၁-၆. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၆၇. ဟေတုံ သုခါယ ဝေဒနာယ သမ္ပယုတ္တံ ဓမ္မံ ပဋိစ္စ ဟေတု သုခါယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. ဟေတုံ သုခါယ ဝေဒနာယ သမ္ပယုတ္တံ ဓမ္မံ ပဋိစ္စ နဟေတု သုခါယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. ဟေတုံ သုခါယ ဝေဒနာယ သမ္ပယုတ္တံ ဓမ္မံ ပဋိစ္စ ဟေတု သုခါယ ဝေဒနာယ သမ္ပယုတ္တော စ နဟေတု သုခါယ ဝေဒနာယ သမ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

၆၈. နဟေတုံ သုခါယ ဝေဒနာယ သမ္ပယုတ္တံ ဓမ္မံ ပဋိစ္စ နဟေတု သုခါယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. နဟေတုံ သုခါယ ဝေဒနာယ သမ္ပယုတ္တံ ဓမ္မံ ပဋိစ္စ ဟေတု သုခါယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. နဟေတုံ သုခါယ ဝေဒနာယ သမ္ပယုတ္တံ ဓမ္မံ ပဋိစ္စ ဟေတု သုခါယ ဝေဒနာယ သမ္ပယုတ္တော စ နဟေတု သုခါယ ဝေဒနာယ သမ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

၆၉. ဟေတုံ သုခါယ ဝေဒနာယ သမ္ပယုတ္တဉ္စ နဟေတုံ သုခါယ ဝေဒနာယ သမ္ပယုတ္တဉ္စ ဓမ္မံ ပဋိစ္စ ဟေတု သုခါယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. ဟေတုံ သုခါယ ဝေဒနာယ သမ္ပယုတ္တဉ္စ နဟေတုံ သုခါယ ဝေဒနာယ သမ္ပယုတ္တဉ္စ ဓမ္မံ ပဋိစ္စ နဟေတု သုခါယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. ဟေတုံ သုခါယ ဝေဒနာယ သမ္ပယုတ္တဉ္စ နဟေတုံ သုခါယ ဝေဒနာယ သမ္ပယုတ္တဉ္စ ဓမ္မံ ပဋိစ္စ ဟေတု သုခါယ ဝေဒနာယ သမ္ပယုတ္တော စ နဟေတု သုခါယ ဝေဒနာယ သမ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃) (သံခိတ္တံ.)

၇၀. ဟေတုယာ နဝ၊ အာရမ္မဏေ နဝ၊ အဓိပတိယာ နဝ၊ အနန္တရေ နဝ၊ သမနန္တရေ နဝ၊ သဟဇာတေ နဝ၊ အညမညေ နဝ၊ နိဿယေ နဝ၊ ဥပနိဿယေ နဝ၊ ပုရေဇာတေ နဝ၊ အာသေဝနေ နဝ၊ ကမ္မေ နဝ၊ ဝိပါကေ နဝ၊ အာဟာရေ နဝ။ပေ။ အဝိဂတေ နဝ (အနုလောမံ).

နဟေတု-နအဓိပတိပစ္စယာ

၇၁. နဟေတုံ သုခါယ ဝေဒနာယ သမ္ပယုတ္တံ ဓမ္မံ ပဋိစ္စ နဟေတု သုခါယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ နဟေတုပစ္စယာ. (၁)

၇၂. ဟေတုံ သုခါယ ဝေဒနာယ သမ္ပယုတ္တံ ဓမ္မံ ပဋိစ္စ ဟေတု သုခါယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ နအဓိပတိပစ္စယာ. ဟေတုံ သုခါယ ဝေဒနာယ သမ္ပယုတ္တံ ဓမ္မံ ပဋိစ္စ နဟေတု သုခါယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ နအဓိပတိပစ္စယာ (သံခိတ္တံ).

၇၃. နဟေတုယာ ဧကံ၊ နအဓိပတိယာ နဝ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နဈာနေ ဧကံ၊ နမဂ္ဂေ ဧကံ၊ နဝိပ္ပယုတ္တေ နဝ (ပစ္စနီယံ).

ဟေတုပစ္စယာ နအဓိပတိယာ နဝ (သံခိတ္တံ၊ အနုလောမပစ္စနီယံ).

နဟေတုပစ္စယာ အာရမ္မဏေ ဧကံ (သံခိတ္တံ၊ ပစ္စနီယာနုလောမံ).

(သဟဇာတဝါရောပိ ပစ္စယဝါရောပိ နိဿယဝါရောပိ သံသဋ္ဌဝါရောပိ သမ္ပယုတ္တဝါရောပိ ပဋိစ္စဝါရသဒိသာ ဝိတ္ထာရေတဗ္ဗာ.)