၃. တတိယပဏ္ဏာသကံ
(၁၁) ၁. ဝလာဟကဝဂ္ဂေါ
၁-၂. ဝလာဟကသုတ္တဒွယဝဏ္ဏနာ
၁၀၁-၂. တတိယပဏ္ဏာသကဿ ပဌမေ ဝလာဟကာတိ မေဃာ. ဘာသိတာ ဟောတိ နော ကတ္တာတိ ‘‘ဣဒဉ္စိဒဉ္စ ကရိဿာမီ’’တိ ကေဝလံ ဘာသတိယေဝ၊ န ကရောတိ. ကတ္တာ ဟောတိ နော ဘာသိတာတိ အကထေတွာဝ ‘‘ဣဒဉ္စိဒဉ္စ မယာ ကာတုံ ဝဋ္ဋတီ’’တိ ကတ္တာ ဟောတိ. ဧဝံ သဗ္ဗတ္ထ အတ္ထော ဝေဒိတဗ္ဗော. ဒုတိယံ ဥတ္တာနတ္ထမေဝ.
၃. ကုမ္ဘသုတ္တဝဏ္ဏနာ
၁၀၃. တတိယေ ကုမ္ဘာတိ ဃဋာ. တုစ္ဆော ပိဟိတောတိ ရိတ္တကော ပိဟိတမုခေါ. ပူရော ဝိဝဋောတိ ဥဒကပုဏ္ဏော အပါရုတမုခေါ. သေသဒွယေပိ ဧသေဝ နယော.
၄. ဥဒကရဟဒသုတ္တဝဏ္ဏနာ
၁၀၄. စတုတ္ထေ ဥတ္တာနော ဂမ္ဘီရောဘာသောတိအာဒီသု ပုရာဏပဏ္ဏရသသမ္ဘိန္နဝဏ္ဏော ကာဠဥဒကော ဂမ္ဘီရောဘာသော နာမ၊ အစ္ဆဝိပ္ပသန္နမဏိဝဏ္ဏဥဒကော ဥတ္တာနောဘာသော နာမ.
၅-၆. အမ္ဗသုတ္တဝဏ္ဏနာ
၁၀၅-၆. ပဉ္စမေ အာမံ ပက္ကဝဏ္ဏီတိ အာမကံ ဟုတွာ ဩလောကေန္တာနံ ပက္ကသဒိသံ ခါယတိ. ဧဝံ သဗ္ဗပဒါနိ ဒဋ္ဌဗ္ဗာနိ. ဆဋ္ဌံ ဥတ္တာနတ္ထမေဝ.
၇. မူသိကသုတ္တဝဏ္ဏနာ
၁၀၇. သတ္တမေ ယော အာဝါဋံ ခဏတိ၊ န စ တတ္ထ ဝသတိ၊ သော ဂါဓံ ကတ္တာ နော ဝသိတာတိ ဝုစ္စတိ. ခန္တာတိပိ ပါဌော. ဣမိနာ နယေန သဗ္ဗပဒါနိ ဝေဒိတဗ္ဗာနိ.
၈. ဗလီဗဒ္ဒသုတ္တဝဏ္ဏနာ
၁၀၈. အဋ္ဌမေ ယော အတ္တနော ဂေါဂဏံ မဒ္ဒတိ၊ န ပရဂေါဂဏံ၊ အယံ သဂဝစဏ္ဍော နော ပရဂဝစဏ္ဍောတိ ဧဝံ သဗ္ဗပဒါနိ ဝေဒိတဗ္ဗာနိ. ဥဗ္ဗေဇေတာ ဟောတီတိ ဃဋ္ဋေတွာ ဝိဇ္ဈိတွာ ဥဗ္ဗေဂပတ္တံ ကရောတိ.
၉. ရုက္ခသုတ္တဝဏ္ဏနာ
၁၀၉. နဝမေ ဖေဂ္ဂု ဖေဂ္ဂုပရိဝါရောတိ နိဿာရော ဖေဂ္ဂုရုက္ခော ဖေဂ္ဂုရုက္ခေဟေဝ ပရိဝုတော. သာရပရိဝါရောတိ ခဒိရာဒီဟိ သာရရုက္ခေဟေဝ ပရိဝုတော. ဧသ နယော သဗ္ဗတ္ထ.
၁၀. အာသီဝိသသုတ္တဝဏ္ဏနာ
၁၁၀. ဒသမေ အာဂတဝိသော န ဃောရဝိသောတိ ယဿ ဝိသံ အာဂစ္ဆတိ၊ ဃောရံ ပန န ဟောတိ၊ စိရကာလံ န ပီဠေတိ. သေသပဒေသုပိ ဧသေဝ နယောတိ.
ဝလာဟကဝဂ္ဂေါ ပဌမော.
(၁၂) ၂. ကေသိဝဂ္ဂေါ
၁. ကေသိသုတ္တဝဏ္ဏနာ
၁၁၁. ဒုတိယဿ ပဌမေ ကေသီတိ တဿ နာမံ. အဿဒမ္မေ သာရေတီတိ အဿဒမ္မသာရထိ. သဏှေနပိ ဝိနေတီတိအာဒီသု တဿ အနုစ္ဆဝိကံ သက္ကာရံ ကတွာ သုဘောဇနံ ဘောဇေတွာ မဓုရပါနံ ပါယေတွာ မုဒုဝစနေန သမုဒါစရိတွာ ဒမေန္တော သဏှေန ဒမေတိ နာမ၊ ဇာဏုဗန္ဓနမုခဗန္ဓနာဒီဟိ စေဝ ပတောဒဝိဇ္ဈနကသာဘိဃာတဖရုသဝစနေဟိ စ ဒမေန္တော ဖရုသေန ဒမေတိ နာမ၊ ကာလေန ကာလံ တဒုဘယံ ကရောန္တော သဏှဖရုသေန ဒမေတိ နာမ.
၂. ဇဝသုတ္တဝဏ္ဏနာ
၁၁၂. ဒုတိယေ အဇ္ဇဝေနာတိ ဥဇုကဘာဝေန. ဇဝေနာတိ ပဒဝေဂေန. ခန္တိယာတိ အဓိဝါသနက္ခန္တိယာ. သောရစ္စေနာတိ သုစိဘာဝသီလေန. ပုဂ္ဂလဂုဏင်္ဂေသု ဇဝေနာတိ ဉာဏဇဝေန. သေသမေတ္ထ ဥတ္တာနတ္ထမေဝ.
