(၃၃. က) အရိယာနံ အဒဿနကမျတာ

၉၃၄. တတ္ထ ကတမာ အရိယာနံ အဒဿနကမျတာ? တတ္ထ ကတမေ အရိယာ? အရိယာ ဝုစ္စန္တိ ဗုဒ္ဓါ စ ဗုဒ္ဓသာဝကာ စ. ယာ ဣမေသံ အရိယာနံ အဒဿနကမျတာ အဒဋ္ဌုကမျတာ အသမေတုကမျတာ အသမာဂန္တုကမျတာ – အယံ ဝုစ္စတိ ‘‘အရိယာနံ အဒဿနကမျတာ’’.

(ခ) သဒ္ဓမ္မံ အသောတုကမျတာ

တတ္ထ ကတမာ သဒ္ဓမ္မံ အသောတုကမျတာ? တတ္ထ ကတမော သဒ္ဓမ္မော? စတ္တာရော သတိပဋ္ဌာနာ၊ စတ္တာရော သမ္မပ္ပဓာနာ၊ စတ္တာရော ဣဒ္ဓိပါဒါ၊ ပဉ္စိန္ဒြိယာနိ၊ ပဉ္စ ဗလာနိ၊ သတ္တ ဗောဇ္ဈင်္ဂါ၊ အရိယော အဋ္ဌင်္ဂိကော မဂ္ဂေါ – အယံ ဝုစ္စတိ ‘‘သဒ္ဓမ္မော’’. ယာ ဣမဿ သဒ္ဓမ္မဿ အသောတုကမျတာ အသဝနကမျတာ အနုဂ္ဂဟေတုကမျတာ အဓာရေတုကမျတာ – အယံ ဝုစ္စတိ ‘‘သဒ္ဓမ္မံ အသောတုကမျတာ’’.

(ဂ) ဥပါရမ္ဘစိတ္တတာ

တတ္ထ ကတမာ ဥပါရမ္ဘစိတ္တတာ? တတ္ထ ကတမော ဥပါရမ္ဘော? ယော ဥပါရမ္ဘော အနုပါရမ္ဘော ဥပါရမ္ဘနာ အနုပါရမ္ဘနာ အနုပါရမ္ဘိတတ္တံ ဥညာ အဝညာ ပရိဘဝေါ ရန္ဓဂဝေသိတာ – အယံ ဝုစ္စတိ ‘‘ဥပါရမ္ဘစိတ္တတာ’’.