၄. စတုက္ကနိဒ္ဒေသော

၇၉၃. (၁. က) တတ္ထ ကတမံ ကမ္မဿကတဉာဏံ? ‘‘အတ္ထိ ဒိန္နံ၊ အတ္ထိ ယိဋ္ဌံ၊ အတ္ထိ ဟုတံ၊ အတ္ထိ သုကတဒုက္ကဋာနံ ကမ္မာနံ ဖလံ ဝိပါကော၊ အတ္ထိ အယံ လောကော၊ အတ္ထိ ပရော လောကော၊ အတ္ထိ မာတာ၊ အတ္ထိ ပိတာ၊ အတ္ထိ သတ္တာ ဩပပါတိကာ၊ အတ္ထိ လောကေ သမဏဗြာဟ္မဏာ သမ္မဂ္ဂတာ သမ္မာပဋိပန္နာ ယေ ဣမဉ္စ လောကံ ပရဉ္စ လောကံ သယံ အဘိညာ သစ္ဆိကတွာ ပဝေဒေန္တီ’’တိ – ယာ ဧဝရူပါ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ ‘‘ကမ္မဿကတဉာဏံ’’. ဌပေတွာ သစ္စာနုလောမိကံ ဉာဏံ၊ သဗ္ဗာပိ သာသဝါ ကုသလာ ပညာ ကမ္မဿကတဉာဏံ.

(ခ) တတ္ထ ကတမံ သစ္စာနုလောမိကံ ဉာဏံ? ‘‘ရူပံ အနိစ္စ’’န္တိ ဝါ ဝေဒနာ။ပေ။ သညာ။ သင်္ခါရာ။ ‘‘ဝိညာဏံ အနိစ္စ’’န္တိ ဝါ ယာ ဧဝရူပီ အနုလောမိကာ ခန္တိ ဒိဋ္ဌိ ရုစိ မုဒိ ပေက္ခာ ဓမ္မနိဇ္ဈာနက္ခန္တိ – ဣဒံ ဝုစ္စတိ ‘‘သစ္စာနုလောမိကံ ဉာဏံ’’.

(ဂ) စတူသု မဂ္ဂေသု ပညာ မဂ္ဂသမင်္ဂိဿ ဉာဏံ.

(ဃ) စတူသု ဖလေသု ပညာ ဖလသမင်္ဂိဿ ဉာဏံ.

၇၉၄. (၂) မဂ္ဂသမင်္ဂိဿ ဉာဏံ ဒုက္ခေပေတံ ဉာဏံ၊ ဒုက္ခသမုဒယေပေတံ ဉာဏံ၊ ဒုက္ခနိရောဓေပေတံ ဉာဏံ၊ ဒုက္ခနိရောဓဂါမိနိယာ ပဋိပဒါယပေတံ ဉာဏံ.

(က) တတ္ထ ကတမံ ဒုက္ခေ ဉာဏံ? ဒုက္ခံ အာရဗ္ဘ ယာ ဥပ္ပဇ္ဇတိ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ ‘‘ဒုက္ခေ ဉာဏံ’’.

(ခ-ဃ) ဒုက္ခသမုဒယံ အာရဗ္ဘ။ပေ။ ဒုက္ခနိရောဓံ အာရဗ္ဘ။ပေ။ ဒုက္ခနိရောဓဂါမိနိံ ပဋိပဒံ အာရဗ္ဘ ယာ ဥပ္ပဇ္ဇတိ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ ‘‘ဒုက္ခနိရောဓဂါမိနိယာ ပဋိပဒါယ ဉာဏံ’’.

၇၉၅. (၃) ကာမာဝစရကုသလာဗျာကတေ ပညာ ကာမာဝစရာ ပညာ၊ ရူပါဝစရကုသလာဗျာကတေ ပညာ ရူပါဝစရာ ပညာ၊ အရူပါဝစရကုသလာဗျာကတေ ပညာ အရူပါဝစရာ ပညာ၊ စတူသု မဂ္ဂေသု စတူသု ဖလေသု ပညာ အပရိယာပန္နာ ပညာ.

၇၉၆. (၄. က) တတ္ထ ကတမံ ဓမ္မေ ဉာဏံ? စတူသု မဂ္ဂေသု စတူသု ဖလေသု ပညာ ဓမ္မေ ဉာဏံ.