၃. ပတောဒသုတ္တဝဏ္ဏနာ
၁၁၃. တတိယေ ပတောဒစ္ဆာယန္တိ ဝိဇ္ဈနတ္ထံ ဥက္ခိတ္တဿ ပတောဒဿ ဆာယံ. သံဝိဇ္ဇတီတိ ‘‘ဇဝေါ မေ ဂဟေတဗ္ဗော’’တိ သလ္လက္ခဏဝသေန သံဝိဇ္ဇတိ. သံဝေဂံ အာပဇ္ဇတီတိ သံဝေဂံ ပဋိပဇ္ဇတိ လောမဝေဓဝိဒ္ဓေါတိ လောမကူပေ ပတောဒဝေဓေန ဝိဒ္ဓမတ္တော. စမ္မဝေဓဝိဒ္ဓေါတိ ဆဝိစမ္မံ ဆိန္ဒန္တေန ပတောဒဝေဓေန ဝိဒ္ဓေါ. အဋ္ဌိဝေဓဝိဒ္ဓေါတိ အဋ္ဌိံ ဘိန္ဒန္တေန ဝေဓေန ဝိဒ္ဓေါ. ကာယေနာတိ နာမကာယေန. ပရမသစ္စန္တိ နိဗ္ဗာနံ. သစ္ဆိကရောတီတိ ပဿတိ. ပညာယာတိ သဟဝိပဿနာယ မဂ္ဂပညာယ.
၄. နာဂသုတ္တဝဏ္ဏနာ
၁၁၄. စတုတ္ထေ အဋ္ဌိံ ကတွာတိ အဋ္ဌိကော ဟုတွာ. တိဏဝနိန္နာဒသဒ္ဒါနန္တိ ဧတ္ထ တိဏဝေါတိ ဍိဏ္ဍိမော၊ နိန္နာဒသဒ္ဒေါတိ သဗ္ဗေသမ္ပိ ဧကတောမိဿိတော မဟာသဒ္ဒေါ. ဍံသာဒီသု ဍံသာတိ ပိင်္ဂလမက္ခိကာ၊ မကသာ မကသာဝ. ခိပ္ပညေဝ ဂန္တာ ဟောတီတိ သီလသမာဓိပညာဝိမုတ္တိဝိမုတ္တိဉာဏဒဿနာနိ ပူရေတွာ သီဃမေဝ ဂန္တာ ဟောတိ.
၅. ဌာနသုတ္တဝဏ္ဏနာ
၁၁၅. ပဉ္စမေ ဌာနာနီတိ ကာရဏာနိ. အနတ္ထာယ သံဝတ္တတီတိ အဟိတာယ အဝဍ္ဎိယာ သံဝတ္တတိ. ဧတ္ထ စ ပဌမံ ဩပါတက္ခဏနမစ္ဆဗန္ဓနသန္ဓိစ္ဆေဒနာဒိဘေဒံ သဒုက္ခံ သဝိဃာတံ ပါပကမ္မံ ဝေဒိတဗ္ဗံ၊ ဒုတိယံ သမဇီဝိကာနံ ဂိဟီနံ ပုပ္ဖစ္ဆဍ္ဍကာဒိကမ္မံ သုဓာကောဋ္ဋန-ဂေဟစ္ဆာဒနအသုစိဋ္ဌာနသမ္မဇ္ဇနာဒိကမ္မဉ္စ ဝေဒိတဗ္ဗံ၊ တတိယံ သုရာပါနဂန္ဓဝိလေပနမာလာပိဠန္ဓနာဒိကမ္မဉ္စေဝ အဿာဒဝသေန ပဝတ္တံ ပါဏာတိပါတာဒိကမ္မဉ္စ ဝေဒိတဗ္ဗံ၊ စတုတ္ထံ ဓမ္မဿဝနတ္ထာယ ဂမနကာလေ သုဒ္ဓဝတ္ထစ္ဆာဒန-မာလာဂန္ဓာဒီနံ အာဒါယ ဂမနံ စေတိယဝန္ဒနံ ဗောဓိဝန္ဒနံ မဓုရဓမ္မကထာသဝနံ ပဉ္စသီလသမာဒါနန္တိ ဧဝမာဒီသု သောမနဿသမ္ပယုတ္တံ ကုသလကမ္မံ ဝေဒိတဗ္ဗံ. ပုရိသထာမေတိ ပုရိသဿ ဉာဏထာမသ္မိံ. သေသဒွယေပိ ဧသေဝ နယော.
၆. အပ္ပမာဒသုတ္တဝဏ္ဏနာ
၁၁၆. ဆဋ္ဌေ ယတော ခေါတိ ယဒါ ခေါ. သမ္ပရာယိကဿာတိ ဒေသနာမတ္တမေတံ၊ ခီဏာသဝေါ ပန နေဝ သမ္ပရာယိကဿ၊ န ဒိဋ္ဌဓမ္မိကဿ မရဏဿ ဘာယတိ. သောဝ ဣဓ အဓိပ္ပေတော. ကေစိ ပန ‘‘သမ္မာဒိဋ္ဌိ ဘာဝိတာတိ ဝစနတော သောတာပန္နံ အာဒိံ ကတွာ သဗ္ဗေပိ အရိယာ အဓိပ္ပေတာ’’တိ ဝဒန္တိ.
၇. အာရက္ခသုတ္တဝဏ္ဏနာ
၁၁၇. သတ္တမေ အတ္တရူပေနာတိ အတ္တနော အနုရူပေန အနုစ္ဆဝိကေန၊ ဟိတကာမေနာတိ အတ္ထော. ရဇနီယေသူတိ ရာဂဿ ပစ္စယဘူတေသု. ဓမ္မေသူတိ သဘာဝေသု၊ ဣဋ္ဌာရမ္မဏေသူတိ အတ္ထော. ဧဝံ သဗ္ဗတ္ထ နယော ဝေဒိတဗ္ဗော. န ရဇ္ဇတီတိ ဒိဋ္ဌိဝသေန န ရဇ္ဇတိ. သေသပဒေသုပိ ဧသေဝ နယော. န စ ပန သမဏဝစနဟေတုပိ ဂစ္ဆတီတိ သမဏာနံ ပရဝါဒီနံ ဝစနဟေတုပိ အတ္တနော ဒိဋ္ဌိံ ပဟာယ တေသံ ဒိဋ္ဌိဝသေန န ဂစ္ဆတီတိ အတ္ထော. ဣဓာပိ ခီဏာသဝေါဝ အဓိပ္ပေတော.
