൫. ചീവരഅച്ഛിന്ദനസിക്ഖാപദം

൬൩൧. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ആയസ്മാ ഉപനന്ദോ സക്യപുത്തോ ഭാതുനോ സദ്ധിവിഹാരികം ഭിക്ഖും ഏതദവോച – ‘‘ഏഹാവുസോ, ജനപദചാരികം പക്കമിസ്സാമാ’’തി. ‘‘നാഹം, ഭന്തേ, ഗമിസ്സാമി; ദുബ്ബലചീവരോമ്ഹീ’’തി. ‘‘ഏഹാവുസോ, അഹം തേ ചീവരം ദസ്സാമീ’’തി തസ്സ ചീവരം അദാസി. അസ്സോസി ഖോ സോ ഭിക്ഖു – ‘‘ഭഗവാ കിര ജനപദചാരികം പക്കമിസ്സതീ’’തി. അഥ ഖോ തസ്സ ഭിക്ഖുനോ ഏതദഹോസി – ‘‘ന ദാനാഹം ആയസ്മതാ ഉപനന്ദേന സക്യപുത്തേന സദ്ധിം ജനപദചാരികം പക്കമിസ്സാമി, ഭഗവതാ സദ്ധിം ജനപദചാരികം പക്കമിസ്സാമീ’’തി. അഥ ഖോ ആയസ്മാ ഉപനന്ദോ സക്യപുത്തോ തം ഭിക്ഖും ഏതദവോച – ‘‘ഏഹി ദാനി, ആവുസോ, ജനപദചാരികം പക്കമിസ്സാമാ’’തി. ‘‘നാഹം, ഭന്തേ, തയാ സദ്ധിം ജനപദചാരികം പക്കമിസ്സാമി, ഭഗവതാ സദ്ധിം ജനപദചാരികം പക്കമിസ്സാമീ’’തി. ‘‘യമ്പി ത്യാഹം, ആവുസോ, ചീവരം അദാസിം, മയാ സദ്ധിം ജനപദചാരികം പക്കമിസ്സതീ’’തി, കുപിതോ അനത്തമനോ അച്ഛിന്ദി.

അഥ ഖോ സോ ഭിക്ഖു ഭിക്ഖൂനം ഏതമത്ഥം ആരോചേസി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ആയസ്മാ ഉപനന്ദോ സക്യപുത്തോ ഭിക്ഖുസ്സ സാമം ചീവരം ദത്വാ കുപിതോ അനത്തമനോ അച്ഛിന്ദിസ്സതീ’’തി! അഥ ഖോ തേ ഭിക്ഖൂ ആയസ്മന്തം ഉപനന്ദം സക്യപുത്തം അനേകപരിയായേന വിഗരഹിത്വാ ഭഗവതോ ഏതമത്ഥം ആരോചേസും…പേ… ‘‘സച്ചം കിര ത്വം, ഉപനന്ദ, ഭിക്ഖുസ്സ സാമം ചീവരം ദത്വാ കുപിതോ അനത്തമനോ അച്ഛിന്ദീ’’തി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ ത്വം, മോഘപുരിസ, ഭിക്ഖുസ്സ സാമം ചീവരം ദത്വാ കുപിതോ അനത്തമനോ അച്ഛിന്ദിസ്സസി! നേതം, മോഘപുരിസ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൬൩൨. ‘‘യോ പന ഭിക്ഖു ഭിക്ഖുസ്സ സാമം ചീവരം ദത്വാ കുപിതോ അനത്തമനോ അച്ഛിന്ദേയ്യ വാ അച്ഛിന്ദാപേയ്യ വാ, നിസ്സഗ്ഗിയം പാചിത്തിയ’’ന്തി.

൬൩൩. യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.

ഭിക്ഖുസ്സാതി അഞ്ഞസ്സ ഭിക്ഖുസ്സ.

സാമന്തി സയം ദത്വാ.