(ခ) သော ဣမိနာ ဓမ္မေန ဉာတေန ဒိဋ္ဌေန ပတ္တေန ဝိဒိတေန ပရိယောဂါဠှေန အတီတာနာဂတေန နယံ နေတိ. ‘‘ယေ ဟိ ကေစိ အတီတမဒ္ဓါနံ သမဏာ ဝါ ဗြာဟ္မဏာ ဝါ ဒုက္ခံ အဗ္ဘညံသု [အဗ္ဘညိံသု (သျာ.) ဧဝမုပရိပိ]၊ ဒုက္ခသမုဒယံ အဗ္ဘညံသု၊ ဒုက္ခနိရောဓံ အဗ္ဘညံသု၊ ဒုက္ခနိရောဓဂါမိနိံ ပဋိပဒံ အဗ္ဘညံသု၊ ဣမညေဝ တေ ဒုက္ခံ အဗ္ဘညံသု၊ ဣမညေဝ တေ ဒုက္ခသမုဒယံ အဗ္ဘညံသု၊ ဣမညေဝ တေ ဒုက္ခနိရောဓံ အဗ္ဘညံသု၊ ဣမညေဝ တေ ဒုက္ခနိရောဓဂါမိနိံ ပဋိပဒံ အဗ္ဘညံသု. ယေ ဟိ ကေစိ အနာဂတမဒ္ဓါနံ သမဏာ ဝါ ဗြာဟ္မဏာ ဝါ ဒုက္ခံ အဘိဇာနိဿန္တိ၊ ဒုက္ခသမုဒယံ အဘိဇာနိဿန္တိ၊ ဒုက္ခနိရောဓံ အဘိဇာနိဿန္တိ၊ ဒုက္ခနိရောဓဂါမိနိံ ပဋိပဒံ အဘိဇာနိဿန္တိ၊ ဣမညေဝ တေ ဒုက္ခံ အဘိဇာနိဿန္တိ၊ ဣမညေဝ တေ ဒုက္ခသမုဒယံ အဘိဇာနိဿန္တိ၊ ဣမညေဝ တေ ဒုက္ခနိရောဓံ အဘိဇာနိဿန္တိ၊ ဣမညေဝ တေ ဒုက္ခနိရောဓဂါမိနိံ ပဋိပဒံ အဘိဇာနိဿန္တီ’’တိ – ယာ တတ္ထ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ ‘‘အနွယေ ဉာဏံ’’.

(ဂ) တတ္ထ ကတမံ ပရိယေ ဉာဏံ? ဣဓ ဘိက္ခု ပရသတ္တာနံ ပရပုဂ္ဂလာနံ စေတသာ စေတော ပရိစ္စ ပဇာနာတိ. သရာဂံ ဝါ စိတ္တံ ‘‘သရာဂံ စိတ္တ’’န္တိ ပဇာနာတိ၊ ဝီတရာဂံ ဝါ စိတ္တံ ‘‘ဝီတရာဂံ စိတ္တ’’န္တိ ပဇာနာတိ၊ သဒေါသံ ဝါ စိတ္တံ ‘‘သဒေါသံ စိတ္တ’’န္တိ ပဇာနာတိ၊ ဝီတဒေါသံ ဝါ စိတ္တံ ‘‘ဝီတဒေါသံ စိတ္တ’’န္တိ ပဇာနာတိ၊ သမောဟံ ဝါ စိတ္တံ ‘‘သမောဟံ စိတ္တ’’န္တိ ပဇာနာတိ၊ ဝီတမောဟံ ဝါ စိတ္တံ ‘‘ဝီတမောဟံ စိတ္တ’’န္တိ ပဇာနာတိ၊ သံခိတ္တံ ဝါ စိတ္တံ ‘‘သံခိတ္တံ စိတ္တ’’န္တိ ပဇာနာတိ၊ ဝိက္ခိတ္တံ ဝါ စိတ္တံ ‘‘ဝိက္ခိတ္တံ စိတ္တ’’န္တိ ပဇာနာတိ၊ မဟဂ္ဂတံ ဝါ စိတ္တံ ‘‘မဟဂ္ဂတံ စိတ္တ’’န္တိ ပဇာနာတိ၊ အမဟဂ္ဂတံ ဝါ စိတ္တံ ‘‘အမဟဂ္ဂတံ စိတ္တ’’န္တိ ပဇာနာတိ၊ သဥတ္တရံ ဝါ စိတ္တံ ‘‘သဥတ္တရံ စိတ္တ’’န္တိ ပဇာနာတိ၊ အနုတ္တရံ ဝါ စိတ္တံ ‘‘အနုတ္တရံ စိတ္တ’’န္တိ ပဇာနာတိ၊ သမာဟိတံ ဝါ စိတ္တံ ‘‘သမာဟိတံ စိတ္တ’’န္တိ ပဇာနာတိ၊ အသမာဟိတံ ဝါ စိတ္တံ ‘‘အသမာဟိတံ စိတ္တ’’န္တိ ပဇာနာတိ၊ ဝိမုတ္တံ ဝါ စိတ္တံ ‘‘ဝိမုတ္တံ စိတ္တ’’န္တိ ပဇာနာတိ၊ အဝိမုတ္တံ ဝါ စိတ္တံ ‘‘အဝိမုတ္တံ စိတ္တ’’န္တိ ပဇာနာတီတိ – ယာ တတ္ထ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ ‘‘ပရိယေ ဉာဏံ’’.