၈-၁၀. သံဝေဇနီယာဒိသုတ္တတ္တယဝဏ္ဏနာ
၁၁၈-၁၂၀. အဋ္ဌမေ ဒဿနီယာနီတိ ပဿိတဗ္ဗယုတ္တကာနိ. သံဝေဇနီယာနီတိ သံဝေဂဇနကာနိ. နဝမေ ဇာတိဘယန္တိ ဇာတိံ အာရဗ္ဘ ဥပ္ပဇ္ဇနကဘယံ. သေသပဒေသုပိ ဧသေဝ နယော. ဒသမေ အဂ္ဂိဘယန္တိ အဂ္ဂိံ ပဋိစ္စ ဥပ္ပဇ္ဇနကဘယံ. သေသပဒေသုပိ ဧသေဝ နယော.
ကေသိဝဂ္ဂေါ ဒုတိယော.
(၁၃) ၃. ဘယဝဂ္ဂေါ
၁. အတ္တာနုဝါဒသုတ္တဝဏ္ဏနာ
၁၂၁. တတိယဿ ပဌမေ အတ္တာနုဝါဒဘယန္တိ အတ္တာနံ အနုဝဒန္တဿ ဥပ္ပဇ္ဇနကဘယံ. ပရာနုဝါဒဘယန္တိ ပရဿ အနုဝါဒတော ဥပ္ပဇ္ဇနကဘယံ. ဒဏ္ဍဘယန္တိ ဒွတ္တိံသ ကမ္မကာရဏာ ပဋိစ္စ ဥပ္ပဇ္ဇနကဘယံ. ဒုဂ္ဂတိဘယန္တိ စတ္တာရော အပါယေ ပဋိစ္စ ဥပ္ပဇ္ဇနကဘယံ. ဣဒံ ဝုစ္စတိ၊ ဘိက္ခဝေ၊ အတ္တာနုဝါဒဘယန္တိအာဒီသု အတ္တာနုဝါဒဘယံ တာဝ ပစ္စဝေက္ခန္တဿ အဇ္ဈတ္တံ ဟိရီ သမုဋ္ဌာတိ၊ သာဿ တီသု ဒွါရေသု သံဝရံ ဇနေတိ၊ တီသု ဒွါရေသု သံဝရော စတုပါရိသုဒ္ဓိသီလံ ဟောတိ. သော တသ္မိံ သီလေ ပတိဋ္ဌာယ ဝိပဿနံ ဝဍ္ဎေတွာ အဂ္ဂဖလေ ပတိဋ္ဌာတိ. ပရာနုဝါဒဘယံ ပန ပစ္စဝေက္ခန္တဿ ဗဟိဒ္ဓါ ဩတ္တပ္ပံ သမုဋ္ဌာတိ၊ တဒဿ တီသု ဒွါရေသု သံဝရံ ဇနေတိ၊ တီသု ဒွါရေသု သံဝရော စတုပါရိသုဒ္ဓိသီလံ ဟောတိ. သော တသ္မိံ သီလေ ပတိဋ္ဌာယ ဝိပဿနံ ဝဍ္ဎေတွာ အဂ္ဂဖလေ ပတိဋ္ဌာတိ. ဒုဂ္ဂတိဘယံ ပစ္စဝေက္ခန္တဿ အဇ္ဈတ္တံ ဟိရီ သမုဋ္ဌာတိ၊ သာဿ တီသု ဒွါရေသု သံဝရံ ဇနေတိ၊ တီသု ဒွါရေသု သံဝရော စတုပါရိသုဒ္ဓိသီလံ ဟောတိ. သော တသ္မိံ သီလေ ပတိဋ္ဌာယ ဝိပဿနံ ဝဍ္ဎေတွာ အဂ္ဂဖလေ ပတိဋ္ဌာတိ.
၂. ဦမိဘယသုတ္တဝဏ္ဏနာ
၁၂၂. ဒုတိယေ ဥဒကောရောဟန္တဿာတိ ဥဒကံ ဩတရန္တဿ. ပါဋိကင်္ခိတဗ္ဗာနီတိ ဣစ္ဆိတဗ္ဗာနိ. သုသုကာဘယန္တိ စဏ္ဍမစ္ဆဘယံ. မုခါဝရဏံ မညေ ကရောန္တီတိ မုခပိဒဟနံ ဝိယ ကရောန္တိ. ဩဒရိကတ္တဿာတိ မဟောဒရတာယ မဟဂ္ဃသဘာဝဿ. အရက္ခိတေနေဝ ကာယေနာတိအာဒီသု ကာယဒွါရေ တိဝိဓဿ သံဝရဿ အဘာဝတော အရက္ခိတေန ကာယေန. ဝစီဒွါရေ စတုဗ္ဗိဓဿ သံဝရဿ အဘာဝတော အရက္ခိတာယ ဝါစာယ.
၃. ပဌမနာနာကရဏသုတ္တဝဏ္ဏနာ
၁၂၃. တတိယေ တဒဿာဒေတီတိ တံ ဈာနံ သုခဿာဒေန အဿာဒေတိ. နိကာမေတီတိ ပတ္ထေတိ. ဝိတ္တိံ အာပဇ္ဇတီတိ တုဋ္ဌိံ အာပဇ္ဇတိ. တဒဓိမုတ္တောတိ တသ္မိံ အဓိမုတ္တော၊ တံ ဝါ အဓိမုတ္တော. တဗ္ဗဟုလဝိဟာရီတိ တေန ဈာနေန ဗဟုလံ ဝိဟရန္တော. သဟဗျတံ ဥပပဇ္ဇတီတိ သဟဘာဝံ ဂစ္ဆတိ၊ တတ္ထ နိဗ္ဗတ္တတီတိ အတ္ထော. ကပ္ပေါ အာယုပ္ပမာဏန္တိ ဧတ္ထ ပဌမဇ္ဈာနံ အတ္ထိ ဟီနံ၊ အတ္ထိ မဇ္ဈိမံ၊ အတ္ထိ ပဏီတံ. တတ္ထ ဟီနေန ဥပ္ပန္နာနံ ကပ္ပဿ တတိယော ကောဋ္ဌာသော အာယုပ္ပမာဏံ၊ မဇ္ဈိမေန ဥပဍ္ဎကပ္ပေါ၊ ပဏီတေန ကပ္ပေါ. တံ သန္ဓာယေတံ ဝုတ္တံ. နိရယမ္ပိ ဂစ္ဆတီတိ နိရယဂမနီယဿ ကမ္မဿ အပ္ပဟီနတ္တာ အပရာပရံ ဂစ္ဆတိ၊ န အနန္တရမေဝ. တသ္မိံယေဝ ဘဝေ ပရိနိဗ္ဗာယတီတိ တသ္မိံယေဝ ရူပဘဝေ ဌတွာ ပရိနိဗ္ဗာယတိ၊ န ဟေဋ္ဌာ ဩတရတိ. ယဒိဒံ ဂတိယာ ဥပပတ္တိယာ သတီတိ ယံ ဣဒံ ဂတိယာ စ ဥပပတ္တိယာ စ သတိ သေခဿ အရိယသာဝကဿ ပဋိသန္ဓိဝသေန ဟေဋ္ဌာ အနောတရိတွာ တသ္မိံယေဝ ရူပဘဝေ ဥပရိ ဒုတိယတတိယာဒီသု အညတရသ္မိံ ဗြဟ္မလောကေ ပရိနိဗ္ဗာနံ၊ ပုထုဇ္ဇနဿ ပန နိရယာဒိဂမနံ၊ ဣဒံ နာနာကရဏန္တိ အတ္ထော.
