(၁၄) အသာခလျဉ္စ အပ္ပဋိသန္ထာရော စ

၉၀၄. (က) တတ္ထ ကတမံ အသာခလျံ? ယာ သာ ဝါစာ ကဏ္ဍကာ ကက္ကသာ ပရကဋုကာ ပရာဘိသဇ္ဇနီ ကောဓသာမန္တာ အသမာဓိသံဝတ္တနိကာ တထာရူပိံ ဝါစံ ဘာသိတာ ဟောတိ. ယာ တတ္ထ အသဏှဝါစတာ အသခိလဝါစတာ ဖရုသဝါစတာ – ဣဒံ ဝုစ္စတိ ‘‘အသာခလျံ’’.

(ခ) တတ္ထ ကတမော အပ္ပဋိသန္ထာရော [အပ္ပဋိသန္ဓာရော (က.)]? ဒွေ ပဋိသန္ထာရာ – အာမိသပဋိသန္ထာရော စ ဓမ္မပဋိသန္ထာရော စ. ဣဓေကစ္စော အပ္ပဋိသန္ထာရကော ဟောတိ အာမိသပဋိသန္ထာရေန ဝါ ဓမ္မပဋိသန္ထာရေန ဝါ – အယံ ဝုစ္စတိ ‘‘အပ္ပဋိသန္ထာရော’’.