(ဃ) ဌပေတွာ ဓမ္မေ ဉာဏံ အနွယေ ဉာဏံ ပရိယေ ဉာဏံ၊ အဝသေသာ ပညာ သမ္မုတိဉာဏံ.

၇၉၇. (၅. က) တတ္ထ ကတမာ ပညာ အာစယာယ နော အပစယာယ? ကာမာဝစရကုသလေ ပညာ အာစယာယ နော အပစယာယ.

(ခ) စတူသု မဂ္ဂေသု ပညာ အပစယာယ နော အာစယာယ.

(ဂ) ရူပါဝစရာရူပါဝစရကုသလေ ပညာ အာစယာယ စေဝ အပစယာယ စ.

(ဃ) အဝသေသာ ပညာ နေဝ အာစယာယ နော အပစယာယ.

၇၉၈. (၆. က) တတ္ထ ကတမာ ပညာ နိဗ္ဗိဒါယ နော ပဋိဝေဓာယ? ယာယ ပညာယ ကာမေသု ဝီတရာဂေါ ဟောတိ၊ န စ အဘိညာယော ပဋိဝိဇ္ဈတိ န စ သစ္စာနိ – အယံ ဝုစ္စတိ ‘‘ပညာ နိဗ္ဗိဒါယ နော ပဋိဝေဓာယ’’.

(ခ) သွေဝ ပညာယ ကာမေသု ဝီတရာဂေါ သမာနော အဘိညာယော ပဋိဝိဇ္ဈတိ န စ သစ္စာနိ – အယံ ဝုစ္စတိ ‘‘ပညာ ပဋိဝေဓာယ နော နိဗ္ဗိဒါယ’’.

(ဂ) စတူသု မဂ္ဂေသု ပညာ နိဗ္ဗိဒါယ စေဝ ပဋိဝေဓာယ စ.

(ဃ) အဝသေသာ ပညာ နေဝ နိဗ္ဗိဒါယ နော ပဋိဝေဓာယ.

၇၉၉. (၇. က) တတ္ထ ကတမာ ဟာနဘာဂိနီ ပညာ? ပဌမဿ ဈာနဿ လာဘိံ ကာမသဟဂတာ သညာမနသိကာရာ သမုဒါစရန္တိ ဟာနဘာဂိနီ ပညာ.

(ခ) တဒနုဓမ္မတာ သတိ သန္တိဋ္ဌတိ ဌိတိဘာဂိနီ ပညာ.

(ဂ) အဝိတက္ကသဟဂတာ သညာမနသိကာရာ သမုဒါစရန္တိ ဝိသေသဘာဂိနီ ပညာ.