ဒွေ ကပ္ပါတိ ဧတ္ထာပိ ဒုတိယဇ္ဈာနံ ဝုတ္တနယေနေဝ တိဝိဓံ ဟောတိ. တတ္ထ ပဏီတဘာဝနေန နိဗ္ဗတ္တာနံ အဋ္ဌကပ္ပါ အာယုပ္ပမာဏံ၊ မဇ္ဈိမေန စတ္တာရော၊ ဟီနေန ဒွေ. တံ သန္ဓာယေတံ ဝုတ္တံ. စတ္တာရော ကပ္ပါတိ ဧတ္ထ ယံ ဟေဋ္ဌာ ဝုတ္တံ ‘‘ကပ္ပေါ၊ ဒွေ ကပ္ပါ’’တိ၊ တမ္ပိ အာဟရိတွာ အတ္ထော ဝေဒိတဗ္ဗော. ကပ္ပေါတိ စ ဂုဏဿပိ နာမံ၊ တသ္မာ ကပ္ပေါ ဒွေ ကပ္ပါ စတ္တာရော ကပ္ပါတိ အယမေတ္ထ အတ္ထော ဒဋ္ဌဗ္ဗော. ဣဒံ ဝုတ္တံ ဟောတိ – ယော ပဌမံ ဝုတ္တော ကပ္ပေါ၊ သော ဒွေ ဝါရေ ဂဏေတွာ ဧကေန ဂုဏေန ဒွေ ကပ္ပါ ဟောန္တိ၊ ဒုတိယေန စတ္တာရော၊ ပုန တေ စတ္တာရော ကပ္ပါတိ ဣမေဟိ စတူဟိ ဂုဏေဟိ ဂုဏိတာ ဧကေန ဂုဏေန အဋ္ဌ ဟောန္တိ၊ ဒုတိယေန သောဠသ၊ တတိယေန ဒွတ္တိံသ၊ စတုတ္ထေန စတုသဋ္ဌီတိ. ဧဝမိဓ ပဏီတဇ္ဈာနဝသေန စတုသဋ္ဌိ ကပ္ပါ ဂဟိတာတိ ဝေဒိတဗ္ဗာ. ပဉ္စ ကပ္ပသတာနီတိ ဣဒံ ပဏီတဿေဝ ဥပပတ္တိဇ္ဈာနဿ ဝသေန ဝုတ္တံ. ဝေဟပ္ဖလေသု ဝါ ပဌမဇ္ဈာနဘူမိအာဒီသု ဝိယ တိဏ္ဏံ ဗြဟ္မလောကာနံ အဘာဝတော ဧတ္တကမေဝ အာယုပ္ပမာဏံ. တသ္မာ ဧဝံ ဝုတ္တံ.
၄. ဒုတိယနာနာကရဏသုတ္တဝဏ္ဏနာ
၁၂၄. စတုတ္ထေ ရူပမေဝ ရူပဂတံ. သေသပဒေသုပိ ဧသေဝ နယော. အနိစ္စတောတိအာဒီသု ဟုတွာ အဘာဝဋ္ဌေန အနိစ္စတော၊ အာဗာဓဋ္ဌေန ရောဂတော၊ အန္တော ပဒုဿနဋ္ဌေန ဂဏ္ဍတော၊ အနုပဝိဋ္ဌဋ္ဌေန သလ္လတော၊ သဒုက္ခဋ္ဌေန အဃတော၊ သမ္ပီဠနဋ္ဌေန အာဗာဓတော၊ အဝိဓေယျဋ္ဌေန ပရတော၊ ပလုဇ္ဇနဋ္ဌေန ပလောကတော၊ နိဿတ္တဋ္ဌေန သုညတော၊ အဝသဝတ္တနဋ္ဌေန အနတ္တတော. ဧတ္ထ စ ‘‘အနိစ္စတော ပလောကတော’’တိ ဒွီဟိ ပဒေဟိ အနိစ္စလက္ခဏံ ကထိတံ၊ ‘‘သုညတော အနတ္တတော’’တိ ဒွီဟိ အနတ္တလက္ခဏံ၊ သေသေဟိ ဒုက္ခလက္ခဏံ ကထိတန္တိ ဝေဒိတဗ္ဗံ. သမနုပဿတီတိ ဉာဏေန ပဿတိ. ဧဝံ ပဉ္စက္ခန္ဓေ တိလက္ခဏံ အာရောပေတွာ ပဿန္တော တယော မဂ္ဂေ တီဏိ ဖလာနိ သစ္ဆိကရောတိ. သုဒ္ဓါဝါသာနံ ဒေဝါနံ သဟဗျတံ ဥပပဇ္ဇတီတိ တတ္ထ ဌိတော စတုတ္ထဇ္ဈာနံ ဘာဝေတွာ ဥပပဇ္ဇတိ.
၅-၆. မေတ္တာသုတ္တဒွယဝဏ္ဏနာ
၁၂၅-၁၂၆. ပဉ္စမေ ပဌမဇ္ဈာနဝသေန မေတ္တာ၊ ဒုတိယာဒိဝသေန ကရုဏာဒယော ဒဿိတာ. ဆဋ္ဌံ စတုတ္ထေ ဝုတ္တနယေနေဝ ဝေဒိတဗ္ဗံ.
