၁-၆. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၁၆၂. ပရိတ္တံ နဟေတုံ ဓမ္မံ ပဋိစ္စ ပရိတ္တော နဟေတု ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

မဟဂ္ဂတံ နဟေတုံ ဓမ္မံ ပဋိစ္စ မဟဂ္ဂတော နဟေတု ဓမ္မော ဥပ္ပဇ္ဇတိ ဟေတုပစ္စယာ. မဟဂ္ဂတံ နဟေတုံ ဓမ္မံ ပဋိစ္စ ပရိတ္တော နဟေတု ဓမ္မော ဥပ္ပဇ္ဇတိ ဟေတုပစ္စယာ. မဟဂ္ဂတံ နဟေတုံ ဓမ္မံ ပဋိစ္စ ပရိတ္တော နဟေတု စ မဟဂ္ဂတော နဟေတု စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

အပ္ပမာဏံ နဟေတုံ ဓမ္မံ ပဋိစ္စ အပ္ပမာဏော နဟေတု ဓမ္မော ဥပ္ပဇ္ဇတိ ဟေတုပစ္စယာ. အပ္ပမာဏံ နဟေတုံ ဓမ္မံ ပဋိစ္စ ပရိတ္တော နဟေတု ဓမ္မော ဥပ္ပဇ္ဇတိ ဟေတုပစ္စယာ. အပ္ပမာဏံ နဟေတုံ ဓမ္မံ ပဋိစ္စ ပရိတ္တော နဟေတု စ အပ္ပမာဏော နဟေတု စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

ပရိတ္တံ နဟေတုဉ္စ မဟဂ္ဂတံ နဟေတုဉ္စ ဓမ္မံ ပဋိစ္စ ပရိတ္တော နဟေတု ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ပရိတ္တံ နဟေတုဉ္စ အပ္ပမာဏံ နဟေတုဉ္စ ဓမ္မံ ပဋိစ္စ ပရိတ္တော နဟေတု ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၁၆၃. ဟေတုယာ တေရသ၊ အာရမ္မဏေ ပဉ္စ၊ အဓိပတိယာ နဝ။ပေ။ ဝိဂတေ ပဉ္စ၊ အဝိဂတေ တေရသ (သံခိတ္တံ).

ပစ္စနီယံ

နဟေတုပစ္စယော

၁၆၄. ပရိတ္တံ နဟေတုံ ဓမ္မံ ပဋိစ္စ ပရိတ္တော နဟေတု ဓမ္မော ဥပ္ပဇ္ဇတိ နဟေတုပစ္စယာ. (၁) (သံခိတ္တံ.)

နဟေတုယာ ဧကံ၊ နအာရမ္မဏေ ပဉ္စ၊ နအဓိပတိယာ ဒသ။ပေ။ နောဝိဂတေ ပဉ္စ (သံခိတ္တံ).

ဟေတုပစ္စယာ နအာရမ္မဏေ ပဉ္စ (သံခိတ္တံ).

နဟေတုပစ္စယာ အာရမ္မဏေ ဧကံ (သံခိတ္တံ).

(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ ဝိတ္ထာရေတဗ္ဗံ.)