൬. ഏളകലോമസിക്ഖാപദം

൫൭൧. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന അഞ്ഞതരസ്സ ഭിക്ഖുനോ കോസലേസു ജനപദേ സാവത്ഥിം ഗച്ഛന്തസ്സ അന്തരാമഗ്ഗേ ഏളകലോമാനി ഉപ്പജ്ജിംസു. അഥ ഖോ സോ ഭിക്ഖു താനി ഏളകലോമാനി ഉത്തരാസങ്ഗേന ഭണ്ഡികം ബന്ധിത്വാ അഗമാസി. മനുസ്സാ തം ഭിക്ഖും പസ്സിത്വാ ഉപ്പണ്ഡേസും – ‘‘കിത്തകേന തേ, ഭന്തേ, കീതാനി? കിത്തകോ ഉദയോ ഭവിസ്സതീ’’തി? സോ ഭിക്ഖു തേഹി മനുസ്സേഹി ഉപ്പണ്ഡിയമാനോ മങ്കു അഹോസി. അഥ ഖോ സോ ഭിക്ഖു സാവത്ഥിം ഗന്ത്വാ താനി ഏളകലോമാനി ഠിതകോവ ആസുമ്ഭി. ഭിക്ഖൂ തം ഭിക്ഖും ഏതദവോചും – ‘‘കിസ്സ ത്വം, ആവുസോ, ഇമാനി ഏളകലോമാനി ഠിതകോവ ആസുമ്ഭസീ’’തി? ‘‘തഥാ ഹി പനാഹം, ആവുസോ, ഇമേസം ഏളകലോമാനം കാരണാ മനുസ്സേഹി ഉപ്പണ്ഡിതോ’’തി. ‘‘കീവ ദൂരതോ പന ത്വം, ആവുസോ, ഇമാനി ഏളകലോമാനി ആഹരീ’’തി? ‘‘അതിരേകതിയോജനം, ആവുസോ’’തി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖു അതിരേകതിയോജനം ഏളകലോമാനി ആഹരിസ്സതീ’’തി! അഥ ഖോ തേ ഭിക്ഖൂ തം ഭിക്ഖും അനേകപരിയായേന വിഗരഹിത്വാ ഭഗവതോ ഏതമത്ഥം ആരോചേസും…പേ… സച്ചം കിര ത്വം, ഭിക്ഖു, അതിരേകതിയോജനം ഏളകലോമാനി ആഹരീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ ത്വം, മോഘപുരിസ, അതിരേകതിയോജനം ഏളകലോമാനി ആഹരിസ്സസി! നേതം മോഘപുരിസ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൫൭൨. ‘‘ഭിക്ഖുനോ പനേവ അദ്ധാനമഗ്ഗപ്പടിപന്നസ്സ ഏളകലോമാനി ഉപ്പജ്ജയ്യും. ആകങ്ഖമാനേന ഭിക്ഖുനാ പടിഗ്ഗഹേതബ്ബാനി. പടിഗ്ഗഹേത്വാ തിയോജനപരമം സഹത്ഥാ ഹരിതബ്ബാനി [ഹാരേതബ്ബാനി (സീ. സ്യാ. ക.)], അസന്തേ ഹാരകേ. തതോ ചേ ഉത്തരി ഹരേയ്യ, അസന്തേപി ഹാരകേ, നിസ്സഗ്ഗിയം പാചിത്തിയ’’ന്തി.

൫൭൩. ഭിക്ഖുനോ പനേവ അദ്ധാനമഗ്ഗപ്പടിപന്നസ്സാതി പന്ഥം ഗച്ഛന്തസ്സ.

ഏളകലോമാനി ഉപ്പജ്ജേയ്യുന്തി ഉപ്പജ്ജേയ്യും സങ്ഘതോ വാ ഗണതോ വാ ഞാതിതോ വാ മിത്തതോ വാ പംസുകൂലം വാ അത്തനോ വാ ധനേന.

ആകങ്ഖമാനേനാതി ഇച്ഛമാനേന പടിഗ്ഗഹേതബ്ബാനി.