၇. ပဌမတထာဂတအစ္ဆရိယသုတ္တဝဏ္ဏနာ
၁၂၇. သတ္တမေ ပါတုဘာဝါတိ ပါတုဘာဝေန. ကုစ္ဆိံ ဩက္ကမတီတိ ဧတ္ထ ကုစ္ဆိံ ဩက္ကန္တော ဟောတီတိ အတ္ထော. ဩက္ကန္တေ ဟိ တသ္မိံ ဧဝံ ဟောတိ၊ န ဩက္ကမမာနေ. အပ္ပမာဏောတိ ဝုဍ္ဎိပ္ပမာဏော၊ ဝိပုလောတိ အတ္ထော. ဥဠာရောတိ တဿေဝ ဝေဝစနံ. ဒေဝါနံ ဒေဝါနုဘာဝန္တိ ဧတ္ထ ဒေဝါနံ အယမာနုဘာဝေါ – နိဝတ္ထဝတ္ထဿ ပဘာ ဒွါဒသ ယောဇနာနိ ဖရတိ၊ တထာ သရီရဿ၊ တထာ ဝိမာနဿ၊ တံ အတိက္ကမိတွာတိ အတ္ထော. လောကန္တရိကာတိ တိဏ္ဏံ တိဏ္ဏံ စက္ကဝါဠာနံ အန္တရာ ဧကေကော လောကန္တရိကော ဟောတိ၊ တိဏ္ဏံ သကဋစက္ကာနံ ပတ္တာနံ ဝါ အညမညံ အာဟစ္စ ဌပိတာနံ မဇ္ဈေ ဩကာသော ဝိယ. သော ပန လောကန္တရိကနိရယော ပရိမာဏတော အဋ္ဌယောဇနသဟဿပ္ပမာဏော ဟောတိ. အဃာတိ နိစ္စဝိဝဋာ. အသံဝုတာတိ ဟေဋ္ဌာပိ အပ္ပတိဋ္ဌာ. အန္ဓကာရာတိ တမဘူတာ. အန္ဓကာရတိမိသာတိ စက္ခုဝိညာဏုပ္ပတ္တိနိဝါရဏတော အန္ဓဘာဝကရဏတိမိသာယ သမန္နာဂတာ. တတ္ထ ကိရ စက္ခုဝိညာဏံ န ဇာယတိ. ဧဝံမဟိဒ္ဓိကာနန္တိ စန္ဒိမသူရိယာ ကိရ ဧကပ္ပဟာရေနေဝ တီသု ဒီပေသု ပညာယန္တိ၊ ဧဝံမဟိဒ္ဓိကာ. ဧကေကာယ ဒိသာယ နဝ နဝ ယောဇနသတသဟဿာနိ အန္ဓကာရံ ဝိဓမိတွာ အာလောကံ ဒဿေန္တိ၊ ဧဝံမဟာနုဘာဝါ. အာဘာ နာနုဘောန္တီတိ ပဘာ နပ္ပဟောန္တိ. တေ ကိရ စက္ကဝါဠပဗ္ဗတဿ ဝေမဇ္ဈေန စရန္တိ စက္ကဝါဠပဗ္ဗတဉ္စ အတိက္ကမိတွာ လောကန္တရနိရယာ. တသ္မာ တေသံ တတ္ထ အာဘာ နပ္ပဟောန္တိ.
ယေပိ တတ္ထ သတ္တာတိ ယေပိ တသ္မိံ လောကန္တရမဟာနိရယေ သတ္တာ ဥပပန္နာ. ကိံ ပန ကမ္မံ ကတွာ တတ္ထ ဥပ္ပဇ္ဇန္တီတိ? ဘာရိယံ ဒါရုဏံ မာတာပိတူနံ ဓမ္မိကသမဏဗြာဟ္မဏာနဉ္စ ဥပရိ အပရာဓံ၊ အညဉ္စ ဒိဝသေ ဒိဝသေ ပါဏဝဓာဒိသာဟသိကကမ္မံ ကတွာ ဥပ္ပဇ္ဇန္တိ တမ္ဗပဏ္ဏိဒီပေ အဘယစောရနာဂစောရာဒယော ဝိယ. တေသံ အတ္တဘာဝေါ တိဂါဝုတိကော ဟောတိ၊ ဝဂ္ဂုလီနံ ဝိယ ဒီဃနခါ ဟောန္တိ. တေ ရုက္ခေ ဝဂ္ဂုလိယော ဝိယ နခေဟိ စက္ကဝါဠပဗ္ဗတပါဒေ လဂ္ဂန္တိ. ယဒါ သံသပ္ပန္တာ အညမညဿ ဟတ္ထပါသဂတာ ဟောန္တိ၊ အထ ‘‘ဘက္ခော နော လဒ္ဓေါ’’တိ မညမာနာ တတ္ထ ဗျာဝဋာ ဝိပရိဝတ္တိတွာ လောကသန္ဓာရကဥဒကေ ပတန္တိ၊ ဝါတေ ပဟရန္တေပိ မဓုကဖလာနိ ဝိယ ဆိဇ္ဇိတွာ ဥဒကေ ပတန္တိ၊ ပတိတမတ္တာဝ အစ္စန္တခါရေ ဥဒကေ ပိဋ္ဌပိဏ္ဍိ ဝိယ ဝိလီယန္တိ. အညေပိ ကိရ ဘော သန္တိ သတ္တာတိ ဘော ယထာ မယံ မဟာဒုက္ခံ အနုဘဝါမ၊ ဧဝံ အညေပိ ကိရ သတ္တာ ဣဒံ ဒုက္ခံ အနုဘဝနတ္ထာယ ဣဓူပပန္နာတိ တံဒိဝသံ ပဿန္တိ. အယံ ပန ဩဘာသော ဧကယာဂုပါနမတ္တမ္ပိ န တိဋ္ဌတိ. ယာဝတာ နိဒ္ဒါယိတွာ ပဗုဒ္ဓေါ အာရမ္မဏံ ဝိဘာဝေတိ၊ တတ္တကံ ကာလံ ဟောတိ. ဒီဃဘာဏကာ ပန ‘‘အစ္ဆရာသင်္ဃာတမတ္တမေဝ ဝိဇ္ဇုဩဘာသော ဝိယ နိစ္ဆရိတွာ ကိံ ဣဒန္တိ ဘဏန္တာနံယေဝ အန္တရဓာယတီ’’တိ ဝဒန္တိ.
