၃. ပုဂ္ဂလဓမ္မဝါရော
(၁) ဥပ္ပါဒနိရောဓကာလသမ္ဘေဒဝါရော
၁၀၅. (က) ယဿ ယံ စိတ္တံ ဥပ္ပဇ္ဇတိ န နိရုဇ္ဈတိ တဿ တံ စိတ္တံ နိရုဇ္ဈိဿတိ န ဥပ္ပဇ္ဇိဿတီတိ? အာမန္တာ.
(ခ) ယဿ ဝါ ပန ယံ စိတ္တံ နိရုဇ္ဈိဿတိ န ဥပ္ပဇ္ဇိဿတိ တဿ တံ စိတ္တံ ဥပ္ပဇ္ဇတိ န နိရုဇ္ဈတီတိ? အာမန္တာ.
(က) ယဿ ယံ စိတ္တံ န ဥပ္ပဇ္ဇတိ နိရုဇ္ဈတိ တဿ တံ စိတ္တံ န နိရုဇ္ဈိဿတိ ဥပ္ပဇ္ဇိဿတီတိ? နော.
(ခ) ယဿ ဝါ ပန ယံ စိတ္တံ န နိရုဇ္ဈိဿတိ ဥပ္ပဇ္ဇိဿတိ တဿ တံ စိတ္တံ န ဥပ္ပဇ္ဇတိ နိရုဇ္ဈတီတိ? နတ္ထိ.
(၂) ဥပ္ပါဒုပ္ပန္နဝါရော
၁၀၆. (က) ယဿ ယံ စိတ္တံ ဥပ္ပဇ္ဇတိ တဿ တံ စိတ္တံ ဥပ္ပန္နန္တိ? အာမန္တာ.
(ခ) ယဿ ဝါ ပန ယံ စိတ္တံ ဥပ္ပန္နံ တဿ တံ စိတ္တံ ဥပ္ပဇ္ဇတီတိ?
ဘင်္ဂက္ခဏေ စိတ္တံ ဥပ္ပန္နံ၊ နော စ တဿ တံ စိတ္တံ ဥပ္ပဇ္ဇတိ. ဥပ္ပါဒက္ခဏေ စိတ္တံ ဥပ္ပန္နဉ္စေဝ ဥပ္ပဇ္ဇတိ စ.
(က) ယဿ ယံ စိတ္တံ န ဥပ္ပဇ္ဇတိ တဿ တံ စိတ္တံ န ဥပ္ပန္နန္တိ?
ဘင်္ဂက္ခဏေ စိတ္တံ န ဥပ္ပဇ္ဇတိ၊ နော စ တဿ တံ စိတ္တံ န ဥပ္ပန္နံ. အတီတာနာဂတံ စိတ္တံ န စေဝ ဥပ္ပဇ္ဇတိ န စ ဥပ္ပန္နံ.
(ခ) ယဿ ဝါ ပန ယံ စိတ္တံ န ဥပ္ပန္နံ တဿ တံ စိတ္တံ န ဥပ္ပဇ္ဇတီတိ? အာမန္တာ.
(၃) နိရောဓုပ္ပန္နဝါရော
၁၀၇. (က) ယဿ ယံ စိတ္တံ နိရုဇ္ဈတိ တဿ တံ စိတ္တံ ဥပ္ပန္နန္တိ? အာမန္တာ.
(ခ) ယဿ ဝါ ပန ယံ စိတ္တံ ဥပ္ပန္နံ တဿ တံ စိတ္တံ နိရုဇ္ဈတီတိ?
ဥပ္ပါဒက္ခဏေ စိတ္တံ ဥပ္ပန္နံ၊ နော စ တဿ တံ စိတ္တံ နိရုဇ္ဈတိ. ဘင်္ဂက္ခဏေ စိတ္တံ ဥပ္ပန္နဉ္စေဝ နိရုဇ္ဈတိ စ.
(က) ယဿ ယံ စိတ္တံ န နိရုဇ္ဈတိ တဿ တံ စိတ္တံ န ဥပ္ပန္နန္တိ?
ဥပ္ပါဒက္ခဏေ စိတ္တံ န နိရုဇ္ဈတိ၊ နော စ တဿ တံ စိတ္တံ န ဥပ္ပန္နံ. အတီတာနာဂတံ စိတ္တံ န စေဝ နိရုဇ္ဈတိ န စ ဥပ္ပန္နံ.
