(၂၅. က) အရတိ

၉၂၆. တတ္ထ ကတမာ အရတိ? ပန္တေသု ဝါ သေနာသနေသု အညတရညတရေသု ဝါ အဓိကုသလေသု ဓမ္မေသု အရတိ အရတိတာ အနဘိရတိ အနဘိရမဏာ ဥက္ကဏ္ဌိတာ ပရိတဿိတာ – အယံ ဝုစ္စတိ ‘‘အရတိ’’.

(ခ) ဝိဟေသာ

တတ္ထ ကတမာ ဝိဟေသာ? ဣဓေကစ္စော ပါဏိနာ ဝါ လေဍ္ဍုနာ ဝါ ဒဏ္ဍေန ဝါ သတ္ထေန ဝါ ရဇ္ဇုယာ ဝါ အညတရညတရေန သတ္တေ ဝိဟေဌေတိ၊ ယာ ဧဝရူပါ ဟေဌနာ ဝိဟေဌနာ ဟိံသနာ ဝိဟိံသနာ ရောသနာ ဝိရောသနာ ပရူပဃာတော – အယံ ဝုစ္စတိ ‘‘ဝိဟေသာ’’.

(ဂ) အဓမ္မစရိယာ

တတ္ထ ကတမာ အဓမ္မစရိယာ? ကာယေန အဓမ္မစရိယာဝိသမစရိယာ၊ ဝါစာယ အဓမ္မစရိယာဝိသမစရိယာ၊ မနသာ အဓမ္မစရိယာဝိသမစရိယာ – အယံ ဝုစ္စတိ ‘‘အဓမ္မစရိယာ’’.