၈. ဒုတိယတထာဂတအစ္ဆရိယသုတ္တဝဏ္ဏနာ
၁၂၈. အဋ္ဌမေ တဏှာဒိဋ္ဌီဟိ အလ္လီယိတဗ္ဗဋ္ဌေန အာလယောတိ ပဉ္စ ကာမဂုဏာ၊ သကလမေဝ ဝါ ဝဋ္ဋံ. အာရမန္တိ ဧတ္ထာတိ အာရာမော၊ အာလယော အာရာမော ဧတိဿာတိ အာလယာရာမာ. အာလယေ ရတာတိ အာလယရတာ. အာလယေ သမ္မုဒိတာတိ အာလယသမ္မုဒိတာ. အနာလယေ ဓမ္မေတိ အာလယပဋိပက္ခေ ဝိဝဋ္ဋူပနိဿိတေ အရိယဓမ္မေ. သုဿူသတီတိ သောတုကာမော ဟောတိ. သောတံ ဩဒဟတီတိ သောတံ ဌပေတိ. အညာ စိတ္တံ ဥပဋ္ဌပေတီတိ အာဇာနနတ္ထာယ စိတ္တံ ပစ္စုပဋ္ဌပေတိ. မာနောတိ မညနာ၊ မညိတဗ္ဗဋ္ဌေန ဝါ သကလံ ဝဋ္ဋမေဝ. မာနဝိနယေ ဓမ္မေတိ မာနဝိနယဓမ္မေ. ဥပသမပဋိပက္ခော အနုပသမော၊ အနုပသန္တဋ္ဌေန ဝါ ဝဋ္ဋမေဝ အနုပသမော နာမ. ဩပသမိကေတိ ဥပသမကရေ ဝိဝဋ္ဋူပနိဿိတေ. အဝိဇ္ဇာယ ဂတာ သမန္နာဂတာတိ အဝိဇ္ဇာဂတာ. အဝိဇ္ဇဏ္ဍကောသေန ပရိယောနဒ္ဓတ္တာ အဏ္ဍံ ဝိယ ဘူတာတိ အဏ္ဍဘူတာ. သမန္တတော ဩနဒ္ဓါတိ ပရိယောနဒ္ဓါ. အဝိဇ္ဇာဝိနယေတိ အဝိဇ္ဇာဝိနယော ဝုစ္စတိ အရဟတ္တံ၊ တံနိဿိတေ ဓမ္မေ ဒေသိယမာနေတိ အတ္ထော. ဣတိ ဣမသ္မိံ သုတ္တေ စတူသု ဌာနေသု ဝဋ္ဋံ၊ စတူသု ဝိဝဋ္ဋံ ကထိတံ.
၉. အာနန္ဒအစ္ဆရိယသုတ္တဝဏ္ဏနာ
၁၂၉. နဝမေ ဘိက္ခုပရိသာ အာနန္ဒံ ဒဿနာယာတိ ယေ ဘဂဝန္တံ ပဿိတုကာမာ ထေရံ ဥပသင်္ကမန္တိ၊ ယေ ဝါ ‘‘အာယသ္မာ ကိရာနန္ဒော သမန္တပါသာဒိကော အဘိရူပေါ ဒဿနီယော ဗဟုဿုတော သံဃသောဘနော’’တိ ထေရဿ ဂုဏေ သုတွာ အာဂစ္ဆန္တိ၊ တေ သန္ဓာယ ‘‘ဘိက္ခုပရိသာ အာနန္ဒံ ဒဿနာယ ဥပသင်္ကမတီ’’တိ ဝုတ္တံ. ဧသ နယော သဗ္ဗတ္ထ. အတ္တမနာတိ ‘‘သဝနေန နော ဒဿနံ သမေတီ’’တိ သကမနာ တုဋ္ဌစိတ္တာ. ဓမ္မန္တိ ‘‘ကစ္စိ၊ အာဝုသော၊ ခမနီယံ၊ ကစ္စိ ယာပနီယံ၊ ကစ္စိ ယောနိသောမနသိကာရကမ္မံ ကရောထ၊ အာစရိယုပဇ္ဈာယဝတ္တံ ပူရေထာ’’တိ ဧဝရူပံ ပဋိသန္ထာရဓမ္မံ. တတ္ထ ဘိက္ခုနီသု ‘‘ကစ္စိ၊ ဘဂိနိယော၊ အဋ္ဌ ဂရုဓမ္မေ သမာဒါယ ဝတ္တထာ’’တိ ဣဒမ္ပိ နာနာကရဏံ ဟောတိ. ဥပါသကေသု ‘‘သွာဂတံ၊ ဥပါသက၊ န တေ ကိဉ္စိ သီသံ ဝါ အင်္ဂံ ဝါ ရုဇ္ဇတိ၊ အရောဂါ တေ ပုတ္တဘာတရော’’တိ န ဧဝံ ပဋိသန္ထာရံ ကရောတိ၊ ဧဝံ ပန ကရောတိ – ‘‘ကထံ၊ ဥပါသကာ၊ တီဏိ သရဏာနိ ပဉ္စ သီလာနိ ရက္ခထ၊ မာသဿ အဋ္ဌ ဥပေါသထေ ကရောထ၊ မာတာပိတူနံ ဥပဋ္ဌာနဝတ္တံ ပူရေထ၊ ဓမ္မိကသမဏဗြာဟ္မဏေ ပဋိဇဂ္ဂထာ’’တိ. ဥပါသိကာသုပိ ဧသေဝ နယော.
၁၀. စက္ကဝတ္တိအစ္ဆရိယသုတ္တဝဏ္ဏနာ
၁၃၀. ဒသမေ ခတ္တိယပရိသာတိ အဘိသိတ္တာ အနဘိသိတ္တာ စ ခတ္တိယာ. တေ ဟိ ကိရ ‘‘ရာဇာ စက္ကဝတ္တီ နာမ အဘိရူပေါ ပါသာဒိကော ဟောတိ၊ အာကာသေန ဝိစရန္တော ရဇ္ဇံ အနုသာသတိ၊ ဓမ္မိကော ဓမ္မရာဇာ’’တိ တဿ ဂုဏကထံ သုတွာ သဝနေန ဒဿနမှိ သမေန္တေ အတ္တမနာ ဟောန္တိ. ဘာသတီတိ ‘‘ကထံ၊ တာတာ၊ ရာဇဓမ္မံ ပူရေထ၊ ပဝေဏိံ ရက္ခထာ’’တိ ပဋိသန္ထာရံ ကရောတိ. ဗြာဟ္မဏေသု ပန ‘‘ကထဉ္စ၊ အာစရိယာ၊ မန္တေ ဝါစေထ၊ အန္တေဝါသိကာ မန္တေ ဂဏှန္တိ၊ ဒက္ခိဏံ ဝါ ဝတ္ထာနိ ဝါ သီလံ ဝါ လဘထာ’’တိ ဧဝံ ပဋိသန္ထာရံ ကရောတိ. ဂဟပတီသု ‘‘ကထံ၊ တာတာ၊ န ဝေါ ရာဇကုလတော ဒဏ္ဍေန ဝါ ဗန္ဓနေန ဝါ ပီဠာ အတ္ထိ၊ သမ္မာ ဒေဝေါ ဓာရံ အနုပ္ပဝေစ္ဆတိ၊ သဿာနိ သမ္ပဇ္ဇန္တီ’’တိ ဧဝံ ပဋိသန္ထာရံ ကရောတိ. သမဏေသု ‘‘ကထံ၊ ဘန္တေ၊ ကစ္စိ ပဗ္ဗဇိတပရိက္ခာရာ သုလဘာ၊ သမဏဓမ္မေ နပ္ပမဇ္ဇထာ’’တိ ဧဝံ ပဋိသန္ထာရံ ကရောတီတိ.
