၂. ဒုတိယပဏ္ဏာသကံ
(၆) ၁. ပုညာဘိသန္ဒဝဂ္ဂေါ
၁. ပဌမပုညာဘိသန္ဒသုတ္တဝဏ္ဏနာ
၅၁. ဒုတိယဿ ပဌမေ ပုညာဘိသန္ဒာတိ ပုညဿ အဘိသန္ဒာ၊ ပုညပ္ပတ္တိယောတိ အတ္ထော. ကုသလာဘိသန္ဒာတိ တဿေဝ ဝေဝစနံ. တေ ပနေတေ သုခံ အာဟရန္တီတိ သုခဿာဟာရာ. သုဋ္ဌု အဂ္ဂါနံ ရူပါဒီနံ ဒါယကာတိ သောဝဂ္ဂိကာ. သုခေါ နေသံ ဝိပါကောတိ သုခဝိပါကာ. သဂ္ဂေ ဥပပတ္တိ သဂ္ဂေါ၊ သဂ္ဂါယ သံဝတ္တန္တီတိ သဂ္ဂသံဝတ္တနိကာ. စီဝရံ ပရိဘုဉ္ဇမာနောတိ စီဝရတ္ထာယ ဝတ္ထံ လဘိတွာ သူစိသုတ္တာဒီနံ အဘာဝေန တံ နိက္ခိပန္တောပိ ကရောန္တောပိ ပါရုပန္တောပိ ဇိဏ္ဏကာလေ ပစ္စတ္ထရဏံ ကရောန္တောပိ ပစ္စတ္ထရိတုမ္ပိ အသက္ကုဏေယျံ ဘူမတ္ထရဏံ ကရောန္တောပိ ဘူမတ္ထရဏဿ အနနုစ္ဆဝိကံ ဖာလေတွာ ပါဒပုဉ္ဆနံ ကရောန္တောပိ ‘‘ပရိဘုဉ္ဇမာနော’’တွေဝ ဝုစ္စတိ. ယဒါ ပန ‘‘ပါဒပုဉ္ဆနမ္ပိ န သက္ကာ ဣဒ’’န္တိ သမ္မဇ္ဇိတွာ ဆဍ္ဍိတံ ဟောတိ၊ တဒါ ပရိဘုဉ္ဇမာနော နာမ န ဟောတိ. အပ္ပမာဏံ စေတောသမာဓိန္တိ အရဟတ္တဖလသမာဓိံ. အပ္ပမာဏော တဿ ပုညာဘိသန္ဒောတိ ဣမိနာ ဒါယကဿ ပုညစေတနာယ အပ္ပမာဏတံ ကထေတိ. တဿ ဟိ ‘‘ခီဏာသဝေါ မေ စီဝရံ ပရိဘုဉ္ဇတီ’’တိ ပုနပ္ပုနံ အနုဿရဏဝသေန ပဝတ္တာ ပုညစေတနာ အပ္ပမာဏာ ဟောတိ. တံ သန္ဓာယေတံ ဝုတ္တံ. ပိဏ္ဍပါတာဒီသု ပန ယော ပိဏ္ဍပါတံ ပရိဘုဉ္ဇိတွာ သတ္တာဟမ္ပိ တေနေဝ ယာပေတိ၊ အညံ န ပရိဘုဉ္ဇတိ၊ သော သတ္တာဟမ္ပိ တံယေဝ ပိဏ္ဍပါတံ ပရိဘုဉ္ဇမာနော နာမ ဟောတိ. ဧကသ္မိံ ပန သေနာသနေ ရတ္တိဋ္ဌာနဒိဝါဋ္ဌာနာဒီသု စင်္ကမန္တောပိ ယာဝ တံ သေနာသနံ ပဟာယ အညံ န ဂဏှာတိ၊ တာဝ ပရိဘုဉ္ဇမာနော နာမ ဟောတိ. ဧကေန ပန ဘေသဇ္ဇေန ဗျာဓိမှိ ဝူပသန္တေ ယာဝ အညံ ဘေသဇ္ဇံ န ပရိဘုဉ္ဇတိ၊ တာဝဒေဝ ပရိဘုဉ္ဇမာနော နာမ ဟောတိ.
ဗဟုဘေရဝန္တိ ဗဟူဟိ ဘေရဝါရမ္မဏေဟိ သမန္နာဂတံ. ရတနဝရာနန္တိ သတ္တန္နမ္ပိ ဝရရတနာနံ. အာလယန္တိ နိဝါသဋ္ဌာနံ. ပုထူ သဝန္တီတိ ဗဟုကာ ဟုတွာ သန္ဒမာနာ. သေသမေတ္ထ ဥတ္တာနမေဝ.
၂. ဒုတိယပုညာဘိသန္ဒသုတ္တဝဏ္ဏနာ
၅၂. ဒုတိယေ အရိယကန္တေဟီတိ မဂ္ဂဖလသမ္ပယုတ္တေဟိ. တာနိ ဟိ အရိယာနံ ကန္တာနိ ဟောန္တိ ပိယာနိ မနာပါနိ. သေသံ သုတ္တန္တေ တာဝ ယံ ဝတ္တဗ္ဗံ သိယာ၊ တံ ဝိသုဒ္ဓိမဂ္ဂေ (ဝိသုဒ္ဓိ. ၁.၁၂၄ အာဒယော) ဝုတ္တမေဝ.
ဂါထာသု ပန သဒ္ဓါတိ သောတာပန္နဿ သဒ္ဓါ အဓိပ္ပေတာ. သီလမ္ပိ သောတာပန္နဿ သီလမေဝ. ဥဇုဘူတဉ္စ ဒဿနန္တိ ကာယဝင်္ကာဒီနံ အဘာဝေန ခီဏာသဝဿ ဒဿနံ ဥဇုဘူတဒဿနံ နာမ. အာဟူတိ ကထယန္တိ. ပသာဒန္တိ ဗုဒ္ဓဓမ္မသံဃေသု ပသာဒံ. ဓမ္မဒဿနန္တိ စတုသစ္စဓမ္မဒဿနံ.
၃. ပဌမသံဝါသသုတ္တဝဏ္ဏနာ
၅၃. တတိယေ သမ္ဗဟုလာပိ ခေါ ဂဟပတီ စ ဂဟပတာနိယော စာတိ ဗဟုကာ ဂဟပတယော စ ဂဟပတာနိယော စ အာဝါဟဝိဝါဟကရဏတ္ထာယ ဂစ္ဆန္တာ တမေဝ မဂ္ဂံ ပဋိပန္နာ ဟောန္တိ. သံဝါသာတိ သဟဝါသာ ဧကတောဝါသာ. ဆဝေါ ဆဝါယာတိ ဂုဏမရဏေန မတတ္တာ ဆဝေါ ဂုဏမရဏေနေဝ မတာယ ဆဝါယ သဒ္ဓိံ. ဒေဝိယာ သဒ္ဓိန္တိ ဂုဏေဟိ ဒေဝိဘူတာယ သဒ္ဓိံ. ဒုဿီလောတိ နိဿီလော. ပါပဓမ္မောတိ လာမကဓမ္မော. အက္ကောသကပရိဘာသကောတိ ဒသဟိ အက္ကောသဝတ္ထူဟိ အက္ကောသကော၊ ဘယံ ဒဿေတွာ သန္တဇ္ဇနေန ပရိဘာသကော. ဧဝံ သဗ္ဗတ္ထ အတ္ထော ဝေဒိတဗ္ဗော.
ကဒရိယာတိ ထဒ္ဓမစ္ဆရိနော. ဇာနိပတယောတိ ဇယမ္ပတိကာ. ဝဒညူတိ ယာစကာနံ ဝစနဿ အတ္ထံ ဇာနန္တိ. သညတာတိ သီလသံယမေန သမန္နာဂတာ. ဓမ္မဇီဝိနောတိ ဓမ္မေ ဌတွာ ဇီဝိကံ ကပ္ပေန္တီတိ ဓမ္မဇီဝိနော. အတ္ထာသံ ပစုရာ ဟောန္တီတိ ဝဍ္ဎိသင်္ခါတာ အတ္ထာ ဧတေသံ ဗဟူ ဟောန္တိ. ဖာသုကံ ဥပဇာယတီတိ အညမညံ ဖာသုဝိဟာရော ဇာယတိ. ကာမကာမိနောတိ ကာမေ ကာမယမာနာ.
၄. ဒုတိယသံဝါသသုတ္တဝဏ္ဏနာ
၅၄. စတုတ္ထေ ကမ္မပထဝသေန ဒေသနာ ပဝတ္တိတာ. သေသံ တာဒိသမေဝ. ဣမေသု ပန ဒွီသုပိ သုတ္တေသု အဂါရိကပဋိပဒါ ကထိတာ. သောတာပန္နသကဒါဂါမီနမ္ပိ ဝဋ္ဋတိ.
