(၁၃) တီဏိ ဘယာနိ

၉၂၁. တတ္ထ ကတမာနိ တီဏိ ဘယာနိ? ဇာတိဘယံ၊ ဇရာဘယံ၊ မရဏဘယံ.

(က) တတ္ထ ကတမံ ဇာတိဘယံ? ဇာတိံ ပဋိစ္စ ဘယံ ဘယာနကံ ဆမ္ဘိတတ္တံ လောမဟံသော စေတသော ဥတြာသော – ဣဒံ ဝုစ္စတိ ‘‘ဇာတိဘယံ’’.

(ခ) တတ္ထ ကတမံ ဇရာဘယံ? ဇရံ ပဋိစ္စ ဘယံ ဘယာနကံ ဆမ္ဘိတတ္တံ လောမဟံသော စေတသော ဥတြာသော – ဣဒံ ဝုစ္စတိ ‘‘ဇရာဘယံ’’.

(ဂ) တတ္ထ ကတမံ မရဏဘယံ? မရဏံ ပဋိစ္စ ဘယံ ဘယာနကံ ဆမ္ဘိတတ္တံ လောမဟံသော စေတသော ဥတြာသော – ဣဒံ ဝုစ္စတိ ‘‘မရဏဘယံ’’. ဣမာနိ တီဏိ ဘယာနိ.