၅-၆. သမဇီဝီသုတ္တဒွယဝဏ္ဏနာ

၅၅-၅၆. ပဉ္စမေ တေနုပသင်္ကမီတိ ကိမတ္ထံ ဥပသင်္ကမိ? အနုဂ္ဂဏှနတ္ထံ. တထာဂတော ဟိ တံ ရဋ္ဌံ ပါပုဏန္တော ဣမေသံယေဝ ဒွိန္နံ သင်္ဂဏှနတ္ထာယ ပါပုဏာတိ. နကုလပိတာ ကိရ ပဉ္စ ဇာတိသတာနိ တထာဂတဿ ပိတာ အဟောသိ၊ ပဉ္စ ဇာတိသတာနိ မဟာပိတာ၊ ပဉ္စ ဇာတိသတာနိ စူဠပိတာ. နကုလမာတာပိ ပဉ္စ ဇာတိသတာနိ တထာဂတဿ မာတာ အဟောသိ၊ ပဉ္စ ဇာတိသတာနိ မဟာမာတာ၊ ပဉ္စ ဇာတိသတာနိ စူဠမာတာ. တေ သတ္ထု ဒိဋ္ဌကာလတော ပဋ္ဌာယ ပုတ္တသိနေဟံ ပဋိလဘိတွာ ‘‘ဟန္တာတ၊ ဟန္တာတာ’’တိ ဝစ္ဆကံ ဒိသွာ ဝစ္ဆဂိဒ္ဓိနီ ဂါဝီ ဝိယ ဝိရဝမာနာ ဥပသင်္ကမိတွာ ပဌမဒဿနေနေဝ သောတာပန္နာ ဇာတာ. နိဝေသနေ ပဉ္စသတာနံ ဘိက္ခူနံ အာသနာနိ သဒါ ပညတ္တာနေဝ ဟောန္တိ. ဣတိ ဘဂဝါ တေသံ အနုဂ္ဂဏှနတ္ထာယ ဥပသင်္ကမိ. အတိစရိတာတိ အတိက္ကမိတာ. အဘိသမ္ပရာယဉ္စာတိ ပရလောကေ စ. သမသဒ္ဓါတိ သဒ္ဓါယ သမာ ဧကသဒိသာ. သီလာဒီသုပိ ဧသေဝ နယော. ဆဋ္ဌံ ကေဝလံ ဘိက္ခူနံ ဒေသိတံ. သေသမေတ္ထ တာဒိသမေဝ.