(ဃ) နိဗ္ဗိဒါသဟဂတာ သညာမနသိကာရာ သမုဒါစရန္တိ ဝိရာဂူပသဉှိတာ နိဗ္ဗေဓဘာဂိနီ ပညာ. ဒုတိယဿ ဈာနဿ လာဘိံ ဝိတက္ကသဟဂတာ သညာမနသိကာရာ သမုဒါစရန္တိ ဟာနဘာဂိနီ ပညာ. တဒနုဓမ္မတာ သတိ သန္တိဋ္ဌတိ ဌိတိဘာဂိနီ ပညာ. ဥပေက္ခာသဟဂတာ သညာမနသိကာရာ သမုဒါစရန္တိ ဝိသေသဘာဂိနီ ပညာ. နိဗ္ဗိဒါသဟဂတာ သညာမနသိကာရာ သမုဒါစရန္တိ ဝိရာဂူပသဉှိတာ နိဗ္ဗေဓဘာဂိနီ ပညာ. တတိယဿ ဈာနဿ လာဘိံ ပီတိသုခသဟဂတာ သညာမနသိကာရာ သမုဒါစရန္တိ ဟာနဘာဂိနီ ပညာ. တဒနုဓမ္မတာ သတိ သန္တိဋ္ဌတိ ဌိတိဘာဂိနီ ပညာ. အဒုက္ခမသုခသဟဂတာ သညာမနသိကာရာ သမုဒါစရန္တိ ဝိသေသဘာဂိနီ ပညာ. နိဗ္ဗိဒါသဟဂတာ သညာမနသိကာရာ သမုဒါစရန္တိ ဝိရာဂူပသဉှိတာ နိဗ္ဗေဓဘာဂိနီ ပညာ. စတုတ္ထဿ ဈာနဿ လာဘိံ ဥပေက္ခာသဟဂတာ သညာမနသိကာရာ သမုဒါစရန္တိ ဟာနဘာဂိနီ ပညာ. တဒနုဓမ္မတာ သတိ သန္တိဋ္ဌတိ ဌိတိဘာဂိနီ ပညာ. အာကာသာနဉ္စာယတနသဟဂတာ သညာမနသိကာရာ သမုဒါစရန္တိ ဝိသေသဘာဂိနီ ပညာ. နိဗ္ဗိဒါသဟဂတာ သညာမနသိကာရာ သမုဒါစရန္တိ ဝိရာဂူပသဉှိတာ နိဗ္ဗေဓဘာဂိနီ ပညာ. အာကာသာနဉ္စာယတနဿ လာဘိံ ရူပသဟဂတာ သညာမနသိကာရာ သမုဒါစရန္တိ ဟာနဘာဂိနီ ပညာ. တဒနုဓမ္မတာ သတိ သန္တိဋ္ဌတိ ဌိတိဘာဂိနီ ပညာ. ဝိညာဏဉ္စာယတနသဟဂတာ သညာမနသိကာရာ သမုဒါစရန္တိ ဝိသေသဘာဂိနီ ပညာ. နိဗ္ဗိဒါသဟဂတာ သညာမနသိကာရာ သမုဒါစရန္တိ ဝိရာဂူပသဉှိတာ နိဗ္ဗေဓဘာဂိနီ ပညာ. ဝိညာဏဉ္စာယတနဿ လာဘိံ အာကာသာနဉ္စာယတနသဟဂတာ သညာမနသိကာရာ သမုဒါစရန္တိ ဟာနဘာဂိနီ ပညာ. တဒနုဓမ္မတာ သတိ သန္တိဋ္ဌတိ ဌိတိဘာဂိနီ ပညာ. အာကိဉ္စညာယတနသဟဂတာ သညာမနသိကာရာ သမုဒါစရန္တိ ဝိသေသဘာဂိနီ ပညာ. နိဗ္ဗိဒါသဟဂတာ သညာမနသိကာရာ သမုဒါစရန္တိ ဝိရာဂူပသဉှိတာ နိဗ္ဗေဓဘာဂိနီ ပညာ. အာကိဉ္စညာယတနဿ လာဘိံ ဝိညာဏဉ္စာယတနသဟဂတာ သညာမနသိကာရာ သမုဒါစရန္တိ ဟာနဘာဂိနီ ပညာ. တဒနုဓမ္မတာ သတိ သန္တိဋ္ဌတိ ဌိတိဘာဂိနီ ပညာ. နေဝသညာနာသညာယတနသဟဂတာ သညာမနသိကာရာ သမုဒါစရန္တိ ဝိသေသဘာဂိနီ ပညာ. နိဗ္ဗိဒါသဟဂတာ သညာမနသိကာရာ သမုဒါစရန္တိ ဝိရာဂူပသဉှိတာ နိဗ္ဗေဓဘာဂိနီ ပညာ.

