နမော တဿ ဘဂဝတော အရဟတော သမ္မာသမ္ဗုဒ္ဓဿ
အဘိဓမ္မပိဋကေ
ယမကပါဠိ (ဒုတိယော ဘာဂေါ)
၆. သင်္ခါရယမကံ
၁. ပဏ္ဏတ္တိဝါရော
(က) ဥဒ္ဒေသော
၁. တယော သင်္ခါရာ – ကာယသင်္ခါရော၊ ဝစီသင်္ခါရော၊ စိတ္တသင်္ခါရောတိ. အဿာသပဿာသာ ကာယသင်္ခါရော၊ ဝိတက္ကဝိစာရာ ဝစီသင်္ခါရော၊ သညာ စ ဝေဒနာ စ စိတ္တသင်္ခါရော. ဌပေတွာ ဝိတက္ကဝိစာရေ သဗ္ဗေပိ စိတ္တသမ္ပယုတ္တကာ ဓမ္မာ စိတ္တသင်္ခါရော.
၁. ပဒသောဓနဝါရော
(က) အနုလောမံ
၂. (က) ကာယော ကာယသင်္ခါရော?
(ခ) ကာယသင်္ခါရော ကာယော?
(က) ဝစီ ဝစီသင်္ခါရော?
(ခ) ဝစီသင်္ခါရော ဝစီ?
(က) စိတ္တံ စိတ္တသင်္ခါရော?
(ခ) စိတ္တသင်္ခါရော စိတ္တံ?
(ခ) ပစ္စနီကံ
၃. (က) န ကာယော န ကာယသင်္ခါရော?
(ခ) န ကာယသင်္ခါရော န ကာယော?
(က) န ဝစီ န ဝစီသင်္ခါရော?
(ခ) န ဝစီသင်္ခါရော န ဝစီ?
(က) န စိတ္တံ န စိတ္တသင်္ခါရော?
(ခ) န စိတ္တသင်္ခါရော န စိတ္တံ?
၂. ပဒသောဓနမူလစက္ကဝါရော
(က) အနုလောမံ
၄. (က) ကာယော ကာယသင်္ခါရော?
(ခ) သင်္ခါရာ ဝစီသင်္ခါရော?
(က) ကာယော ကာယသင်္ခါရော?
(ခ) သင်္ခါရာ စိတ္တသင်္ခါရော?
(က) ဝစီ ဝစီသင်္ခါရော?
(ခ) သင်္ခါရာ ကာယသင်္ခါရော?
(က) ဝစီ ဝစီသင်္ခါရော?
(ခ) သင်္ခါရာ စိတ္တသင်္ခါရော?
(က) စိတ္တံ စိတ္တသင်္ခါရော?
(ခ) သင်္ခါရာ ကာယသင်္ခါရော?
(က) စိတ္တံ စိတ္တသင်္ခါရော?
(ခ) သင်္ခါရာ ဝစီသင်္ခါရော?
(ခ) ပစ္စနီကံ
၅. (က) န ကာယော န ကာယသင်္ခါရော?
(ခ) န သင်္ခါရာ န ဝစီသင်္ခါရော?
(က) န ကာယော န ကာယသင်္ခါရော?
(ခ) န သင်္ခါရာ န စိတ္တသင်္ခါရော?
(က) န ဝစီ န ဝစီသင်္ခါရော?
(ခ) န သင်္ခါရာ န ကာယသင်္ခါရော?
(က) န ဝစီ န ဝစီသင်္ခါရော?
(ခ) န သင်္ခါရာ န စိတ္တသင်္ခါရော?
(က) န စိတ္တံ န စိတ္တသင်္ခါရော?
(ခ) န သင်္ခါရာ န ကာယသင်္ခါရော?
(က) န စိတ္တံ န စိတ္တသင်္ခါရော?
(ခ) န သင်္ခါရာ န ဝစီသင်္ခါရော?
၃. သုဒ္ဓသင်္ခါရဝါရော
(က) အနုလောမံ
၆. (က) ကာယသင်္ခါရော ဝစီသင်္ခါရော?
(ခ) ဝစီသင်္ခါရော ကာယသင်္ခါရော?
(က) ကာယသင်္ခါရော စိတ္တသင်္ခါရော?
