၁-၆. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၃၇၁. ဟေတုံ အပ္ပမာဏံ ဓမ္မံ ပဋိစ္စ ဟေတု အပ္ပမာဏော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

နဟေတုံ အပ္ပမာဏံ ဓမ္မံ ပဋိစ္စ နဟေတု အပ္ပမာဏော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ဟေတုံ အပ္ပမာဏဉ္စ နဟေတုံ အပ္ပမာဏဉ္စ ဓမ္မံ ပဋိစ္စ ဟေတု အပ္ပမာဏော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (သံခိတ္တံ).

၃၇၂. ဟေတုယာ နဝ၊ အာရမ္မဏေ နဝ၊ အဓိပတိယာ နဝ။ပေ။ ဥပနိဿယေ နဝ။ပေ။ ကမ္မေ နဝ၊ ဝိပါကေ နဝ။ပေ။ အဝိဂတေ နဝ (သံခိတ္တံ).

နအဓိပတိပစ္စယော

၃၇၃. ဟေတုံ အပ္ပမာဏံ ဓမ္မံ ပဋိစ္စ ဟေတု အပ္ပမာဏော ဓမ္မော ဥပ္ပဇ္ဇတိ နအဓိပတိပစ္စယာ (သံခိတ္တံ).

၃၇၄. နအဓိပတိယာ ဆ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နဝိပ္ပယုတ္တေ နဝ (သံခိတ္တံ).

ဟေတုပစ္စယာ နအဓိပတိယာ ဆ (သံခိတ္တံ).

နအဓိပတိပစ္စယာ ဟေတုယာ ဆ (သံခိတ္တံ).

(သဟဇာတဝါရောပိ ပစ္စယဝါရောပိ နိဿယဝါရောပိ သံသဋ္ဌဝါရောပိ သမ္ပယုတ္တဝါရောပိ ပဋိစ္စဝါရသဒိသာ ဝိတ္ထာရေတဗ္ဗာ.)