ဘယဝဂ္ဂေါ တတိယော.
(၁၄) ၄. ပုဂ္ဂလဝဂ္ဂေါ
၁. သံယောဇနသုတ္တဝဏ္ဏနာ
၁၃၁. စတုတ္ထဿ ပဌမေ ဥပပတ္တိပဋိလာဘိယာနီတိ ယေဟိ အနန္တရာ ဥပပတ္တိံ ပဋိလဘတိ. ဘဝပဋိလာဘိယာနီတိ ဥပပတ္တိဘဝဿ ပဋိလာဘာယ ပစ္စယာနိ. သကဒါဂါမိဿာတိ ဣဒံ အပ္ပဟီနသံယောဇနေသု အရိယေသု ဥတ္တမကောဋိယာ ဂဟိတံ. ယသ္မာ ပန အန္တရာပရိနိဗ္ဗာယိဿ အန္တရာ ဥပပတ္တိ နတ္ထိ၊ ယံ ပန သော တတ္ထ ဈာနံ သမာပဇ္ဇတိ၊ တံ ကုသလတ္တာ ‘‘ဥပပတ္တိဘဝဿ ပစ္စယော’’ တေဝ သင်္ချံ ဂစ္ဆတိ. တသ္မာဿ ‘‘ဥပပတ္တိပဋိလာဘိယာနိ သံယောဇနာနိ ပဟီနာနိ၊ ဘဝပဋိလာဘိယာနိ သံယောဇနာနိ အပ္ပဟီနာနီ’’တိ ဝုတ္တံ. ဩရမ္ဘာဂိယေသု စ အပ္ပဟီနံ ဥပါဒါယ သကဒါဂါမိဿ အဝိသေသေန ‘‘ဩရမ္ဘာဂိယာနိ သံယောဇနာနိ အပ္ပဟီနာနီ’’တိ ဝုတ္တံ. သေသမေတ္ထ ဥတ္တာနမေဝ.
၂. ပဋိဘာနသုတ္တဝဏ္ဏနာ
၁၃၂. ဒုတိယေ ယုတ္တပ္ပဋိဘာနော နော မုတ္တပ္ပဋိဘာနောတိ ပဉှံ ကထေန္တော ယုတ္တမေဝ ကထေတိ၊ သီဃံ ပန န ကထေတိ၊ သဏိကမေဝ ကထေတီတိ အတ္ထော. ဣမိနာ နယေန သဗ္ဗပဒါနိ ဝေဒိတဗ္ဗာနိ.
၃. ဥဂ္ဃဋိတညူသုတ္တဝဏ္ဏနာ
၁၃၃. တတိယေ စတုန္နမ္ပိ ပုဂ္ဂလာနံ ဣမိနာ သုတ္တေန ဝိသေသော ဝေဒိတဗ္ဗော –
‘‘ကတမော စ ပုဂ္ဂလော ဥဂ္ဃဋိတညူ၊ ယဿ ပုဂ္ဂလဿ သဟ ဥဒါဟဋဝေလာယ ဓမ္မာဘိသမယော ဟောတိ၊ အယံ ဝုစ္စတိ ပုဂ္ဂလော ဥဂ္ဃဋိတညူ. ကတမော စ ပုဂ္ဂလော ဝိပဉ္စိတညူ၊ ယဿ ပုဂ္ဂလဿ ဝိတ္ထာရေန အတ္ထေ ဝိဘဇိယမာနေ ဓမ္မာဘိသမယော ဟောတိ၊ အယံ ဝုစ္စတိ ပုဂ္ဂလော ဝိပဉ္စိတညူ. ကတမော စ ပုဂ္ဂလော နေယျော၊ ယဿ ပုဂ္ဂလဿ ဥဒ္ဒေသတော ပရိပုစ္ဆတော ယောနိသောမနသိကရောတော ကလျာဏမိတ္တေ သေဝတော ဘဇတော ပယိရုပါသတော အနုပုဗ္ဗေန ဓမ္မာဘိသမယော ဟောတိ၊ အယံ ဝုစ္စတိ ပုဂ္ဂလော နေယျော. ကတမော စ ပုဂ္ဂလော ပဒပရမော၊ ယဿ ပုဂ္ဂလဿ ဗဟုမ္ပိ သုဏတော ဗဟုမ္ပိ ဘဏတော ဗဟုမ္ပိ ဓာရယတော ဗဟုမ္ပိ ဝါစယတော န တာယ ဇာတိယာ ဓမ္မာဘိသမယော ဟောတိ၊ အယံ ဝုစ္စတိ ပုဂ္ဂလော ပဒပရမော’’တိ (ပု. ပ. ၁၄၈-၁၅၁).
၄. ဥဋ္ဌာနဖလသုတ္တဝဏ္ဏနာ
၁၃၄. စတုတ္ထေ ဥဋ္ဌာနဝီရိယေနေဝ ဒိဝသံ ဝီတိနာမေတွာ တဿ နိဿန္ဒဖလမတ္တံ ကိဉ္စိဒေဝ လဘိတွာ ဇီဝိကံ ကပ္ပေတိ၊ တံ ပန ဥဋ္ဌာနံ အာဂမ္မ ကိဉ္စိ ပုညဖလံ နပ္ပဋိလဘတိ၊ အယံ ဥဋ္ဌာနဖလူပဇီဝီ န ကမ္မဖလူပဇီဝီ နာမ. စာတုမဟာရာဇိကေ ပန ဒေဝေ အာဒိံ ကတွာ သဗ္ဗေပိ ဒေဝါ ဥဋ္ဌာနဝီရိယေန ဝိနာ ပုညဖလဿေဝ ဥပဇီဝနတော ကမ္မဖလူပဇီဝိနော န ဥဋ္ဌာနဖလူပဇီဝိနော နာမ. ရာဇရာဇမဟာမတ္တာဒယော ဥဋ္ဌာနဖလူပဇီဝိနော စ ကမ္မဖလူပဇီဝိနော စ. နေရယိကသတ္တာ နေဝ ဥဋ္ဌာနဖလူပဇီဝိနော န ကမ္မဖလူပဇီဝိနော. ဣမသ္မိံ သုတ္တေ ပုညဖလမေဝ ကမ္မဖလန္တိ အဓိပ္ပေတံ၊ တဉ္စ တေသံ နတ္ထိ.
