൭. ഏളകലോമധോവാപനസിക്ഖാപദം

൫൭൬. തേന സമയേന ബുദ്ധോ ഭഗവാ സക്കേസു വിഹരതി കപിലവത്ഥുസ്മിം നിഗ്രോധാരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഭിക്ഖുനീഹി ഏളകലോമാനി ധോവാപേന്തിപി രജാപേന്തിപി വിജടാപേന്തിപി. ഭിക്ഖുനിയോ ഏളകലോമാനി ധോവന്തിയോ രജന്തിയോ വിജടേന്തിയോ രിഞ്ചന്തി ഉദ്ദേസം പരിപുച്ഛം അധിസീലം അധിചിത്തം അധിപഞ്ഞം. അഥ ഖോ മഹാപജാപതി ഗോതമീ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം അട്ഠാസി. ഏകമന്തം ഠിതം ഖോ മഹാപജാപതിം ഗോതമിം ഭഗവാ ഏതദവോച – ‘‘കച്ചി, ഗോതമി, ഭിക്ഖുനിയോ അപ്പമത്താ ആതാപിനിയോ പഹിതത്താ വിഹരന്തീ’’തി? ‘‘കുതോ, ഭന്തേ, ഭിക്ഖുനീനം അപ്പമാദോ! അയ്യാ ഛബ്ബഗ്ഗിയാ ഭിക്ഖുനീഹി ഏളകലോമാനി ധോവാപേന്തിപി രജാപേന്തിപി വിജടാപേന്തിപി. ഭിക്ഖുനിയോ ഏളകലോമാനി ധോവന്തിയോ രജന്തിയോ വിജടേന്തിയോ രിഞ്ചന്തി ഉദ്ദേസം പരിപുച്ഛം അധിസീലം അധിചിത്തം അധിപഞ്ഞ’’ന്തി.

അഥ ഖോ ഭഗവാ മഹാപജാപതിം ഗോതമിം ധമ്മിയാ കഥായ സന്ദസ്സേസി സമാദപേസി സമുത്തേജേസി സമ്പഹംസേസി. അഥ ഖോ മഹാപജാപതി ഗോതമീ ഭഗവതാ ധമ്മിയാ കഥായ സന്ദസ്സിതാ സമാദപിതാ സമുത്തേജിതാ സമ്പഹംസിതാ ഭഗവന്തം അഭിവാദേത്വാ പദക്ഖിണം കത്വാ പക്കാമി. അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ഭിക്ഖുസങ്ഘം സന്നിപാതാപേത്വാ ഛബ്ബഗ്ഗിയേ ഭിക്ഖൂ പടിപുച്ഛി – ‘‘സച്ചം കിര തുമ്ഹേ, ഭിക്ഖവേ, ഭിക്ഖുനീഹി ഏളകലോമാനി ധോവാപേഥപി രജാപേഥപി വിജടാപേഥപീ’’തി? ‘‘സച്ചം, ഭഗവാ’’തി. ‘‘ഞാതികായോ തുമ്ഹാകം, ഭിക്ഖവേ, അഞ്ഞാതികായോ’’തി? ‘‘അഞ്ഞാതികായോ, ഭഗവാ’’തി. ‘‘അഞ്ഞാതകാ, മോഘപുരിസാ, അഞ്ഞാതികാനം ന ജാനന്തി പതിരൂപം വാ അപ്പതിരൂപം വാ പാസാദികം വാ അപാസാദികം. തത്ഥ നാമ തുമ്ഹേ, മോഘപുരിസാ, അഞ്ഞാതികാഹി ഭിക്ഖുനീഹി ഏളകലോമാനി ധോവാപേസ്സഥപി രജാപേസ്സഥപി വിജടാപേസ്സഥപി! നേതം, മോഘപുരിസാ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൫൭൭. ‘‘യോ പന ഭിക്ഖു അഞ്ഞാതികായ ഭിക്ഖുനിയാ ഏളകലോമാനി ധോവാപേയ്യ വാ രജാപേയ്യ വാ വിജടാപേയ്യ വാ, നിസ്സഗ്ഗിയം പാചിത്തിയ’’ന്തി.

൫൭൮. യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.

അഞ്ഞാതികാ നാമ മാതിതോ വാ പിതിതോ വാ യാവ സത്തമാ പിതാമഹയുഗാ അസമ്ബദ്ധാ.

ഭിക്ഖുനീ നാമ ഉഭതോസങ്ഘേ ഉപസമ്പന്നാ.

