၁-၆. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၅၄၅. ဟေတုံ အနိဒဿနအပ္ပဋိဃံ ဓမ္မံ ပဋိစ္စ ဟေတု အနိဒဿနအပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

နဟေတုံ အနိဒဿနအပ္ပဋိဃံ ဓမ္မံ ပဋိစ္စ နဟေတု အနိဒဿနအပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ဟေတုံ အနိဒဿနအပ္ပဋိဃဉ္စ နဟေတုံ အနိဒဿနအပ္ပဋိဃဉ္စ ဓမ္မံ ပဋိစ္စ ဟေတု အနိဒဿနအပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (သံခိတ္တံ).

၅၄၆. ဟေတုယာ နဝ၊ အာရမ္မဏေ နဝ။ပေ။ ကမ္မေ နဝ၊ ဝိပါကေ နဝ၊ အာဟာရေ နဝ။ပေ။ အဝိဂတေ နဝ (သံခိတ္တံ).

နဟေတု-နအဓိပတိပစ္စယာ

၅၄၇. နဟေတုံ အနိဒဿနအပ္ပဋိဃံ ဓမ္မံ ပဋိစ္စ နဟေတု အနိဒဿနအပ္ပဋိဃော ဓမ္မော ဥပ္ပဇ္ဇတိ နဟေတုပစ္စယာ. နဟေတုံ အနိဒဿနအပ္ပဋိဃံ ဓမ္မံ ပဋိစ္စ ဟေတု အနိဒဿနအပ္ပဋိဃော ဓမ္မော ဥပ္ပဇ္ဇတိ နဟေတုပစ္စယာ. (၂)

ဟေတုံ အနိဒဿနအပ္ပဋိဃံ ဓမ္မံ ပဋိစ္စ နဟေတု အနိဒဿနအပ္ပဋိဃော ဓမ္မော ဥပ္ပဇ္ဇတိ နအာရမ္မဏပစ္စယာ။ တီဏိ.

ဟေတုံ အနိဒဿနအပ္ပဋိဃံ ဓမ္မံ ပဋိစ္စ ဟေတု အနိဒဿနအပ္ပဋိဃော ဓမ္မော ဥပ္ပဇ္ဇတိ နအဓိပတိပစ္စယာ (သံခိတ္တံ).

၅၄၈. နဟေတုယာ ဒွေ၊ နအာရမ္မဏေ တီဏိ၊ နအဓိပတိယာ နဝ။ပေ။ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဧကံ၊ နမဂ္ဂေ ဧကံ၊ နသမ္ပယုတ္တေ တီဏိ၊ နဝိပ္ပယုတ္တေ နဝ၊ နောနတ္ထိယာ တီဏိ၊ နောဝိဂတေ တီဏိ (သံခိတ္တံ).

ဟေတုပစ္စယာ နအာရမ္မဏေ တီဏိ (သံခိတ္တံ).

နဟေတုပစ္စယာ အာရမ္မဏေ ဒွေ (သံခိတ္တံ).

(သဟဇာတဝါရောပိ ပစ္စယဝါရောပိ နိဿယဝါရောပိ သံသဋ္ဌဝါရောပိ သမ္ပယုတ္တဝါရောပိ ပဋိစ္စဝါရသဒိသာ ဝိတ္ထာရေတဗ္ဗာ.)