၅. သာဝဇ္ဇသုတ္တဝဏ္ဏနာ
၁၃၅. ပဉ္စမေ ပဌမော အန္ဓဗာလပုထုဇ္ဇနော၊ ဒုတိယော အန္တရန္တရာ ကုသလကာရကော လောကိယပုထုဇ္ဇနော၊ တတိယော သောတာပန္နော၊ သကဒါဂါမိအနာဂါမိနောပိ ဧတေနေဝ သင်္ဂဟိတာ. စတုတ္ထော ခီဏာသဝေါ. သော ဟိ ဧကန္တေနေဝ အနဝဇ္ဇော.
၆-၇. သီလသုတ္တာဒိဝဏ္ဏနာ
၁၃၆-၁၃၇. ဆဋ္ဌေ ပဌမော လောကိယမဟာဇနော၊ ဒုတိယော သုက္ခဝိပဿကော သောတာပန္နော စ သကဒါဂါမီ စ၊ တတိယော အနာဂါမီ. သော ဟိ ယသ္မာ တင်္ခဏိကမ္ပိ ဥပပတ္တိနိမိတ္တကံ ဈာနံ ပဋိလဘတိယေဝ၊ တသ္မာ သုက္ခဝိပဿကောပိ သမာဓိသ္မိံ ပရိပူရကာရီယေဝ. စတုတ္ထော ခီဏာသဝေါယေဝ. သော ဟိ သဗ္ဗေသံ သီလာဒိပစ္စနီကာနံ ပဟီနတ္တာ သဗ္ဗတ္ထ ပရိပူရကာရီ နာမ. သတ္တမေပိ ဆဋ္ဌေ ဝုတ္တနယေနေဝ ပုဂ္ဂလပရိစ္ဆေဒေါ ဝေဒိတဗ္ဗော.
၈. နိကဋ္ဌသုတ္တဝဏ္ဏနာ
၁၃၈. အဋ္ဌမေ နိကဋ္ဌကာယောတိ နိဂ္ဂတကာယော. အနိကဋ္ဌစိတ္တောတိ အနုပဝိဋ္ဌစိတ္တော. ကာယေနေဝ ဂါမတော နိက္ခန္တော၊ စိတ္တေန အရညေ ဝသန္တောပိ ဂါမမေဝ ပဝိဋ္ဌောတိ ဝုတ္တံ ဟောတိ. ဣမိနာ နယေန သဗ္ဗတ္ထ အတ္ထော ဝေဒိတဗ္ဗော.
၉. ဓမ္မကထိကသုတ္တဝဏ္ဏနာ
၁၃၉. နဝမေ အသဟိတန္တိ အတ္ထေန အသံယုတ္တံ. န ကုသလာ ဟောတီတိ န ဆေကာ ဟောတိ. သဟိတာသဟိတဿာတိ အတ္ထနိဿိတဿ ဝါ အနိဿိတဿ ဝါ. ဧဝံ သဗ္ဗတ္ထ အတ္ထော ဝေဒိတဗ္ဗော.
၁၀. ဝါဒီသုတ္တဝဏ္ဏနာ
၁၄၀. ဒသမေ အတ္ထတော ပရိယာဒါနံ ဂစ္ဆတီတိ အဋ္ဌကထံ ပုစ္ဆိတော ပရိယာဒါနံ ပရိက္ခယံ ဂစ္ဆတိ၊ ကထေတုံ န သက္ကောတိ. နော ဗျဉ္ဇနတောတိ ဗျဉ္ဇနံ ပနဿ ပဝတ္တတိ န ပရိယာဒိယတိ. ဧသေဝ နယော သဗ္ဗတ္ထာတိ.
ပုဂ္ဂလဝဂ္ဂေါ စတုတ္ထော.
(၁၅) ၅. အာဘာဝဂ္ဂေါ
၁. အာဘာသုတ္တဝဏ္ဏနာ
၁၄၁. ပဉ္စမဿ ပဌမေ အာဘာသနဝသေန စန္ဒောဝ စန္ဒာဘာ. သေသပဒေသုပိ ဧသေဝ နယော.
၂-၅. ပဘာသုတ္တာဒိဝဏ္ဏနာ
၁၄၂-၁၄၅. ဒုတိယာဒီသုပိ ပဘာသနဝသေန စန္ဒောဝ စန္ဒပ္ပဘာ. အာလောကနဝသေန စန္ဒောဝ စန္ဒာလောကော. ဩဘာသနဝသေန စန္ဒောဝ စန္ဒောဘာသော. ပဇ္ဇောတနဝသေန စန္ဒောဝ စန္ဒပဇ္ဇောတောတိ. ဧဝံ သဗ္ဗပဒေသုပိ အတ္ထော ဝေဒိတဗ္ဗော.
၆. ပဌမကာလသုတ္တဝဏ္ဏနာ
၁၄၆. ဆဋ္ဌေ ကာလာတိ ယုတ္တပ္ပယုတ္တကာလာ. ကာလေန ဓမ္မဿဝနန္တိ ယုတ္တပ္ပယုတ္တကာလေ ဓမ္မဿဝနံ. ဓမ္မသာကစ္ဆာတိ ပဉှပုစ္ဆနဝိဿဇ္ဇနဝသေန ပဝတ္တာ သံသန္ဒနကထာ.
၇. ဒုတိယကာလသုတ္တဝဏ္ဏနာ
၁၄၇. သတ္တမေ ကာလာတိ တသ္မိံ တသ္မိံ ကာလေ ဓမ္မဿဝနာဒိဝသေန ပဝတ္တာနံ ကုသလဓမ္မာနံ ဧတံ အဓိဝစနံ. တေ ဘာဝိယန္တိ စေဝ အနုပရိဝတ္တိယန္တိ စ. အာသဝါနံ ခယန္တိ အရဟတ္တံ. အဋ္ဌမံ ဥတ္တာနတ္ထမေဝ.
၉-၁၀. သုစရိတသုတ္တာဒိဝဏ္ဏနာ
၁၄၉-၁၅၀. နဝမေ သဏှာ ဝါစာတိ မုဒုကဝါစာ. မန္တဘာသာတိ မန္တသင်္ခါတာယ ပညာယ ပရိစ္ဆိန္ဒိတွာ ကထိတကထာ. ဒသမေ သီလသာရောတိ သာရသမ္ပာပကံ သီလံ. သေသေသုပိ ဧသေဝ နယော.
အာဘာဝဂ္ဂေါ ပဉ္စမော.
တတိယပဏ္ဏာသကံ နိဋ္ဌိတံ.