(ခ) ယဿ ဝါ ပန ယံ စိတ္တံ န ဥပ္ပန္နံ တဿ တံ စိတ္တံ န နိရုဇ္ဈတီတိ? အာမန္တာ.
(၄) ဥပ္ပါဒဝါရော
၁၀၈. (က) ယဿ ယံ စိတ္တံ ဥပ္ပဇ္ဇတိ တဿ တံ စိတ္တံ ဥပ္ပဇ္ဇိတ္ထာတိ? နော.
(ခ) ယဿ ဝါ ပန ယံ စိတ္တံ ဥပ္ပဇ္ဇိတ္ထ တဿ တံ စိတ္တံ ဥပ္ပဇ္ဇတီတိ? နော.
(က) ယဿ ယံ စိတ္တံ န ဥပ္ပဇ္ဇတိ တဿ တံ စိတ္တံ န ဥပ္ပဇ္ဇိတ္ထာတိ?
အတီတံ စိတ္တံ န ဥပ္ပဇ္ဇတိ၊ နော စ တဿ တံ စိတ္တံ န ဥပ္ပဇ္ဇိတ္ထ. ဘင်္ဂက္ခဏေ အနာဂတဉ္စ စိတ္တံ န စေဝ ဥပ္ပဇ္ဇတိ န စ ဥပ္ပဇ္ဇိတ္ထ.
(ခ) ယဿ ဝါ ပန ယံ စိတ္တံ န ဥပ္ပဇ္ဇိတ္ထ တဿ တံ စိတ္တံ န ဥပ္ပဇ္ဇတီတိ?
ဥပ္ပါဒက္ခဏေ စိတ္တံ န ဥပ္ပဇ္ဇိတ္ထ၊ နော စ တဿ တံ စိတ္တံ န ဥပ္ပဇ္ဇတိ. ဘင်္ဂက္ခဏေ အနာဂတဉ္စ စိတ္တံ န စေဝ ဥပ္ပဇ္ဇိတ္ထ န စ ဥပ္ပဇ္ဇတိ.
၁၀၉. (က) ယဿ ယံ စိတ္တံ ဥပ္ပဇ္ဇတိ တဿ တံ စိတ္တံ ဥပ္ပဇ္ဇိဿတီတိ? နော.
(ခ) ယဿ ဝါ ပန ယံ စိတ္တံ ဥပ္ပဇ္ဇိဿတိ တဿ တံ စိတ္တံ ဥပ္ပဇ္ဇတီတိ? နော.
(က) ယဿ ယံ စိတ္တံ န ဥပ္ပဇ္ဇတိ တဿ တံ စိတ္တံ န ဥပ္ပဇ္ဇိဿတီတိ?
အနာဂတံ စိတ္တံ န ဥပ္ပဇ္ဇတိ၊ နော စ တဿ တံ စိတ္တံ န ဥပ္ပဇ္ဇိဿတိ. ဘင်္ဂက္ခဏေ အတီတဉ္စ စိတ္တံ န စေဝ ဥပ္ပဇ္ဇတိ န စ ဥပ္ပဇ္ဇိဿတိ.
(ခ) ယဿ ဝါ ပန ယံ စိတ္တံ န ဥပ္ပဇ္ဇိဿတိ တဿ တံ စိတ္တံ န ဥပ္ပဇ္ဇတီတိ?
ဥပ္ပါဒက္ခဏေ စိတ္တံ န ဥပ္ပဇ္ဇိဿတိ၊ နော စ တဿ တံ စိတ္တံ န ဥပ္ပဇ္ဇတိ. ဘင်္ဂက္ခဏေ အတီတဉ္စ စိတ္တံ န စေဝ ဥပ္ပဇ္ဇိဿတိ န စ ဥပ္ပဇ္ဇတိ.
၁၁၀. (က) ယဿ ယံ စိတ္တံ ဥပ္ပဇ္ဇိတ္ထ တဿ တံ စိတ္တံ ဥပ္ပဇ္ဇိဿတီတိ? နော.
(ခ) ယဿ ဝါ ပန ယံ စိတ္တံ ဥပ္ပဇ္ဇိဿတိ တဿ တံ စိတ္တံ ဥပ္ပဇ္ဇိတ္ထာတိ? နော.
