၇. သုပ္ပဝါသာသုတ္တဝဏ္ဏနာ

၅၇. သတ္တမေ ပဇ္ဇနိကန္တိ တဿ နိဂမဿ နာမံ. ကောလိယာနန္တိ ကောလရာဇကုလာနံ. အာယုံ ခေါ ပန ဒတွာတိ အာယုဒါနံ ဒတွာ. အာယုဿ ဘာဂိနီ ဟောတီတိ အာယုဘာဂပဋိလာဘိနီ ဟောတိ၊ အာယုံ ဝါ ဘဇနိကာ ဟောတိ၊ အာယုပ္ပဋိလာဘိနီတိ အတ္ထော. သေသပဒေသုပိ ဧသေဝ နယော.

ရသသာ ဥပေတန္တိ ရသေန ဥပေတံ ရသသမ္ပန္နံ. ဥဇ္ဇုဂတေသူတိ ကာယဝင်္ကာဒိရဟိတတ္တာ ဥဇုကမေဝ ဂတေသု ခီဏာသဝေသု. စရဏူပပန္နေသူတိ ပဉ္စဒသဟိ စရဏဓမ္မေဟိ သမန္နာဂတေသု. မဟဂ္ဂတေသူတိ မဟတ္တံ ဂတေသု. ခီဏာသဝါနညေဝေတံ နာမံ. ပုညေန ပုညံ သံသန္ဒမာနာတိ ပုညေန သဒ္ဓိံ ပုညံ ဃဋယမာနာ. မဟပ္ဖလာ လောကဝိဒူန ဝဏ္ဏိတာတိ ဧဝရူပါ ဒါနသင်္ခါတာ ဒက္ခိဏာ တိဝိဓလောကံ ဝိဒိတံ ကတွာ ဌိတတ္တာ လောကဝိဒူနံ ဗုဒ္ဓါနံ ဝဏ္ဏိတာ၊ ဗုဒ္ဓေဟိ ပသတ္ထာတိ အတ္ထော. ယညမနုဿရန္တာတိ ယညံ ဒါနံ အနုဿရန္တာ. ဝေဒဇာတာတိ တုဋ္ဌိဇာတာ.