၅-၆. သမဇီဝီသုတ္တဒွယဝဏ္ဏနာ
၅၅-၅၆. ပဉ္စမေ တေနုပသင်္ကမီတိ ကိမတ္ထံ ဥပသင်္ကမိ? အနုဂ္ဂဏှနတ္ထံ. တထာဂတော ဟိ တံ ရဋ္ဌံ ပါပုဏန္တော ဣမေသံယေဝ ဒွိန္နံ သင်္ဂဏှနတ္ထာယ ပါပုဏာတိ. နကုလပိတာ ကိရ ပဉ္စ ဇာတိသတာနိ တထာဂတဿ ပိတာ အဟောသိ၊ ပဉ္စ ဇာတိသတာနိ မဟာပိတာ၊ ပဉ္စ ဇာတိသတာနိ စူဠပိတာ. နကုလမာတာပိ ပဉ္စ ဇာတိသတာနိ တထာဂတဿ မာတာ အဟောသိ၊ ပဉ္စ ဇာတိသတာနိ မဟာမာတာ၊ ပဉ္စ ဇာတိသတာနိ စူဠမာတာ. တေ သတ္ထု ဒိဋ္ဌကာလတော ပဋ္ဌာယ ပုတ္တသိနေဟံ ပဋိလဘိတွာ ‘‘ဟန္တာတ၊ ဟန္တာတာ’’တိ ဝစ္ဆကံ ဒိသွာ ဝစ္ဆဂိဒ္ဓိနီ ဂါဝီ ဝိယ ဝိရဝမာနာ ဥပသင်္ကမိတွာ ပဌမဒဿနေနေဝ သောတာပန္နာ ဇာတာ. နိဝေသနေ ပဉ္စသတာနံ ဘိက္ခူနံ အာသနာနိ သဒါ ပညတ္တာနေဝ ဟောန္တိ. ဣတိ ဘဂဝါ တေသံ အနုဂ္ဂဏှနတ္ထာယ ဥပသင်္ကမိ. အတိစရိတာတိ အတိက္ကမိတာ. အဘိသမ္ပရာယဉ္စာတိ ပရလောကေ စ. သမသဒ္ဓါတိ သဒ္ဓါယ သမာ ဧကသဒိသာ. သီလာဒီသုပိ ဧသေဝ နယော. ဆဋ္ဌံ ကေဝလံ ဘိက္ခူနံ ဒေသိတံ. သေသမေတ္ထ တာဒိသမေဝ.
၇. သုပ္ပဝါသာသုတ္တဝဏ္ဏနာ
၅၇. သတ္တမေ ပဇ္ဇနိကန္တိ တဿ နိဂမဿ နာမံ. ကောလိယာနန္တိ ကောလရာဇကုလာနံ. အာယုံ ခေါ ပန ဒတွာတိ အာယုဒါနံ ဒတွာ. အာယုဿ ဘာဂိနီ ဟောတီတိ အာယုဘာဂပဋိလာဘိနီ ဟောတိ၊ အာယုံ ဝါ ဘဇနိကာ ဟောတိ၊ အာယုပ္ပဋိလာဘိနီတိ အတ္ထော. သေသပဒေသုပိ ဧသေဝ နယော.
ရသသာ ဥပေတန္တိ ရသေန ဥပေတံ ရသသမ္ပန္နံ. ဥဇ္ဇုဂတေသူတိ ကာယဝင်္ကာဒိရဟိတတ္တာ ဥဇုကမေဝ ဂတေသု ခီဏာသဝေသု. စရဏူပပန္နေသူတိ ပဉ္စဒသဟိ စရဏဓမ္မေဟိ သမန္နာဂတေသု. မဟဂ္ဂတေသူတိ မဟတ္တံ ဂတေသု. ခီဏာသဝါနညေဝေတံ နာမံ. ပုညေန ပုညံ သံသန္ဒမာနာတိ ပုညေန သဒ္ဓိံ ပုညံ ဃဋယမာနာ. မဟပ္ဖလာ လောကဝိဒူန ဝဏ္ဏိတာတိ ဧဝရူပါ ဒါနသင်္ခါတာ ဒက္ခိဏာ တိဝိဓလောကံ ဝိဒိတံ ကတွာ ဌိတတ္တာ လောကဝိဒူနံ ဗုဒ္ဓါနံ ဝဏ္ဏိတာ၊ ဗုဒ္ဓေဟိ ပသတ္ထာတိ အတ္ထော. ယညမနုဿရန္တာတိ ယညံ ဒါနံ အနုဿရန္တာ. ဝေဒဇာတာတိ တုဋ္ဌိဇာတာ.
၈. သုဒတ္တသုတ္တဝဏ္ဏနာ
၅၈. အဋ္ဌမေ သညတာနန္တိ ကာယဝါစာဟိ သံယတာနံ. ပရဒတ္တဘောဇိနန္တိ ပရေဟိ ဒိန္နမေဝ ဘုဉ္ဇိတွာ ယာပေန္တာနံ. ကာလေနာတိ ယုတ္တပ္ပတ္တကာလေန. သက္ကစ္စ ဒဒါတီတိ သဟတ္ထာ သက္ကာရံ ကတွာ ဒဒါတိ. စတ္တာရိ ဌာနာနိ အနုပ္ပဝေစ္ဆတီတိ စတ္တာရိ ကာရဏာနိ အနုပ္ပဝေသေတိ ဒဒါတိ. ယသဝါ ဟောတီတိ မဟာပရိဝါရော ဟောတိ. နဝမံ ကေဝလံ ဘိက္ခူနံ ကထိတံ. သေသမေတ္ထ တာဒိသမေဝ.
၁၀. ဂိဟိသာမီစိသုတ္တဝဏ္ဏနာ
၆၀. ဒသမေ ဂိဟိသာမီစိပဋိပဒန္တိ ဂိဟီနံ အနုစ္ဆဝိကံ ပဋိပတ္တိံ. ပစ္စုပဋ္ဌိတော ဟောတီတိ အတိဟရိတွာ ဒါတုကာမတာယ ပတိဥပဋ္ဌိတော ဟောတိ ဥပဂတော၊ ဘိက္ခုသံဃဿ စီဝရံ ဒေတီတိ အတ္ထော.
ဥပဋ္ဌိတာတိ ဥပဋ္ဌာယကော. တေသံ ဒိဝါ စ ရတ္တော စာတိ ယေ ဧဝံ စတူဟိ ပစ္စယေဟိ ဥပဋ္ဌဟန္တိ၊ တေသံ ဒိဝါ စ ရတ္တိဉ္စ ပရိစ္စာဂဝသေန စ အနုဿရဏဝသေန စ သဒါ ပုညံ ပဝဍ္ဎတိ. သဂ္ဂဉ္စ ကမတိဋ္ဌာနန္တိ တာဒိသော စ ဘဒ္ဒကံ ကမ္မံ ကတွာ သဂ္ဂဋ္ဌာနံ ဥပဂစ္ဆတိ. ဣမေသု စတူသုပိ သုတ္တေသု အာဂါရိယပဋိပဒါ ကထိတာ. သောတာပန္နသကဒါဂါမီနမ္ပိ ဝဋ္ဋတိ.
ပုညာဘိသန္ဒဝဂ္ဂေါ ပဌမော.
(၇) ၂. ပတ္တကမ္မဝဂ္ဂေါ
၁. ပတ္တကမ္မသုတ္တဝဏ္ဏနာ
၆၁. ဒုတိယဿ ပဌမေ အနိဋ္ဌပဋိက္ခေပေန ဣဋ္ဌာ. မနေ ကမန္တိ ပဝိသန္တီတိ ကန္တာ. မနံ အပ္ပါယန္တိ ပဝဍ္ဎေန္တီတိ မနာပါ. ဒုလ္လဘာတိ ပရမဒုလ္လဘာ. ဘောဂါတိ ဘုဉ္ဇိတဗ္ဗာ ရူပါဒယော ဝိသယာ. သဟဓမ္မေနာတိ ဓမ္မေနေဝ သဒ္ဓိံ ဥပ္ပဇ္ဇန္တု၊ မာ ဓမ္မူပဃာတံ ကတွာ အဓမ္မေနာတိ. အထဝါ သဟဓမ္မေနာတိ သကာရဏေန၊ တေန တေန သေနာပတိသေဋ္ဌိဋ္ဌာနာဒိကာရဏေန သဒ္ဓိံယေဝ ဥပ္ပဇ္ဇန္တူတိ အတ္ထော. ယသောတိ ပရိဝါရသမ္ပတ္တိ. သဟ ဉာတီဘီတိ ဉာတကေဟိ သဒ္ဓိံ. သဟ ဥပဇ္ဈာယေဟီတိ သုခဒုက္ခေသု ဥပနိဇ္ဈာယိတဗ္ဗတ္တာ ဥပဇ္ဈာယသင်္ခါတေဟိ သန္ဒိဋ္ဌသမ္ဘတ္တေဟိ သဒ္ဓိံ.
အကိစ္စံ ကရောတီတိ အကာတဗ္ဗံ ကရောတိ. ကိစ္စံ အပရာဓေတီတိ ကတ္တဗ္ဗယုတ္တကံ ကိစ္စံ အကရောန္တော တံ အပရာဓေတိ နာမ. ဓံသတီတိ ပတတိ ပရိဟာယတိ. အဘိဇ္ဈာဝိသမလောဘန္တိ အဘိဇ္ဈာသင်္ခါတံ ဝိသမလောဘံ. ပဇဟတီတိ နုဒတိ နီဟရတိ. မဟာပညောတိ မဟန္တပညော. ပုထုပညောတိ ပုထုလပညော. အာပါတဒသောတိ တံ တံ အတ္ထံ အာပါတေတိ တမေဝ ပဿတိ၊ သုခုမမ္ပိဿ အတ္ထဇာတံ အာပါတံ အာဂစ္ဆတိယေဝါတိ အတ္ထော.
ဥဋ္ဌာနဝီရိယာဓိဂတေဟီတိ ဥဋ္ဌာနသင်္ခါတေန ဝီရိယေန အဓိဂတေဟိ. ဗာဟာဗလပရိစိတေဟီတိ ဗာဟာဗလေန ပရိစိတေဟိ ဝဍ္ဎိတေဟိ. သေဒါဝက္ခိတ္တေဟီတိ အဝက္ခိတ္တသေဒေဟိ၊ သေဒံ မုဉ္စိတွာ ဝါယာမေန ပယောဂေန သမဓိဂတေဟီတိ အတ္ထော. ဓမ္မိကေဟီတိ ဓမ္မယုတ္တေဟိ. ဓမ္မလဒ္ဓေဟီတိ ဒသကုသလကမ္မပထဓမ္မေ အကောပေတွာ လဒ္ဓေဟိ. ပတ္တကမ္မာနီတိ ယုတ္တကမ္မာနိ အနုစ္ဆဝိကကမ္မာနိ. သုခေတီတိ သုခိတံ ကရောတိ. ပီဏေတီတိ ပီဏိတံ ဗလသမ္ပန္နံ ကရောတိ. ဌာနဂတံ ဟောတီတိ ကာရဏဂတံ ဟောတိ. ကိံ ပန တန္တိ? စတူသု ပတ္တကမ္မေသု ဧကံ ဘောဂေဟိ ကတ္တဗ္ဗကမ္မံ ဘောဂဇာတမေဝ ဌာနဂတံ. ပတ္တဂတန္တိ ယုတ္တပ္ပတ္တဋ္ဌာနဂတံ. အာယတနသော ပရိဘုတ္တန္တိ ကာရဏေနေဝ ပရိဘုတ္တံ ဘောဂဇာတံ ဟောတိ.
