(၅၁) ဟီနောဟမသ္မီတိ မာနော

၈၆၈. တတ္ထ ကတမော ဟီနောဟမသ္မီတိ မာနော? ဣဓေကစ္စော ဇာတိယာ ဝါ ဂေါတ္တေန ဝါ ကောလပုတ္တိယေန ဝါ ဝဏ္ဏပေါက္ခရတာယ ဝါ ဓနေန ဝါ အဇ္ဈေနေန ဝါ ကမ္မာယတနေန ဝါ သိပ္ပါယတနေန ဝါ ဝိဇ္ဇာဋ္ဌာနေန ဝါ သုတေန ဝါ ပဋိဘာနေန ဝါ အညတရညတရေန ဝတ္ထုနာ ဩမာနံ ဇပ္ပေတိ၊ ယော ဧဝရူပေါ ဩမာနော ဩမညနာ ဩမညိတတ္တံ ဟီဠနာ ဩဟီဠနာ ဩဟီဠိတတ္တံ အတ္တုညာ အတ္တဝညာ အတ္တပရိဘဝေါ – အယံ ဝုစ္စတိ ‘‘ဟီနောဟမသ္မီတိ မာနော’’.