၇. ပဉှာဝါရော

ပစ္စယစတုက္ကံ

၁၆၅. ပရိတ္တော နဟေတု ဓမ္မော ပရိတ္တဿ နဟေတုဿ ဓမ္မဿ အာရမ္မဏပစ္စယေန ပစ္စယော. ပရိတ္တော နဟေတု ဓမ္မော မဟဂ္ဂတဿ နဟေတုဿ ဓမ္မဿ အာရမ္မဏပစ္စယေန ပစ္စယော. (၂)

မဟဂ္ဂတော နဟေတု ဓမ္မော မဟဂ္ဂတဿ နဟေတုဿ ဓမ္မဿ အာရမ္မဏပစ္စယေန ပစ္စယော. မဟဂ္ဂတော နဟေတု ဓမ္မော ပရိတ္တဿ နဟေတုဿ ဓမ္မဿ အာရမ္မဏပစ္စယေန ပစ္စယော. (၂)

အပ္ပမာဏော နဟေတု ဓမ္မော အပ္ပမာဏဿ နဟေတုဿ ဓမ္မဿ အာရမ္မဏပစ္စယေန ပစ္စယော. အပ္ပမာဏော နဟေတု ဓမ္မော ပရိတ္တဿ နဟေတုဿ ဓမ္မဿ အာရမ္မဏပစ္စယေန ပစ္စယော. အပ္ပမာဏော နဟေတု ဓမ္မော မဟဂ္ဂတဿ နဟေတုဿ ဓမ္မဿ အာရမ္မဏပစ္စယေန ပစ္စယော. (၃)

ပရိတ္တော နဟေတု ဓမ္မော ပရိတ္တဿ နဟေတုဿ ဓမ္မဿ အဓိပတိပစ္စယေန ပစ္စယော (သံခိတ္တံ).

၁၆၆. အာရမ္မဏေ သတ္တ၊ အဓိပတိယာ သတ္တ၊ အနန္တရေ နဝ၊ သမနန္တရေ နဝ၊ သဟဇာတေ ဧကာဒသ၊ အညမညေ သတ္တ၊ နိဿယေ တေရသ၊ ဥပနိဿယေ နဝ။ပေ။ အဝိဂတေ တေရသ (သံခိတ္တံ).

နဟေတုယာ ပန္နရသ၊ နအာရမ္မဏေ ပန္နရသ (သံခိတ္တံ).

အာရမ္မဏပစ္စယာ နဟေတုယာ သတ္တ (သံခိတ္တံ).

နဟေတုပစ္စယာ အာရမ္မဏေ သတ္တ (သံခိတ္တံ).

(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)