ပရိယောဓာယ သံဝတ္တတီတိ ပိဒဟိတွာ ဝတ္တတိ. ယထာ အဂ္ဂိအာဒီဟိ ဥပ္ပန္နာသု အာပဒါသု၊ ဧဝံ အာဒိတ္တဂေဟနိဗ္ဗာပနာဒီနံ အတ္ထာယ ဓနပရိစ္စာဂံ ကတွာ တာသံ အာပဒါနံ မဂ္ဂံ ပိဒဟတိ နိဝါရေတိ. သောတ္ထိံ အတ္တာနံ ကရောတီတိ နိရုပဒ္ဒဝံ ခေမံ အတ္တာနံ ကရောတိ. ဉာတိဗလိန္တိ ဉာတကာနံ ဗလိံ. အတိထိဗလိန္တိ အာဂန္တုကာနံ ဗလိံ. ပုဗ္ဗပေတဗလိန္တိ ပရလောကဂတာနံ ဉာတကာနံ ဗလိံ. ရာဇဗလိန္တိ ရညော ကတ္တဗ္ဗယုတ္တကံ ရာဇဗလိံ. ဒေဝတာဗလိန္တိ ဒေဝတာနံ ကတ္တဗ္ဗဗလိံ. သဗ္ဗမေတံ တေသံ တေသံ ယထာနုစ္ဆဝိကဝသေန ဒါတဗ္ဗဒါနဿ အဓိဝစနံ.
ခန္တိသောရစ္စေ နိဝိဋ္ဌာတိ အဓိဝါသနက္ခန္တိယဉ္စ သုသီလတာယ စ နိဝိဋ္ဌာ. ဧကမတ္တာနံ ဒမေန္တီတိ ဧကံ အတ္တနောဝ အတ္တဘာဝံ ဣန္ဒြိယဒမေန ဒမေန္တိ. သမေန္တီတိ အတ္တနော စိတ္တံ ကိလေသဝူပသမနေန သမေန္တိ. ပရိနိဗ္ဗာပေန္တီတိ ကိလေသပရိနိဗ္ဗာနေနေဝ ပရိနိဗ္ဗာပေန္တိ. ဥဒ္ဓဂ္ဂိကန္တိအာဒီသု ဥပရူပရိဘူမီသု ဖလဒါနဝသေန ဥဒ္ဓမဂ္ဂမဿာတိ ဥဒ္ဓဂ္ဂိကာ. သဂ္ဂဿ ဟိတာတိ တတြုပပတ္တိဇနနတော သောဝဂ္ဂိကာ. နိဗ္ဗတ္တနိဗ္ဗတ္တဋ္ဌာနေ သုခေါဝ ဝိပါကော အဿာတိ သုခဝိပါကာ. သုဋ္ဌု အဂ္ဂါနံ ဒိဗ္ဗဝဏ္ဏာဒီနံ ဒသန္နံ ဝိသေသာနံ နိဗ္ဗတ္တနတော သဂ္ဂသံဝတ္တနိကာ၊ ဧဝရူပံ ဒက္ခိဏံ ပတိဋ္ဌာပေတီတိ အတ္ထော.
အရိယဓမ္မေ ဌိတောတိ ပဉ္စသီလဓမ္မေ ပတိဋ္ဌိတော. ပေစ္စ သဂ္ဂေ ပမောဒတီတိ ပရလောကံ ဂန္တွာ ယတ္ထ သဂ္ဂေ ပဋိသန္ဓိံ ဂဏှာတိ၊ တတ္ထ မောဒတိ. သောတာပန္နသကဒါဂါမိနော ဝါ ဟောန္တု အနာဂါမီ ဝါ၊ သဗ္ဗေသံ အယံ ပဋိပဒါ လဗ္ဘတေဝါတိ.
၂. အာနဏျသုတ္တဝဏ္ဏနာ
၆၂. ဒုတိယေ အဓိဂမနီယာနီတိ ပတ္တဗ္ဗာနိ. ကာမဘောဂိနာတိ ဝတ္ထုကာမေ စ ကိလေသကာမေ စ ပရိဘုဉ္ဇန္တေန. အတ္ထိသုခါဒီသု အတ္ထီတိ ဥပ္ပဇ္ဇနကသုခံ အတ္ထိသုခံ နာမ. ဘောဂေ ပရိဘုဉ္ဇန္တဿ ဥပ္ပဇ္ဇနကသုခံ ဘောဂသုခံ နာမ. အနဏောသ္မီတိ ဥပ္ပဇ္ဇနကသုခံ အာနဏျသုခံ နာမ. နိဒ္ဒေါသော အနဝဇ္ဇောသ္မီတိ ဥပ္ပဇ္ဇနကသုခံ အနဝဇ္ဇသုခံ နာမ.
ဘုဉ္ဇန္တိ ဘုဉ္ဇမာနော. ပညာ ဝိပဿတီတိ ပညာယ ဝိပဿတိ. ဥဘော ဘာဂေတိ ဒွေ ကောဋ္ဌာသေ၊ ဟေဋ္ဌိမာနိ တီဏိ ဧကံ ကောဋ္ဌာသံ၊ အနဝဇ္ဇသုခံ ဧကံ ကောဋ္ဌာသန္တိ ဧဝံ ပညာယ ပဿမာနော ဒွေ ကောဋ္ဌာသေ ဇာနာတီတိ အတ္ထော. အနဝဇ္ဇသုခဿေတန္တိ ဧတံ တိဝိဓမ္ပိ သုခံ အနဝဇ္ဇသုခဿ သောဠသိံ ကလံ နာဂ္ဃတီတိ.
၃. ဗြဟ္မသုတ္တဝဏ္ဏနာ
၆၃. တတိယံ တိကနိပါတေ ဝဏ္ဏိတမေဝ. သပုဗ္ဗဒေဝတာနီတိ ပဒမတ္တမေဝ ဧတ္ထ ဝိသေသောတိ. စတုတ္ထေ သဗ္ဗံ ဥတ္တာနတ္ထမေဝ.
၅. ရူပသုတ္တဝဏ္ဏနာ
၆၅. ပဉ္စမေ ရူပေ ပမာဏံ ဂဟေတွာ ပသန္နော ရူပပ္ပမာဏော နာမ. ရူပပ္ပသန္နောတိ တဿေဝ အတ္ထဝစနံ. ဃောသေ ပမာဏံ ဂဟေတွာ ပသန္နော ဃောသပ္ပမာဏော နာမ. စီဝရလူခပတ္တလူခေသု ပမာဏံ ဂဟေတွာ ပသန္နော လူခပ္ပမာဏော နာမ. ဓမ္မေ ပမာဏံ ဂဟေတွာ ပသန္နော ဓမ္မပ္ပမာဏော နာမ. ဣတရာနိ တေသံယေဝ အတ္ထဝစနာနိ. သဗ္ဗသတ္တေ စ တယော ကောဋ္ဌာသေ ကတွာ ဒွေ ကောဋ္ဌာသာ ရူပပ္ပမာဏာ၊ ဧကော န ရူပပ္ပမာဏော. ပဉ္စ ကောဋ္ဌာသေ ကတွာ စတ္တာရော ကောဋ္ဌာသာ ဃောသပ္ပမာဏာ၊ ဧကော န ဃောသပ္ပမာဏော. ဒသ ကောဋ္ဌာသေ ကတွာ နဝ ကောဋ္ဌာသာ လူခပ္ပမာဏာ၊ ဧကော န လူခပ္ပမာဏော. သတသဟဿံ ကောဋ္ဌာသေ ကတွာ ပန ဧကော ကောဋ္ဌာသောဝ ဓမ္မပ္ပမာဏော၊ သေသာ န ဓမ္မပ္ပမာဏာတိ ဝေဒိတဗ္ဗာ.
ရူပေ ပမာဏိံသူတိ ယေ ရူပံ ဒိသွာ ပသန္နာ၊ တေ ရူပေ ပမာဏိံသု နာမ၊ ပသီဒိံသူတိ အတ္ထော. ဃောသေန အနွဂူတိ ဃောသေန အနုဂတာ၊ ဃောသပ္ပမာဏံ ဂဟေတွာ ပသန္နာတိ အတ္ထော. ဆန္ဒရာဂဝသူပေတာတိ ဆန္ဒဿ စ ရာဂဿ စ ဝသံ ဥပေတာ. အဇ္ဈတ္တဉ္စ န ဇာနာတီတိ နိယကဇ္ဈတ္တေ တဿ ဂုဏံ န ဇာနာတိ. ဗဟိဒ္ဓါ စ န ပဿတီတိ ဗဟိဒ္ဓါပိဿ ပဋိပတ္တိံ န ပဿတိ. သမန္တာဝရဏောတိ သမန္တတော အာဝါရိတော၊ သမန္တာ ဝါ အာဝရဏမဿာတိ သမန္တာဝရဏော. ဃောသေန ဝုယှတီတိ ဃောသေန နိယတိ၊ န ဂုဏေန. အဇ္ဈတ္တဉ္စ န ဇာနာတိ၊ ဗဟိဒ္ဓါ စ ဝိပဿတီတိ နိယကဇ္ဈတ္တေ ဂုဏံ န ဇာနာတိ၊ ဗဟိဒ္ဓါ ပနဿ ပဋိပတ္တိံ ပဿတိ. ဗဟိဒ္ဓါ ဖလဒဿာဝီတိ တဿ ပရေဟိ ကတံ ဗဟိဒ္ဓါ သက္ကာရဖလံ ပဿန္တော. ဝိနီဝရဏဒဿာဝီတိ ဝိဝဋဒဿာဝီ. န သော ဃောသေန ဝုယှတီတိ သော ဃောသေန န နီယတိ.
