(၂) ဥပ္ပါဒုပ္ပန္နဝါရော

၁၀၆. (က) ယဿ ယံ စိတ္တံ ဥပ္ပဇ္ဇတိ တဿ တံ စိတ္တံ ဥပ္ပန္နန္တိ? အာမန္တာ.

(ခ) ယဿ ဝါ ပန ယံ စိတ္တံ ဥပ္ပန္နံ တဿ တံ စိတ္တံ ဥပ္ပဇ္ဇတီတိ?

ဘင်္ဂက္ခဏေ စိတ္တံ ဥပ္ပန္နံ၊ နော စ တဿ တံ စိတ္တံ ဥပ္ပဇ္ဇတိ. ဥပ္ပါဒက္ခဏေ စိတ္တံ ဥပ္ပန္နဉ္စေဝ ဥပ္ပဇ္ဇတိ စ.

(က) ယဿ ယံ စိတ္တံ န ဥပ္ပဇ္ဇတိ တဿ တံ စိတ္တံ န ဥပ္ပန္နန္တိ?

ဘင်္ဂက္ခဏေ စိတ္တံ န ဥပ္ပဇ္ဇတိ၊ နော စ တဿ တံ စိတ္တံ န ဥပ္ပန္နံ. အတီတာနာဂတံ စိတ္တံ န စေဝ ဥပ္ပဇ္ဇတိ န စ ဥပ္ပန္နံ.

(ခ) ယဿ ဝါ ပန ယံ စိတ္တံ န ဥပ္ပန္နံ တဿ တံ စိတ္တံ န ဥပ္ပဇ္ဇတီတိ? အာမန္တာ.