(ခ) စိတ္တသင်္ခါရော ကာယသင်္ခါရော?
(က) ဝစီသင်္ခါရော စိတ္တသင်္ခါရော?
(ခ) စိတ္တသင်္ခါရော ဝစီသင်္ခါရော?
(ခ) ပစ္စနီကံ
၇. (က) န ကာယသင်္ခါရော န ဝစီသင်္ခါရော?
(ခ) န ဝစီသင်္ခါရော န ကာယသင်္ခါရော?
(က) န ကာယသင်္ခါရော န စိတ္တသင်္ခါရော?
(ခ) န စိတ္တသင်္ခါရော န ကာယသင်္ခါရော?
(က) န ဝစီသင်္ခါရော န စိတ္တသင်္ခါရော?
(ခ) န စိတ္တသင်္ခါရော န ဝစီသင်္ခါရော?
ပဏ္ဏတ္တိဥဒ္ဒေသဝါရော.
ပဏ္ဏတ္တိဝါရော.
(ခ) နိဒ္ဒေသော
၁. ပဒသောဓနဝါရော
(က) အနုလောမံ
၈. (က) ကာယော ကာယသင်္ခါရောတိ? နော.
(ခ) ကာယသင်္ခါရော ကာယောတိ? နော.
(က) ဝစီ ဝစီသင်္ခါရောတိ? နော.
(ခ) ဝစီသင်္ခါရော ဝစီတိ? နော.
(က) စိတ္တံ စိတ္တသင်္ခါရောတိ? နော.
(ခ) စိတ္တသင်္ခါရော စိတ္တန္တိ? နော.
(ခ) ပစ္စနီကံ
၉. (က) န ကာယော န ကာယသင်္ခါရောတိ?
ကာယသင်္ခါရော န ကာယော၊ ကာယသင်္ခါရော. ကာယဉ္စ ကာယသင်္ခါရဉ္စ ဌပေတွာ အဝသေသာ န စေဝ ကာယော န စ ကာယသင်္ခါရော.
(ခ) န ကာယသင်္ခါရော န ကာယောတိ?
ကာယော န ကာယသင်္ခါရော၊ ကာယော. ကာယဉ္စ ကာယသင်္ခါရဉ္စ ဌပေတွာ အဝသေသာ န စေဝ ကာယော န စ ကာယသင်္ခါရော.
(က) န ဝစီ န ဝစီသင်္ခါရောတိ?
ဝစီသင်္ခါရော န ဝစီ၊ ဝစီသင်္ခါရော. ဝစိဉ္စ ဝစီသင်္ခါရဉ္စ ဌပေတွာ အဝသေသာ န စေဝ ဝစီ န စ ဝစီသင်္ခါရော.
(ခ) န ဝစီသင်္ခါရော န ဝစီတိ?
ဝစီ န ဝစီသင်္ခါရော၊ ဝစီ. ဝစိဉ္စ ဝစီသင်္ခါရဉ္စ ဌပေတွာ အဝသေသာ န စေဝ ဝစီ န စ ဝစီသင်္ခါရော.
(က) န စိတ္တံ န စိတ္တသင်္ခါရောတိ?
စိတ္တသင်္ခါရော န စိတ္တံ၊ စိတ္တသင်္ခါရော. စိတ္တဉ္စ စိတ္တသင်္ခါရဉ္စ ဌပေတွာ အဝသေသာ န စေဝ စိတ္တံ န စ စိတ္တသင်္ခါရော.
(ခ) န စိတ္တသင်္ခါရော န စိတ္တန္တိ?
စိတ္တံ န စိတ္တသင်္ခါရော၊ စိတ္တံ. စိတ္တဉ္စ စိတ္တသင်္ခါရဉ္စ ဌပေတွာ အဝသေသာ န စေဝ စိတ္တံ န စ စိတ္တသင်္ခါရော.
၂. ပဒသောဓနမူလစက္ကဝါရော
(က) အနုလောမံ
၁၀. (က) ကာယော ကာယသင်္ခါရောတိ? နော.
(ခ) သင်္ခါရာ ဝစီသင်္ခါရောတိ?
ဝစီသင်္ခါရော သင်္ခါရော စေဝ ဝစီသင်္ခါရော စ. အဝသေသာ သင်္ခါရာ [အဝသေသာ သင်္ခါရာ သင်္ခါရာ (သီ. သျာ. ကံ.)] န ဝစီသင်္ခါရော.