၆. သရာဂသုတ္တဝဏ္ဏနာ
၆၆. ဆဋ္ဌေ မောဟဇံ စာပဝိဒ္ဒသူတိ မောဟဇံ စာပိ အဝိဒ္ဒသူ အပဏ္ဍိတာ. သဝိဃာတန္တိ သဒုက္ခံ. ဒုခုဒြယန္တိ အာယတိဉ္စ ဒုက္ခဝဍ္ဎိဒါယကံ. အစက္ခုကာတိ ပညာစက္ခုရဟိတာ. ယထာ ဓမ္မာ တထာ သန္တာတိ ယထာ ရာဂါဒယော ဓမ္မာ ဌိတာ၊ တထာ သဘာဝါဝ ဟုတွာ. န တဿေဝန္တိ မညရေတိ မယံ ဧဝံသန္တာ ဧဝံသဘာဝါတိ တဿ န မညရေ၊ န မညန္တီတိ အတ္ထော. ဣမသ္မိံ သုတ္တေပိ ဂါထာသုပိ ဝဋ္ဋမေဝ ကထိတံ.
၇. အဟိရာဇသုတ္တဝဏ္ဏနာ
၆၇. သတ္တမေ ဣမာနိ စတ္တာရိ အဟိရာဇကုလာနီတိ ဣဒံ ဒဋ္ဌဝိသာနေဝ သန္ဓာယ ဝုတ္တံ. ယေ ဟိ ကေစိ ဒဋ္ဌဝိသာ၊ သဗ္ဗေတေ ဣမေသံ စတုန္နံ အဟိရာဇကုလာနံ အဗ္ဘန္တရဂတာဝ ဟောန္တိ. အတ္တဂုတ္တိယာတိ အတ္တနော ဂုတ္တတ္ထာယ. အတ္တရက္ခာယာတိ အတ္တနော ရက္ခဏတ္ထာယ. အတ္တပရိတ္တာယာတိ အတ္တနော ပရိတ္တာဏတ္ထာယ. ပရိတ္တံ နာမ အနုဇာနာမီတိ အတ္ထော.
ဣဒါနိ ယထာ တံ ပရိတ္တံ ကာတဗ္ဗံ၊ တံ ဒဿေန္တော ဝိရူပက္ခေဟိ မေတိအာဒိမာဟ. တတ္ထ ဝိရူပက္ခေဟီတိ ဝိရူပက္ခနာဂကုလေဟိ. သေသေသုပိ ဧသေဝ နယော. အပါဒကေဟီတိ အပါဒကသတ္တေဟိ. သေသေသုပိ ဧသေဝ နယော. သဗ္ဗေ သတ္တာတိ ဣတော ပုဗ္ဗေ ဧတ္တကေန ဌာနေန ဩဒိဿကမေတ္တံ ကထေတွာ ဣဒါနိ အနောဒိဿကမေတ္တံ ကထေတုံ ဣဒမာရဒ္ဓံ. တတ္ထ သတ္တာ ပါဏာ ဘူတာတိ သဗ္ဗာနေတာနိ ပုဂ္ဂလဝေဝစနာနေဝ. ဘဒြာနိ ပဿန္တူတိ ဘဒြာနိ အာရမ္မဏာနိ ပဿန္တု. မာ ကဉ္စိ ပါပမာဂမာတိ ကဉ္စိ သတ္တံ ပါပကံ လာမကံ မာ အာဂစ္ဆတု. အပ္ပမာဏော ဗုဒ္ဓေါတိ ဧတ္ထ ဗုဒ္ဓေါတိ ဗုဒ္ဓဂုဏာ ဝေဒိတဗ္ဗာ. တေ ဟိ အပ္ပမာဏာ နာမ. သေသပဒဒွယေပိ ဧသေဝ နယော. ပမာဏဝန္တာနီတိ ဂုဏပ္ပမာဏေန ယုတ္တာနိ. ဥဏ္ဏနာဘီတိ လောမသနာဘိကော မက္ကဋကော. သရဗူတိ ဃရဂေါလိကာ. ကတာ မေ ရက္ခာ၊ ကတာ မေ ပရိတ္တာတိ မယာ ဧတ္တကဿ ဇနဿ ရက္ခာ စ ပရိတ္တာဏဉ္စ ကတံ. ပဋိက္ကမန္တု ဘူတာနီတိ သဗ္ဗေပိ မေ ကတပရိတ္တာဏာ သတ္တာ အပဂစ္ဆန္တု၊ မာ မံ ဝိဟေဌယိံသူတိ အတ္ထော.
၈. ဒေဝဒတ္တသုတ္တဝဏ္ဏနာ
၆၈. အဋ္ဌမေ အစိရပက္ကန္တေ ဒေဝဒတ္တေတိ သံဃံ ဘိန္ဒိတွာ နစိရပက္ကန္တေ. ပရာဘဝါယာတိ အဝဍ္ဎိယာ ဝိနာသာယ. အဿတရီတိ ဝဠဝါယ ကုစ္ဆိသ္မိံ ဂဒြဘဿ ဇာတာ. အတ္တဝဓာယ ဂဗ္ဘံ ဂဏှာတီတိ တံ အဿေန သဒ္ဓိံ သမ္ပယောဇေန္တိ၊ သာ ဂဗ္ဘံ ဂဏှိတွာ ကာလေ သမ္ပတ္တေ ဝိဇာယိတုံ နသက္ကောန္တီ ပါဒေဟိ ဘူမိံ ပဟရန္တီ တိဋ္ဌတိ. အထဿာ စတ္တာရော ပါဒေ စတူသု ခါဏူသု ဗန္ဓိတွာ ကုစ္ဆိံ ဖာလေတွာ ပေါတကံ နီဟရန္တိ. သာ တတ္ထေဝ မရတိ. တေနေတံ ဝုတ္တံ.
၉. ပဓာနသုတ္တဝဏ္ဏနာ
၆၉. နဝမေ ကိလေသာနံ သံဝရတ္ထာယ ပဝေသနဒွါရံ ပိဒဟနတ္ထာယ ပဓာနံ သံဝရပ္ပဓာနံ၊ ပဇဟနတ္ထာယ ပဓာနံ ပဟာနပ္ပဓာနံ၊ ကုသလာနံ ဓမ္မာနံ ဗြူဟနတ္ထာယ ဝဍ္ဎနတ္ထာယ ပဓာနံ ဘာဝနာပ္ပဓာနံ၊ တေသံယေဝ အနုရက္ခဏတ္ထာယ ပဓာနံ အနုရက္ခဏာပ္ပဓာနံ.
၁၀. အဓမ္မိကသုတ္တဝဏ္ဏနာ
၇၀. ဒသမေ အဓမ္မိကာ ဟောန္တီတိ ပေါရာဏကရာဇူဟိ ဌပိတံ ဒသဘာဂဗလိဉ္စေဝ အပရာဓာနုရူပဉ္စ ဒဏ္ဍံ အဂ္ဂဟေတွာ အတိရေကဗလိနော စေဝ အတိရေကဒဏ္ဍဿ စ ဂဟဏေန အဓမ္မိကာ. ရာဇာယုတ္တာတိ ရညော ဇနပဒေသု ကိစ္စသံဝိဓာယကာ အာယုတ္တကပုရိသာ. ဗြာဟ္မဏဂဟပတိကာတိ အန္တောနဂရဝါသိနော ဗြာဟ္မဏဂဟပတယော. နေဂမဇာနပဒါတိ နိဂမဝါသိနော စေဝ ဇနပဒဝါသိနော စ. ဝိသမန္တိ ဝိသမာ ဟုတွာ၊ အသမယေန ဝါယန္တီတိ အတ္ထော. ဝိသမာတိ န သမာ၊ အတိထဒ္ဓါ ဝါ အတိမုဒုကာ ဝါတိ အတ္ထော. အပဉ္ဇသာတိ မဂ္ဂတော အပဂတာ၊ ဥမ္မဂ္ဂဂါမိနော ဟုတွာ ဝါယန္တီတိ အတ္ထော. ဒေဝတာ ပရိကုပိတာ ဘဝန္တီတိ ဝါတေသု ဟိ ဝိသမေသု အပဉ္ဇသေသု ဝါယန္တေသု ရုက္ခာ ဘိဇ္ဇန္တိ၊ ဝိမာနာနိ ဘိဇ္ဇန္တိ. တသ္မာ ဒေဝတာ ပရိကုပိတာ ဘဝန္တိ၊ တာ ဒေဝဿ သမ္မာ ဝဿိတုံ န ဒေန္တိ. တေန ဝုတ္တံ ဒေဝေါ န သမ္မာ ဓာရံ အနုပ္ပဝေစ္ဆတီတိ. ဝိသမပါကာနိ သဿာနိ ဘဝန္တီတိ ဧကသ္မိံ ဌာနေ ဂဗ္ဘီနိ ဟောန္တိ၊ ဧကသ္မိံ သဉ္ဇာတခီရာနိ၊ ဧကံ ဌာနံ ပစ္စတီတိ ဧဝံ ဝိသမံ ပါကာနိ သဿာနိ ဘဝန္တိ.