၈၀၀. (၈) တတ္ထ ကတမာ စတဿော ပဋိသမ္ဘိဒါ? အတ္ထပဋိသမ္ဘိဒါ၊ ဓမ္မပဋိသမ္ဘိဒါ၊ နိရုတ္တိပဋိသမ္ဘိဒါ၊ ပဋိဘာနပဋိသမ္ဘိဒါ. အတ္ထေ ဉာဏံ အတ္ထပဋိသမ္ဘိဒါ၊ ဓမ္မေ ဉာဏံ ဓမ္မပဋိသမ္ဘိဒါ၊ တတြ ဓမ္မနိရုတ္တာဘိလာပေ ဉာဏံ နိရုတ္တိပဋိသမ္ဘိဒါ၊ ဉာဏေသု ဉာဏံ ပဋိဘာနပဋိသမ္ဘိဒါ. ဣမာ စတဿော ပဋိသမ္ဘိဒါ.

၈၀၁. (၉) တတ္ထ ကတမာ စတဿော ပဋိပဒါ? ဒုက္ခပဋိပဒါ ဒန္ဓာဘိညာ ပညာ၊ ဒုက္ခပဋိပဒါ ခိပ္ပါဘိညာ ပညာ၊ သုခပဋိပဒါ ဒန္ဓာဘိညာ ပညာ၊ သုခပဋိပဒါ ခိပ္ပါဘိညာ ပညာ.

(က) တတ္ထ ကတမာ ဒုက္ခပဋိပဒါ ဒန္ဓာဘိညာ ပညာ? ကိစ္ဆေန ကသိရေန သမာဓိံ ဥပ္ပါဒေန္တဿ ဒန္ဓံ တဏ္ဌာနံ အဘိဇာနန္တဿ ယာ ဥပ္ပဇ္ဇတိ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ‘‘ဒုက္ခပဋိပဒါ ဒန္ဓာဘိညာ ပညာ’’.

(ခ) တတ္ထ ကတမာ ဒုက္ခပဋိပဒါ ခိပ္ပါဘိညာ ပညာ? ကိစ္ဆေန ကသိရေန သမာဓိံ ဥပ္ပါဒေန္တဿ ခိပ္ပံ တဏ္ဌာနံ အဘိဇာနန္တဿ ယာ ဥပ္ပဇ္ဇတိ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ‘‘ဒုက္ခပဋိပဒါ ခိပ္ပါဘိညာ ပညာ’’.

(ဂ) တတ္ထ ကတမာ သုခပဋိပဒါ ဒန္ဓာဘိညာ ပညာ? အကိစ္ဆေန အကသိရေန သမာဓိံ ဥပ္ပါဒေန္တဿ ဒန္ဓံ တဏ္ဌာနံ အဘိဇာနန္တဿ ယာ ဥပ္ပဇ္ဇတိ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ‘‘သုခပဋိပဒါ ဒန္ဓာဘိညာ ပညာ’’.

(ဃ) တတ္ထ ကတမာ သုခပဋိပဒါ ခိပ္ပါဘိညာ ပညာ? အကိစ္ဆေန အကသိရေန သမာဓိံ ဥပ္ပါဒေန္တဿ ခိပ္ပံ တဏ္ဌာနံ အဘိဇာနန္တဿ ယာ ဥပ္ပဇ္ဇတိ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ‘‘သုခပဋိပဒါ ခိပ္ပါဘိညာ ပညာ’’. ဣမာ စတဿော ပဋိပဒါ.

၈၀၂. (၁၀) တတ္ထ ကတမာနိ စတ္တာရိ အာရမ္မဏာနိ? ပရိတ္တာ ပရိတ္တာရမ္မဏာ ပညာ၊ ပရိတ္တာ အပ္ပမာဏာရမ္မဏာ ပညာ၊ အပ္ပမာဏာ ပရိတ္တာရမ္မဏာ ပညာ၊ အပ္ပမာဏာ အပ္ပမာဏာရမ္မဏာ ပညာ.

(က) တတ္ထ ကတမာ ပရိတ္တာ ပရိတ္တာရမ္မဏာ ပညာ? သမာဓိဿ န နိကာမလာဘိဿ အာရမ္မဏံ ထောကံ ဖရန္တဿ ယာ ဥပ္ပဇ္ဇတိ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ‘‘ပရိတ္တာ ပရိတ္တာရမ္မဏာ ပညာ’’.

