၁-၇. ပဋိစ္စဝါရာဒိ
ပစ္စယစတုက္ကံ
ဟေတုပစ္စယော
၂၅၃. ကုသလံ ဟေတုသမ္ပယုတ္တံ ဓမ္မံ ပဋိစ္စ ကုသလော ဟေတုသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. (၁)
အကုသလံ ဟေတုသမ္ပယုတ္တံ ဓမ္မံ ပဋိစ္စ အကုသလော ဟေတုသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. (၁)
အဗျာကတံ ဟေတုသမ္ပယုတ္တံ ဓမ္မံ ပဋိစ္စ အဗျာကတော ဟေတုသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)
၂၅၄. ဟေတုယာ တီဏိ၊ အာရမ္မဏေ တီဏိ။ပေ။ အဝိဂတေ တီဏိ (သံခိတ္တံ).
နအဓိပတိယာ တီဏိ။ပေ။ နဝိပ္ပယုတ္တေ တီဏိ (သံခိတ္တံ).
(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ.)
ဟေတု-အာရမ္မဏပစ္စယာ
၂၅၅. ကုသလော ဟေတုသမ္ပယုတ္တော ဓမ္မော ကုသလဿ ဟေတုသမ္ပယုတ္တဿ ဓမ္မဿ ဟေတုပစ္စယေန ပစ္စယော. (၁)
အကုသလော ဟေတုသမ္ပယုတ္တော ဓမ္မော အကုသလဿ ဟေတုသမ္ပယုတ္တဿ ဓမ္မဿ ဟေတုပစ္စယေန ပစ္စယော. (၁)
အဗျာကတော ဟေတုသမ္ပယုတ္တော ဓမ္မော အဗျာကတဿ ဟေတုသမ္ပယုတ္တဿ ဓမ္မဿ ဟေတုပစ္စယေန ပစ္စယော. (၁)
ကုသလော ဟေတုသမ္ပယုတ္တော ဓမ္မော ကုသလဿ ဟေတုသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော။ တီဏိ.
အကုသလော ဟေတုသမ္ပယုတ္တော ဓမ္မော အကုသလဿ ဟေတုသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော။ တီဏိ.
အဗျာကတော ဟေတုသမ္ပယုတ္တော ဓမ္မော အဗျာကတဿ ဟေတုသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော။ တီဏိ (သံခိတ္တံ).
၂၅၆. ဟေတုယာ တီဏိ၊ အာရမ္မဏေ နဝ၊ အဓိပတိယာ သတ္တ၊ အနန္တရေ ပဉ္စ၊ သမနန္တရေ ပဉ္စ၊ သဟဇာတေ တီဏိ၊ ဥပနိဿယေ နဝ။ပေ။ အဝိဂတေ တီဏိ (သံခိတ္တံ).
နဟေတုယာ နဝ၊ နအာရမ္မဏေ နဝ (သံခိတ္တံ).
ဟေတုပစ္စယာ နအာရမ္မဏေ တီဏိ (သံခိတ္တံ).
နဟေတုပစ္စယာ အာရမ္မဏေ နဝ (သံခိတ္တံ).
(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)