ധോവാതി ആണാപേതി, ആപത്തി ദുക്കടസ്സ. ധോതാനി നിസ്സഗ്ഗിയാനി ഹോന്തി. രജാതി ആണാപേതി, ആപത്തി ദുക്കടസ്സ. രത്താനി നിസ്സഗ്ഗിയാനി ഹോന്തി. വിജടേഹീതി ആണാപേതി, ആപത്തി ദുക്കടസ്സ. വിജടിതാനി നിസ്സഗ്ഗിയാനി ഹോന്തി. നിസ്സജ്ജിതബ്ബാനി സങ്ഘസ്സ വാ ഗണസ്സ വാ പുഗ്ഗലസ്സ വാ. ഏവഞ്ച പന, ഭിക്ഖവേ, നിസ്സജ്ജിതബ്ബാനി…പേ… ഇമാനി മേ, ഭന്തേ, ഏളകലോമാനി അഞ്ഞാതികായ ഭിക്ഖുനിയാ ധോവാപിതാനി നിസ്സഗ്ഗിയാനി. ഇമാനാഹം സങ്ഘസ്സ നിസ്സജ്ജാമീതി…പേ… ദദേയ്യാതി…പേ… ദദേയ്യുന്തി…പേ… ആയസ്മതോ ദമ്മീതി.

൫൭൯. അഞ്ഞാതികായ അഞ്ഞാതികസഞ്ഞീ ഏളകലോമാനി ധോവാപേതി, നിസ്സഗ്ഗിയം പാചിത്തിയം. അഞ്ഞാതികായ അഞ്ഞാതികസഞ്ഞീ ഏളകലോമാനി ധോവാപേതി രജാപേതി, നിസ്സഗ്ഗിയേന ആപത്തി ദുക്കടസ്സ. അഞ്ഞാതികായ അഞ്ഞാതികസഞ്ഞീ ഏളകലോമാനി ധോവാപേതി വിജടാപേതി, നിസ്സഗ്ഗിയേന ആപത്തി ദുക്കടസ്സ. അഞ്ഞാതികായ അഞ്ഞാതികസഞ്ഞീ ഏളകലോമാനി ധോവാപേതി രജാപേതി വിജടാപേതി, നിസ്സഗ്ഗിയേന ആപത്തി ദ്വിന്നം ദുക്കടാനം.

അഞ്ഞാതികായ അഞ്ഞാതികസഞ്ഞീ ഏളകലോമാനി രജാപേതി, നിസ്സഗ്ഗിയം പാചിത്തിയം. അഞ്ഞാതികായ അഞ്ഞാതികസഞ്ഞീ ഏളകലോമാനി രജാപേതി വിജടാപേതി, നിസ്സഗ്ഗിയേന ആപത്തി ദുക്കടസ്സ. അഞ്ഞാതികായ അഞ്ഞാതികസഞ്ഞീ ഏളകലോമാനി രജാപേതി ധോവാപേതി, നിസ്സഗ്ഗിയേന ആപത്തി ദുക്കടസ്സ. അഞ്ഞാതികായ അഞ്ഞാതികസഞ്ഞീ ഏളകലോമാനി രജാപേതി വിജടാപേതി ധോവാപേതി, നിസ്സഗ്ഗിയേന ആപത്തി ദ്വിന്നം ദുക്കടാനം.

അഞ്ഞാതികായ അഞ്ഞാതികസഞ്ഞീ ഏളകലോമാനി വിജടാപേതി, നിസ്സഗ്ഗിയം പാചിത്തിയം. അഞ്ഞാതികായ അഞ്ഞാതികസഞ്ഞീ ഏളകലോമാനി വിജടാപേതി ധോവാപേതി, നിസ്സഗ്ഗിയേന ആപത്തി ദുക്കടസ്സ. അഞ്ഞാതികായ അഞ്ഞാതികസഞ്ഞീ ഏളകലോമാനി വിജടാപേതി രജാപേതി, നിസ്സഗ്ഗിയേന ആപത്തി ദുക്കടസ്സ. അഞ്ഞാതികായ അഞ്ഞാതികസഞ്ഞീ ഏളകലോമാനി വിജടാപേതി ധോവാപേതി രജാപേതി, നിസ്സഗ്ഗിയേന ആപത്തി ദ്വിന്നം ദുക്കടാനം.

൫൮൦. അഞ്ഞാതികായ വേമതികോ…പേ… അഞ്ഞാതികായ ഞാതികസഞ്ഞീ…പേ… അഞ്ഞസ്സ ഏളകലോമാനി ധോവാപേതി, ആപത്തി ദുക്കടസ്സ. ഏകതോ ഉപസമ്പന്നായ ധോവാപേതി, ആപത്തി ദുക്കടസ്സ. ഞാതികായ അഞ്ഞാതികസഞ്ഞീ, ആപത്തി ദുക്കടസ്സ. ഞാതികായ വേമതികോ, ആപത്തി ദുക്കടസ്സ. ഞാതികായ ഞാതികസഞ്ഞീ, അനാപത്തി.

൫൮൧. അനാപത്തി ഞാതികായ ധാവന്തിയാ അഞ്ഞാതികാ ദുതിയാ ഹോതി, അവുത്താ ധോവതി, അപരിഭുത്തം കതഭണ്ഡം ധോവാപേതി, സിക്ഖമാനായ സാമണേരിയാ ഉമ്മത്തകസ്സ ആദികമ്മികസ്സാതി.

ഏളകലോമധോവാപനസിക്ഖാപദം നിട്ഠിതം സത്തമം.