(ခ) တတ္ထ ကတမာ ပရိတ္တာ အပ္ပမာဏာရမ္မဏာ ပညာ? သမာဓိဿ န နိကာမလာဘိဿ အာရမ္မဏံ ဝိပုလံ ဖရန္တဿ ယာ ဥပ္ပဇ္ဇတိ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ‘‘ပရိတ္တာ အပ္ပမာဏာရမ္မဏာ ပညာ’’.

(ဂ) တတ္ထ ကတမာ အပ္ပမာဏာ ပရိတ္တာရမ္မဏာ ပညာ? သမာဓိဿ နိကာမလာဘိဿ အာရမ္မဏံ ထောကံ ဖရန္တဿ ယာ ဥပ္ပဇ္ဇတိ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ‘‘အပ္ပမာဏာ ပရိတ္တာရမ္မဏာ ပညာ’’.

(ဃ) တတ္ထ ကတမာ အပ္ပမာဏာ အပ္ပမာဏာရမ္မဏာ ပညာ? သမာဓိဿ နိကာမလာဘိဿ အာရမ္မဏံ ဝိပုလံ ဖရန္တဿ ယာ ဥပ္ပဇ္ဇတိ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ‘‘အပ္ပမာဏာ အပ္ပမာဏာရမ္မဏာ ပညာ’’. ဣမာနိ စတ္တာရိ အာရမ္မဏာနိ.

(၁၁) မဂ္ဂသမင်္ဂိဿ ဉာဏံ ဇရာမရဏေပေတံ ဉာဏံ၊ ဇရာမရဏသမုဒယေပေတံ ဉာဏံ၊ ဇရာမရဏနိရောဓေပေတံ ဉာဏံ၊ ဇရာမရဏနိရောဓဂါမိနိယာ ပဋိပဒါယပေတံ ဉာဏံ.

(က) တတ္ထ ကတမံ ဇရာမရဏေ ဉာဏံ? ဇရာမရဏံ အာရဗ္ဘ ယာ ဥပ္ပဇ္ဇတိ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ ‘‘ဇရာမရဏေ ဉာဏံ’’.

(ခ-ဃ) ဇရာမရဏသမုဒယံ အာရဗ္ဘ။ပေ။ ဇရာမရဏနိရောဓံ အာရဗ္ဘ။ပေ။ ဇရာမရဏနိရောဓဂါမိနိံ ပဋိပဒံ အာရဗ္ဘ ယာ ဥပ္ပဇ္ဇတိ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ ‘‘ဇရာမရဏနိရောဓဂါမိနိယာ ပဋိပဒါယ ဉာဏံ’’.

၈၀၃. (၁၂-၂၁) ဓမ္မသမင်္ဂိဿ ဉာဏံ ဇာတိယာပေတံ ဉာဏံ။ပေ။ ဘဝေပေတံ ဉာဏံ။ပေ။ ဥပါဒါနေပေတံ ဉာဏံ။ပေ။ တဏှာယပေတံ ဉာဏံ။ပေ။ ဝေဒနာယပေတံ ဉာဏံ။ပေ။ ဖဿေပေတံ ဉာဏံ။ပေ။ သဠာယတနေပေတံ ဉာဏံ။ပေ။ နာမရူပေပေတံ ဉာဏံ။ပေ။ ဝိညာဏေပေတံ ဉာဏံ။ပေ။ သင်္ခါရေသုပေတံ ဉာဏံ၊ သင်္ခါရသမုဒယေပေတံ ဉာဏံ၊ သင်္ခါရနိရောဓေပေတံ ဉာဏံ၊ သင်္ခါရနိရောဓဂါမိနိယာ ပဋိပဒါယပေတံ ဉာဏံ.

တတ္ထ ကတမံ သင်္ခါရေသု ဉာဏံ? သင်္ခါရေ အာရဗ္ဘ ယာ ဥပ္ပဇ္ဇတိ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ ‘‘သင်္ခါရေသု ဉာဏံ’’.

သင်္ခါရသမုဒယံ အာရဗ္ဘ။ပေ။ သင်္ခါရနိရောဓံ အာရဗ္ဘ။ပေ။ သင်္ခါရနိရောဓဂါမိနိံ ပဋိပဒံ အာရဗ္ဘ ယာ ဥပ္ပဇ္ဇတိ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ ‘‘သင်္ခါရနိရောဓဂါမိနိယာ ပဋိပဒါယ ဉာဏံ. ဧဝံ စတုဗ္ဗိဓေန ဉာဏဝတ္ထု.

စတုက္ကံ.