ နသဟဇာတေပိ သတ္တ.

၅၃၈. နနိဿယပစ္စယာ နဥပနိဿယပစ္စယာ နပစ္ဆာဇာတေ တီဏီတိ ကုသလာဒီနိ အဗျာကတန္တာနိ. တေသု ကဋတ္တာရူပဉ္စ အာဟာရသမုဋ္ဌာနဉ္စ ပစ္စယုပ္ပန္နံ.

၅၄၃-၅၄၄. နာဟာရနဣန္ဒြိယမူလကေသု စတုက္ကေသု နကမ္မေန သဒ္ဓိံ အဃဋိတတ္တာ နဟေတုမူလကေ ဝိယ ဧကေန္တေန လဗ္ဘန္တိ. နဣန္ဒြိယမူလကေ နဥပနိဿယေ စ နပုရေဇာတေ စ ဌပေတွာ နာဟာရေ တီဏီတိ ကာတဗ္ဗန္တိ နဣန္ဒြိယပစ္စယတော ပဋ္ဌာယ ဣမေ ဒွေ ပစ္စယေ ဃဋေတွာ နဣန္ဒြိယပစ္စယာ။ပေ။ နဥပနိဿယပစ္စယာ နာဟာရေ တီဏီ. နဣန္ဒြိယပစ္စယာ။ပေ။ နပုရေဇာတပစ္စယာ နာဟာရေ တီဏီတိ ဧဝံ ဣမေဟိ ပစ္စယေဟိ သဒ္ဓိံ နာဟာရပစ္စယေ စ ဂဏနာ ကာတဗ္ဗာတိ အတ္ထော. တတ္ထ တီဏီတိ ကုသလာဒီနေဝ အဗျာကတဿ. တတ္ထ ကုသလာကုသလာ ကဋတ္တာရူပါနံ ပုရေဇာတဿ စ ကာယဿ ပစ္ဆာဇာတပစ္စယေန၊ အဗျာကတာ ပန စိတ္တစေတသိကာ ပစ္ဆာဇာတပစ္စယေနေဝါတိ ဣမေသံ ဝသေန တီဏိ ဝိဿဇ္ဇနာနိ ကာတဗ္ဗာနိ. ပရတော ပန နပစ္ဆာဇာတေန သဒ္ဓိံ ဃဋိတတ္တာ နာဟာရေ ဒွေတိ ဝုတ္တံ. တတ္ထ ကဋတ္တာရူပဝသေန ကုသလံ အဗျာကတဿ၊ တထာ အကုသလန္တိ ဧတ္တကမေဝ လဗ္ဘတိ. အာဟာရဿ ပန ပဋိက္ခိတ္တတ္တာ ကဗဠီကာရာဟာရော အတ္ထိအဝိဂတဝသေနာပိ ပစ္စယဘာဝံ န လဘတိ.

၅၄၅. နဝိပ္ပယုတ္တမူလကဿ စတုမူလကေ နဥပနိဿယေ ပဉ္စာတိ ကုသလော သဟဇာတကုသလဿ၊ ကုသလော ကဋတ္တာရူပသင်္ခါတဿ အဗျာကတဿ၊ အကုသလော သဟဇာတအကုသလဿ၊ တထာ ကဋတ္တာရူပသင်္ခါတဿ အဗျာကတဿ၊ အဗျာကတော သဟဇာတအဗျာကတဿာတိ ဧဝံ ပဉ္စ. နဝိပ္ပယုတ္တပစ္စယာ။ပေ။ နဥပနိဿယေ တီဏီတိ ဟေဋ္ဌာ ဝုတ္တနယေနေဝ ကုသလာဒယော တယော အဗျာကတဿ.

၅၄၆. နောအတ္ထိပစ္စယာ နဟေတုယာ နဝါတိ နဟေတုပစ္စယာ နောအတ္ထိယာ ဝုတ္တာ နဝေဝ. သဗ္ဗေပိ ဟိ တေ ဧကမူလကေကာဝသာနာ အနန္တရပကတူပနိဿယဝသေန လဗ္ဘန္တိ. နာရမ္မဏေ နဝါတိပိ တေယေဝ နာရမ္မဏေ ဌတွာ နဥပနိဿယေ ဒွေ ကာတဗ္ဗာ. ယာဝ နိဿယမ္ပီတိ နောအတ္ထိမူလကေ နယေ ‘‘နောအတ္ထိပစ္စယာ နဟေတုပစ္စယာ နာရမ္မဏပစ္စယာ’’တိ ဧဝံ စက္ကဗန္ဓဂမနေန နာရမ္မဏပစ္စယေ ဌတွာ ဣမေဟိ ဝါ တီဟိ၊ ဣတော ပရေသု နာဓိပတိအာဒီသု အညတရညတရေန ဝါ သဒ္ဓိံ ယာဝ နိဿယပစ္စယံ ပါပုဏာတိ၊ တာဝ ဂန္တွာ နဥပနိဿယေ ဒွေ ဝိဿဇ္ဇနာနိ ကာတဗ္ဗာနီတိ အတ္ထော.

ဧဝံ လက္ခဏံ ဌပေတွာ ပုန နာရမ္မဏတော ပဋ္ဌာယ ယာဝ နိဿယာ သတ္တ ပစ္စယေ ဂဟေတွာ နဥပနိဿယေ ဒွေတိ အာဟ. တတ္ထ နောအတ္ထိပစ္စယာ နဟေတုပစ္စယာ နာရမ္မဏပစ္စယာ နဥပနိဿယေ ဒွေ၊ နောအတ္ထိပစ္စယာ နဟေတုနာရမ္မဏနာဓိပတိပစ္စယာ နဥပနိဿယေ ဒွေတိ ဧဝံ နာရမ္မဏတော ပုရိမပစ္ဆိမေဟိ နိဿယပရိယောသာနေဟိ သဗ္ဗပဒေဟိ သဒ္ဓိံ ယောဇနာ ကာတဗ္ဗာ. ဒွေတိ ပနေတ္ထ ကုသလော အဗျာကတဿ၊ အကုသလော အဗျာကတဿာတိ နာနာက္ခဏိကကမ္မဝသေန ကဋတ္တာရူပဿ ပစ္စယဝသေန ဝေဒိတဗ္ဗာနိ. နဥပနိဿယပဒေန သဒ္ဓိံ နပုရေဇာတာဒီသု သဗ္ဗတ္ထ ဒွေ. ကမ္မပစ္စယော ပနေတ္ထ န ဂဟိတော. တသ္မိဉှိ ဂဟိတေ တေပိ ဒွေ ဝါရာ ဆိဇ္ဇန္တိ၊ ဝိဿဇ္ဇနမေဝ န လဗ္ဘတိ. ဧဝံ ယေန ယေန သဒ္ဓိံ ယဿ ယဿ သံသန္ဒနေ. ယံ လဗ္ဘတိ၊ ယဉ္စ ပရိဟာယတိ၊ တံ သဗ္ဗံ သာဓုကံ သလ္လက္ခေတွာ သဗ္ဗပစ္စနီယေသု ဂဏနာ ဥဒ္ဓရိတဗ္ဗာတိ.

ပစ္စနီယဂဏနဝဏ္ဏနာ.