(က) ကာယော ကာယသင်္ခါရောတိ? နော.
(ခ) သင်္ခါရာ စိတ္တသင်္ခါရောတိ?
စိတ္တသင်္ခါရော သင်္ခါရော စေဝ စိတ္တသင်္ခါရော စ. အဝသေသာ သင်္ခါရာ န စိတ္တသင်္ခါရော.
၁၁. (က) ဝစီ ဝစီသင်္ခါရောတိ? နော.
(ခ) သင်္ခါရာ ကာယသင်္ခါရောတိ?
ကာယသင်္ခါရော သင်္ခါရော စေဝ ကာယသင်္ခါရော စ. အဝသေသာ သင်္ခါရာ န ကာယသင်္ခါရော.
(က) ဝစီ ဝစီသင်္ခါရောတိ? နော.
(ခ) သင်္ခါရာ စိတ္တသင်္ခါရောတိ?
စိတ္တသင်္ခါရော သင်္ခါရော စေဝ စိတ္တသင်္ခါရော စ. အဝသေသာ သင်္ခါရာ န စိတ္တသင်္ခါရော.
၁၂. (က) စိတ္တံ စိတ္တသင်္ခါရောတိ? နော.
(ခ) သင်္ခါရာ ကာယသင်္ခါရောတိ?
ကာယသင်္ခါရော သင်္ခါရော စေဝ ကာယသင်္ခါရော စ. အဝသေသာ သင်္ခါရာ န ကာယသင်္ခါရော.
(က) စိတ္တံ စိတ္တသင်္ခါရောတိ? နော.
(ခ) သင်္ခါရာ ဝစီသင်္ခါရောတိ?
ဝစီသင်္ခါရော သင်္ခါရော စေဝ ဝစီသင်္ခါရော စ. အဝသေသာ သင်္ခါရာ န ဝစီသင်္ခါရော.
(ခ) ပစ္စနီကံ
၁၃. (က) န ကာယော န ကာယသင်္ခါရောတိ?
ကာယသင်္ခါရော န ကာယော၊ ကာယသင်္ခါရော. ကာယဉ္စ ကာယသင်္ခါရဉ္စ ဌပေတွာ အဝသေသာ န စေဝ ကာယော န စ ကာယသင်္ခါရော.
(ခ) န သင်္ခါရာ န ဝစီသင်္ခါရောတိ? အာမန္တာ.
(က) န ကာယော န ကာယသင်္ခါရောတိ?
ကာယသင်္ခါရော န ကာယော၊ ကာယသင်္ခါရော. ကာယဉ္စ ကာယသင်္ခါရဉ္စ ဌပေတွာ အဝသေသာ န စေဝ ကာယော န စ ကာယသင်္ခါရော.
(ခ) န သင်္ခါရာ န စိတ္တသင်္ခါရောတိ? အာမန္တာ.
၁၄. (က) န ဝစီ န ဝစီသင်္ခါရောတိ?
ဝစီသင်္ခါရော န ဝစီ၊ ဝစီသင်္ခါရော. ဝစိဉ္စ ဝစီသင်္ခါရဉ္စ ဌပေတွာ အဝသေသာ န စေဝ ဝစီ န စ ဝစီသင်္ခါရော.
(ခ) န သင်္ခါရာ န ကာယသင်္ခါရောတိ? အာမန္တာ.
(က) န ဝစီ န ဝစီသင်္ခါရောတိ?
ဝစီသင်္ခါရော န ဝစီ၊ ဝစီသင်္ခါရော. ဝစိဉ္စ ဝစီသင်္ခါရဉ္စ ဌပေတွာ အဝသေသာ န စေဝ ဝစီ န စ ဝစီသင်္ခါရော.
(ခ) န သင်္ခါရာ န စိတ္တသင်္ခါရောတိ? အာမန္တာ.
၁၅. (က) န စိတ္တံ န စိတ္တသင်္ခါရောတိ?
စိတ္တသင်္ခါရော န စိတ္တံ၊ စိတ္တသင်္ခါရော. စိတ္တဉ္စ စိတ္တသင်္ခါရဉ္စ ဌပေတွာ အဝသေသာ န စေဝ စိတ္တံ န စ စိတ္တသင်္ခါရော.