သမံ နက္ခတ္တာနိ တာရကရူပါနိ ပရိဝတ္တန္တီတိ ယထာ ကတ္တိကပုဏ္ဏမာ ကတ္တိကနက္ခတ္တမေဝ လဘတိ၊ မိဂသိရပုဏ္ဏမာ မိဂသိရနက္ခတ္တမေဝါတိ ဧဝံ တသ္မိံ တသ္မိံ မာသေ သာ သာ ပုဏ္ဏမာ တံ တံ နက္ခတ္တမေဝ လဘတိ၊ တထာ သမ္မာ ပရိဝတ္တန္တိ. သမံ ဝါတာ ဝါယန္တီတိ အဝိသမာ ဟုတွာ သမယသ္မိံယေဝ ဝါယန္တိ၊ ဆ မာသေ ဥတ္တရာ ဝါတာ၊ ဆ မာသေဒက္ခိဏာတိ ဧဝံ တေသံ တေသံ ဇနပဒါနံ အနုရူပေ သမယေ ဝါယန္တိ. သမာတိ သမပ္ပဝတ္တိနော နာတိထဒ္ဓါ နာတိမုဒူ. ပဉ္ဇသာတိ မဂ္ဂပ္ပဋိပန္နာ၊ မဂ္ဂေနေဝ ဝါယန္တိ၊ နော အမဂ္ဂေနာတိ အတ္ထော.
ဇိမှံ ဂစ္ဆတီတိ ကုဋိလံ ဂစ္ဆတိ၊ အတိတ္ထံ ဂဏှာတိ. နေတ္တေ ဇိမှံ ဂတေ သတီတိ နယတီတိ နေတ္တာ. တသ္မိံ နေတ္တေ ဇိမှံ ဂတေ ကုဋိလံ ဂန္တွာ အတိတ္ထံ ဂဏှန္တေ ဣတရာပိ အတိတ္ထမေဝ ဂဏှန္တီတိ အတ္ထော. နေတေတိပိ ပါဌော. ဒုက္ခံ သေတီတိ ဒုက္ခံ သယတိ၊ ဒုက္ခိတံ ဟောတီတိ အတ္ထော.
ပတ္တကမ္မဝဂ္ဂေါ ဒုတိယော.
(၈) ၃. အပဏ္ဏကဝဂ္ဂေါ
၁. ပဓာနသုတ္တဝဏ္ဏနာ
၇၁. တတိယဝဂ္ဂဿ ပဌမေ အပဏ္ဏကပ္ပဋိပဒန္တိ အဝိရဒ္ဓပ္ပဋိပဒံ. ယောနိ စဿ အာရဒ္ဓါ ဟောတီတိ ကာရဏဉ္စဿ ပရိပုဏ္ဏံ ဟောတိ. အာသဝါနံ ခယာယာတိ အရဟတ္တတ္ထာယ. ဒုတိယံ ဥတ္တာနမေဝ.
၃. သပ္ပုရိသသုတ္တဝဏ္ဏနာ
၇၃. တတိယေ အဝဏ္ဏောတိ အဂုဏော. ပါတု ကရောတီတိ ကထေတိ၊ ပါကဋံ ကရောတိ. ပဉှာဘိနီတောတိ ပဉှတ္ထာယ အဘိနီတော. အဟာပေတွာ အလမ္ဗိတွာတိ အပရိဟီနံ အလမ္ဗိတံ ကတွာ. ဧတ္ထ စ အသပ္ပုရိသော ပါပိစ္ဆတာယ အတ္တနော အဝဏ္ဏံ ဆာဒေတိ၊ သပ္ပုရိသော လဇ္ဇိတာယ အတ္တနော ဝဏ္ဏံ. ဣဒါနိ ယသ္မာ အသပ္ပုရိသော ဟိရောတ္တပ္ပရဟိတော သံဝါသေန အဝဇာနာတိ၊ သပ္ပုရိသော ပန ဟိရောတ္တပ္ပသမန္နာဂတော သံဝါသေနာပိ နာဝဇာနာတိ. တသ္မာ အသပ္ပုရိသဘာဝသာဓကံ အဓုနာဂတဝဓုကောပမ္မံ ဒဿေတုံ သေယျထာပိ၊ ဘိက္ခဝေ၊ ဝဓုကာတိအာဒိမာဟ. တတ္ထ ဝဓုကာတိ သုဏိသာ. တိဗ္ဗန္တိ ဗဟလံ. သေသမေတ္ထ ဥတ္တာနတ္ထမေဝါတိ.
၄-၅. အဂ္ဂသုတ္တဒွယဝဏ္ဏနာ
၇၄-၇၅. စတုတ္ထေ သီလဂ္ဂန္တိ အဂ္ဂပ္ပတ္တံ ဥတ္တမသီလံ. ဧသေဝ နယော သဗ္ဗတ္ထ. ပဉ္စမေ ရူပဂ္ဂန္တိ ယံ ရူပံ သမ္မသိတွာ အရဟတ္တံ ပါပုဏာတိ၊ ဣဒံ ရူပဂ္ဂံ နာမ. သေသေသုပိ ဧသေဝ နယော. ဘဝဂ္ဂန္တိ ဧတ္ထ ပန ယသ္မိံ အတ္တဘာဝေ ဌိတော အရဟတ္တံ ပါပုဏာတိ၊ ဧတံ ဘဝဂ္ဂံ နာမာတိ.
၆. ကုသိနာရသုတ္တဝဏ္ဏနာ
၇၆. ဆဋ္ဌေ ဥပဝတ္တနေတိ ပါစီနဂတာယ သာလပန္တိယာ ဥတ္တရေန နိဝတ္တိတွာ ဌိတာယ ဝေမဇ္ဈဋ္ဌာနေ. အန္တရေန ယမကသာလာနန္တိ ဒွိန္နံ သာလရုက္ခာနံ အန္တရေ. ကင်္ခါတိ ဒွေဠှကံ. ဝိမတီတိ ဝိနိစ္ဆိတုံ အသမတ္ထတာ. ‘‘ဗုဒ္ဓေါ နု ခေါ န ဗုဒ္ဓေါ နု ခေါ၊ ဓမ္မော နု ခေါ န ဓမ္မော နု ခေါ၊ သံဃော နု ခေါ န သံဃော နု ခေါ၊ မဂ္ဂေါ နု ခေါ န မဂ္ဂေါ နု ခေါ၊ ပဋိပဒါ နု ခေါ န ပဋိပဒါ နု ခေါ’’တိ ယဿ သံသယော ဥပ္ပဇ္ဇေယျ၊ တံ ဝေါ ဝဒါမိ ပုစ္ဆထ၊ ဘိက္ခဝေတိ အယမေတ္ထ သင်္ခေပတ္ထော. သတ္ထုဂါရဝေနပိ န ပုစ္ဆေယျာထာတိ ‘‘မယံ သတ္ထု သန္တိကေ ပဗ္ဗဇိမှ၊ စတ္တာရော ပစ္စယာပိ နော သတ္ထု သန္တကာဝ. တေ မယံ ဧတ္တကံ ကာလံ ကင်္ခံ အကတွာ န အရဟာမ အဇ္ဇ ပစ္ဆိမေ ကာလေ ကင်္ခံ ကာတု’’န္တိ သစေ ဧဝံ သတ္ထရိ ဂါရဝေန န ပုစ္ဆထ. သဟာယကောပိ၊ ဘိက္ခဝေ၊ သဟာယကဿ အာရောစေတူတိ တုမှာကံ ယော ယဿ ဘိက္ခုဿ သန္ဒိဋ္ဌော သမ္ဘတ္တော၊ သော တဿ အာရောစေတု၊ အဟံ ဧကဿ ဘိက္ခုဿ ကထေဿာမိ၊ တဿ ကထံ သုတွာ သဗ္ဗေ နိက္ကင်္ခါ ဘဝထာတိ ဒဿေတိ. ဧဝံ ပသန္နောတိ ဧဝံ သဒ္ဒဟာမိ အဟန္တိ အတ္ထော. ဉာဏမေဝါတိ နိက္ကင်္ခဘာဝပစ္စက္ခကရဏဉာဏံယေဝ ဧတ္ထ တထာဂတဿ၊ န သဒ္ဓါမတ္တန္တိ အတ္ထော. ဣမေသဉှိ၊ အာနန္ဒာတိ ဣမေသံ အန္တောသာဏိယံ နိသိန္နာနံ ပဉ္စန္နံ ဘိက္ခုသတာနံ. ယော ပစ္ဆိမကောတိ ယော ဂုဏဝသေန ပစ္ဆိမကော၊ အာနန္ဒတ္ထေရံယေဝ သန္ဓာယာဟ.
၇. အစိန္တေယျသုတ္တဝဏ္ဏနာ
၇၇. သတ္တမေ အစိန္တေယျာနီတိ စိန္တေတုံ အယုတ္တာနိ. န စိန္တေတဗ္ဗာနီတိ အစိန္တေယျတ္တာယေဝ န စိန္တေတဗ္ဗာနိ. ယာနိ စိန္တေန္တောတိ ယာနိ ကာရဏာနိ စိန္တေန္တော. ဥမ္မာဒဿာတိ ဥမ္မတ္တကဘာဝဿ. ဝိဃာတဿာတိ ဒုက္ခဿ. ဗုဒ္ဓဝိသယောတိ ဗုဒ္ဓါနံ ဝိသယော၊ သဗ္ဗညုတညာဏာဒီနံ ဗုဒ္ဓဂုဏာနံ ပဝတ္တိ စ အာနုဘာဝေါ စ. ဈာနဝိသယောတိ အဘိညာဈာနဝိသယော. ကမ္မဝိပါကောတိ ဒိဋ္ဌဓမ္မဝေဒနီယာဒီနံ ကမ္မာနံ ဝိပါကော. လောကစိန္တာတိ ‘‘ကေန နု ခေါ စန္ဒိမသူရိယာ ကတာ၊ ကေန မဟာပထဝီ၊ ကေန မဟာသမုဒ္ဒေါ၊ ကေန သတ္တာ ဥပ္ပါဒိတာ၊ ကေန ပဗ္ဗတာ၊ ကေန အမ္ဗတာလနာဠိကေရာဒယော’’တိ ဧဝရူပါ လောကစိန္တာ.