പടിഗ്ഗഹേത്വാ തിയോജനപരമം സഹത്ഥാ ഹരിതബ്ബാനീതി തിയോജനപരമതാ സഹത്ഥാ ഹരിതബ്ബാനി.

അസന്തേ ഹാരകേതി നാഞ്ഞോ കോചി ഹാരകോ ഹോതി ഇത്ഥീ വാ പുരിസോ വാ ഗഹട്ഠോ വാ പബ്ബജിതോ വാ.

തതോ ചേ ഉത്തരി ഹരേയ്യ, അസന്തേപി ഹാരകേതി പഠമം പാദം തിയോജനം അതിക്കാമേതി, ആപത്തി ദുക്കടസ്സ. ദുതിയം പാദം അതിക്കാമേതി, നിസ്സഗ്ഗിയം പാചിത്തിയം [നിസ്സഗ്ഗിയാനി ഹോന്തി (സ്യാ.)]. അന്തോതിയോജനേ ഠിതോ ബഹിതിയോജനം പാതേതി, നിസ്സഗ്ഗിയം പാചിത്തിയം [നിസ്സഗ്ഗിയാനി ഹോന്തി (സ്യാ.)]. അഞ്ഞസ്സ യാനേ വാ ഭണ്ഡേ വാ അജാനന്തസ്സ പക്ഖിപിത്വാ തിയോജനം അതിക്കാമേതി, നിസ്സഗ്ഗിയാനി ഹോന്തി. നിസ്സജ്ജിതബ്ബാനി സങ്ഘസ്സ വാ ഗണസ്സ വാ പുഗ്ഗലസ്സ വാ. ഏവഞ്ച പന, ഭിക്ഖവേ, നിസ്സജ്ജിതബ്ബാനി…പേ… ഇമാനി മേ, ഭന്തേ, ഏളകലോമാനി തിയോജനം അതിക്കാമിതാനി നിസ്സഗ്ഗിയാനി. ഇമാനാഹം സങ്ഘസ്സ നിസ്സജ്ജാമീതി…പേ… ദദേയ്യാതി…പേ… ദദേയ്യുന്തി…പേ… ആയസ്മതോ ദമ്മീതി.

൫൭൪. അതിരേകതിയോജനേ അതിരേകസഞ്ഞീ അതിക്കാമേതി [തിയോജനം അതിക്കാമേതി (സ്യാ.)], നിസ്സഗ്ഗിയം പാചിത്തിയം. അതിരേകതിയോജനേ വേമതികോ അതിക്കാമേതി [തിയോജനം അതിക്കാമേതി (സ്യാ.)], നിസ്സഗ്ഗിയം പാചിത്തിയം. അതിരേകതിയോജനേ ഊനകസഞ്ഞീ അതിക്കാമേതി [തിയോജനം അതിക്കാമേതി (സ്യാ.)], നിസ്സഗ്ഗിയം പാചിത്തിയം.

ഊനകതിയോജനേ അതിരേകസഞ്ഞീ, ആപത്തി ദുക്കടസ്സ. ഊനകതിയോജനേ വേമതികോ, ആപത്തി ദുക്കടസ്സ. ഊനകതിയോജനേ ഊനകസഞ്ഞീ, അനാപത്തി.

൫൭൫. അനാപത്തി തിയോജനം ഹരതി, ഊനകതിയോജനം ഹരതി, തിയോജനം ഹരതിപി, പച്ചാഹരതിപി, തിയോജനം വാസാധിപ്പായോ ഗന്ത്വാ തതോ പരം ഹരതി, അച്ഛിന്നം പടിലഭിത്വാ ഹരതി, നിസ്സട്ഠം പടിലഭിത്വാ ഹരതി, അഞ്ഞം ഹരാപേതി കതഭണ്ഡം, ഉമ്മത്തകസ്സ, ആദികമ്മികസ്സാതി.

ഏളകലോമസിക്ഖാപദം നിട്ഠിതം ഛട്ഠം.