(က) ယဿ ယံ စိတ္တံ န ဥပ္ပဇ္ဇိတ္ထ တဿ တံ စိတ္တံ န ဥပ္ပဇ္ဇိဿတီတိ?
အနာဂတံ စိတ္တံ န ဥပ္ပဇ္ဇိတ္ထ၊ နော စ တဿ တံ စိတ္တံ န ဥပ္ပဇ္ဇိဿတိ. ပစ္စုပ္ပန္နံ စိတ္တံ န စေဝ ဥပ္ပဇ္ဇိတ္ထ န စ ဥပ္ပဇ္ဇိဿတိ.
(ခ) ယဿ ဝါ ပန ယံ စိတ္တံ န ဥပ္ပဇ္ဇိဿတိ တဿ တံ စိတ္တံ န ဥပ္ပဇ္ဇိတ္ထာတိ?
အတီတံ စိတ္တံ န ဥပ္ပဇ္ဇိဿတိ၊ နော စ တဿ တံ စိတ္တံ န ဥပ္ပဇ္ဇိတ္ထ. ပစ္စုပ္ပန္နံ စိတ္တံ န စေဝ ဥပ္ပဇ္ဇိဿတိ န စ ဥပ္ပဇ္ဇိတ္ထ.
(၅) နိရောဓဝါရော
၁၁၁. (က) ယဿ ယံ စိတ္တံ နိရုဇ္ဈတိ တဿ တံ စိတ္တံ နိရုဇ္ဈိတ္ထာတိ? နော.
(ခ) ယဿ ဝါ ပန ယံ စိတ္တံ နိရုဇ္ဈိတ္ထ တဿ တံ စိတ္တံ နိရုဇ္ဈတီတိ? နော.
(က) ယဿ ယံ စိတ္တံ န နိရုဇ္ဈတိ တဿ တံ စိတ္တံ န နိရုဇ္ဈိတ္ထာတိ?
အတီတံ စိတ္တံ န နိရုဇ္ဈတိ၊ နော စ တဿ တံ စိတ္တံ န နိရုဇ္ဈိတ္ထ. ဥပ္ပါဒက္ခဏေ အနာဂတဉ္စ စိတ္တံ န စေဝ နိရုဇ္ဈတိ န စ နိရုဇ္ဈိတ္ထ.
(ခ) ယဿ ဝါ ပန ယံ စိတ္တံ န နိရုဇ္ဈိတ္ထ တဿ တံ စိတ္တံ န နိရုဇ္ဈတီတိ?
ဘင်္ဂက္ခဏေ စိတ္တံ န နိရုဇ္ဈိတ္ထ၊ နော စ တဿ တံ စိတ္တံ န နိရုဇ္ဈတိ. ဥပ္ပါဒက္ခဏေ အနာဂတဉ္စ စိတ္တံ န စေဝ နိရုဇ္ဈိတ္ထ န စ နိရုဇ္ဈတိ.
၁၁၂. (က) ယဿ ယံ စိတ္တံ နိရုဇ္ဈတိ တဿ တံ စိတ္တံ နိရုဇ္ဈိဿတီတိ? နော.
(ခ) ယဿ ဝါ ပန ယံ စိတ္တံ နိရုဇ္ဈိဿတိ တဿ တံ စိတ္တံ နိရုဇ္ဈတီတိ? နော.
(က) ယဿ ယံ စိတ္တံ န နိရုဇ္ဈတိ တဿ တံ စိတ္တံ န နိရုဇ္ဈိဿတီတိ?
ဥပ္ပါဒက္ခဏေ အနာဂတဉ္စ စိတ္တံ န နိရုဇ္ဈတိ၊ နော စ တဿ တံ စိတ္တံ န နိရုဇ္ဈိဿတိ. အတီတံ စိတ္တံ န စေဝ နိရုဇ္ဈတိ န စ နိရုဇ္ဈိဿတိ.
(ခ) ယဿ ဝါ ပန ယံ စိတ္တံ န နိရုဇ္ဈိဿတိ တဿ တံ စိတ္တံ န နိရုဇ္ဈတီတိ?
ဘင်္ဂက္ခဏေ စိတ္တံ န နိရုဇ္ဈိဿတိ၊ နော စ တဿ တံ စိတ္တံ န နိရုဇ္ဈတိ. အတီတံ စိတ္တံ န စေဝ နိရုဇ္ဈိဿတိ န စ နိရုဇ္ဈတိ.