၈. ဒက္ခိဏသုတ္တဝဏ္ဏနာ
၇၈. အဋ္ဌမေ ဒက္ခိဏာဝိသုဒ္ဓိယောတိ ဒါနသင်္ခါတာယ ဒက္ခိဏာယ ဝိသုဇ္ဈနကာရဏာနိ. ဒါယကတော ဝိသုဇ္ဈတီတိ မဟပ္ဖလဘာဝေန ဝိသုဇ္ဈတိ၊ မဟပ္ဖလာ ဟောတီတိ အတ္ထော. ကလျာဏဓမ္မောတိ သုစိဓမ္မော. ပါပဓမ္မောတိ လာမကဓမ္မော. ဒါယကတော ဝိသုဇ္ဈတီတိ ဧတ္ထ ဝေဿန္တရမဟာရာဇာ ကထေတဗ္ဗော. သော ဟိ ဇူဇကဗြာဟ္မဏဿ ဒါရကေ ဒတွာ မဟာပထဝိံ ကမ္ပေသိ. ပဋိဂ္ဂါဟကတော ဝိသုဇ္ဈတီတိ ဧတ္ထ ကလျာဏီနဒီမုခဒွါရဝါသီ ကေဝဋ္ဋော ကထေတဗ္ဗော. သော ကိရ ဒီဃသုမတ္ထေရဿ တိက္ခတ္တုံ ပိဏ္ဍပါတံ ဒတွာ မရဏမဉ္စေ နိပန္နော ‘‘အယျဿ မံ ဒီဃသုမတ္ထေရဿ ဒိန္နပိဏ္ဍပါတော ဥဒ္ဓရတီ’’တိ အာဟ. နေဝ ဒါယကတောတိ ဧတ္ထ ဝဍ္ဎမာနဝါသီ လုဒ္ဒကော ကထေတဗ္ဗော. သော ကိရ ပေတဒက္ခိဏံ ဒေန္တော ဧကဿ ဒုဿီလဿေဝ တယော ဝါရေ အဒါသိ. တတိယဝါရေ ‘‘အမနုဿော ဒုဿီလော မံ ဝိလုမ္ပတီ’’တိ ဝိရဝိ. ဧကဿ သီလဝတော ဘိက္ခုနော ဒတွာ ပါပိတကာလေယေဝဿ ပါပုဏိ. ဒါယကတော စေဝ ဝိသုဇ္ဈတိ ပဋိဂ္ဂါဟကတော စာတိ ဧတ္ထ အသဒိသဒါနံ ကထေတဗ္ဗန္တိ.
၉. ဝဏိဇ္ဇသုတ္တဝဏ္ဏနာ
၇၉. နဝမေ တာဒိသာ ဝါတိ တံသဒိသာဝ တံသရိက္ခကာဝ. ဆေဒဂါမိနီ ဟောတီတိ ဆေဒံ ဂစ္ဆတိ. ယံ ပတ္ထိတံ၊ တံ သဗ္ဗံ နဿတီတိ အတ္ထော. န ယထာဓိပ္ပါယာ ဟောတီတိ ယထာဇ္ဈာသယာ န ဟောတိ. ပရာဓိပ္ပါယာ ဟောတီတိ ပရဇ္ဈာသယာ အဇ္ဈာသယတော အဓိကတရဖလာ ဟောတိ. သမဏံ ဝါ ဗြာဟ္မဏံ ဝါတိ ဧတ္ထ သမိတပါပဗာဟိတပါပတာဟိ သမဏဗြာဟ္မဏတာ ဝေဒိတဗ္ဗာ. ဝဒတု၊ ဘန္တေ၊ ပစ္စယေနာတိ၊ ဘန္တေ၊ စတုဗ္ဗိဓေန စီဝရာဒိနာ ပစ္စယေန ဝဒေယျာသီတိ ဧဝံ ပဝါရေတိ နိမန္တေတိ. ယေန ပဝါရေတီတိ ပရိစ္ဆိန္ဒိတွာ ယတ္တကေန ပဝါရေတိ. တံ န ဒေတီတိ တံ သဗ္ဗသောဝ န ဒေတိ. န ယထာဓိပ္ပါယံ ဒေတီတိ ယထာ တဿ အဇ္ဈာသယော၊ ဧဝံ ဒါတုံ န သက္ကောတိ၊ ဟာပေတွာ အပ္ပကံ ဒေတိ. ယထာဓိပ္ပါယံ ဒေတီတိ ယတ္တကံ သော ဣစ္ဆတိ၊ တတ္တကမေဝ ဒေတိ. ပရာဓိပ္ပါယံ ဒေတီတိ အပ္ပကံ ပဝါရေတွာ အဝတ္ထရိတွာ ဗဟုံ ဒေတိ.
၁၀. ကမ္ဗောဇသုတ္တဝဏ္ဏနာ
၈၀. ဒသမေ နေဝ သဘာယံ နိသီဒတီတိ ဝိနိစ္ဆယကရဏတ္ထံ ဝိနိစ္ဆယသဘာယံ နေဝ နိသီဒတိ. န ကမ္မန္တံ ပယောဇေတီတိ ကသိဝဏိဇ္ဇာဒိမဟာကမ္မန္တံ နပ္ပယောဇေတိ. န ကမ္ဗောဇံ ဂစ္ဆတီတိ ဘောဂေ သမ္ဘရဏတ္ထာယ ကမ္ဗောဇရဋ္ဌံ န ဂစ္ဆတိ. ဒေသနာမတ္တမေဝ စေတံ၊ ယံ ကိဉ္စိ တိရောရဋ္ဌံ န ဂစ္ဆတီတိ အတ္ထော. ကောဓနောတိအာဒီသု ကောဓနတာယ ကောဓပရိယုဋ္ဌိတော အတ္ထာနတ္ထံ န ဇာနာတိ၊ ဣဿုကိတာယ ပရသမ္ပတ္တိံ န သဟတိ၊ မစ္ဆရိတာယ ဓနံ ဒတွာ ကိစ္စံ ကာတုံ န သက္ကောတိ၊ နိပ္ပညတာယ ကိစ္စံ သံဝိဓာတုံ န သက္ကောတိ. တသ္မာ ဧတာနိ သဘာနိသီဒနာဒီနိ န ကရောတီတိ.
အပဏ္ဏကဝဂ္ဂေါ တတိယော.
(၉) ၄. မစလဝဂ္ဂေါ
၁-၅. ပါဏာတိပါတာဒိသုတ္တပဉ္စကဝဏ္ဏနာ
၈၁-၈၅. စတုတ္ထဿ ပဌမာဒီနိ ဥတ္တာနတ္ထာနေဝ. ပဉ္စမေ ‘‘နီစေ ကုလေ ပစ္စာဇာတော’’တိအာဒိကေန တမေန ယုတ္တောတိ တမော. ကာယဒုစ္စရိတာဒီဟိ ပုန နိရယတမူပဂမနတော တမပရာယဏော. ဣတိ ဥဘယေနပိ ခန္ဓတမောဝ ကထိတော ဟောတိ. ‘‘အဍ္ဎေ ကုလေ ပစ္စာဇာတော’’တိအာဒိကေန ဇောတိနာ ယုတ္တတော ဇောတိ၊ အာလောကဘူတောတိ ဝုတ္တံ ဟောတိ. ကာယသုစရိတာဒီဟိ ပုန သဂ္ဂုပ္ပတ္တိဇောတိဘာဝူပဂမနတော ဇောတိပရာယဏော. ဣမိနာ နယေန ဣတရေပိ ဒွေ ဝေဒိတဗ္ဗာ.
ဝေနကုလေတိ ဝိလီဝကာရကုလေ. နေသာဒကုလေတိ မိဂလုဒ္ဒကာဒီနံ ကုလေ. ရထကာရကုလေတိ စမ္မကာရကုလေ. ပုက္ကုသကုလေတိ ပုပ္ဖဆဍ္ဍကကုလေ. ကသိရဝုတ္တိကေတိ ဒုက္ခဝုတ္တိကေ. ဒုဗ္ဗဏ္ဏောတိ ပံသုပိသာစကော ဝိယ ဈာမခါဏုဝဏ္ဏော. ဒုဒ္ဒသိကောတိ ဝိဇာတမာတုယာပိ အမနာပဒဿနော. ဩကောဋိမကောတိ လကုဏ္ဍကော. ကာဏောတိ ဧကစ္ဆိကာဏော ဝါ ဥဘယစ္ဆိကာဏော ဝါ. ကုဏီတိ ဧကဟတ္ထကုဏီ ဝါ ဥဘယဟတ္ထကုဏီ ဝါ. ခဉ္ဇောတိ ဧကပါဒခဉ္ဇော ဝါ ဥဘယပါဒခဉ္ဇော ဝါ. ပက္ခဟတောတိ ဟတပက္ခော ပီဌသပ္ပီ. ပဒီပေယျဿာတိ တေလကပလ္လာဒိနော ဒီပဥပကရဏဿ. ဧဝံ ခေါ၊ ဘိက္ခဝေတိ ဧတ္ထ ဧကော ပုဂ္ဂလော ဗဟိဒ္ဓါ အာလောကံ အဒိသွာ မာတု ကုစ္ဆိမှိယေဝ ကာလံ ကတွာ အပါယေသု နိဗ္ဗတ္တန္တော သကလမ္ပိ ကပ္ပံ သံသရတိ. သောပိ တမောတမပရာယဏောဝ. သော ပန ကုဟကပုဂ္ဂလော ဘဝေယျ. ကုဟကဿ ဟိ ဧဝရူပါ နိပ္ဖတ္တိ ဟောတီတိ ဝုတ္တံ.
