၅. ပဉ္စကနိဒ္ဒေသော

၈၀၄. (၁) တတ္ထ ကတမော ပဉ္စင်္ဂိကော သမ္မာသမာဓိ? ပီတိဖရဏတာ၊ သုခဖရဏတာ၊ စေတောဖရဏတာ၊ အာလောကဖရဏတာ၊ ပစ္စဝေက္ခဏာနိမိတ္တံ. ဒွီသု ဈာနေသု ပညာ ပီတိဖရဏတာ. တီသု ဈာနေသု ပညာ သုခဖရဏတာ. ပရစိတ္တေ ဉာဏံ စေတောဖရဏတာ. ဒိဗ္ဗစက္ခု အာလောကဖရဏတာ. တမှာ တမှာ သမာဓိမှာ ဝုဋ္ဌိတဿ ပစ္စဝေက္ခဏာဉာဏံ ပစ္စဝေက္ခဏာနိမိတ္တံ. အယံ ဝုစ္စတိ ပဉ္စင်္ဂိကော သမ္မာသမာဓိ.

(၂) တတ္ထ ကတမော ပဉ္စဉာဏိကော သမ္မာသမာဓိ? ‘‘အယံ သမာဓိ ပစ္စုပ္ပန္နသုခေါ စေဝ အာယတိဉ္စ သုခဝိပါကော’’တိ ပစ္စတ္တညေဝ ဉာဏံ ဥပ္ပဇ္ဇတိ. ‘‘အယံ သမာဓိ အရိယော နိရာမိသော’’တိ ပစ္စတ္တညေဝ ဉာဏံ ဥပ္ပဇ္ဇတိ. ‘‘အယံ သမာဓိ အကာပုရိသသေဝိတော’’တိ ပစ္စတ္တညေဝ ဉာဏံ ဥပ္ပဇ္ဇတိ. ‘‘အယံ သမာဓိ သန္တော ပဏီတော ပဋိပ္ပဿဒ္ဓလဒ္ဓေါ ဧကောဒိဘာဝါဓိဂတော န သသင်္ခါရနိဂ္ဂယှဝါရိတဂတော’’တိ ပစ္စတ္တညေဝ ဉာဏံ ဥပ္ပဇ္ဇတိ. သော ခေါ ပနာဟံ ဣမံ သမာဓိံ သတော သမာပဇ္ဇာမိ သတော ဝုဋ္ဌဟာမီ’’တိ ပစ္စတ္တညေဝ ဉာဏံ ဥပ္ပဇ္ဇတိ. အယံ ပဉ္စဉာဏိကော သမ္မာသမာဓိ. ဧဝံ ပဉ္စဝိဓေန ဉာဏဝတ္ထု.

ပဉ္စကံ.