ചീവരം നാമ ഛന്നം ചീവരാനം അഞ്ഞതരം ചീവരം, വികപ്പനുപഗം പച്ഛിമം.

കുപിതോ അനത്തമനോതി അനഭിരദ്ധോ ആഹതചിത്തോ ഖിലജാതോ.

അച്ഛിന്ദേയ്യാതി സയം അച്ഛിന്ദതി, നിസ്സഗ്ഗിയം പാചിത്തിയം [നിസ്സഗ്ഗിയം ഹോതി (സ്യാ.)].

അച്ഛിന്ദാപേയ്യാതി അഞ്ഞം ആണാപേതി, ആപത്തി ദുക്കടസ്സ. സകിം ആണത്തോ ബഹുകമ്പി അച്ഛിന്ദതി, നിസ്സഗ്ഗിയം ഹോതി. നിസ്സജ്ജിതബ്ബം സങ്ഘസ്സ വാ ഗണസ്സ വാ പുഗ്ഗലസ്സ വാ. ഏവഞ്ച പന, ഭിക്ഖവേ, നിസ്സജ്ജിതബ്ബം…പേ… ഇദം മേ, ഭന്തേ, ചീവരം ഭിക്ഖുസ്സ സാമം ദത്വാ അച്ഛിന്നം നിസ്സഗ്ഗിയം ഇമാഹം സങ്ഘസ്സ നിസ്സജ്ജാമീതി…പേ… ദദേയ്യാതി …പേ… ദദേയ്യുന്തി…പേ… ആയസ്മതോ ദമ്മീതി.

൬൩൪. ഉപസമ്പന്നേ ഉപസമ്പന്നസഞ്ഞീ ചീവരം ദത്വാ കുപിതോ അനത്തമനോ അച്ഛിന്ദതി വാ അച്ഛിന്ദാപേതി വാ, നിസ്സഗ്ഗിയം പാചിത്തിയം. ഉപസമ്പന്നേ വേമതികോ ചീവരം ദത്വാ കുപിതോ അനത്തമനോ അച്ഛിന്ദതി വാ അച്ഛിന്ദാപേതി വാ, നിസ്സഗ്ഗിയം പാചിത്തിയം. ഉപസമ്പന്നേ അനുപസമ്പന്നസഞ്ഞീ ചീവരം ദത്വാ കുപിതോ അനത്തമനോ അച്ഛിന്ദതി വാ അച്ഛിന്ദാപേതി വാ, നിസ്സഗ്ഗിയം പാചിത്തിയം.

അഞ്ഞം പരിക്ഖാരം ദത്വാ കുപിതോ അനത്തമനോ അച്ഛിന്ദതി വാ അച്ഛിന്ദാപേതി വാ, ആപത്തി ദുക്കടസ്സ. അനുപസമ്പന്നസ്സ ചീവരം വാ അഞ്ഞം വാ പരിക്ഖാരം ദത്വാ കുപിതോ അനത്തമനോ അച്ഛിന്ദതി വാ അച്ഛിന്ദാപേതി വാ, ആപത്തി ദുക്കടസ്സ. അനുപസമ്പന്നേ ഉപസമ്പന്നസഞ്ഞീ, ആപത്തി ദുക്കടസ്സ. അനുപസമ്പന്നേ വേമതികോ, ആപത്തി ദുക്കടസ്സ. അനുപസമ്പന്നേ അനുപസമ്പന്നസഞ്ഞീ, ആപത്തി ദുക്കടസ്സ.

൬൩൫. അനാപത്തി – സോ വാ ദേതി, തസ്സ വാ വിസ്സസന്തോ ഗണ്ഹാതി, ഉമ്മത്തകസ്സ ആദികമ്മികസ്സാതി.

ചീവരഅച്ഛിന്ദനസിക്ഖാപദം നിട്ഠിതം പഞ്ചമം.