ဧတ္ထ စ ‘‘နီစေ ကုလေ’’တိအာဒီဟိ အာဂမနဝိပတ္တိ စေဝ ပစ္စုပ္ပန္နပစ္စယဝိပတ္တိ စ ဒဿိတာ. ‘‘ဒလိဒ္ဒေ’’တိအာဒီဟိ ပဝတ္တပစ္စယဝိပတ္တိ၊ ‘‘ကသိရဝုတ္တိကေ’’တိအာဒီဟိ အာဇီဝုပါယဝိပတ္တိ၊ ‘‘ဒုဗ္ဗဏ္ဏော’’တိအာဒီဟိ အတ္တဘာဝဝိပတ္တိ၊ ‘‘ဗဟွာဗာဓော’’တိအာဒီဟိ ဒုက္ခကာရဏသမာယောဂေါ၊ ‘‘န လာဘီ’’တိအာဒီဟိ သုခကာရဏဝိပတ္တိ စေဝ ဥပဘောဂဝိပတ္တိ စ၊ ‘‘ကာယေန ဒုစ္စရိတ’’န္တိအာဒီဟိ တမပရာယဏဘာဝဿ ကာရဏသမာယောဂေါ၊ ‘‘ကာယဿ ဘေဒါ’’တိအာဒီဟိ သမ္ပရာယိကတမူပဂမော. သုက္ကပက္ခော ဝုတ္တပဋိပက္ခနယေန ဝေဒိတဗ္ဗော.
၆. ဩဏတောဏတသုတ္တဝဏ္ဏနာ
၈၆. ဆဋ္ဌေ ဩဏတောဏတောတိ ဣဒါနိ နီစကော အာယတိမ္ပိ နီစကော ဘဝိဿတိ. ဩဏတုဏ္ဏတောတိ ဣဒါနိ နီစော အာယတိံ ဥစ္စော ဘဝိဿတိ. ဥဏ္ဏတောဏတောတိ ဣဒါနိ ဥစ္စော အာယတိံ နီစော ဘဝိဿတိ. ဥဏ္ဏတုဏ္ဏတောတိ ဣဒါနိ ဥစ္စော အာယတိမ္ပိ ဥစ္စော ဘဝိဿတိ. ဝိတ္ထာရော ပန နေသံ ပုရိမသုတ္တနယေနေဝ ဝေဒိတဗ္ဗော.
၇. ပုတ္တသုတ္တဝဏ္ဏနာ
၈၇. သတ္တမေ သမဏမစလောတိ သမဏအစလော၊ မကာရော ပဒသန္ဓိကရော၊ နိစ္စလသမဏောတိ အတ္ထော. ဣမိနာ သတ္တဝိဓမ္ပိ သေခံ ဒဿေတိ. သော ဟိ သာသနေ မူလဇာတာယ သဒ္ဓါယ ပတိဋ္ဌိတတ္တာ အစလော နာမ. သမဏပုဏ္ဍရီကောတိ ပုဏ္ဍရီကသဒိသော သမဏော. ပုဏ္ဍရီကံ နာမ ဦနသတပတ္တံ သရောရုဟံ. ဣမိနာ သုက္ခဝိပဿကခီဏာသဝံ ဒဿေတိ. သော ဟိ ဈာနာဘိညာနံ အဘာဝေန အပရိပုဏ္ဏဂုဏတ္တာ သမဏပုဏ္ဍရီကော နာမ ဟောတိ. သမဏပဒုမောတိ ပဒုမသဒိသော သမဏော. ပဒုမံ နာမ ပရိပုဏ္ဏသတပတ္တံ သရောရုဟံ. ဣမိနာ ဥဘတောဘာဂဝိမုတ္တံ ခီဏာသဝံ ဒဿေတိ. သော ဟိ ဈာနာဘိညာနံ ဘာဝေန ပရိပုဏ္ဏဂုဏတ္တာ သမဏပဒုမော နာမ ဟောတိ. သမဏေသု သမဏသုခုမာလောတိ သဗ္ဗေသုပိ ဧတေသု သမဏေသု သုခုမာလသမဏော မုဒုစိတ္တသရီရော ကာယိကစေတသိကဒုက္ခရဟိတော ဧကန္တသုခီ. ဧတေန အတ္တာနဉ္စေဝ အတ္တသဒိသေ စ ဒဿေတိ.
ဧဝံ မာတိကံ နိက္ခိပိတွာ ဣဒါနိ ပဋိပါဋိယာ ဝိဘဇန္တော ကထဉ္စ၊ ဘိက္ခဝေတိအာဒိမာဟ. တတ္ထ သေခေါတိ သတ္တဝိဓောပိ သေခေါ. ပါဋိပဒေါတိ ပဋိပန္နကော. အနုတ္တရံ ယောဂက္ခေမံ ပတ္ထယမာနော ဝိဟရတီတိ အရဟတ္တံ ပတ္ထယန္တော ဝိဟရတိ. မုဒ္ဓါဝသိတ္တဿာတိ မုဒ္ဓနိ အဝသိတ္တဿ၊ ကတာဘိသေကဿာတိ အတ္ထော. အာဘိသေကောတိ အဘိသေကံ ကာတုံ ယုတ္တော. အနဘိသိတ္တောတိ န တာဝ အဘိသိတ္တော. မစလပ္ပတ္တောတိ ရညော ခတ္တိယဿ မုဒ္ဓါဝသိတ္တဿ ပုတ္တဘာဝေန စေဝ ပုတ္တေသု ဇေဋ္ဌကဘာဝေန စ န တာဝ အဘိသိတ္တဘာဝေန စ အဘိသေကပ္ပတ္တိအတ္ထာယ အစလပ္ပတ္တော နိစ္စလပတ္တော. မကာရော နိပါတမတ္တံ. ကာယေန ဖုသိတွာတိ နာမကာယေန ဖုသိတွာ.
ယာစိတောဝ ဗဟုလံ စီဝရံ ပရိဘုဉ္ဇတီတိ ‘‘ဣဒံ၊ ဘန္တေ၊ ပရိဘုဉ္ဇထာ’’တိ ဧဝံ ဒါယကေဟိ ယာစမာနေဟေဝ ဥပနီတံ စီဝရံ ဗဟုံ ပရိဘုဉ္ဇတိ၊ ကိဉ္စိဒေဝ အယာစိတံ၊ ဗာကုလတ္ထေရော ဝိယ. ပိဏ္ဍပါတံ ခဒိရဝနမဂ္ဂေ သီဝလိတ္ထေရော ဝိယ. သေနာသနံ အဋ္ဌကနာဂရသုတ္တေ (မ. နိ. ၂.၁၇ အာဒယော၊ အ. နိ. ၁၁.၁၆ အာဒယော) အာနန္ဒတ္ထေရော ဝိယ. ဂိလာနပစ္စယံ ပိလိန္ဒဝစ္ဆထေရော ဝိယ. တျဿာတိ တေ အဿ. မနာပေနေဝါတိ မနံ အလ္လီယနကေန. သမုဒါစရန္တီတိ ကတ္တဗ္ဗကိစ္စာနိ ကရောန္တိ ပဝတ္တန္တိ ဝါ. ဥပဟာရံ ဥပဟရန္တီတိ ကာယိကစေတသိကဥပဟာရံ ဥပဟရန္တိ ဥပနီယန္တိ. သန္နိပါတိကာနီတိ တိဏ္ဏမ္ပိ သန္နိပါတေန နိဗ္ဗတ္တာနိ. ဥတုပရိဏာမဇာနီတိ ဥတုပရိဏာမတော အတိသီတအတိဥဏှဥတုတော ဇာတာနိ. ဝိသမပရိဟာရဇာနီတိ အစ္စာသနအတိဋ္ဌာနာဒိကာ ဝိသမပရိဟာရတော ဇာတာနိ. ဩပက္ကမိကာနီတိ ဝဓဗန္ဓနာဒိဥပက္ကမေန နိဗ္ဗတ္တာနိ. ကမ္မဝိပါကဇာနီတိ ဝိနာပိ ဣမေဟိ ကာရဏေဟိ ကေဝလံ ပုဗ္ဗေ ကတကမ္မဝိပါကဝသေနေဝ ဇာတာနိ. စတုန္နံ ဈာနာနန္တိ ဧတ္ထ ခီဏာသဝါနမ္ပိ ဗုဒ္ဓါနမ္ပိ ကိရိယဇ္ဈာနာနေဝ အဓိပ္ပေတာနိ. သေသံ ဥတ္တာနတ္ထမေဝါတိ.
၈. သံယောဇနသုတ္တဝဏ္ဏနာ
၈၈. အဋ္ဌမေ သာသနေ လဒ္ဓပ္ပတိဋ္ဌတ္တာ သောတာပန္နောဝ သမဏမစလောတိ ဝုတ္တော၊ နာတိဗဟုဂုဏတ္တာ န ဗဟုပတ္တံ ဝိယ သရောရုဟံ သကဒါဂါမီ သမဏပုဏ္ဍရီကောတိ၊ တတော ဗဟုတရဂုဏတ္တာ သတပတ္တံ ဝိယ သရောရုဟံ အနာဂါမီ သမဏပဒုမောတိ၊ ထဒ္ဓဘာဝကရာနံ ကိလေသာနံ သဗ္ဗသော သမုစ္ဆိန္နတ္တာ မုဒုဘာဝပ္ပတ္တော ခီဏာသဝေါ သမဏသုခုမာလောတိ.
၉. သမ္မာဒိဋ္ဌိသုတ္တဝဏ္ဏနာ
၈၉. နဝမေ သမ္မာဒိဋ္ဌိကောတိအာဒီဟိ အဋ္ဌင်္ဂိကမဂ္ဂဝသေန ပဌမသုတ္တေ ဝိယ သတ္တ သေခါ ဂဟိတာ. ဒုတိယဝါရေ ဒသင်္ဂိကမဂ္ဂဝသေန ဝါ အရဟတ္တဖလဉာဏအရဟတ္တဖလဝိမုတ္တီဟိ သဒ္ဓိံ၊ အဋ္ဌင်္ဂိကမဂ္ဂဝသေန ဝါ သုက္ခဝိပဿကခီဏာသဝေါ ကထိတော၊ တတိယဝါရေ ဥဘတောဘာဂဝိမုတ္တော၊ စတုတ္ထဝါရေ တထာဂတော စ တထာဂတသဒိသခီဏာသဝေါ စာတိ. ဣတိ ဣဒံ သုတ္တံ ပဌမသုတ္တေ ကထိတပုဂ္ဂလာနံ ဝသေနေဝ ကထိတံ၊ ဒေသနာမတ္တမေဝ ပနေတ္ထ နာနန္တိ.
