၇. ပဉှာဝါရော

ပစ္စယစတုက္ကံ

ဟေတုပစ္စယာဒိ

၃၇၅. ဟေတု အပ္ပမာဏော ဓမ္မော ဟေတုဿ အပ္ပမာဏဿ ဓမ္မဿ ဟေတုပစ္စယေန ပစ္စယော။ တီဏိ.

နဟေတု အပ္ပမာဏော ဓမ္မော နဟေတုဿ အပ္ပမာဏဿ ဓမ္မဿ အာရမ္မဏပစ္စယေန ပစ္စယော။ တီဏိ.

၃၇၆. ဟေတု အပ္ပမာဏော ဓမ္မော ဟေတုဿ အပ္ပမာဏဿ ဓမ္မဿ အဓိပတိပစ္စယေန ပစ္စယော – သဟဇာတာဓိပတိ။ တီဏိ.

နဟေတု အပ္ပမာဏော ဓမ္မော နဟေတုဿ အပ္ပမာဏဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ တီဏိ.

၃၇၇. ဟေတု အပ္ပမာဏော ဓမ္မော ဟေတုဿ အပ္ပမာဏဿ ဓမ္မဿ အနန္တရပစ္စယေန ပစ္စယော။ နဝ။ပေ။.

ဟေတု အပ္ပမာဏော ဓမ္မော ဟေတုဿ အပ္ပမာဏဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ နဝ (သံခိတ္တံ).

၃၇၈. ဟေတုယာ တီဏိ၊ အာရမ္မဏေ တီဏိ၊ အဓိပတိယာ ဆ၊ အနန္တရေ နဝ၊ သမနန္တရေ နဝ၊ သဟဇာတေ နဝ၊ အညမညေ နဝ၊ နိဿယေ နဝ၊ ဥပနိဿယေ နဝ၊ ကမ္မေ တီဏိ၊ ဝိပါကေ နဝ၊ အာဟာရေ တီဏိ၊ ဣန္ဒြိယေ နဝ၊ ဈာနေ တီဏိ၊ မဂ္ဂေ နဝ၊ သမ္ပယုတ္တေ နဝ၊ အတ္ထိယာ နဝ၊ နတ္ထိယာ နဝ၊ ဝိဂတေ နဝ၊ အဝိဂတေ နဝ (သံခိတ္တံ).

ပစ္စနီယုဒ္ဓါရော

၃၇၉. ဟေတု အပ္ပမာဏော ဓမ္မော ဟေတုဿ အပ္ပမာဏဿ ဓမ္မဿ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော (သံခိတ္တံ).

၃၈၀. နဟေတုယာ နဝ၊ နအာရမ္မဏေ နဝ (သံခိတ္တံ).

ဟေတုပစ္စယာ နအာရမ္မဏေ တီဏိ (သံခိတ္တံ).

နဟေတုပစ္စယာ အာရမ္မဏေ တီဏိ (သံခိတ္တံ).

(ယထာ ကုသလတ္တိကေ ပဉှာဝါရဿ အနုလောမမ္ပိ ပစ္စနီယမ္ပိ အနုလောမပစ္စနီယမ္ပိ ပစ္စနီယာနုလောမမ္ပိ ဂဏိတံ၊ ဧဝံ ဂဏေတဗ္ဗံ.)

ဟေတုဒုကပရိတ္တတ္တိကံ နိဋ္ဌိတံ.