(ခ) န သင်္ခါရာ န ကာယသင်္ခါရောတိ? အာမန္တာ.
(က) န စိတ္တံ န စိတ္တသင်္ခါရောတိ?
စိတ္တသင်္ခါရော န စိတ္တံ၊ စိတ္တသင်္ခါရော. စိတ္တဉ္စ စိတ္တသင်္ခါရဉ္စ ဌပေတွာ အဝသေသာ န စေဝ စိတ္တံ န စ စိတ္တသင်္ခါရော.
(ခ) န သင်္ခါရာ န ဝစီသင်္ခါရောတိ? အာမန္တာ.
၃. သုဒ္ဓသင်္ခါရဝါရော
(က) အနုလောမံ
၁၆. (က) ကာယသင်္ခါရော ဝစီသင်္ခါရောတိ? နော.
(ခ) ဝစီသင်္ခါရော ကာယသင်္ခါရောတိ? နော.
(က) ကာယသင်္ခါရော စိတ္တသင်္ခါရောတိ? နော.
(ခ) စိတ္တသင်္ခါရော ကာယသင်္ခါရောတိ? နော.
(က) ဝစီသင်္ခါရော စိတ္တသင်္ခါရောတိ? နော.
(ခ) စိတ္တသင်္ခါရော ဝစီသင်္ခါရောတိ? နော.
(ခ) ပစ္စနီကံ
၁၇. (က) န ကာယသင်္ခါရော န ဝစီသင်္ခါရောတိ?
ဝစီသင်္ခါရော န ကာယသင်္ခါရော၊ ဝစီသင်္ခါရော. ကာယသင်္ခါရဉ္စ ဝစီသင်္ခါရဉ္စ ဌပေတွာ အဝသေသာ န စေဝ ကာယသင်္ခါရော န စ ဝစီသင်္ခါရော.
(ခ) န ဝစီသင်္ခါရော န ကာယသင်္ခါရောတိ?
ကာယသင်္ခါရော န ဝစီသင်္ခါရော၊ ကာယသင်္ခါရော. ဝစီသင်္ခါရဉ္စ ကာယသင်္ခါရဉ္စ ဌပေတွာ အဝသေသာ န စေဝ ဝစီသင်္ခါရော န စ ကာယသင်္ခါရော.
(က) န ကာယသင်္ခါရော န စိတ္တသင်္ခါရောတိ?
စိတ္တသင်္ခါရော န ကာယသင်္ခါရော၊ စိတ္တသင်္ခါရော. ကာယသင်္ခါရဉ္စ စိတ္တသင်္ခါရဉ္စ ဌပေတွာ အဝသေသာ န စေဝ ကာယသင်္ခါရော န စ စိတ္တသင်္ခါရော.
(ခ) န စိတ္တသင်္ခါရော န ကာယသင်္ခါရောတိ?
ကာယသင်္ခါရော န စိတ္တသင်္ခါရော၊ ကာယသင်္ခါရော. စိတ္တသင်္ခါရဉ္စ ကာယသင်္ခါရဉ္စ ဌပေတွာ အဝသေသာ န စေဝ စိတ္တသင်္ခါရော န စ ကာယသင်္ခါရော.
၁၈. (က) န ဝစီသင်္ခါရော န စိတ္တသင်္ခါရောတိ?
စိတ္တသင်္ခါရော န ဝစီသင်္ခါရော၊ စိတ္တသင်္ခါရော. ဝစီသင်္ခါရဉ္စ စိတ္တသင်္ခါရဉ္စ ဌပေတွာ အဝသေသာ န စေဝ ဝစီသင်္ခါရော န စ စိတ္တသင်္ခါရော.
(ခ) န စိတ္တသင်္ခါရော န ဝစီသင်္ခါရောတိ?
ဝစီသင်္ခါရော န စိတ္တသင်္ခါရော၊ ဝစီသင်္ခါရော. စိတ္တသင်္ခါရဉ္စ ဝစီသင်္ခါရဉ္စ ဌပေတွာ အဝသေသာ န စေဝ စိတ္တသင်္ခါရော န စ ဝစီသင်္ခါရော.
ပဏ္ဏတ္တိနိဒ္ဒေသဝါရော.