၁၀. ခန္ဓသုတ္တဝဏ္ဏနာ
၉၀. ဒသမေ ပဌမဝါရေ အရဟတ္တတ္ထာယ ပယောဂံ အနာရဘိတွာ ဌိတော ပမာဒဝိဟာရီ သေခပုဂ္ဂလော ကထိတော. ဒုတိယဝါရေ အနုပ္ပါဒိတဇ္ဈာနော အာရဒ္ဓဝိပဿကော အပ္ပမာဒဝိဟာရီ သေခပုဂ္ဂလော ကထိတော. တတိယဝါရေ အာရဒ္ဓဝိပဿကော အပ္ပမာဒဝိဟာရီ အဋ္ဌဝိမောက္ခလာဘီ သေခပုဂ္ဂလော ကထိတော၊ စတုတ္ထဝါရေ ပရမသုခုမာလခီဏာသဝေါတိ.
မစလဝဂ္ဂေါ စတုတ္ထော.
(၁၀) ၅. အသုရဝဂ္ဂေါ
၁. အသုရသုတ္တဝဏ္ဏနာ
၉၁. ပဉ္စမဿ ပဌမေ အသုရောတိ အသုရသဒိသော ဗီဘစ္ဆော. ဒေဝေါတိ ဒေဝသဒိသော ဂုဏဝသေန အဘိရူပေါ ပါသာဒိကော.
၂. ပဌမသမာဓိသုတ္တဝဏ္ဏနာ
၉၂. ဒုတိယေ အဇ္ဈတ္တံ စေတောသမထဿာတိ နိယကဇ္ဈတ္တေ အပ္ပနာစိတ္တသမာဓိဿ. အဓိပညာဓမ္မဝိပဿနာယာတိ သင်္ခါရပရိဂ္ဂါဟကဝိပဿနာဉာဏဿ. တဉှိ အဓိပညာသင်္ခါတဉ္စ၊ ပဉ္စက္ခန္ဓသင်္ခါတေသု စ ဓမ္မေသု ဝိပဿနာဘူတံ၊ တသ္မာ ‘‘အဓိပညာဓမ္မဝိပဿနာ’’တိ ဝုစ္စတီတိ.
၃. ဒုတိယသမာဓိသုတ္တဝဏ္ဏနာ
၉၃. တတိယေ ယောဂေါ ကရဏီယောတိ ယုတ္တပ္ပယုတ္တတာ ကတ္တဗ္ဗာ. ဆန္ဒောတိ ကတ္တုကမျတာဆန္ဒော. ဝါယာမောတိ ပယောဂေါ. ဥဿာဟောတိ တတော အဓိမတ္တတရံ ဝီရိယံ. ဥဿောဠှီတိ ပင်္ကလဂ္ဂသကဋဥဒ္ဓရဏသဒိသံ မဟာဝီရိယံ. အပ္ပဋိဝါနီတိ အနိဝတ္တနတာ.
၄. တတိယသမာဓိသုတ္တဝဏ္ဏနာ
၉၄. စတုတ္ထေ ဧဝံ ခေါ၊ အာဝုသော၊ သင်္ခါရာ ဒဋ္ဌဗ္ဗာတိအာဒီသု၊ အာဝုသော၊ သင်္ခါရာ နာမ အနိစ္စတော ဒဋ္ဌဗ္ဗာ၊ အနိစ္စတော သမ္မသိတဗ္ဗာ၊ အနိစ္စတော ပဿိတဗ္ဗာ. တထာ ဒုက္ခတော၊ အနတ္တတောတိ ဧဝံ အတ္ထော ဒဋ္ဌဗ္ဗော. ဧဝံ ခေါ၊ အာဝုသော၊ စိတ္တံ သဏ္ဌပေတဗ္ဗန္တိအာဒီသုပိ ပဌမဇ္ဈာနဝသေန၊ အာဝုသော၊ စိတ္တံ သဏ္ဌပေတဗ္ဗံ ပဌမဇ္ဈာနဝသေန သန္နိသာဒေတဗ္ဗံ၊ ပဌမဇ္ဈာနဝသေန ဧကောဒိ ကာတဗ္ဗံ၊ ပဌမဇ္ဈာနဝသေန သမာဒဟိတဗ္ဗံ. တထာ ဒုတိယဇ္ဈာနာဒိဝသေနာတိ ဧဝံ အတ္ထော ဒဋ္ဌဗ္ဗော. ဣမေသု တီသုပိ သုတ္တေသု သမထဝိပဿနာ လောကိယလောကုတ္တရာဝ ကထိတာ.
၅. ဆဝါလာတသုတ္တဝဏ္ဏနာ
၉၅. ပဉ္စမေ ဆဝါလာတန္တိ သုသာနေ အလာတံ. မဇ္ဈေ ဂူထဂတန္တိ မဇ္ဈဋ္ဌာနေ ဂူထမက္ခိတံ. နေဝ ဂါမေ ကဋ္ဌတ္ထံ ဖရတီတိ ကူဋဂေါပါနသိထမ္ဘသောပါနာဒီနံ အတ္ထာယ အနုပနေယျတာယ ဂါမေ န ကဋ္ဌတ္ထံ သာဓေတိ၊ ခေတ္တကုဋိပါဒံ ဝါ မဉ္စပါဒံ ဝါ ကာတုံ အနုပနေယျတာယ န အရညေ ကဋ္ဌတ္ထံ သာဓေတိ. ဒွီသု ကောဋီသု ဂယှမာနံ ဟတ္ထံ ဍဟတိ၊ မဇ္ဈေ ဂယှမာနံ ဂူထေန မက္ခေတိ. တထူပမန္တိ တံသရိက္ခကံ. အဘိက္ကန္တတရောတိ သုန္ဒရတရော. ပဏီတတရောတိ ဥတ္တမတရော. ဂဝါ ခီရန္တိ ဂါဝိတော ခီရံ. ခီရမှာ ဒဓီတိအာဒီသု ပရံ ပရံ ပုရိမတော ပုရိမတော အဂ္ဂံ၊ သပ္ပိမဏ္ဍော ပန တေသု သဗ္ဗေသုပိ အဂ္ဂမေဝ. အဂ္ဂေါတိအာဒီသု ဂုဏေဟိ အဂ္ဂေါ စေဝ သေဋ္ဌော စ ပမုခေါ စ ဥတ္တမော စ ပဝရော စာတိ ဝေဒိတဗ္ဗော. ဆဝါလာတူပမာယ န ဒုဿီလော ပုဂ္ဂလော ကထိတော၊ အပ္ပဿုတော ပန ဝိဿဋ္ဌကမ္မန္တော ဂေါဏသဒိသော ပုဂ္ဂလော ကထိတောတိ ဝေဒိတဗ္ဗော. ဆဋ္ဌေ သဗ္ဗံ ဥတ္တာနတ္ထမေဝ.
၇. ခိပ္ပနိသန္တိသုတ္တဝဏ္ဏနာ
၉၇. သတ္တမေ ခိပ္ပနိသန္တီတိ ခိပ္ပနိသာမနော သီဃံ ဇာနိတုံ သမတ္ထော. သုတာနဉ္စ ဓမ္မာနန္တိ သုတပ္ပဂုဏာနံ တန္တိဓမ္မာနံ. အတ္ထူပပရိက္ခီတိ အတ္ထံ ဥပပရိက္ခကော. အတ္ထမညာယ ဓမ္မမညာယာတိ အဋ္ဌကထဉ္စ ပါဠိဉ္စ ဇာနိတွာ. ဓမ္မာနုဓမ္မပ္ပဋိပန္နော ဟောတီတိ နဝလောကုတ္တရဓမ္မာနံ အနုရူပဓမ္မဘူတံ သသီလကံ ပုဗ္ဗဘာဂပ္ပဋိပဒံ ပဋိပန္နော ဟောတိ. နော စ ကလျာဏဝါစောတိ န သုန္ဒရဝစနော. န ကလျာဏဝါက္ကရဏောတိ န သုန္ဒရဝစနဃောသော ဟောတိ. ပေါရိယာတိအာဒီဟိ သဒ္ဓိံ နော-ကာရော ယောဇေတဗ္ဗောယေဝ. ဂုဏပရိပုဏ္ဏာယ အပလိဗုဒ္ဓါယ အဒေါသာယ အဂဠိတပဒဗျဉ္ဇနာယ အတ္ထံ ဝိညာပေတုံ သမတ္ထာယ ဝါစာယ သမန္နာဂတော န ဟောတီတိ အတ္ထော. ဣမိနာ ဥပါယေန သဗ္ဗတ္ထ အတ္ထော ဝေဒိတဗ္ဗော.
၈. အတ္တဟိတသုတ္တဝဏ္ဏနာ
၉၈-၉၉. အဋ္ဌမံ ပုဂ္ဂလဇ္ဈာသယဝသေနာပိ ဒသဗလဿ ဒေသနာဉာဏဝိလာသေနာပိ ကထိတံ၊ နဝမံ ပဉ္စဝေရဝသေန.
၁၀. ပေါတလိယသုတ္တဝဏ္ဏနာ
၁၀၀. ဒသမေ ကာလေနာတိ ယုတ္တပ္ပတ္တကာလေန. ခမတီတိ ရုစ္စတိ. ယဒိဒံ တတ္ထ တတ္ထ ကာလညုတာတိ ယာ ဧသာ တတ္ထ တတ္ထ ကာလံ ဇာနနာ. တံ တံ ကာလံ ဉတွာ ဟိ အဝဏ္ဏာရဟဿ အဝဏ္ဏကထနံ ဝဏ္ဏာရဟဿ စ ဝဏ္ဏကထနံ ပဏ္ဍိတာနံ ပကတီတိ ဒဿေတိ.
အသုရဝဂ္ဂေါ ပဉ္စမော.
ဒုတိယပဏ္ဏာသကံ နိဋ္ဌိတံ.