၁၁၃. (က) ယဿ ယံ စိတ္တံ နိရုဇ္ဈိတ္ထ တဿ တံ စိတ္တံ နိရုဇ္ဈိဿတီတိ? နော.
(ခ) ယဿ ဝါ ပန ယံ စိတ္တံ နိရုဇ္ဈိဿတိ တဿ တံ စိတ္တံ နိရုဇ္ဈိတ္ထာတိ? နော.
(က) ယဿ ယံ စိတ္တံ န နိရုဇ္ဈိတ္ထ တဿ တံ စိတ္တံ န နိရုဇ္ဈိဿတီတိ?
ဥပ္ပါဒက္ခဏေ အနာဂတဉ္စ စိတ္တံ န နိရုဇ္ဈိတ္ထ၊ နော စ တဿ တံ စိတ္တံ န နိရုဇ္ဈိဿတိ. ဘင်္ဂက္ခဏေ စိတ္တံ န စေဝ နိရုဇ္ဈိတ္ထ န စ နိရုဇ္ဈိဿတိ.
(ခ) ယဿ ဝါ ပန ယံ စိတ္တံ န နိရုဇ္ဈိဿတိ တဿ တံ စိတ္တံ န နိရုဇ္ဈိတ္ထာတိ?
အတီတံ စိတ္တံ န နိရုဇ္ဈိဿတိ၊ နော စ တဿ တံ စိတ္တံ န နိရုဇ္ဈိတ္ထ. ဘင်္ဂက္ခဏေ စိတ္တံ န စေဝ နိရုဇ္ဈိဿတိ န စ နိရုဇ္ဈိတ္ထ.
(ယဿ စိတ္တကေ သကဘာဝေန နိဒ္ဒိဋ္ဌေ၊ ယံ စိတ္တကေ စ ယဿ ယံ စိတ္တကေ စ ဧကတ္တေန နိဒ္ဒိဋ္ဌေ.)
၂. သုတ္တန္တစိတ္တမိဿကဝိသေသော
၁၁၄. ယဿ သရာဂံ စိတ္တံ ဥပ္ပဇ္ဇတိ န နိရုဇ္ဈတိ တဿ သရာဂံ စိတ္တံ နိရုဇ္ဈိဿတိ န ဥပ္ပဇ္ဇိဿတီတိ?
သရာဂပစ္ဆိမစိတ္တဿ ဥပ္ပါဒက္ခဏေ တေသံ သရာဂံ စိတ္တံ ဥပ္ပဇ္ဇတိ န နိရုဇ္ဈတိ၊ နိရုဇ္ဈိဿတိ န ဥပ္ပဇ္ဇိဿတိ. ဣတရေသံ သရာဂစိတ္တဿ ဥပ္ပါဒက္ခဏေ တေသံ။ပေ။.
၃. အဘိဓမ္မစိတ္တမိဿကဝိသေသော
၁၁၅. ယဿ ကုသလံ စိတ္တံ ဥပ္ပဇ္ဇတိ န နိရုဇ္ဈတိ တဿ ကုသလံ စိတ္တံ နိရုဇ္ဈိဿတိ န ဥပ္ပဇ္ဇိဿတီတိ?
ပစ္ဆိမကုသလစိတ္တဿ ဥပ္ပါဒက္ခဏေ တေသံ ကုသလံ စိတ္တံ ဥပ္ပဇ္ဇတိ န နိရုဇ္ဈတိ၊ နိရုဇ္ဈိဿတိ န ဥပ္ပဇ္ဇိဿတိ. ဣတရေသံ ကုသလစိတ္တဿ ဥပ္ပါဒက္ခဏေ တေသံ။ပေ။.
ယဿ ဝါ ပန။ပေ။? အာမန္တာ ။ပေ။.
၁၁၆. ယဿ အကုသလံ စိတ္တံ ဥပ္ပဇ္ဇတိ န နိရုဇ္ဈတိ။ပေ။. ယဿ အဗျာကတံ စိတ္တံ ဥပ္ပဇ္ဇတိ န နိရုဇ္ဈတိ။ပေ။.
(မူလယမကံ စိတ္တယမကံ ဓမ္မယမကန္တိ တီဏိ ယမကာနိ ယာဝ သရဏအရဏာ ဂစ္ဆန္တိ.)
စိတ္တယမကံ နိဋ္ဌိတံ.